مەملەكەت ءتوراعاسى شي جينپيڭ مەن حانىمى پىڭ لييۋان 2 - ايدىڭ 5 - كۇنى تۇستە بەيجيڭ حالىق سارايىنىڭ جينسى زالىندا قوناعاسى وتكىزىپ، بەيجيڭ 2022 - جىلعى قىسقى وليمپيادا سپورت جارىسىنىڭ باستالۋ سالتىنا قاتىناسقان حالىقارالىق سيلى قوناقتاردى قارسى الدى. سۋرەتتە: شي جينپيڭ قوناعاسىدا ارناۋ ءسوز سويلەۋدە.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
مەملەكەت ءتوراعاسى شي جينپيڭ مەن حانىمى پىڭ لييۋان 2 - ايدىڭ 5 - كۇنى تۇستە بەيجيڭ حالىق سارايىنىڭ جينسى زالىندا قوناعاسى وتكىزىپ، بەيجيڭ 2022 - جىلعى قىسقى وليمپيادا سپورت جارىسىنىڭ باستالۋ سالتىنا قاتىناسقان حالىقارالىق سيلى قوناقتاردى قارسى الدى. سۋرەتتە: شي جينپيڭ مەن پىڭ لييۋان حالىقارالىق سيلى قوناقتارمەن بىرگە ەستەلىك سۋرەتكە تۇسۋدە.
□ سۋرەتتى شينحۋا اگەنتتىگىنىڭ ءتىلشىسى شيە حۋانچى تۇسىرگەن
شينحۋا اگەنتتىگىنىڭ 2 - ايدىڭ 5 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ مەن حانىمى پىڭ لييۋان 2 - ايدىڭ 5 - كۇنى تۇستە بەيجيڭ حالىق سارايىنىڭ جينسى زالىندا قوناعاسى وتكىزىپ، بەيجيڭ 2022 - جىلعى قىسقى وليمپيادا سپورت جارىسىنىڭ باستالۋ سالتىنا قاتىناسقان حالىقارالىق سيلى قوناقتاردى قارسى الدى.
جۇڭگونىڭ ەگىنشىلىك كالەندارى بويىنشا 1 - ايدىڭ 5 - كۇنى، حالىق سارايىندا شامدار ءىلىنىپ، ءتۇستى تورعىندار بايلاندى، ”بيڭدۇندۇن“ مەن ”شۋەرۇڭرۇڭنىڭ“ جۇزىندە سۇيكىمدى كۇلكى ويناپ، كوكتەم بوساعالىعى ”福“ ءارىبى، قاعازدان قيىلعان مەرەكەلىك سۋرەت، جۇڭگو تۇيىنشەگى كوكتەم مەرەكەسىنىڭ مەرەيىن اسىرا ءتۇستى.
ساعات 11دەن 30 مينۋت وتكەندە، حالىقارالىق سيلى قوناقتار حالىق سارايىنىڭ شىعىس قاقپاسىنىڭ سىرتىنداعى الاڭعا ىركەس - تىركەس كەلىپ جەتىپ، باسپالداقپەن جوعارى كوتەرىلدى. قۇرمەت قاراۋىلدارى قاتار تۇزەپ قارسى الىپ، قۇرمەت ءبىلدىردى.
حالىقارالىق سيلى قوناقتار بەيزاتتىق مادەنيەت مۇرالارى دالىزىنەن ءجۇرىپ ءوتىپ، ءالسىن - ءالى ايالداپ تاماشالادى. ءبىر بولىك سارالانعان ۇلگىدەگى جۇڭگونىڭ ”بۇتحانا جارمەڭكەسى“ جۇڭگو حالقىنىڭ شار تاراپتان كەلگەن قوناقتاردى قىزۋ قارسى الاتىندىعىن جانە ولارعا دەگەن تەرەڭ سۇيىسپەنشىلىگىن بەينەلەدى.
شي جينپيڭ مەن پىڭ لييۋان حالىقارالىق سيلى قوناقتارعا ىستىق ىقىلاسپەن قول بۇلعاپ قۇرمەت ءبىلدىردى، سونداي - اق بىرگە ەستەلىك سۋرەتكە ءتۇستى.
«بەيبىتشىلىك − تاعدىرلاس ورتاق تۇلعا» اتتى قوناق قارسى الۋ مۋزيكاسى ىشىندە شي جينپيڭ مەن پىڭ لييۋان سيلى قوناقتارمەن بىرگە جينسى زالىنا كىردى.
ءار ەلدىڭ مەملەكەت تۋلارى قىزىل كىلەمنىڭ ەكى جاعىنا قاتارلاستىرا قويىلدى. جينسى زالى گۇل - بايشەشەككە ورانىپ، الۋان نۇرعا مالىنىپ تۇردى. بەيجيڭ قىسقى وليمپيادا سپورت جارىسىنىڭ تاقىرىپتىق گۇلدىگى تارتىمدى كوركەمدىگىمەن كوز تارتتى، ”قاردا سامعاۋ“، ”قار ايداعار“، ”قار قۇتى“ اق كورپەگە ورانىپ ۇزىننان - ۇزاققا كوسىلىپ جاتقان ورمان مەن جاپ - جاسىل جەلەك جامىلعان كەڭ دالادا قاداۋ - قاداۋ كەستەلەنىپ، كوز سۇرىندىرەر جۇڭگونىڭ كوركەم سۋرەتىن كورسەتتى. گۇلدىكتىڭ ورتاسىنداعى بەيجيڭ قىسقى وليمپيادا سپورت جارىسىنىڭ بەلگىسى ءار ەلمەن بىرگە بولاشاققا اتتانۋدى مەڭزەپ تۇر.
قوناعاسى باستالدى. شي جينپيڭ ارناۋ ءسوز سويلەدى.
شي جينپيڭ، اۋەلى، جۇڭگو ۇكىمەتى مەن حالقى اتىنان، بەيجيڭ قىسقى وليمپيادا سپورت جارىسىنا قاتىناسۋ ءۇشىن جۇڭگوعا كەلگەن سيلى قوناقتاردى قىزۋ قارسى الاتىندىعىن ءبىلدىرىپ، بەيجيڭ قىسقى وليمپيادا سپورت جارىسىنا كوڭىل بولگەن جانە قولداۋ كورسەتكەن ءار ەل ۇكىمەتىنە، ءار ەل حالقىنا جانە حالىقارالىق ۇيىمدارعا شىن جۇرەكتەن العىس ايتتى.
شي جينپيڭ بىلاي دەپ اتاپ كورسەتتى: كەشە كەشتە بەيجيڭ قىسقى وليمپيادا سپورت جارىسى مەملەكەتتىك دەنە تاربيە الاڭىندا رەسمي باستالدى. اراعا 14 جىل سالىپ، وليمپيادانىڭ قاسيەتتى الاۋى بەيجيڭدە تاعى ءبىر مارتە تۇتانىپ، بەيجيڭ دۇنيە ءجۇزى بويىنشا تۇڭعىش ”قوس وليمپيادا قالاسى“ بولدى. جۇڭگو جاسىل، بىرگە يگىلىكتەنۋ، اشىق، پاك بولۋ سىندى وليمپيادا سپورت جارىسىن وتكىزۋ ۇستانىمىن ۇستانىپ، جاڭا تيپتى ايدارشا ۆيرۋس وكپە قابىنۋ ىندەتىنىڭ ىقپالىن بار كۇشپەن ەڭسەرىپ، حالىقارالىق قوعامعا بەرگەن ايبىندى ۋادەسىن مۇقيات ورىنداپ، بەيجيڭ قىسقى وليمپيادا سپورت جارىسىنىڭ ۋاعىندا، ءساتتى وتكىزىلۋىنە شىنايى كەپىلدىك ەتتى. جۇڭگو قىسقى وليمپيادا سپورت جارىسىن وتكىزۋگە دايىندالۋ جانە قىسقى وليمپيادا سپورتىن جالپىلاستىرۋ ارقىلى قار - مۇز سپورتىنىڭ جاي بۇقارا وتباسىلارىنا دەيىن جەتۋىنە مۇمكىندىك جاساپ، 300 ميلليون ادامدى قار - مۇز سپورتىنا قاتىناسۋعا باستاۋ نىساناسىن جۇزەگە اسىرىپ، الەمدىك وليمپيادا ىستەرى ءۇشىن تىڭ ۇلەس قوستى.
شي جينپيڭ بىلاي دەپ باسا دارىپتەدى: وليمپيادا سپورتى ادامزاتتىڭ بەيبىتشىلىككە، ىنتىماققا، العا باسۋعا دەگەن تاماشا تالپىنىسىن ارقالاعان. ءبىز وليمپيادا سپورتىنىڭ اۋەلگى ماقساتىن ەسىمىزدە بەرىك ساقتاپ، دۇنيە ءجۇزىنىڭ بەيبىتشىلىگىن بىرگە قورعاپ، ءوزارا قۇرمەت ەتۋگە، تەڭ تۇرعىدا سيلاسۋعا تاباندى بولىپ، باياندى بەيبىت دۇنيە ءجۇزىن بىرگە قۇرۋعا ءتيىسپىز. ءبىز وليمپيادا سپورتى رۋحىن اسقاقتاتىپ، حالىقارالىق قوعامعا ورتاق سىن - سايىستارعا ىنتىماقتاسا توتەپ بەرىپ، ناعىز كوپ جاقتىلىقتى امالياتتا ايگىلەپ، جاراسىمدى، سەلبەسەتىن حالىقارالىق ۇلكەن شاڭىراقتى بىرگە قۇرۋعا ءتيىسپىز. ءبىز وليمپيادا سپورتىنىڭ باس ماقساتىن امالياتتا ايگىلەپ، ادامزاتتىڭ العا باسۋ ىستەرىن ۇزدىكسىز ىلگەرىلەتىپ، بەيبىتشىلىك، دامۋ، ادىلدىك، تۋراشىلدىق، دەموكراتيا، ەركىندىك سىندى بۇكىل ادامزاتقا ورتاق قۇندىلىقتاردان جازباي، تۇرلىشە وركەنيەتتەردىڭ ارالاسۋىن، ءوزارا ۇلگى الۋىن جەبەپ، ادامزاتتىڭ تاعدىرلاس ورتاق تۇلعاسىن بىرگە قۇرۋىمىز كەرەك.
شي جينپيڭ بىلاي دەپ اتاپ كورسەتتى: جۇڭگو جاڭا عانا ەگىنشىلىك كالەندارى بويىنشا بارىس جىلىن قارسى الدى. بارىس − كۇش - قايراتتىڭ، جۇرەكتىلىكتىڭ، جان قيارلىقتىڭ سيمۆولى، وليمپيادا ساڭلاقتارىنىڭ بارىستاي قايراتتى بولىپ، تاماشا ناتيجەگە جەتۋلەرىن تىلەيمىن. مەن كوپشىلىكتىڭ بىرگە قۇلشىنۋىندا بەيجيڭ قىسقى وليمپيادا سپورت جارىسىنىڭ، ءسوز جوق، تاريح بەتىنەن وشپەس ورىن الاتىندىعىنا سەنەمىن.
حالىقارالىق وليمپيادا كوميتەتىنىڭ ءتوراعاسى باح، بىرلەسكەن مەملەكەتتەر ۇيىمىنىڭ باس حاتشىسى گۋتەرەس جەكە - جەكە ءسوز سويلەدى. ولار حالىقارالىق سيلى قوناقتار اتىنان ءتوراعا شي جينپيڭنىڭ شىن ىقىلاستى سي - قۇرمەتىنە شىن جۇرەكتەن العىس ايتىپ، بەيجيڭ قىسقى وليمپيادا سپورت جارىسىنىڭ باستالۋ سالتىنىڭ تولىق تابىستى بولعاندىعىن قۇتتىقتادى. ولار مىنالاردى ءبىلدىردى: ءبىز كەشە كەشتەگى ەرەن دە تاڭعاجايىپ، تارتىمدى دا كەرەمەت بەيجيڭ قىسقى وليمپيادا سپورت جارىسىنىڭ باستالۋ سالتىن ماڭگى ۇمىتپايمىز. جۇڭگو حالقى ونىمدىلىگىمەن، بەرىك بەكىمىمەن جانە جالىندى ومىرشەڭدىگىمەن تانىمال، جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ بولسىن، الدە بەيجيڭ قىسقى وليمپيادا سپورت جارىسىن وتكىزۋ بولسىن، قاي - قايسىسى دا وسى ءتۇيىندى دالەلدەپ وتىر. جۇڭگو 300 ميلليون ادامنىڭ قار - مۇز سپورتىمەن اينالىسۋىنا مۇمكىندىك جاساۋ نىساناسىن كۇنى بۇرىن جۇزەگە اسىردى، بۇل الەمدىك قار - مۇز سپورتىنىڭ اۋقىمىن ماڭگى وزگەرتىپ، جۇڭگو مەن دۇنيە ءجۇزىنىڭ ونىڭ يگىلىگىن كورۋىنە مۇمكىندىك جاسايدى. ەرەجەگە قۇرمەت ەتۋ، ءوزارا قۇرمەت ەتۋ، بەيبىت، ءتيىمدى باسەكە ارقىلى دۇنيە ءجۇزىن ىنتىماقتاستىرۋ وليمپيادا سپورتىنىڭ بورىشى، بۇل دۇنيە ءجۇزى ەلدەرىنىڭ دە نىساناسى بولۋعا ءتيىس. قازىر دۇنيە ءجۇزى كوپتەگەن سىن - سايىستارعا ءدوپ كەلىپ وتىر، بۇل ىنتىماق پەن سەلبەستىكتى اناعۇرلىم قاجەت ەتەدى. حالىقارالىق قوعامنىڭ بەيجيڭ قىسقى وليمپيادا سپورت جارىسىن وراي ەتىپ، الاۋىزدىقتار شەڭبەرىنەن شىعىپ، بولاشاققا بىرگە اتتانىپ، اناعۇرلىم جارقىن بولاشاقتى بىرگە قۇرۋىن ءۇمىت ەتەمىز.
قوناعاسى مەرەيلى، شادىمان، بەرەكەلى رايدا ءوتتى. قوناعاسى اياقتاعاندا، شي جينپيڭ مەن پىڭ لييۋان حالىقارالىق سيلى قوناقتارعا «بولاشاققا بىرگە اتتانايىق» اتتى مۋزيكا ءۇنى ىشىندە قول بۇلعاپ قوش ايتىستى.
ۋاڭ حۋنيڭ، حان جىڭ، ديڭ شۋەشياڭ، سۇن چۇنلان، ياڭ جيەچى، ساي چي، ۋاڭ ي قاتارلىلار قيمىلعا قاتىناستى.
