شي جينپيڭ يتاليانىڭ زۇڭتۇڭى ماتتارەللامەن كەڭەس وتكىزدى

مەملەكەت ءتوراعاسى شي جينپيڭ 3 - ايدىڭ 22 - كۇنى ريمدە يتاليانىڭ زۇڭتۇڭى ماتتارەللامەن كەڭەس وتكىزدى. ەكى ەلدىڭ مەملەكەت باسشىلارى جۇڭگو - يتاليا قارىم - قاتىناسىن دامىتۋدىڭ ۇلكەن بەتالىسىن ستراتەگيالىق دەڭگەيدەن جانە ۇزاق بولاشاقتىق تۇرعىدان مىقتاپ يگەرىپ، جۇڭگو مەن يتاليانىڭ جالپى بەتتىك ستراتەگيالىق سەرىكتەستىك قارىم - قاتىناسىنىڭ جاڭا كەزەڭدە اناعۇرلىم زور دامۋعا قول جەتكىزۋىن تىزە قوسا ىلگەرىلەتۋگە ءبىر اۋىزدان قوسىلدى.
　　شي جينپيڭ بىلاي دەپ اتاپ كورسەتتى: جۇڭگو مەن يتاليا شۇعىلالى مادەنيەتى بار وركەنيەتتى بايىرعى ەلدەر. ەكى ەل قارىم - قاتىناسىنىڭ تەرەڭ تاريحي قاتپارى بار. بيىل جۇڭگو مەن يتاليانىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 15 جىلدىعى، كەلەر جىلى ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 50 جىلدىعى. جارتى عاسىرعا تاياۋ ۋاقىتتان بەرى، ەكى ەل ءوزارا قۇرمەت ەتىپ، ءوزارا سەنىم ارتىپ، ءوزارا كومەكتەسىپ، جوعارى جىكتەگىلەردىڭ قارىم - قاتىناسىن جيىلەتىپ جانە ستراتەگيالىق ءوزارا سەنىمىن ۇزدىكسىز نىعايتىپ، اۋىس - ءتۇيىس پەن سەلبەستىكتى جانە مۇددە توعىسۋىن كۇشەيتىپ، ءوزارا ءتۇسىنۋدى جانە ءداستۇرلى دوستىقتى تەرەڭدەتتى. قازىرگى تاڭداعى دۇنيە ءجۇزى 100 جىلدا بولماعان ۇلكەن وزگەرىسكە ءدوپ كەلۋدە. جۇڭگو جاق يتاليا جاقپەن سەلبەستىك رۋحىن جالعاستىرىپ جانە ساۋلەلەندىرىپ، ستراتەگيالىق بايلانىستى كۇشەيتىپ، حالىقارالىق قوعامنىڭ پارىقتاردى ساقتاپ، ورتاقتىققا ۇمتىلۋىن ىلگەرىلەتىپ، سەلبەستىك ارقىلى دامۋدى جەبەپ، اناعۇرلىم كوركەم دۇنيە ءجۇزىن قۇرۋ ءۇشىن جاڭا اقىل - پاراساتى مەن كۇش - قۋاتىن ارناۋدى قالايدى.
　　شي جينپيڭ بىلاي دەپ باسا دارىپتەدى: جۇڭگو جاق يتاليا جاقپەن تىزە قوسا قۇلشىنىپ، جاڭا داۋىردەگى جۇڭگو - يتاليا قارىم - قاتىناسىن دامىتۋدىڭ ۇلكەن بەتالىسىن مىقتاپ يگەرىپ، جوعارى جىكتەگىلەردىڭ بارىس - كەلىسىن جيىلەتىپ، ەكى جاقتى ناقتى ىستەر سەلبەستىگىنىڭ ساپاسىن كوتەرىپ، دارەجەسىن جوعارىلاتۋدى قالايدى. مەن زۇڭتۇڭ مىرزا العا قويعان ”يتاليا مەن جۇڭگو مۇددەدە كەڭ پەيىلدى، ورتاق داميتىن سەرىكتەستەردەن بولۋ كەرەك“ دەگەنىن قۇپتايمىن، جۇڭگو جاق يتاليا جاقپەن جالپى بەتتىك ستراتەگيالىق سەرىكتەستىك قاتىناستى كۇشەيتۋدى قالايدى. ەكى جاق ۇستانىمدىق بايلانىستى كۇشەيتىپ، ساياسي ءوزارا سەنىمدىلىكتى بەكەمدەپ، ءبىر - ءبىرىنىڭ وزەكتى مۇددەسىنە جانە ءجىتى قاداعالاپ وتىرعان كەلەلى ىستەرىنە ساياساتىن ماسەلەلەردە ۇزدىكسىز ءوزارا ءتۇسىنىپ جانە قولداپ، ۇكىمەتتەردىڭ، زاڭ شىعارۋ قۇرىلىمدارىنىڭ، ساياسي پارتيالاردىڭ اۋىس - ءتۇيىسىن، سەلبەستىگىن قويۋلاتۋ كەرەك. ەكى جاق سەلبەستىكتىڭ جارقىن تۇيىندەرىن جارىققا شىعارىپ، ”ءبىر بەلدەۋ، ءبىر جول“دى تىزە قوسا بىرگە قۇرىپ، دامۋ ستراتەگيالارىنىڭ ۇشتاسۋىن جانە ناقتى ىستەر سەلبەستىك جوباسىن كۇشەيتۋ كەرەك. جۇڭگو جاق يتاليانىڭ ءتىپتى دە كوپ ساپالى ونىمدەرىن يمپورت ەتۋدى قالايدى، ناقتى قۋاتى بار اناعۇرلىم كوپ جۇڭگو قارجىلاندىرعان كاسىپورىنداردى يتاليادا قارجى قوسىپ، شارۋاشىلىعىن شالقىتۋعا ىنتالاندىرادى. ەكى جاق گۋمانيتارلىق اۋىس - ءتۇيىستى جيىلەتىپ، مادەنيەت، وقۋ - اعارتۋ، كينو - تەلەۆيزيا، اقپارات قۇرالدارى سياقتى سالالاردا اۋىس - ءتۇيىستى، سەلبەستىكتى كۇشەيتىپ، حالىقتىڭ تىلەگىن جالعاۋ ينجەنەرياسىن بەكەمدەۋ كەرەك. 
　　شي جينپيڭ بىلاي دەپ اتاپ كورسەتتى: جۇڭگو ەۆروپانىڭ ءبىر تۇلعالانۋ اياق الىسىن دايەكتى قولداپ كەلەدى، ەۆروپا وداعىنىڭ ءوز ماسەلەسىن شەشۋ جولىندا جاساعان قۇلشىنىسىنا قۇرمەت ەتەدى. يتاليا جاقتىڭ بەلسەندى رولىن ۇزدىكسىز ساۋلەلەندىرىپ، ەۆروپا وداعىنىڭ جۇڭگو جاقپەن بىرگە بەيبىتشىلىك، ارتۋ، رەفورما، وركەنيەت سىندى 4 ۇلكەن سەرىكتەستىك قاتىناستى ىلگەرىلەتۋىن دەمەۋدى ءۇمىت ەتەدى. جۇڭگو جاق يتاليا جاقپەن بىرلەسكەن مەملەكەتتەر ۇيىمى ىستەرى، الەمدىك جونگە سالۋ، كليمات وزگەرىسى، 2030 - جىلعا دەيىنگى باياندى دامۋ كەڭەستىك ءتارتىبى سياقتى كەلەلى كەڭەستىك تاقىرىپتار جونىندە كەڭەسۋدى جانە سايكەسۋدى كۇشەيتىپ، ساۋدانىڭ جانە قارجى قوسۋدىڭ ەركىن، قولايلى بولۋىن بىرگە دارىپتەپ، ەكونوميكانىڭ جاھاندانۋىنىڭ اناعۇرلىم اشىق، سيىسىمدى، جالپىعا ءتيىمدى، تەڭ، بىرگە يگىلىككە كەنەلۋ بەتالىسىنا قاراي دامۋىنا جەتەكشىلىك ەتۋدى قالايدى.
　　ماتتارەللا مىنانى ءبىلدىردى: ءتوراعا شي جينپيڭدى قىزۋ قارسى الامىن. مەنىڭ الدىڭعى جىلى جۇڭگوعا جاساعان ساپارىم قازىرگە دەيىن كوكەيىمدە سايراپ تۇر. يتاليا مەن جۇڭگونىڭ جوعارى جىكتەگىلەردىڭ ءجيى بارىس - كەلىسىن ساقتاۋى، اسىرەسە، ءتوراعا شي جينپيڭنىڭ بۇل رەتكى ساپارى ەكى ەل قارىم - قاتىناسىنىڭ جوعارى دەڭگەيىن تولىق كورسەتتى. جۇڭگو يتاليانىڭ ەتەنە ءارى ماڭىزدى سەرىگى. يتاليا جاق جۇڭگونىڭ دامۋ جەتىستىگىنە سۇيىنەدى، جۇڭگو جاقتىڭ ەسىك اشۋ ستراتەگياسىن اتقارعاندىعىن القايدى، يتاليا - جۇڭگو سەلبەستىگىنىڭ بولاشاعى جاقسى دەپ قارايدى، يتاليا مەن جۇڭگونىڭ جالپى بەتتىك ستراتەگيالىق سەرىكتەستىك قارىم - قاتىناس ورناتقاندىعىنىڭ 15 جىلدىعىن جانە كەلەر جىلعى ديپلوماتيالىق قارىم - قاتىناس ورناتقاندىعىنىڭ 50 جىلدىعىن وراي ەتىپ، ەكى ەلدىڭ ەكونوميكا - ساۋدا، قارجى قوسۋ، عىلىم - تەحنيكا، جاڭالىق اشۋ سياقتى سالالارداعى ءوزارا پايدا جەتكىزۋ سەلبەستىگىن كەڭەيتۋدى قالايدى. يتاليا مەن جۇڭگو ىلگەرى بايىرعى جىبەك جولىنىڭ ەكى ۇشىندا بولعان، بۇل ءبىزدىڭ ەلدەرىمىزدىڭ بايلانىستى جيىلەتۋىنىڭ دانەكەرى. يتاليا ءتوراعا شي جينپيڭ دارىپتەگەن ”ءبىر بەلدەۋ، ءبىر جول“ باستاماسىن قولدايدى، مۇنىڭ ەۆروپا - ازيا قۇرلىعىنىڭ ۇلاسۋىنا، تۇتاسۋىنا جانە بىرگە دامۋىنا پايدالى بولاتىندىعىنا، بايىرعى جىبەك جولىنىڭ قازىرگى زاماندا جاڭا ومىرشەڭدىك كۇشىن قاۋلاتۋىنا مۇمكىندىك بەرەتىندىگىنە سەنەدى. ”ءبىر بەلدەۋ، ءبىر جولى“ دا مادەنيەتتىك اۋىس - ءتۇيىس جاساۋ جولى. يتاليا جاق جۇڭگو جاقپەن مادەنيەت، ساياحات سالالارىنداعى اۋىس - ءتۇيىستى، سەلبەستىكتى كۇشەيتۋدى قالايدى. يتاليا مەن جۇڭگو نەشە مىڭ جىلدىق وركەنيەتى بار بايىرعى ەلدەر، ەكى ەل حالقىندا قازىرگى تاڭداعى ادامزات قوعامى ءدوپ كەلىپ وتىرعان سىن - سايىسقا توتەپ بەرەتىن جەتكىلىكتى اقىل - پاراسات بار. يتاليا جۇڭگونىڭ گۇلدەنۋىنىڭ دۇنيە ءجۇزىنىڭ بەيبىتشىلىگى مەن كوركەيۋىنە تىڭ تاريحي ۇلەس قوساتىندىعىنا سەنەدى. يتاليا جاق ەۆروپا - جۇڭگو قارىم - قاتىناسىنىڭ ىشكەرىلەي دامۋىن ىلگەرىلەتۋگە كۇش سالادى، جۇڭگومەن بىرگە بىرلەسكەن مەملەكەتتەر ۇيىمى، 20 ەل توبى سياقتى كوپ جاقتى قۇرىلىمداردا بايلانىستى جانە سايكەسۋدى كۇشەيتىپ، كوپ جاقتىلىقتى جانە ساۋدانىڭ ەركىن بولۋىن بىرگە قورعاپ، كليمات وزگەرىسى، حالىقارالىق حاۋىپسىزدىك سياقتى جاقتارداعى سىن - سايىستارعا تىزە قوسا توتەپ بەرۋدى قالايدى. 
　　كەڭەستەن كەيىن، ەكى ەلدىڭ مەملەكەت باسشىلارى تىلشىلەرمەن بىرگە كەزدەستى.
　　كەڭەستىڭ الدىندا، ماتتارەللا زۇڭتۇڭ زۇڭتۇڭ سارايى الاڭىندا شي جينپيڭگە ارناپ سالتاناتتى قارسى الۋ سالتىن وتكىزدى. كوكتەم باسىنداعى ريمدە سامال ەسىپ، اسپان شايداي اشىق بولدى. شي جينپيڭ مەن حانىمى پىڭ لييۋان اۆتوكولىككە وتىرىپ، ءساندى كيىم كيىنىپ، ايبىندى تۇلعاسى اسقاقتاعان يتاليا اتتى اسكەرلەرىنىڭ قورعاۋىندا زۇڭتۇڭ سارايى الاڭىنا قاراي جول الدى.
　　شي جينپيڭ مەن حانىمى پىڭ لييۋان الاڭعا جەتكەندە، ماتتارەللا زۇڭتۇڭ مەن قىزى لاۋرا اۆتوكولىك توقتاتۋ ورنىندا قارسى الىپ، ءوزارا سالەمدەستى. وسىدان كەيىن، اسكەري وركەستىر جۇڭگو، يتاليا ەلدەرىنىڭ مەملەكەت ءانىن ورىندادى، جۇڭگونىڭ مەملەكەت تۋى شىعارىلدى. ەكى ەلدىڭ مەملەكەت باسشىلارى بىرگە قۇرمەت قاراۋىلىن كوزدەن كەشىردى. قۇرمەت قاراۋىلىنىڭ باستىعى الدىعا كەلىپ، شي جينپيڭدى كوزدەن كەشىرۋگە ۇسىنىس ەتتى. شي جينپيڭ ماتتارەللا زۇڭتۇڭنىڭ سەرىك بولۋىندا قۇرلىق ارمياسىن، تەڭىز ارمياسىن، اۋە ارمياسىن جانە اتتى اسكەرلەر شارشى توبىن رەتى بويىنشا كوزدەن كەشىردى. شي جينپيڭ يتاليا جاقتىڭ نەگىزگى مانساپتىلارىمەن قول الىستى، ماتتارەللا زۇڭتۇڭ جۇڭگو جاقتان بىرگە بارعان ادامدارمەن قول الىستى. 
　　سول كۇنى شي جينپيڭ يتالياداعى اتسىز قاھارماندار ەسكەرتكىشىنە گۇل شارباق قويدى. 
　　ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.
　　شينحۋا اگەنتتىگىنىڭ 3 - ايدىڭ 21 - كۇنى ريمنەن بەرگەن حابارى (تىلشىلەر چىن جانجيە، لي جيانمين). 3 - ايدىڭ 21 - كۇنى مەملەكەت ءتوراعاسى شي جينپيڭ ارناۋلى ۇشاقپەن ريمگە جەتىپ، يتاليا رەسپۋبليكاسىنا مەملەكەتتىك ساپارىن باستادى. 
　　شي جينپيڭ وتىرعان ارناۋلى ۇشاق يتاليا كەڭىستىگىنە كىرگەندە، يتاليا اۋە ارمياسىنىڭ 2 سوعىس ۇشاعى كەڭىستىككە كوتەرىلىپ قورعادى. جەرگىلىكتى ۋاقىت كەشكى ساعات 6دان 30 مينۋت مولشەرىندە، ارناۋلى ۇشاق ريمنىڭ فيۋميكيۋنو اۋەجايىنا كەلىپ قوندى. شي جينپيڭ مەن حانىمى پىڭ لييۋان ۇشاق ەسىگىنەن شىققاندا قۇرمەت قاراۋىلى سالەم بەرىپ قۇرمەت ءبىلدىردى، يتاليا اۋىل شارۋاشىلىق - ساياحات مينيسترلىگىنىڭ مينيسترى قاتارلى جوعارى دارەجەلى ءمانساپتىلار ۇشاق باسپالداعىنىڭ جانىندا تۇرىپ قىزۋ قارسى الدى. شي جينپيڭ مەن پىڭ لييۋان قىزىل كىلەمنىڭ ۇستىمەن الدىعا ءجۇردى. قۇرمەت قاراۋىلى قىزىل كىلەمنىڭ ەكى جاعىندا قاتار تۇزەپ، قۇرمەتپەن قاراپ تۇردى. 
　　شي جينپيڭ جۇڭگو ۇكىمەتى جانە جۇڭگو حالقى اتىنان يتاليا ۇكىمەتىنە جانە حالقىنا شىن ىقىلاستى سالەم جولدادى ءارى ىزگى تىلەك ءبىلدىردى. شي جينپيڭ بىلاي دەپ اتاپ كورسەتتى: جۇڭگو مەن يتاليا ديپلوماتيالىق قاتىناس ورناتقان 49 جىلدان بەرى، ەكى ەل قارىم - قاتىناسى ۋاقىتتىڭ جانە حالىقارالىق اۋمالى - توكپەلى جاعدايدىڭ سىنىنان ءوتتى، ەكى جاق ءوزارا قۇرمەتتەۋ، ءوزارا سەنىم ارتۋ، تيىمدىلىك جاساپ بىرگە يگىلىككە كەنەلۋ پرينسيبىن ۇستانىپ، جۇڭگو مەن يتاليانىڭ دوستىعى مەن سەلبەستىگىن ۇزدىكسىز ىلگەرىلەتىپ، قوعامدىق ءتۇزىمى، مادەنيەت استارى، دامۋ ساتىسى تۇرلىشە ەلدەردىڭ ەكى جاقتى قارىم - قاتىناستى دامىتۋىنىڭ ۇلگىسىنە اينالدى. جۇڭگو مەن يتاليانىڭ ناقتى ىستەر سەلبەستىگى مول ناتيجە بەرىپ، ەكى ەل حالقىنا شىنايى مۇددە جەتكىزدى؛ گۋمانيتارلىق اۋىس - ءتۇيىس الۋان فورمادا، باي مازمۇندا ءجۇرىلىپ، ءوزارا ءتۇسىنۋدى جانە دوستىقتى نىعايتتى. 
　　شي جينپيڭ مىنانى اتاپ كورسەتتى: مەن ماتتارەللا زۇڭتۇڭ، كونتە زۇڭلي قاتارلى يتاليا باسشىلارىمەن كەڭەسىپ، كەزدەسىپ، جۇڭگو - يتاليا قارىم - قاتىناسى دامۋىنىڭ ۇلى جوباسىن بىرگە جاساۋدى كۇتۋدەمىن. ەكى جاقتىڭ بىرگە قۇلشىنۋىندا جۇڭگو - يتاليا جان - جاقتى ستراتەگيالىق سەرىكتەستىك قارىم - قاتىناسىنىڭ اناعۇرلىم تاماشا جارقىن بولاشاققا يە بولاتىندىعىنا سەنەمىن. 
　　ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلى ساپارلاستارى وسى ۇشاقپەن بىرگە باردى. 
　　جۇڭگونىڭ يتالياداعى باس ەلشىسى لي رۇيۇي دە اۋەجايعا بارىپ قارسى الدى. 
　　يتالياداعى مەملەكەتتىك ساپارىن اياقتاتقاننان كەيىن، شي جينپيڭ موناكودا، فرانسيادا مەملەكەتتىك ساپاردا بولادى.