شي جينپيڭ جۇڭگونىڭ ورتا ازياداعى 5 ەلمەن ديپلوماتيالىق قارىم - قاتىناس ورناتقاندىعىنىڭ 30 جىلدىعى بايلانىسىمەن وتكىزىلگەن بەينە ەكران باسشىلار ءماجىلىسىن باسقاردى
اناعۇرلىم تىعىز جۇڭگو - ورتا ازيا تاعدىرلاس ورتاق تۇلعاسىن قول ۇستاسا قۇرۋدى باسا دارىپتەدى
1 - ايدىڭ 25 - كۇنى تۇستەن كەيىن مەملەكەت ءتوراعاسى شي جينپيڭ بەيجيڭدە جۇڭگونىڭ ورتا ازياداعى 5 ەلمەن ديپلوماتيالىق قارىم - قاتىناس ورناتقاندىعىنىڭ 30 جىلدىعى بايلانىسىمەن وتكىزىلگەن بەينە ەكران باسشىلار ءماجىلىسىن باسقاردى، «قول ۇستاسا تاعدىرلاس بولىپ، بولاشاققا بىرگە اتتانايىق» تاقىرىبىندا ماڭىزدى ءسوز سويلەدى.
□ سۋرەتتى شينحۋا اگەنتتىگىنىڭ ءتىلشىسى پاڭ شيڭلەي تۇسىرگەن
شينحۋا اگەنتتىگىنىڭ 1 - ايدىڭ 25 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ 1 - ايدىڭ 25 - كۇنى تۇستەن كەيىن بەيجيڭدە جۇڭگونىڭ ورتا ازياداعى 5 ەلمەن ديپلوماتيالىق قارىم - قاتىناس ورناتقاندىعىنىڭ 30 جىلدىعى بايلانىسىمەن وتكىزىلگەن بەينە ەكران باسشىلار ءماجىلىسىن باسقاردى. قازاقستاننىڭ زۇڭتۇڭى توقايەۆ، قىرعىزستاننىڭ زۇڭتۇڭى جاپاروۆ، تاجىكستاننىڭ زۇڭتۇڭى راحمون، تۇركمەنستاننىڭ زۇڭتۇڭى بەردىمۇحامەتوۆ، وزبەكستاننىڭ زۇڭتۇڭى ميرزيويەۆ باسشىلار ماجىلىسىنە قاتىناستى.
شي جينپيڭ مەن 5 ەلدىڭ باسشىلارى بىرگە جۇڭگونىڭ ورتا ازياداعى ەلدەرمەن قارىم - قاتىناسىنىڭ دامۋى بارىسىنداعى تاريحي كوزايىم ساتتەر بەينەلەنگەن بەينە ەكراندى بىرگە كورىپ، قىزۋ، سالتاناتتى، دوستىق بەينەدە تاجىريبەلەردى قورىتىندىلاپ، بولاشاققا كوز جىبەردى. شي جينپيڭ «قول ۇستاسا تاعدىرلاس بولىپ، بولاشاققا بىرگە اتتانايىق» تاقىرىبىندا ماڭىزدى ءسوز سويلەدى.
شي جينپيڭ بىلاي دەپ اتاپ كورسەتتى: 30 جىلدىڭ الدىندا جۇڭگو الدىمەن ورتا ازياداعى ەلدەرمەن ديپلوماتيالىق قارىم - قاتىناس ورناتىپ، تاراپتار بارىس - كەلىس پەن سەلبەستىكتىڭ قاقپاسىن اشتى. 30 جىلدان بەرى ەكى جاق اعىمعا ۇيلەسىپ، سەنىمدىلىكتى دارىپتەپ، جاراسىمدىلىققا ۇمتىلىپ، ءوزارا ءتۇسىنىسۋ، ءوزارا جول بەرۋ نەگىزىندە تاريحتان قالعان شەكارا ماسەلەسىن تۇبەگەيلى شەشىپ، تاتۋ كورشىلەس دوستىقتىڭ، سەلبەسىپ تەڭ يگىلىككە كەنەلۋدىڭ تىڭ جولىمەن ءجۇرىپ، جاڭاشا حالىقارالىق قارىم - قاتىناس ورناتۋدىڭ تيپتىك ۇلگىسىنە اينالدى. ەكى جاق قول ۇستاسا بىرگە ءجۇرىپ، دامۋدى بىرگە قاراستىرىپ، ”ءبىر بەلدەۋ، ءبىر جولدى“ بىرگە قۇرۋ ورتا ازيا وڭىرىندە گۇل اشىپ، جەمىس بەردى. ەكى جاق قۋانىش - جۇبانىشتا بىرگە بولىپ، حاۋىپسىزدىكتەن بىرگە يگىلىكتەنىپ، قيىنشىلىقتى بىرگە ارقالاپ، ورتاق حاۋىپسىزدىك مۇددە مەن ءوڭىردىڭ بەيبىتشىلىگىن، ورنىقتىلىعىن پارمەندى قورعادى. ەكى جاق ءوزارا ءتۇسىنىسىپ، ءوزارا ءبىلىسىپ، ءوزارا توعىسىپ، ءوزارا بايلانىس جاساپ، جۇڭگونىڭ ورتا ازياداعى ەلدەر حالقىمەن زەينەت پەن بەينەتتە بىرگە بولاتىن، كوڭىلدەردى توعىستىراتىن اسەرلى سيمفونياسىن جازدى. ەكى جاق ءبىر - ءبىرىن مەدەت تۇتىپ، ادىلدىكتى باتىل ساقتاپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىر - ءبىرىن باتىل قولداپ، ەكى جاقتىڭ ورىندى مۇددەسى مەن ستراتەگيالىق مۇددەسىن قورعادى.
شي جينپيڭ بىلاي دەپ باسا دارىپتەدى: جۇڭگونىڭ ورتا ازياداعى 5 ەلمەن 30 جىلدىق سەلبەستىگىنىڭ تابىستى بولۋىنىڭ قۇپياسى ەكى جاقتىڭ باستان - اياق ءوزارا قۇرمەت ەتىپ، تاتۋ كورشىلەس دوس بولىپ، قيىندىقتى بىلەك بىرىكتىرە جەڭىپ، ءوزارا پايدا جەتكىزىپ تەڭ يگىلىككە كەنەلۋىندە. وسى 4 ءتۇرلى پرينسيپ سەلبەستىك بارىسىندا توپتالعان قۇندى تاجىريبە جانە ورتاق بايلىق، جۇڭگونىڭ ورتا ازياداعى ەلدەرمەن قارىم - قاتىناسىنىڭ ورنىقتى دا باياندى بولۋىنىڭ ساياسي كەپىلى ءارى جۇڭگونىڭ ورتا ازياداعى ەلدەرمەن دوستىق بارىس - كەلىسىنىڭ الدىڭعىلاردىڭ ءىزىن باسىپ، بولاشاققا جول اشۋداعى كۇش قاينارى. حالىقارالىق اۋمالى - توكپەلى جاعداي مەيلى قالاي وزگەرسىن، بولاشاقتا جۇڭگو دامىپ مەيلى قانداي دەڭگەيگە جەتسىن، جۇڭگو قاي - قاشان دا ورتا ازياداعى ەلدەردىڭ سەنىم ارتۋعا جانە قاستەرلەۋگە تاتيتىن جاقسى كورشىسى، جاقسى سەرىگى، جاقسى دوسى، جاقسى باۋىرلاسى بولا بەرەدى. جۇڭگو جاق ورتا ازياداعى ەلدەردىڭ ءوز ەلىنىڭ مەملەكەت جاعدايىنا ۇيلەسەتىن دامۋ جولىمەن ءجۇرۋىن باتىل قولدايدى، ءار ەلدىڭ ءوز ەلىنىڭ يەلىك ۇقىعىن، تاۋەلسىزدىگىن، تەرريتوريا تۇتاستىعىن قورعاۋىن باتىل قولدايدى، ءار ەلدىڭ ۇلتتىڭ گۇلدەنۋىنە جانە ىنتىماقتاسىپ ءوزىن الۋەتتەندىرۋگە ۇمتىلىس جاساۋىن باتىل قولدايدى، ءار ەلدىڭ حالىقارالىق ساحنادا اناعۇرلىم زور رول اتقارۋىن باتىل قولدايدى. جۇڭگو جاق ورتا ازياداعى ەلدەرمەن اناعۇرلىم تىعىز جۇڭگو - ورتا ازيا تاعدىرلاس ورتاق تۇلعاسىن قول ۇستاسا قۇرۋدى قالايدى.
شي جينپيڭ 5 ۇسىنىس قويدى.
ءبىرىنشى، تاتۋ كورشىلەس دوستىقتىڭ ۇلگى - ونەگەسىن تەرەڭدەي ماپەلەۋ. جۇڭگو جاق تاتۋ، ادال، قايىرىمدى، كەڭ پەيىل بولۋ ۇستانىمىنان جازباي، ورتا ازياداعى ەلدەرمەن جوعارى جىكتەگىلەردىڭ بارىس - كەلىسى مەن ستراتەگيالىق كەڭەسۋىن كۇشەيتىپ، ”جۇڭگو + ورتا ازياداعى 5 ەل“ سىرتقى ىستەر مينيسترلەرى كەڭەسى سياقتى ءبىر قىدىرۋ تىلدەسۋ، سەلبەسۋ مەحانيزمىن ويداعىداي اتقارىپ، ىنتىماقتى، ءوزارا سەنىمدىلىكتى ۇزدىكسىز كۇشەيتىپ، ءوزارا پايدا جەتكىزۋ سەلبەستىگىن تەرەڭدەتىپ، بىرگە دامۋدى، بىرگە گۇلدەنۋدى جۇزەگە اسىرادى. ادامدىق ۇقىقتى جەلەۋ ەتىپ وزگە ەلدەردىڭ ىشكى ىسىنە كيلىگۋگە باتىل قارسى تۇرادى.
ەكىنشى، جوعارى ساپالى دامۋدىڭ سەلبەستىك بەلدەۋىن قۇرۋ. جۇڭگو ورتا ازياداعى ەلدەرگە اسا ۇلكەن كولەمدە بازار اشىپ، ورتا ازياداعى ەلدەردىڭ اناعۇرلىم كوپ ساپالى تاۋارلارىن جانە اۋىل شارۋاشىلىق ونىمدەرىن يمپورت ەتىپ، جۇڭگو - ورتا ازيا ەكونوميكا - ساۋدا سەلبەستىك تالقى مىنبەرىن ۇزدىكسىز ويداعىداي جۇرگىزۋدى قالايدى. جۇڭگو جاق جۇڭگو - ورتا ازياداعى 5 ەلدىڭ ەلەكتروندى ساۋدا ىستەرى سەلبەستىگى تىلدەسۋ مەحانيزمىن ورناتىپ، جۇڭگو - ورتا ازيا ەلدەرىنىڭ كاسىپ سالاسى مەن قارجى قوسۋ سەلبەستىك تالقى مىنبەرىن ۇيلەسىمدى كەزدە وتكىزۋدى دارىپتەيدى. ادامدار ىركىلىسسىز قاتىنايتىن ”تەز ارنا“ قۇرىپ، زاتتار ىركىلىسسىز جەتكىزىلەتىن ”جاسىل ارنانى“ كەمەلدەندىرىپ، جۇڭگو - قىرعىزستان - وزبەكستان تەمىر جولى نىسانىن جەدەل ىلگەرىلەتىپ، جۇڭگو - ورتا ازيا قاتىناس ءدالىزى قۇرىلىسىن ىلگەرىلەتۋ كەرەك. جۇڭگو - ورتا ازيا مۇناي، گاز قۇبىرىنىڭ ورنىقتى اينالىمىنا شىنايى كەپىلدىك ەتىپ، ەنەرگيانىڭ تۇتاس كاسىپ سالاسى تىزبەگىندەگى سەلبەستىگىن كەڭەيتۋ كەرەك. جاساندى زەردە، ۇلكەن ساندى مالىمەت، بۇلتتىق ەسەپتەۋ سياقتى جوعارى تەحنيكا سالاسىنداعى سەلبەستىكتى كۇشەيتۋ كەرەك.
ءۇشىنشى، بەيبىتشىلىكتى ساقتاۋدىڭ قورعانىس قالقانىن كۇشەيتۋ. ”ءۇش ءتۇرلى كۇشكە“ ۇزدىكسىز سوققى بەرىپ، شەكارانى باسقارۋ - تىزگىندەۋ سياقتى سەلبەستىكتى تەرەڭدەتىپ، ءوڭىردىڭ حاۋىپسىزدىك قورعانىس تورىن بەكەمدەۋ كەرەك. جۇڭگو جاق ورتا ازياداعى ەلدەردى ۆاكسينامەن جانە ىندەتكە قارسى اتتانۋ زاتتىق ماتەريالدارىمەن ۇزدىكسىز قامداپ، ۆاكسينانى جانە ەرەكشە شيپالى ءدارى - دارمەكتەردى بىرلەسىپ ءوندىرۋدى جانە تەحنيكا وتكەرۋدى ارتتىرۋدى قالايدى. 2022 - جىلى جۇڭگو ورتا ازياداعى ەلدەرگە تاعى 50 ميلليون دانا ۆاكسينانى كومەككە بەرەدى ءارى قاجەت ەتكەن ەلدەردە ءداستۇرلى مەديتسينا ورتالىعىن قۇرادى. جۇڭگو جاق جۇڭگو - ورتا ازيا سالاماتتىق كاسىپ سالاسى وداعىن قۇرۋعا ۇندەيدى.
ءتورتىنشى، كوپ نەگىزدى، ءوزارا ىقپالداساتىن ۇلكەن شاڭىراق قۇرۋ. گۋمانيتارلىق اۋىس - كۇيىس ۇلكەن ارناسىن قۇرىپ، مادەنيەت ورتالىعىن ءوزارا قۇرۋدى تەزدەتىپ، مادەنيەت مۇرالارى تىلدەسۋىن بەلسەنە ورىستەتىپ، ايەلدەر، اقىل - پاراسات قويماسى، اقپارات قۇرالدارى سياقتى سالالارداعى اۋىس - كۇيىستى ۇزدىكسىز ىلگەرىلەتۋ كەرەك. جۇڭگو جاق ورتا ازياداعى ەلدەردىڭ ساياحات بايلىعىن تانىستىرۋىنا تۇعىر ورناتىپ، 5 ەلدى تۇگەلدەي جۇڭگو ازاماتتارىنىڭ شەكارادان شىعىپ ساياحاتتاۋىنداعى نىسانالى ەلدەر قاتارىنا قوسۋدى قالايدى. جۇڭگو جاق جۇڭگو - ورتا ازيا حالىقتىق دوستىق تالقى مىنبەرىن وتكىزۋدى دارىپتەپ، الداعى 5 تە 10 جىلدا جۇڭگومەن ورتا ازياداعى 5 ەلدىڭ دوس قالالارىن 100 جۇپقا جەتكىزۋگە قۇلشىنادى. الداعى 5 جىلدا جۇڭگو جاق ورتا ازياداعى 5 ەلگە جۇڭگو ۇكىمەتىنىڭ وقۋ سيلىعىنان 1200 سان بەرۋدى، جۇڭگو - ورتا ازيا جاستار كوركەمونەر مەرەكەسى، ”بولاشاق كوپىرى“ جۇڭگو - ورتا ازيا جاس باسشىلار ءبىلىم جەتىلدىرۋ، اۋىس - كۇيىس لاگەرى سياقتى قيمىلداردى وتكىزۋدى جوسپارلاپ وتىر.
بەسىنشى، بەيبىت داميتىن جەر شارى قىستاعىن قورعاۋ. تاياۋدا مەن بۇكىل الەمدىك دامۋ باستاماسىن العا قويىپ، حاۋىپ - قاتەرگە، سىن - سايىسقا كۇش بىرىكتىرە وتىرىپ توتەپ بەرىپ، بىرلەسكەن مەملەكەتتەر ۇيىمىنىڭ 2030 - جىلعا دەيىنگى باياندى دامۋ كەڭەستىك ءتارتىبىن ىلگەرىلەتۋگە ۇندەگەن ەدىم. مەن مىنانى جاريالاماقشىمىن: الداعى 3 جىلدا جۇڭگو ورتا ازياداعى ەلدەرگە 500 ميلليون دوللار تەگىن كومەك بەرەدى، بۇل ءار ەلدىڭ حالىق تۇرمىسى نىساندارى قۇرىلىسىنا جۇمسالادى؛ ءبىلىم جەتىلدىرۋگە، زەرەتتەۋ - تالقىلاۋعا 5000 سان بەرىپ، ءار ەلدىڭ دەنساۋلىق ساقتاۋ - سالاماتتىق، كەدەيلىكتى ازايتىپ شارۋالارعا تيىمدىلىك جاساۋ، ۇلاستىرۋ - تۇتاستىرۋ، ينفورماتسيا تەحنيكاسى سياقتى سالالارداعى كاسىپتىك دارىندىلاردى باۋلۋىنا كومەكتەسىپ، دامۋدىڭ ىشكى قوزعاۋشى كۇشىن نىعايتادى.
شي جينپيڭ سوڭىندا بىلاي دەپ باسا دارىپتەدى: جۇڭگودا بۇرىنعىلاردان قالعان مىناداي ءسوز بار: ”جول جاقىن بولسا دا، جۇرمەسەڭ جەتە المايسىڭ؛ ءىس كىشكەنە بولعانىمەن، ىستەمەسەڭ تىندىرا المايسىڭ“. ءبىز 6 ەل حالقىنىڭ ورتاق قۇت - ىرىسىن شىعار ءتۇيىن ەتىپ، دوستىقتى ۇزدىكسىز جالعاستىرىپ، سەلبەستىكتى ىلگەرىلەتىپ، جۇڭگو مەن ورتا ازياداعى ەلدەردىڭ قارىم - قاتىناسىنىڭ اناعۇرلىم تاماشا بولاشاعىن بىرگە جازىپ، ادامزاتتىڭ تاعدىرلاس ورتاق تۇلعاسىن قۇرۋدى بىرگە ىلگەرىلەتەيىك.
ورتا ازياداعى 5 ەلدىڭ مەملەكەت باسشىلارى جۇڭگو جاقتىڭ باستاماسىنا ءارى تاريحي مانگە يە وسى رەتكى بەينە ەكران باسشىلار ءماجىلىسىن باسقارىپ اشقاندىعىنا العىس ايتتى، جۇڭگونىڭ دامۋ تابىسىن جوعارى باعالادى، جۇڭگونىڭ ءوڭىردىڭ جانە دۇنيە ءجۇزىنىڭ بەيبىتشىلىگى مەن دامۋىنا قوسقان ماڭىزدى ۇلەسىن القادى، ورتا ازياداعى ەلدەردىڭ جۇڭگومەن قارىم - قاتىناس ورناتقان 30 جىلدان بەرگى دامۋدا قول جەتكىزگەن قوماقتى جەتىستىگىن بەلسەندى باعالاپ، ورتا ازيا ەلدەرىنىڭ جۇڭگومەن قارىم - قاتىناسىن دامىتۋى ءاربىرىنىڭ دامۋىن، گۇلدەنۋىن جەبەپ عانا قويماي ءارى ءوڭىردىڭ بەيبىتشىلىگىن، ورنىقتىلىعىن ءونىمدى قورعادى، ءوزارا قۇرمەتتەيتىن، ءادىل، تۋراشىل، سەلبەسىپ تەڭ يگىلىككە كەنەلەتىن جاڭاشا حالىقارالىق قارىم - قاتىناستىڭ تيپتىك ۇلگىسىن ورناتتى دەپ قارادى. ءار ەلدىڭ ۇزاق شەكارا جەلىسى ەندىگارى ”ىرگە بولەتىن شەكارا“ بولمايدى، قايتا ەكى جاق حالقىنىڭ تاتۋ كورشىلەس دوستىعىنىڭ كوپىرىنە جانە دانەكەرىنە اينالادى. جۇڭگونىڭ 5 ەلگە ۇزاق ۋاقىتتان بەرى كورسەتكەن قىمباتتى قولداۋىنىڭ جانە 5 ەلگە جاڭا تيپتى ايدارشا ۆيرۋس وكپە قابىنۋ ىندەتىنە قارسى اتتانۋ ءۇشىن بەرگەن ۆاكسيناسى مەن ىندەتكە قارسى اتتانۋ زاتتىق ماتەريالدارى سياقتى قولداۋلارىنىڭ بارلىعى ورتا ازياداعى ەلدەردىڭ جۇڭگومەن بەرىك دوستىعىنىڭ ايعاعى بولىپ تابىلادى.
5 ەلدىڭ مەملەكەت باسشىلارى مىنالاردى ءبىلدىردى: ءتوراعا شي جينپيڭنىڭ بولاشاقتا جۇڭگونىڭ ورتا ازياداعى ەلدەرمەن قارىم - قاتىناسى جونىندە ورتاعا قويعان ۇسىنىستارىن بۇكىلدەي قۇپتايمىز، ەكى جاقتىڭ ديپلوماتيالىق قارىم - قاتىناس ورناتقاندىعىنىڭ 30 جىلدىعىن جاڭا باستاما ەتىپ، مازمۇنى باي، جەتىستىگى قوماقتى، دوستىعى باياندى ستراتەگيالىق سەرىكتەستىك قارىم - قاتىناستى كۇش بىرىكتىرە ورناتىپ، ورتا ازيا - جۇڭگو تاعدىرلاس ورتاق تۇلعاسىن سومداپ، ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋدى قالايمىز. ءار ەل ءاربىرىنىڭ تاڭداعان دامۋ جولىن باتىل قولداپ، ءاربىرىنىڭ تاۋەلسىزدىك، يەلىك ۇقىق جانە تەرريتوريا تۇتاستىعىن باتىل قولداپ، ءارقانداي سىلتاۋ كورسەتىپ باسقا ەلدەردىڭ ىشكى ىسىنە كيلىگۋگە قارسى تۇرىپ، 6 ەلدىڭ وزەكتى حاۋىپسىزدىك مۇددەسى مەن ستراتەگيالىق مۇددەسىن بىرگە قورعايدى. ”ءبىر بەلدەۋ، ءبىر جولدى“ بىرگە قۇرۋ وسى ءوڭىردىڭ ەكونوميكالىق دامۋىن، حالىقتىڭ ىرىس - قۇتىن، تاتۋ كورشىلىكتى، ءوزارا سەنىمدىلىكتى جەبەۋ جونىنەن كەلەلى ستراتەگيالىق مانگە يە. ءار جاق كەڭەسۋدەگى ماڭىزدى ورتاق تانىمدى جانە جەتىستىكتى مۇقيات تياناقتاندىرىپ، بەلگىلى مەرزىمدە جوعارى جىكتەگىلەردىڭ بارىس - كەلىسىن كۇشەيتىپ، ”ءبىر بەلدەۋ، ءبىر جول“ قۇرىلىسىن جاپپاي ىلگەرىلەتىپ، وڭىرلەردىڭ ۇلاسۋىن، تۇتاسۋىن جانە ەكونوميكا - ساۋدا، ەنەرگيا، جوعارى تەحنيكا، حاۋىپسىزدىك سياقتى ءار سالاداعى ناقتى ىستەر سەلبەستىگىن تەرەڭدەتىپ، الەمدىك دامۋ باستاماسىن بەلسەنە تياناقتاندىرىپ، وڭىرلىك، حالىقارالىق ىستەردە بايلانىس جاساۋدى، سەلبەسۋدى جيىلەتىپ، ورتا ازيا ەلدەرىنىڭ جۇڭگومەن قارىم - قاتىناسىن ىلگەرىلەتۋدە جاڭا دامۋدى جۇزەگە اسىرىپ، ورتاق سىن - سايىسقا اناعۇرلىم ويداعىداي توتەپ بەرىپ، ءوڭىردىڭ بەيبىتشىلىگىن، حاۋىپسىزدىگىن قورعاۋعا تىڭ ۇلەس قوسادى.
5 ەلدىڭ مەملەكەت باسشىلارى ءبىر اۋىزدان مىنالاردى ءبىلدىردى: كەلەر اپتادا جۇڭگوعا بارىپ بەيجيڭ قىسقى وليمپيادا سپورت جارىسىنىڭ اشىلۋ سالتىنا قاتىناسۋدى ىقىلاسپەن كۇتۋدەمىز. جۇڭگو جاقتىڭ ىندەت قيىنشىلىعىن جەڭىپ، بەيجيڭ قىسقى وليمپيادا سپورت جارىسىن دەر كەزىندە ءساتتى وتكىزىپ، دۇنيە جۇزىنە، ءسوز جوق، اناعۇرلىم كوپ سەنىم مەن ءۇمىت اكەلەتىندىگىنە سەنەمىز! بەيجيڭ قىسقى وليمپيادا سپورت جارىسىنىڭ تابىستى بولۋىن تىلەيمىز، جۇڭگو حالقىنىڭ كوكتەم مەرەكەسىن كوڭىلدى وتكىزۋىن تىلەيمىز!
باسشىلار ءماجىلىسى «جۇڭگونىڭ ورتا ازياداعى 5 ەل باسشىلارىمەن ديپلوماتيالىق قارىم - قاتىناس ورناتقاندىعىنىڭ 30 جىلدىعى جونىندەگى بىرلەسكەن مالىمدەمەنى» ماقۇلدادى ءارى جاريالادى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار باسشىلار ماجىلىسىنە قاتىناستى.
