حوتان تۋانچىڭ: كونە قالا رايونى جاڭا بەينەگە ەندى
9 - ايدىڭ 13 - كۇنى حوتان قالاسىنىڭ كونە قالا رايونى تۋانچىڭدا سەيىلدەدىك، كوگىلدىر اسپان، اقشا بۇلتتار قوڭىرقاي قىشتاردى ايشىقتاپ تۇر، كوشەدە قۇستار سايراپ، گۇلدەر جايقالىپ، جاسىل جەلەك جامىلعان. 9 - اي حوتاننىڭ ەڭ كورىكتى مەزگىلى، شىت جاڭا بەينەگە ەنگەن تۋانچىڭداعى ساۋدا دۇكەندەر يىق تىرەسىپ تۇر، بىردە كوتەرىلىپ، بىردە باسىلعان قاريدار شاقىرعان داۋىستار، نەتكەن دۋماندى دەسەڭىزشى!
”جاڭالاۋدان ىلگەرى، بۇل اراداعى ۇيلەر كونە بولاتىن، سۋ، توك، گاز قۇرىلعىلارى كەمەلدەنبەگەن، ءورت ءسوندىرۋ، ورتتەن ساقتانۋ جولى ارناعا تۇسپەگەن بولاتىن“، - دەدى حوتان تۋانچىڭىن جاڭالاۋ قولباسشىلىق شتابىنىڭ باس ينجەنەرى اباباكري توقسۇن.
حوتان قالاسىنىڭ نارباق ءمالىسى قالانىڭ ورتالىق اۋماعىنا ورنالاسقان، ونىڭ كوشەلەرى جان - جاققا تارامدالىپ ورنالاسقاندىقتان، جەرگىلىكتى ادامدار ”تۋانچىڭ“ دەپ اتاعان. 2016 - جىلى حوتان قالاسىنىڭ كونە قالا رايونى ”تۋانچىڭدى“ جاڭالاۋ ينجەنەرياسى باستالدى، جاڭالايتىن جالپى قۇرىلىس اۋماعى شامامەن 420 مىڭ شارشى مەتر، 3500 وتباسى تۇرعىنىنا سايادى.
كەزىندە تۇرعىن ايگۇل ءماتقۇربان اربامەن جەمىس - جيدەك ساتىپ تۇرمىس كەشىرەتىن، ءبىر ءۇيلى جان كونە تار ۇيدە وتىراتىن. 2016 - جىلى 7 - ايدا ونىڭ كونە ءۇيى 1 - توپتا جاڭالاۋ جوسپارىنا ەنگىزىلىپ، ۇكىمەت ءار شارشى مەترىنە 580 يۋاننان قوسىمشا قاراجات بەردى، وعان ءوزى جيعان - تەرگەنىن قوسىپ، 2 قاباتتى ءۇي سالىپ الدى.
”1 - قاباتتاعى 2 دۇكەن ءۇيدى سىرتقا جالعا بەردىك، ءوزىمىز ەسىك الدىندا جەمىس - جيدەك ساۋداسىمەن شۇعىلدانامىز؛ 2 - قاباتتا 5 ءۇي بار، ۇيدەگىلەردىڭ بارلىعىنىڭ بىردەن بولمەسى بار“. جاڭا تۇراعىنا قاراپ تۇرىپ ايگۇل تەبىرەنە بىلاي دەدى: ”قازىر 2 دۇكەن ۇيدەن جىلىنا 46 مىڭ يۋان جالاقى كىرىسى كىرەدى. كونە قالا رايونىن جاڭالاعاننان كەيىن ساياحاتشىلاردىڭ قاتارى بارعان سايىن مولايىپ، وتباسىمىزدىڭ جەمىس - جيدەك، سۋىق سۋسىن ساۋداسى دا بارعان سايىن كۇسەت بولدى. اقشا جيعاننان كەيىن اۋلانى قايتالاي اشەكەيلەپ، جەمىس - جيدەك ەرەن بازارىن اشپاقشىمىن“.
اباباكري بىلاي دەپ تانىستىردى: تۋانچىڭدى جاڭالاۋدا تاريحقا، مادەنيەتكە جانە تۇرعىنداردىڭ تىلەگىنە قۇرمەت ەتۋدى باس ماقسات ەتىپ، قالانىڭ تاريحي بەت - بەينەسىن قورعاۋعا ەرەكشە كوڭىل ءبولىپ، تۇرمىس ورتاسىن جاقسارتۋمەن بىرگە، تۇرعىنداردىڭ جۇمىستانۋىن دا جەبەدى. قازىر حوتاننىڭ تۋانچىڭى شينجياڭنىڭ ءىشى - سىرتىنداعى ساياحاتشىلاردىڭ ”ءسوزسىز باراتىن جەرىنە“ اينالدى.
”تۋانچىڭدىقتار“ − توراپتا قىزۋ قارسى الىنعان اسحانا. ”اسحانا ەرەكشە ءدامدى تاعامداردى نەگىز ەتكەن، ساياحاتشىلاردان سىرت، كوپتەگەن جەرگىلىكتى ادامداردى دا ساياحاتتاۋعا باۋراپ وتىر، قىلاياعى، تۋانچىڭداعى قارتتار دا كەلىپ، حوتاننىڭ روزا گۇلى شايىن ءىشىپ، مۋزيكا تىڭداپ قايتادى“. اسحانانىڭ قوجايىنى ءماتباحۇن ءابليمىت اسحانانىڭ 30عا تارتا ادامدى جۇمىسقا قابىلداعاندىعىن، مۇنىڭ ىشىندەگى 10 ادامنىڭ ارحيۆ تۇرعىزىلىپ، كارتچكالانعان كەدەي وتباسى ەكەندىگىن ايتتى.
كەزەكتە تۋانچىڭنىڭ 1 - مەرزىمدىك 97 ءۇيدى جاڭالاۋ ينجەنەرياسى اياقتادى. تۋانچىڭنىڭ 2 - مەرزىمدىك، 3 - مەرزىمدىك جاڭالاۋ نىساندارى ءجۇرىلىپ جاتىر، ساياحاتقا قىزمەت وتەۋ قۇرىلعىلارى قۇرىلىسى قاتار جۇرىلۋدە. نىساندار قۇرىلىسى تۇگەلدەي اياقتاعاننان كەيىن، بۇل ارادا بەلگىلى كولەمدەگى قاس تاسىن ويۋلاۋ، ورنەكتەۋ، ۇلتتىق كيىم - كەشەك تىگىنشىلىگى، گۇل باسۋ - بوياۋ، ءتۇستى ورنەك سياقتى ۇلتتىق قولونەر شەبەرحانالارى قالىپتاسادى.
2019 - جىلى تۋانچىڭ مەملەكەتتىك 3A دارەجەلى ساياحات كورىنىس ءوڭىرى بولۋدى ءساتتى ءوتىنىش ەتتى. اباباكري: ”الدا تۋانچىڭ حوتان قالاسىنىڭ ۇلتتىق سالت - سانا، مادەنيەت، ساياحات شەڭبەرىن قالىپتاستىرىپ، ەرەكشە ۇلتتىق سالت - سانامەن، مادەنيەتپەن ەل ءىشى - سىرتىنداعى ساياحاتشىلاردى باۋراپ، حوتاننىڭ ساياحات كاسىبىنىڭ جوعارى ساپالى دامۋىنا دەم بەرەدى“ دەدى.
