كۇشتى سۋىق اعىس تيانشان تاۋىنان استى، تۇتاس شينجياڭنىڭ كوپ ءبولىم وڭىرلەرىندە جاۋىن - شاشىن بولدى
ماماندار: جالپى ىقپالىنىڭ زيانىنان پايداسى كوپ، ءبيدايلى وڭىرلەر ورۋ، كەپتىرۋ، قامبالاۋ جۇمىسىن دەر كەزىندە جاقسى ىستەۋ كەرەك
اۆتونوميالى رايوندىق اۋا رايى ستانسياسىنان ۇعىسۋىمىزشا، جۋىقتا ءبىرشاما كۇشتى سۋىق اعىس تيانشان تاۋىنان اسىپ، تۇتاس شينجياڭ كولەمىندە كوپ ءبولىم وڭىرلەردە جاۋىن - شاشىن بولىپ، ءىشىنارا تاۋلى وڭىرلەردە قالىڭ قار جاۋعان.
اۆتونوميالى رايوندىق اۋا رايى ستانسياسىنىڭ ساندى مالىمەتىنە قاراعاندا، 6 - ايدىڭ 28 - كۇنى كۇندىزدەن 29 - كۇنى ساعات 18گە دەيىن، ىلە قازاق اۆتونوميالى وبلىسىنىڭ شىعىس بولىگى، وڭتۇستىك بولىگى، تارباعاتاي ايماعىنىڭ وڭتۇستىك بولىگى، التاي ايماعىنىڭ سولتۇستىك بولىگى، شىحىزى قالاسى، ءۇرىمجى قالاسى سياقتى جەرلەردە ورتاشا جانە قاتتى جاڭبىر جاۋعان، تاۋلى وڭىرلەردىڭ كەيبىر جەرىندە نوسەر جاۋعان. مۇندا تەڭىز دەڭگەيىنەن بيىك ءبىر ءبولىم وڭىرلەردە، مىسالى، ءۇرىمجىنىڭ نانشان تاۋى، تيانشاننىڭ بوعدا كولى، ىلە وبلىسىنىڭ نىلقى، تەكەس، موڭعۇلكۇرە تاۋلى ءوڭىرى سياقتى جەرلەردە ۇقساماعان دارەجەدە قار جاۋعان، حىجيڭ اۋدانىنىڭ بايىنبۇلاق تاۋلى وڭىرىندە قالىڭ قار جاۋعان، جوعارىداعى وڭىرلەردە تەمپەراتۋرا جالپى بەتتىك 10 سەلتسي گرادۋستان ارتىق تومەندەگەن.
اۆتونوميالى رايوندىق اۋا رايى ستانسياسىنىڭ باس الدىن الا مالىمەت بەرۋشىسى لۇي شينشىڭ ءتۇسىندىرىپ بىلاي دەدى: ”بۇل جولعى سۋىق اعىس ءبىرشاما كۇشتى بولعاندىقتان، تيانشان تاۋىنان اسىپ، تۇتاس شينجياڭ كولەمىندە جاپپاي جاۋىن - شاشىن بولدى، سونىمەن بىرگە تەڭىز دەڭگەيىنەن بيىك وڭىرلەردە قار جاۋدى“.
ءۇرىمجى قالاسىندا 6 - ايدىڭ 29 - كۇنى ساعات 6دان 18گە دەيىن، جاۋىن - شاشىن مولشەرى 14.4 ميلليمەتر بولىپ، قاتتى جاڭبىر دارەجەسىنە جەتىپ، ەڭ تومەن تەمپەراتۋرا 10 سەلتسي گرادۋس شاماسىنا تومەندەدى.
وسى رەت جاۋىن - شاشىن مولشەرى كوپ بولعانىمەن، جالعاسقان ۋاقىتى ۇزاق بولمادى. الدىن الا مالىمەتتە كورسەتىلۋىنشە، 6 - ايدىڭ 29 - كۇنى تۇننەن 30 - كۇنى كۇندىزگە دەيىن، سولتۇستىك شينجياڭنىڭ كوپ ءبولىم ءوڭىرى، حوتان ايماعىنىڭ وڭتۇستىگىندەگى تاۋلى ءوڭىر، اقسۋ ايماعىنىڭ شىعىس بولىگى، بايىنعولين موڭعۇل اۆتونوميالى وبلىسى، تۇرپان قالاسىنىڭ سولتۇستىگىندەگى تاۋلى ءوڭىر، قۇمىل قالاسى سياقتى جەرلەردىڭ ءىشىنارا وڭىرلەرىندە سەبەزگى جاڭبىر جانە از جاڭبىر جاۋعان. تاۋلى وڭىرلەردىڭ ءىشىنارا جەرىندە نوسەر جاۋدى. بىرنەشە كۇننەن كەيىن، تۇتاس شينجياڭنىڭ كوپ ءبولىم وڭىرلەرىندە كۇن اشىق بولادى، كەيدە بۇلتتايدى، تەمپەراتۋرا بىرتىندەپ قايتا جوعارىلايدى ەكەن.
اۆتونوميالى رايوندىق اۋا رايى ستانسياسىنىڭ مامانى مىنانى ەسكەرتەدى: جاۋىن - شاشىن بولىپ، تەمپەراتۋرا تومەندەگەندىكتەن، داندەنۋ كەزەڭىندە تۇرعان ءبيداي وڭاي جاپىرىلىپ قالادى، سولتۇستىك شينجياڭداعى پىسىپ تۇرعان دۇمبە ءبيدايدى ورىپ الۋ، كەپتىرۋگە ءبىراز اسەرىن تيگىزدى، اۋا تەمپەراتۋراسىنىڭ تومەندەۋى جىلۋلىقتى قالايتىن داقىل ماقتا سياقتىلاردىڭ وسۋىنە ءتيىمسىز بولسا دا، كەڭ كولەمدە جاۋعان جاۋىن - شاشىننىڭ جالپى جاقتان ايتقاندا زيانىنان پايداسى كوپ بولىپ، وتكەننەن بەرگى سولتۇستىك شينجياڭنىڭ ءىشىنارا وڭىرلەرىندە كورىنگەن قۋاڭشىلىق جاعدايىن باسەڭدەتۋگە ءتيىمدى. سونىمەن قاتار، وڭتۇستىك شينجياڭداعى ءبيدايلى وڭىرلەردىڭ دۇمبە ءبيدايدى ورۋ، كەپتىرۋ، قامبالاۋ جۇمىسىن ويداعىداي ىستەپ، كوكتەۋىنەن، كوگەرۋىنەن ساقتانۋعا؛ قايتالاي ەگۋ جۇمىسىن ويداعىداي ىستەۋگە ۇسىنىس بەرەمىز. سولتۇستىك شينجياڭداعى ءبيدايلى وڭىرلەر اتىز باپتاۋدى كۇشەيتىپ، جاپىراققا تىڭايتقىش بۇركىپ، بوراننىڭ، جاۋىن - شاشىننىڭ داندەنۋ كەزەڭىندەگى ءبيدايدى جاپىرىپ كەتۋىنەن ساقتانۋى ءارى ءتيىمسىز اۋا رايىنان اۋاشا كەزدە پىسىپ تۇرعان دۇمبە ءبيدايدى دەر كەزىندە ورىپ الۋى كەرەك.
