تەمپەراتۋرا جىلداعىدان ℃2.6 جوعارى بولدى
شينجياڭ 60 جىلدان بەرگى ەڭ جىلى كوكتەمدى باستان وتكىزدى
6 - ايدىڭ 17 - كۇنى اۆتونوميالى رايوندىق اۋا رايى مەكەمەسى جاريالاعان 2020 - جىلعى كوكتەمگى (3 - ايدان 5 - ايعا دەيىن) شينجياڭ كليماتىنىڭ ىقپالىن باعالاۋ ساندى مالىمەتىنە قاراعاندا، بيىل 3 - ايدان 5 - ايعا دەيىن، بۇكىل شينجياڭدا ورتاشا تەمپەراتۋرا ℃13 بولىپ، جىلداعىدان ℃2.6 جوعارى بولعان، بۇل 1961 - جىلى اۋا رايىن ەستەلىككە الۋ باستالعاننان بەرگى تاريحتاعى ەڭ جوعارى دەڭگەيگە جەتكەن، مۇندا سولتۇستىك شينجياڭ مەن تيانشان تاۋلى ءوڭىرى دەرلىك كوكتەمدەگى ەڭ جوعارى تەمپەراتۋرا تاريحىندا ءبىرىنشى ورىنعا شىققان.
اۆتونوميالى رايوندىق كليمات ورتالىعى بىلاي دەپ تانىستىردى: بيىل كوكتەمدە بۇكىل شينجياڭنىڭ كوپ ساندى جەرىندە تەمپەراتۋرا جوعارىلاۋ بولىپ، سولتۇستىك شينجياڭدا، شىعىس شينجياڭدا ايرىقشا جوعارى بولعان؛ كوپ ساندى جەردە جاۋىن - شاشىن مولشەرى ازداۋ بولىپ، وڭتۇستىك شينجياڭداعى قاشقار ايماعىندا، قىزىلسۋ قىرعىز اۆتونوميالى وبلىسىندا، حوتان ايماعىندا جاۋىن - شاشىن مولشەرى ％50تەن ارتىق كوبەيگەن. بۇكىل شينجياڭدا ورتاشا جاۋىن - شاشىن مولشەرى 33.1mm بولىپ، جىلداعىدان ％24 ازايعان، سولتۇستىك شينجياڭدا، تيانشان تاۋلى وڭىرىندە جەكە - جەكە ％40، ％14 از بولىپ، وڭتۇستىك شينجياڭدا ％1 كوپ بولعان. تەمپەراتۋرا ءۇرتىس جوعارى بولعان جاعدايدا، بۇكىل شينجياڭداعى باسىم كوپ وڭىردە كوكتەم باسى مەن سوڭعى قىراۋ مەزگىلى جاپپاي ەرتەرەك بولعان، اسىرەسە، سولتۇستىك شينجياڭنىڭ باسىم كوپ جەرىندە سوڭعى قىراۋ مەزگىلى 11 دە 33 كۇن ەرتە بولعان.
بيىلعى كوكتەمگى اۋا رايى شارت - جاعدايى دۇمبە ءبيدايدىڭ ءوسۋى، جازدىق داقىلداردىڭ ەگىلۋىنە، كوكتەۋىنە جانە مايسالاردىڭ وسۋىنە، باسىم كوپ ساندى جەمىس ورمانىنىڭ گۇل اشىپ، توزاڭدانۋىنا، ءدان الۋىنا، وڭتۇستىك شينجياڭنىڭ باتىس بولىگىندەگى شابىندىقتىڭ كوكتەۋىنە، وسۋىنە ەداۋىر ءتيىمدى بولعان، ايتسە دە سولتۇستىك شينجياڭداعى كەيبىر وڭىرلەردەگى جاۋىن - شاشىننىڭ ۇزدىكسىز از بولۋى شابىندىقتىڭ وسۋىنە ءتيىمسىز بولعان، ونىڭ ۇستىنە، وڭتۇستىك شينجياڭنىڭ باتىس بولىگىندەگى جاۋىن - شاشىن مولشەرىنىڭ كوبەيۋى ءبىر ءبولىم جەرلەردەگى ماقتانىڭ كوكتەۋىنە، سونداي - اق مايسانىڭ وسۋىنە ىقپال جاساعان.
اۆتونوميالى رايوندىق كليمات ورتالىعى جاز كىرگەننەن بەرى، تەمپەراتۋرانىڭ ءالى دە جوعارىلاۋ، جاۋىن - شاشىننىڭ ازداۋ بولعاندىعىن، ءىشىنارا جەرلەردە قار ەرىپ سەل ءجۇرۋ مۇمكىندىگى ەداۋىر كۇشتى ەكەندىگىن ەسكەرتتى. قاتىستى تاراۋلاردىڭ قاداعالاۋدى، ساقتاندىرۋدى، الدىن الا مالىمەت بەرۋدى ۇزدىكسىز كۇشەيتىپ، سۋ قويماسى، كول، توسپا، وزەن ارناسى سياقتى ءتۇيىندى جەرلەردى شارلاپ تەكسەرۋدى كۇشەيتىپ، سەل ءجۇرۋ، قۋاڭشىلىق بولۋ جاعدايىنا دەر كەزىندە تالداۋ، تۇجىرىم جاساۋىن ۇسىنىس ەتتى. قالىڭ اۋىل شارۋاشىلىق وڭىرلەرىن سۋ مەن تىڭايتقىشتى ءبىر تۇلعالاندىرىپ سۋارىپ، تىڭايتقىش بەرۋ ءتاسىلىن رەتتەۋ سياقتى شارالاردان پايدالانىپ، داقىلداردىڭ قۋاڭشىلىققا توزىمدىلىگىن كۇشەيتۋىن ۇسىنىس ەتتى.
