ءۇرىمجى كەدەنىنەن ۇعىسۋىمىزشا، 5 - ايدا شينجياڭنىڭ سىرتقى ساۋدا يمپورت - ەكسپورت جالپى قۇنى 8 ميلليارد 420 ميلليون يۋان بولىپ، ۇقساس مەزگىلمەن سالىستىرعاندا ％0.5 ارتىپ، ۇقساس مەزگىلمەن سالىستىرعاندا ۇدايى 3 اي ارتۋدى ساقتاعان.
ىندەتتىڭ ىقپالىندا، الدىڭعى 5 ايدا شينجياڭنىڭ سىرتقى ساۋدا يمپورت - ەكسپورت جالپى قۇنى 44 ميلليارد 50 ميلليون يۋان بولعان. مۇنىڭ ىشىندە، ەكسپورت قۇنى 25 ميلليارد 720 ميلليون يۋان بولىپ، سايكەس مەزگىلدەگىدەن ％33.2 تومەندەگەن، دەسەدە يمپورت زور مولشەردە ءوسۋ بەتالىسىن ساقتاپ، يمپورت قۇنى 18 ميلليارد 330 ميلليون يۋانعا جەتىپ، سايكەس مەزگىلدەگىدەن ％31.9 ارتقان.
3 - ايدان بەرى، شينجياڭنىڭ سىرتقى ساۋداسىنىڭ ايلىق ساۋدا قۇنى اي سايىن قايتا كوتەرىلۋ بەتالىسىن كورسەتىپ، 5 - ايداعى ساۋدا قۇنىنىڭ تومەندەۋ مولشەرى 4 - ايمەن سالىستىرعاندا 5.7 پايىز ازايعان.
شينجياڭنىڭ سىرتقى ساۋداسى شەكارالىق شاعىن سومالىق ساۋدانى نەگىز ەتەدى. الدىڭعى 5 ايدا شينجياڭنىڭ شەكارالىق شاعىن سومالىق ساۋدا يمپورت - ەكسپورت جالپى قۇنى 20 ميلليارد 520 ميلليون يۋان بولىپ، شينجياڭنىڭ سىرتقى ساۋدا جالپى قۇنىنىڭ ％46.6ىن قۇراعان؛ ادەتتەگى ساۋدا يمپورت - ەكسپورت جالپى قۇنى 18 ميلليارد 940 ميلليون يۋان بولىپ، سايكەس مەزگىلدەگىدەن ％1.7 ارتىپ، شاعىن كولەمدە ءوسۋ بەتالىسىن كورسەتكەن؛ شينجياڭ كەشەندى قورعامالى باجى رايونى ايرىقشا كوزگە ءتۇسىپ، يمپورت - ەكسپورت جالپى قۇنى 3 ميلليارد 510 ميلليون يۋانعا جەتىپ، سايكەس مەزگىلدەگىدەن 2.4 ەسە ارتقان، مۇنىڭ ىشىندە رايون ىشىندەگى زات جەتكىزۋ تاۋارلارىنىڭ يمپورت - ەكسپورتىنىڭ ارتۋى ءبىرشاما تەز بولعان.
حالىقتىق كاسىپورىندار − شينجياڭنىڭ سىرتقى ساۋدا يمپورت - ەكسپورتىنىڭ نەگىزگى كۇشى، الدىڭعى 5 ايدا يمپورت - ەكسپورت جالپى قۇنىنا 29 ميلليارد 600 ميلليون يۋان ۇلەس قوسىپ، شينجياڭنىڭ سىرتقى ساۋدا جالپى قۇنىنىڭ ％67.2 قۇراعان؛ مەملەكەت يەلىگىندەگى كاسىپورىندار يمپورت - ەكسپورت جالپى قۇنىنان 13 ميلليارد 960 ميلليون يۋان ورىنداپ، سايكەس مەزگىلدەگىدەن ％9.6 ارتقان.
سىرتقى ساۋدانى ورنىقتىرۋ قىزمەتىن ونان ارى ويداعىداي ىستەۋ ءۇشىن، ءۇرىمجى كەدەنى شەكارا اتتاعان ساۋدانىڭ شارۋاشىلىق - ساۋدا ورتاسىن ۇزدىكسىز بەكەمدەپ، ساپالىلاندىرىپ، سىرتقى ساۋدا سالاسىنداعى ”بەرۋ، باسقارۋ، قىزمەت وتەۋ“ رەفورماسىن ىشكەرىلەي ىلگەرىلەتىپ، جۇمىس ءتارتىبىن ساپالىلاندىرۋ، كەدەننەن ءوتۋ راسمياتتارىن ىقشامداۋ، تالون - كۋالىكتەردى ازايتۋ، حالىقارالىق ساۋدادا ”ءبىر تەرەزەلىك“ قولدانىلىمدى تەرەڭدەتۋ سياقتى شارالار ارقىلى ساۋدانىڭ وڭاي بولۋ دەڭگەيىن جوعارىلاتىپ، جوعارى ءونىمدى، ساپالى شارۋاشىلىق - ساۋدا ورتاسىن قالىپتاستىرادى.
