3 - ايدىڭ 20 - كۇنى تۇستەن بۇرىن S21 التايدان ۇرىمجىگە دەيىنگى قۇمدى ءشول جوعارى قارقىندى تاس جولى قۇرىلىس نىسانى جۇمىسىن قالپىنا كەلتىردى.
بۇل سول كۇنى جۇمىسىن قالپىنا كەلتىرگەن وسى نىساننىڭ ءبىرىنشى مەرزىمدىك ينجەنەرياسى. ”قازىر جۇمىسشىلار، جابدىقتار ارت - ارتىنان جۇمىس ورنىنا كەلۋدە، ادام، زات اينالىمى، قارجى اينالىمى جەدەلدەي تۇسەدى“، - دەدى التاي - ءۇرىمجى جوعارى قارقىندى تاس جول نىسانىنىڭ قولباسشىسى لو شياۋگاڭ.
S21 التايدان ۇرىمجىگە دەيىنگى تاس جول بەيتۇن قالاسىنان باستالعان، بۋرىلتوعاي اۋدانىن، ۋجياچۇي قالاسىن، سانجى حۇيزۋ اۆتونوميالى وبلىسىن باسىپ ءوتىپ، ءۇرىمجى قالاسىنا كەلىپ اياقتايدى، جالپى ۇزىندىعى 342.538 كيلومەتر، ءشول دالانى جانە قۇمدى ءشولدى ەندەي وتەتىن جول بولىگىنىڭ ۇزىندىعى 150 كيلومەتردەن اسادى. جوعارى قارقىندى تاس جول ولشەمى بويىنشا سالىنعان، مەجەمەن 2022 - جىلى 8 - ايدىڭ سوڭىندا بىتەدى. نىسان 2 مەزگىلگە ءبولىنىپ جۇرگىزىلەدى، ءبىرىنشى مەرزىمدىك قۇرىلىسى حۋاڭحۋاگوۋدەن ۇرىمجىگە دەيىنگى بولىگى، نەگىزگى جەلى ۇزىندىعى 229.188 كيلومەتر، بىلتىر 12 - ايدا جۇمىس باستاعان؛ ەكىنشى مەرزىمدىك قۇرىلىسى التايدان حۋاڭحۋاگوۋگە دەيىنگى بولىگى.
S21 التايدان ۇرىمجىگە دەيىنگى تاس جول قۇرىلىسى اۆتونوميالى رايوننىڭ ”13 - بەسجىلدىق“ جوباسىنىڭ نەگىزگى جول تورابىنىڭ ماڭىزدى قۇرامداس بولىگى، سولتۇستىككە قاراي قۇربانتۇڭعىت ءشولىن، جوڭعار ويپاتىن كەسىپ ءوتىپ، نەگىزىنەن ءتۇزۋ سىزىق باعىتىندا جۇرەدى، ۇرىمجىدەن التاي قالاسىنا بارعاندا ەندىگارى اينالىپ جۇرمەيدى، G217 جەلىسىمەن جۇرۋگە قاراعاندا 258 كيلومەتر قىسقارىپ، G216 جەلىسىنەن 193 كيلومەتر قىسقارىپ، ءۇرىمجى قالاسىنىڭ التاي ايماعىمەن جالعاساتىن قولايلى، تەز جوعارى قارقىندى تاس جول وتكەلىنە اينالادى.
”نىسان سالىنىپ بولعاننان كەيىن ۇرىمجىدەن التاي قالاسىنا بارۋعا اۆتوكولىكپەن ەڭ تەز بولعاندا نە بارى 4 ساعات مولشەرىندە ۋاقىت كەتەدى، بۇرىنعى كەزبەن سالىستىرعاندا 3 تە 4 ساعات ۇنەمدەلەدى“، - دەدى لو شياۋگاڭ.
ۇعىسۋعا قاراعاندا، قازىر رايونىمىزدىڭ قۇمدى ءشول تاس جولى جەكە - جەكە بۇگۇردەن نيەگە دەيىنگى تاس جول، اقسۋدان حوتانعا دەيىنگى تاس جول جانە سالىنۋ ۇستىندەگى لوپنۇردان چەرچەنگە دەيىنگى تاس جولداردى قامتيدى، الايدا بارلىعى جوعارى قارقىندى تاس جول ەمەس.
سول كۇنى S20 ۋگۇڭتاي − قارامايلى، G30 شياۋساۋحۋ − ءۇرىمجى بولىگى، G7 ۋتۇڭداچۋان − اراتۇرىك − باركول − موري بولىگى، چارقىلىق − نيە تاس جول نىساندارى دا ءبىر ۋاقىتتا جۇمىستى قالپىنا كەلتىرىپ، قۇرىلىس جۇرگىزدى.
