كورىنىس وڭىرىندە ادام كوبەيە ءتۇستى

　3 - ايدىڭ 19 - كۇنى ارتيستەر شينجياڭ حالىقارالىق ۇلكەن بازارى كورىنىس اۋماعىندا ءبي بيلەۋدە. شينجياڭ حالىقارالىق ۇلكەن بازارى كورىنىس اۋماعى 3 - ايدىڭ 10 - كۇنى تيجاراتتى جالپى بەتتىك قالپىنا كەلتىردى، ساياحاتشىلار كۇن سايىن كوبەيدى. 

”مەن ءار جىلى بوعدا كولىنە بىرنەشە رەت كەلەمىن، دەسەدە، بۇل جولى مۇلدە ۇقسامايدى، مەن سەزىنگەن تاماشا ساتتەرىمدى كوپشىلىكپەن ءبولىسىپ، ءتىپتى دە كوپ ادامعا شينجياڭدى تۇسىندىرەمىن، شينجياڭدى تانىستىرامىن“، - دەدى 3 - ايدىڭ 18 - كۇنى ساياحاتشى ليۋ جيە قۋانىشپەن. ءدال قازىرگى بوعدا كولىندە ”مۇز جارتىلاي ەرىگەن“ كوركەم كورىنىس قالىپتاسپتى، ليۋ جيە تاماشالاي ءجۇرىپ كەسكىنگە ءتۇسىرىپ، دوۋيىنگە جولداپ جاتتى.

سول كۇنى تيانشان بوعدا كولى كورىنىس وڭىرىنە كەلگەن ساياحاتشى 600دەن استى. ”كورىنىس ءوڭىرى قايتا اشىلعاننان بەرى، ساياحاتشىلار كۇن سايىن كوبەيدى“، - دەدى تيانشان بوعدا كولى كورىنىس ءوڭىرىن باسقارۋ كوميتەتى ۇگىت - تاربيە، زاڭ - بەلگىلەمە باسقارماسىنىڭ باستىعى ليۋ ۋىن - ي تانىستىرىپ.

شينجياڭنىڭ مادەنيەت - ساياحات كاسىبى جۇمىستى جالپى بەتتىك قالپىنا كەلتىرگەننەن بەرى، بۇكىل شينجياڭداعى 440 كورىنىس ءوڭىرى، كورىنىس تۇيىندەرى جالپى بەتتىك تارتىپپەن اشىلىپ، كورىنىس ءوڭىرى، كورىنىس تۇيىندەرىندە ساياحاتشىلار كۇن سايىن كوبەيدى.

ماسكى تاعۋ، دەنە تەمپەراتۋراسىن ولشەۋ، قولدى ءجيى جۋۋ... تيانشان بوعدا كولى كورىنىس وڭىرىندە راديودان ىندەتتەن ساقتانۋ مازمۇنى قايتالانىپ بەرىلىپ، ساياحاتشىلارعا ماسكى تاعۋ، تارتىپپەن شىرەتتە تۇرۋ ەسكەرتىلىپ جاتتى؛ كورىنىس وڭىرىندەگى دارەتحانالارعا قول جۋۋ سۇيىقتىعى قويىلىپ، تاستاندى كەرەكسىز ماسكىنى تاستايتىن ارناۋلى قوقسىق ساندىعى قويىلعان. ساياحاتشىلار شوعىرىن ءونىمدى تىزگىندەۋ ءۇشىن، وسى ساياحات ءوڭىرى ساياحاتشىلاردىڭ جەلىدە اتى - جونىمەن بەلەت ساتىپ الۋىن جولعا قويدى.

ەرەكشە قيمىلدار مەن ءتيىمدى شارالاردى جولعا قويدى، كوز تارتاتىن ساياحاتتىڭ سارا جەلىلەرىن كوبەيتتى، جاڭا ساياحات ءونىمىن جوبالادى، ساتۋدى جانە ۇگىتتى كۇشەيتتى... التاي ايماعى كوپ ءتۇرلى شارا قولدانىپ، ساياحاتتى بىرتىندەپ جاندانۋعا جەتەكتەدى. قاناس كورىنىس ءوڭىرى ىندەتتەن ساقتانۋ - تىزگىندەۋ شارالارى مەن ساياحاتشىلار بىلۋگە ءتيىستى ىستەردى دەر كەزىندە جاريالاپ، ۇگىت ارقىلى جەتەكشىلىك ەتۋدى ويداعىداي ىستەپ، بۇرىننان بار ساياحات جەلىسى ونىمدەرىنىڭ دارەجەسىن ءوسىرىپ، قاناس كورىنىس ءوڭىرىنىڭ جاڭا ەرەكشە جەلى ءونىمى سياقتىلاردى جارىققا شىعاردى؛ كوكتوعاي كورىنىس ءوڭىرى، ۋسايتان كورىنىس ءوڭىرى ۋيچات، دوۋيىن سياقتىلار ارقىلى كورىنىس وڭىرىنە قاتىستى مازمۇنداردى تانىستىرىپ، ساياحاتشىلاردى باۋرادى.

3 - ايدىڭ 17 - كۇنى ءۇرىمجى تيانشان ۇلكەن اڭعارى، شينجياڭ جىبەك جولى حالىقارالىق دەمالىس رايونى سياقتى كورىنىس وڭىرلەرى ءۇرىمجى قالاسىنىڭ تۇڭعىش توپتاعى ءبىر كۇندىك ساياحات ۇيىرمەسىندەگى ساياحاتشىلاردى قابىلدادى. ”جۇمىس قالپىنا كەلگەن ءبىرىنشى كۇنى مەن جۇزگە تاياۋ اقىل - كەڭەس سۇراۋ تەلەفونىن قابىلدادىم“، - دەدى شينجياڭ يوۋمەيلى حالىقارالىق ساياحات كووپەراتيۆى شەكتى سەرىكتەستىگىنىڭ ورىنباسار باس ديرەكتورى شيان مەي قۋانىشتى بەينەدە.

تۇرپانداعى ءارقايسى كورىنىس وڭىرلەرى، كورىنىس تۇيىندەرى دە توپ - توپ ساياحاتشىلاردى قابىلدادى. ”تۇرپان كورىنىس ءوڭىرى قايتا اشىلعاننان كەيىن 3 - ايدىڭ 17 - كۇنى ءبىز تۇڭعىش توپتاعى ساياحاتشىلار ۇيىرمەسىن قابىلدادىق، 3 - ايدىڭ 18 - كۇنى تۇڭعىش توپتاعى ءوز كولىگىمەن ساياحاتتاعانداردى كۇتىپ الدىق“، - دەدى تۇرپان تۇڭيى ساياحات شەكتى جاۋاپكەرشىلىك سەرىكتەستىگىنىڭ ورىنباسار ديرەكتورى لي فىڭ تانىستىرىپ.

حوتان ايماعىنىڭ كورىنىس وڭىرىندەگى، كورىنىس تۇيىندەرىندەگى ساياحاتشىلار دا بىرتىندەپ كوبەيدى. مەملەكەتتىك 3A دارەجەلى كورىنىس ءوڭىرى بولعان حوتان كەشكى بازارى 3 - ايدىڭ 11 - كۇنىنەن باستاپ تيجاراتىن قالپىنا كەلتىرگەننەن بەرى، ءار كۇنى كەشتە ساياحاتشىلاردىڭ اياعى ۇزىلمەدى. تيجاراتتى قالپىنا كەلتىرگەن 5 كۇندە 20 مىڭعا جۋىق ساياحاتشى قابىلداپ، ساياحات كىرىسى 500 مىڭ يۋانعا جەتتى.

بىرنەشە كۇننەن بەرى، لوپنۇرلىقتار قورجاسى ساياحات وڭىرىندە ساياحاتشىلاردىڭ اياعى ۇزىلمەدى، ساياحات ءوڭىرىن باسقارۋ كوميتەتىنىڭ مەڭگەرۋشىسى ليۋ يان وتە قاربالاس كۇيگە ءتۇستى، 2 كۇندە 8 ساياحات كووپەراتيۆىن ارالاپ، ساياحاتشىلاردى باۋراۋ ءىسىن اقىلداستى، ”بيىل ءبىز ءتۇرلى مادەنيەت، ساياحات، دەنە تاربيە قيمىلدارىن كوپتەپ وتكىزىپ، كەشكى ساياحات نىساندارىن كوبەيتەمىز“، - دەدى ليۋ يان.

”ءبىز ءۇرىمجى قالاسىنىڭ، سانجى حۇيزۋ اۆتونوميالى وبلىسىنىڭ ماڭايىندا ساياحاتشىلار كوپ بولۋ ەرەكشەلىگىنە مەڭزەس، باتپىراۋىق مەرەكەسى سياقتى قيمىلداردى وتكىزىپ، كوكتەمگى ساياحاتتى قىزدىرامىز“. ليۋ ۋىن - ي وسى كورىنىس ءوڭىرىنىڭ ساياحاتتىڭ سايابىر كەزىندەگى بەلەت باعاسىنىڭ كۇشكە يە ۋاقىتىن تاعى دا ءبىر اي ۇزارتىپ، 4 - ايعا دەيىن جالعاستىراتىندىعىن ايتتى.

بيىل شينجياڭ قابىلدايتىن ساياحاتشى سانىن 300 ميلليون ادام - رەتكە جەتكىزۋگە كۇش سالماق. وسىعان وراي جەر - جەر مادەنيەت، ساياحات كاسىبىن جانداندىرۋ قارقىنىن جەدەلدەتىپ، ىندەت تۋدىرعان زياننىڭ ورنىن تولتىرىپ، ىندەت زايا كەتىرگەن ۋاقىتتى باتىل ۇتپاق.