تۇتاس رايون بويىنشا جازدىق ءبيداي ەگىلگەن جەر 300 مىڭ مۋعا تايادى
وڭتۇستىك شينجياڭدا كوكتەمگى ەگىس جۇمىسىنىڭ جالپىلىق قارقىنى وتكەن جىلداعىدان تەز بولدى
اۆتونوميالى رايوندىق اۋىل شارۋاشىلىعى، اۋىل - قىستاق مەڭگەرمەسىنەن ۇعىسۋىمىزشا، تەمپەراتۋرانىڭ بىرتىندەپ جوعارىلاۋىنا بايلانىستى رايونىمىزدا كوكتەمگى ەگىس جۇمىسى وڭتۇستىكتەن سولتۇستىككە قاراي بىرتىندەپ ورىستەتىلگەن. تۇتاس رايون بويىنشا 299 مىڭ 700 مۋ جەرگە جازدىق ءبيداي ەگىلگەن، ءبيدايدان سىرت ەگىلگەن ەگىس داقىلدارى 493 مىڭ 100 مۋ بولعان. وڭتۇستىك شينجياڭ ءوڭىرى جازدىق ءبيداي ەگۋدىڭ قاۋىرت مەزگىلىنە ءوتىپ، 297 مىڭ 200 مۋ جەرگە تۇقىم ءسىڭىرىلىپ، كوكتەمگى ەگىن ەگىلمەكشى بولعان جەر اۋدانىنىڭ ％84.91ىن يەلەپ، جالپىلىق قارقىنى وتكەن جىلداعىدان تەز بولعان.
كەزەكتە رايونىمىزدا قىستىق داقىلداردى كوكتەمدە باپتاۋ جۇمىسى جاپپاي ورىستەتىلىپ، وڭتۇستىك شينجياڭدا 6 ميلليون 800 مىڭ مۋ جەردەگى دۇمبە ءبيداي كوكتەي باستادى، سولتۇستىك شينجياڭدا دۇمبە ءبيداي ءالى قىستان شىعۋ مەزگىلىندە تۇر. وڭتۇستىك شينجياڭداعى ءار دارەجەلى اۋىل شارۋاشىلىعى، اۋىل - قىستاق تاراۋلارى شارۋالار مەن ءتۇرلى اۋىل شارۋاشىلىعى تيجارات تۇلعالارىن ەگىس باسىنا تارتىپپەن بارۋعا، ۋاقىت بولىنىسىنە قاراي ەگىس جۇمىسىنا شىعۋعا، ءبولىنىپ جۇمىس ىستەۋگە ۇيىمداستىرىپ، اتتانىسقا كەلتىرىپ، ەگىس ۋاقىتىن وتكىزبەي كوك سۋىن سالىپ، قايتا كوكتەۋ تىڭايتقىشىن شاشتى.
قازىرگە دەيىن وڭتۇستىك شينجياڭدا كوك سۋى سالىنعان دۇمبە ءبيداي جەر اۋدانى 4 ميلليون 130 مىڭ مۋعا جەتىپ، ％60.74تى يەلەيدى، ۇستەمە قايتا كوكتەۋ تىڭايتقىشى بەرىلگەن جەر اۋدانى 5 ميلليون 986 مىڭ 100 مۋعا جەتىپ، ％88.03تى يەلەدى. 1 - ، 2 - تۇردەگى دۇمبە ءبيداي مايساسىنىڭ سالىستىرماسى قىستان شىعۋ الدىنداعىدان كورنەكتى جوعارىلادى، دۇمبە ءبيداي مايساسىنىڭ جالپىلىق بوي تارتۋ جاعدايى ايتارلىقتاي بولىپ، وتكەن جىلعى سول تۇستاعىدان جاقسى بولدى.
تانىستىرۋعا قاراعاندا، بيىل تۇتاس رايوندا ەگىس داقىلدارىنىڭ نيەتتىك ەگىلەتىن جەر اۋدانى 70 ميلليون 642 مىڭ 900 مۋ بولعان، بىلتىرعىمەن سالىستىرعاندا ورنىقتىلىقتى ساقتاۋ نەگىزىندە تومەندەگەن، ەگۋ قۇرىلىمىندا ءبيداي كەمەيۋ، ماقتا كەمەيۋ، جۇگەرى ارتۋ، كوكونىس ارتۋ، ەرەكشە ەگىس داقىلدارى ارتۋ سىندى ”ەكى كەمەيۋ، ءۇش ارتۋ جاعدايى“ جارىققا شىعىپ، قۇرىلىمدىق ورنالاسۋى ساپالىلانا تۇسكەن. تۇتاس رايون استىق حاۋىپسىزدىگىنە ولكە باستىعى جاۋاپتى بولۋ ءتۇزىمىن قاتاڭ تياناقتاندىرىپ، تۇتاس جىلدىق استىق ءوندىرىسىنىڭ نىساناسىن عىلمي ەسەپتەپ، بەلگىلەپ، ىشەر استىقتىڭ بۇكىلدەي حاۋىپسىزدىگىنە شىنايى كەپىلدىك ەتەدى ەكەن.
اۋىل شارۋاشىلىق ماتەريالدارىمەن قامتاماسىزداندىرۋ جاعىندا، تۇتاس رايونداعى اۋىل شارۋاشىلىعى، اۋىل - قىستاق تاراۋلارى ءارقايسى قاتىستى تاراۋلارمەن بىرلەسىپ، ىندەت تۋدىرعان ءتيىمسىز ىقپالداردى بەلسەنە جەڭىپ، تۇتاس رايوندا اۋىل شارۋاشىلىق ماتەريالدارىن وندىرەتىن كاسىپورىنداردىڭ قايتا جۇمىس باستاۋ سالىستىرماسى زور دارەجەدە جوعارىلادى، كوكتەمگى ەگىسكە قاجەتتى اۋىل شارۋاشىلىق ماتەريالدارىن تاسۋداعى بوگەت تۇيىندەر جاپپاي ىركىلىسسىزدەندىرىلدى، اۋىل شارۋاشىلىق ماتەريالدارىن ساتاتىن ساۋدا دۇكەندەرىنىڭ ％90تەن استامى اشىلىپ تيجارات باستادى، وڭتۇستىك شينجياڭداعى 4 ايماق - وبلىستا تۇقىم، حيميالىق تىڭايتقىش، ەگىس دارىلەرى، ەگىس جارعاقتارى سىندى نەگىزگى اۋىل شارۋاشىلىق ماتەريالدارىمەن قامداپ قاناعاتتاندىرۋ سالىستىرماسى جاپپاي ％100كە جەتتى نەمەسە تايادى، سولتۇستىك شينجياڭ وڭىرىندە زاپاس قور ورەسى كوكتەمگى ەگىس ءوندىرىسى قاجەتىن نەگىزىنەن قاناعاتتاندىرادى، رايون بويىنشا كوكتەمگى ەگىس جۇمىسىنا قاجەتتى اۋىل شارۋاشىلىق ماتەريالدارى پارمەندى قامتاماسىز ەتىلدى.
