11 - ايدىڭ 8 - كۇنى 2 - كەزەكتى جۇڭگو شينجياڭ ەرەكشە جەمىس ونىمدەرى كورمەسى گۋاڭجوۋدا اشىلدى. اۆتونوميالى رايوندىق پارتكومنىڭ تۇراقتى مۇشەسى، اۆتونوميالى رايوننىڭ ورىنباسار ءتوراعاسى ەركىن تۇنياز، مەملەكەتتىك ساياسي كەڭەستىڭ تۇراقتى مۇشەسى، مەملەكەتتىك ورمان شارۋاشىلىعى جانە جايلىم مەكەمەسىنىڭ ورىنباسار باستىعى ليۋ دۇڭشىڭ اشىلۋ سالتىنا قاتىناستى ءارى ءسوز سويلەدى.
ەركىن تۇنياز بىلاي دەدى: تاياۋ جىلداردان بەرى، مەملەكەتتىڭ مينيسترلىك - كوميتەتتەرى مەن شينجياڭعا باعىتتامالى كومەكتەسەتىن 19 ولكە، قالانىڭ زور كۇشپەن قولداۋىندا، شينجياڭنىڭ اۋىل شارۋاشىلىق ونىمدەرى بازارىنىڭ ساتۋ قىزمەتى ۇزدىكسىز كەڭەيىپ، جەمىس ونىمدەرىن نەگىز ەتكەن شينجياڭ اۋىل شارۋاشىلىق ونىمدەرىن شينجياڭ ىشىندە ساتىپ الۋ، شينجياڭنىڭ سىرتىنا ساتۋ سىندى 2 تور بارعان سايىن ءجيى توقىلىپ، شينجياڭنىڭ توپ - توپ ەرەكشە جەمىس ونىمدەرى ۇزدىكسىز ىشكى وڭىرلەر بازارىنا جونەلتىلىپ، تۇتىنۋشىلاردىڭ الۋان تۇرلىلەنگەن تۇرمىستىق قاجەتىن قاناعاتتاندىرۋمەن بىرگە، شينجياڭ جەمىس ونىمدەرىنىڭ تانىمالىلىعى مەن ىقپال كۇشىن پارمەندى جوعارىلاتتى. شينجياڭ كورمە جينالىسىنان پايدالانىپ، ءارقايسى ولكەمەن، رايونمەن، قالامەن اۋىس - كۇيىس سەلبەستىگىن كۇشەيتىپ، جەمىس ونىمدەرىن ۇتىمدى قامداۋ قۋاتى مەن بازار اشۋ دەڭگەيىن اناعۇرلىم جوعارىلاتادى.
ليۋ دۇڭشىڭ مىنانى ءبىلدىردى: وسى كەزەكتى كورمەنىڭ نەگىزگى تاقىرىبى اناعۇرلىم داۋىرلىك ەرەكشەلىككە يە، كولەمى اناعۇرلىم زور، مازمۇنى اناعۇرلىم مول، ونىمدەر اناعۇرلىم ساپالى، قىزمەت وتەۋى اناعۇرلىم كەمەلدى، ءار جاقتىڭ پاراساتى مەن قۋاتى توپتالعان، شينجياڭ جەمىس ونىمدەرىنىڭ ”التىن ماڭدايشالىق“ىن بىرگە جاساعان، جاۋھارلار شوعىرلانعان، تاڭداۋلىلار ىركەس - تىركەس ايگىلەنگەن سالتاناتتى جينالىس بولادى.
وسى كەزەكتى كورمە ”كورىكتى شينجياڭ. ءيىسى اڭقىعان جەمىس“تى نەگىزگى تاقىرىپ ەتىپ، شينجياڭنىڭ ساپالى جەمىس ونىمدەرى، ەرەكشە جىنتىكتەي مانەرلەنگەن اۋىل شارۋاشىلىق ونىمدەرى جانە ساياحات ونىمدەرى سياقتى جيىنى 50 تۇرپاتتاعى 700 ءتۇرلى ءونىمدى شوعىرلى ايگىلەدى ءارى تۇڭعىش رەت بۇكىل ەلدەگى 18 ولكە، قالانىڭ ەرەكشە جەمىس ونىمدەرى مەن اۋىل شارۋاشىلىق قوسىمشا ونىمدەرىن كورمەگە قويدى. جۇڭگو قالا ساۋدا تور تۇيىندەرى قۇرىلىسىن باسقارۋ بىرلەستىگى تاعى ەل ىشىندەگى كوپتەگەن ساتىپ الۋشى ساۋداگەرلەردى سول جەردىڭ وزىندە كەڭەسىپ كەلىسۋگە ۇيىمداستىردى.
