كومورو ەكونوميكا ـ ساۋدا ۋاكىلدەر ۇيىرمەسى شينجياڭدا ەكسكۋرسيادا، ساپاردا بولدى —
ٴوزارا پايدا جەتكىزىپ بىرگە يگىلىككە كەنەلۋدىڭ جاڭا جاعدايىن اشامىز
”جۇڭگو شينجياڭىنىڭ ەكونوميكاسىنىڭ، قوعامىنىڭ جىلدام دامۋىنىڭ قۇپياسى نەدە“؟ كومورو ەكونوميكا ـ ساۋدا ۋاكىلدەر ۇيىرمەسى شينجياڭدا ەكسكۋرسيادا، ساپاردا بولۋ بارىسىندا بۇعان ەرەكشە قىزىقتى.
3 ـ ايدىڭ 18 ـ كۇنى كومورو ەكونوميكا ـ ساۋدا ۋاكىلدەر ۇيىرمەسى اۆتونوميالى رايوندىق حالىق قۇرىلتايى تۇراقتى كوميتەتىنە، شينجياڭ مۇراجايىنا، شينجياڭ حالىقارالىق ۇلكەن بازارىنا بارىپ ەكسكۋرسيالاپ، جۇڭگو شينجياڭىنىڭ ساياسي، ەكونوميكا، قوعام، مادەنيەت سياقتى جاقتارداعى جاعدايىن ىشكەرىلەي ۇعىستى. شينجياڭ ساۋدانى جەبەۋ قوعامى كاسىپورىنداردى ۋاكىلدەر ۇيىرمەسىندەگىلەرمەن اڭگىمە وتكىزۋگە ۇيىمداستىرىپ، شينجياڭ ەكونوميكاسىنىڭ جىلدام دامۋىنداعى تاجىريبەلەردى بۇكپەسىز ايتىپ، ٴوزارا پايدا جەتكىزىپ بىرگە يگىلىككە كەنەلۋ جاڭا جاعدايىن اشۋدى ٴۇمىت ەتتى.
ۋاكىلدەر ۇيىرمەسى شينجياڭ حالىق قۇرىلتايى تاريحى كورمە سارايىنا كىردى، ونداعى سۋرەتتەر، باعالى ناقتى زاتتار حالىق قۇرىلتايى ٴتۇزىمىنىڭ شينجياڭدا ورناۋ، دامۋ بارىسىن ەسكە ٴتۇسىرىپ، شينجياڭنىڭ ەكونوميكالىق، قوعامدىق دامۋىن ىلگەرىلەتۋدىڭ ناتيجەلەرىن ايگىلەپ تۇر. ولار ايبىندى شينجياڭ حالىق سارايىن ەكسكۋرسيالاپ، مۇنىڭ حالىق قۇرىلتايى ۋاكىلدەرىنىڭ مەملەكەت ٴىسىن بىرگە اقىلداساتىن ساحنا ەكەندىگىن ٴتۇسىندى.
”شينجياڭدا ساياسيدىڭ دەموكراتيالى، اشىق جانە جاريا ەكەندىگى ايگىلەنىپتى“. كومورو حالىقتىق پارلامەنتىنىڭ ەكىنشى ورىنباسار باستىعى حايدار نۇردين سيتي ەكسكۋرسيادان كەيىن تەبىرەنىپ بىلاي دەدى: ”شينجياڭ حالىق سارايى ٴبىزدىڭ پارلامەنت عيماراتىمىز سياقتى ساياسي سيمۆولدىق ٴمانى بار قۇرىلىس ەكەن، بۇل جەر ٴبىزدى ەكسكۋرسيالاۋعا قابىلداپ، شينجياڭنىڭ اشىقتىعىن، وزىنە سەنەتىندىگىن ايگىلەدى“.
كومورو ٴۇندى مۇحيتىنداعى افريكا ارال ەلى، اۋىل شارۋاشىلىعى — حالىق شارۋاشىلىعىنىڭ تىرەكتى كاسىپ سالاسى، ۆانيل، قالامپىر، ارتابوتريس سياقتى حوش ٴيىستى ماتەريالداردىڭ ٴونىم مولشەرى دۇنيە جۇزىندە الدىڭعى قاتاردا تۇرادى.
”جۇڭگونىڭ شينجياڭى مەن كومورو كوپ جاقتاردا سەلبەستىك كومەسكى كۇشىن ونان ارى تەرەڭ اشا الادى. اسىرەسە، كومورونىڭ ساياحات بايلىعى مول، تەڭىز ارالدارىنىڭ كورىنىسى كوركەم، شينجياڭ ساياحاتىنىڭ كوپ ٴتۇرلى كۇيمەن دامۋ ۇلگىسىنىڭ بىزبەن اراداعى ٴوزارا تولىقتاۋ سيپاتى كۇشتى، ۇيرەنۋگە، ۇلگى الۋعا تاتيدى“، ـ دەدى حايدار نۇردين سيتي.
كومورو كاسىپورىندارىنىڭ ۋاكىلى دانيار ابدۇللا حوش ٴيىستى زاتتار كاسىپورنىنىڭ جاۋاپتىسى، اڭگىمە ماجىلىسىندە ول سەرىكتەستىگىنىڭ نەگىزگى ٴونىمى يلان، قالامپىر، ۆانيل سىندى 3 ٴتۇرلى ەفير مايىن تانىستىردى، وسى ەفير مايلارىنىڭ ٴبىرى جوعارى سورتتى ٴاتىردىڭ شيكىزاتى ەتىلگەن. ول: ”ۇلگىسىن شينجياڭعا جىبەرىپ كورسەتۋىمىزگە بولادى، ساتۋ جولىن كەڭەيتىپ، ساتۋ ارناسىن اشۋدى ٴۇمىت ەتەمىز“، ـ دەدى.
”شارالاردى بىرگە اقىلداسىپ، زات اينالىمىنىڭ وزىندىك قۇنىن تومەندەتىپ، كومورونىڭ ٴتىپتى دە كوپ ونىمدەرىنىڭ جۇڭگو بازارىنا ٴساتتى كىرۋىنە قولايلىلىق جاساۋدى ٴۇمىت ەتەمىز“، ـ دەدى كومورو كاسىپورىندارىنىڭ ۋاكىلى يبىراھيم حاميداني، ـ كومورونىڭ ەكسپورت ونىمدەرىنىڭ %50ى جۇڭگوعا ساتىلعانىمەن، قازىر حالىقارالىق زات اينالىمى وزىندىك قۇنىنىڭ بارعان سايىن جوعارىلاۋ قىسىمىنا ٴدوپ كەلىپ وتىر، اسىرەسە، 2019 ـ جىلداعىمەن سالىستىرعاندا، كونتينەرمەن تاسۋ اقىسى ٴبىر ەسە ارتتى.
سول كۇنگى اڭگىمە ماجىلىسىنە شينجياڭنىڭ ەگىن، مال شارۋاشىلىعى، ساياحات، مادەنيەت، حالىقارالىق ساۋدا سياقتى سالالارعا ساياتىن 6 كاسىپورنى قاتىناستى. ساياسيدا ٴوزارا سەنىم ارتۋدان ەكونوميكا ـ ساۋدانى تۇيىلىستىرۋگە دەيىن ۋاكىلدەر ۇيىرمەسى شينجياڭدى ونان ارى جان ـ جاقتى تانىدى.
ۇعىسۋعا قاراعاندا، كومورو ەكونوميكا ـ ساۋدا ۋاكىلدەر ۇيىرمەسى شينجياڭ ساۋدانى جەبەۋ قوعامىنىڭ ۇسىنىسىمەن شينجياڭدا ەكسكۋرسيادا، ساپاردا بولعان، ۋاكىلدەر ۇيىرمەسىندەگىلەر تاعى شينجياڭ زۇنگۇيشيانشى عىلىم ـ تەحنولوگيا شەكتى سەرىكتەستىگى، شينجياڭ يەما بايىرعى ەكولوگيا باقشاسى سياقتى جەرلەردە ەكسكۋرسيادا، ساپاردا بولادى ەكەن.
