انار بۇلت \ شينجياڭ گازەتىنىڭ ٴتىلشىسى چىن چياڭۋي 1 ـ ايدىڭ 24 ـ كۇنى ۇرىمجىدەن حابارلايدى. 1 ـ ايدىڭ 23 ـ كۇنى ٴۇرىمجى كەدەنى اقپار جاريالاۋ ٴماجىلىسىن اشىپ، 2024 ـ جىلعى شينجياڭنىڭ سىرتقى ساۋدا يمپورت ـ ەكسپورت جاعدايىن حابارلادى. 2024 ـ جىلى شينجياڭنىڭ سىرتقى ساۋدا يمپورت ـ ەكسپورت جالپى قۇنى 435 ميلليارد 110 ميلليون يۋانعا جەتىپ، سايكەس مەزگىلدەگىدەن %21.8 ارتىپ، بۇكىل ەلدىڭ ارتۋ قارقىنىنان 16.8 پايىز جوعارى بولعان.
كۇردەلى دە قۇبىلمالى سىرتقى ورتا الدىندا، 2024 ـ جىلى شينجياڭنىڭ سىرتقى ساۋداسى ورنىقتىلىق بارىسىندا ىلگەرىلەپ، ساپا جوعارىلاعان، مولشەر ورنىقتى بولعان دامۋ اۋقىمىن اۋەلگىدەي ساقتاپ، جۇرتتى جالت قاراتقان تابىستارعا قول جەتكىزدى. بەرتىنگى 3 جىلدا شينجياڭنىڭ سىرتقى ساۋدا يمپورت ـ ەكسپورت جالپى قۇنى ٴۇرتىس 200 ميلليارد يۋاندىق، 300 ميلليارد يۋاندىق، 400 ميلليارد يۋاندىق وتكەلدەن ٴوتتى.
2024 ـ جىلى شينجياڭنىڭ ادەتتەگى ساۋدا تاسىلىندەگى يمپورت ـ ەكسپورت قۇنى سايكەس مەزگىلدەگىدەن %69.2 ارتىپ، سىرتقى ساۋدا يمپورت ـ ەكسپورت جالپى قۇنىنىڭ سايكەس مەزگىلدەگىدەن 17.6 پايىز ارتۋىن جەبەدى. بازاردان ساتىپ الۋ، شەكارا تۇرعىندارىنىڭ ٴوزارا بازارشىلاۋ سياقتى جاڭا كاسىپ كۇيى قارىشتاپ دامىپ، بازاردان ساتىپ الۋ ساۋدا تاسىلىندەگى ەكسپورت قۇنى سايكەس مەزگىلدەگىدەن %394 ارتتى؛ شەكارا تۇرعىندارىنىڭ ٴوزارا بازارشىلاۋ ساۋداسى تاسىلىندەگى يمپورت قۇنى سايكەس مەزگىلدەگىدەن %100.8 ارتتى.
مەملەكەت مەنشىگىندەگى كاسىپورىندار، شەتەل ساۋداگەرلەرى قارجى قوسقان كاسىپورىندار، حالىقتىق كاسىپورىندار سىندى ٴۇش ۇلكەن شارۋاشىلىق تۇلعاسىنىڭ يمپورت ـ ەكسپورتى ىركەس ـ تىركەس ارتىپ، ناقتى ناتيجەسى بار سىرتقى ساۋدا شارۋاشىلىق تۇلعالارىنىڭ سانى سايكەس مەزگىلدەگىدەن %19.2 ارتتى. مەملەكەت مەنشىگىندەگى كاسىپورىنداردىڭ يمپورت ـ ەكسپورت قۇنى سايكەس مەزگىلدەگىدەن %32.6 ارتتى، شەتەل ساۋداگەرلەرى قارجى قوسقان كاسىپورىنداردىڭ يمپورت ـ ەكسپورت قۇنى سايكەس مەزگىلدەگىدەن %7.3 ارتتى، حالىقتىق كاسىپورىنداردىڭ يمپورت ـ ەكسپورت قۇنى سايكەس مەزگىلدەگىدەن %21.1 ارتتى.
شينجياڭنىڭ سىرتقى ساۋدا ”دوستار شەڭبەرى“ بارعان سايىن كەڭەيىپ، 2024 ـ جىلى 213 مەملەكەتپەن جانە رايونمەن ساۋدا بارىس ـ كەلىسىن جاسادى. جۇڭگو شينجياڭىنىڭ ”ٴبىر بەلدەۋ، ٴبىر جولدى“ بىرگە قۇراتىن ەلدەرمەن اراداعى يمپورت ـ ەكسپورت قۇنى سايكەس مەزگىلدەگىدەن %18.7 ارتتى؛ «وڭىرلىك جان ـ جاقتى ەكونوميكالىق سەرىكتەستىك قارىم ـ قاتىناس كەلىسىمىندەگى» (RCEP) باسقا مۇشە ەلدەرمەن جانە شىعىس وڭتۇستىك ازيا ەلدەرى وداعىمەن اراداعى يمپورت ـ ەكسپورت قۇنى سايكەس مەزگىلدەگىدەن جەكە ـ جەكە %167.8 جانە %191.9 ارتتى.
شينجياڭنىڭ وڭىرلىك ەسىك اشۋ ورنالاسىمىنىڭ باسىمدىعى اناعۇرلىم كورنەكتىلەندى. بۇكىل شينجياڭنىڭ جەر ـ جەرى ”جارىسا ۇمتىلدى“، ىلە قازاق اۆتونوميالى وبلىسى بۇكىل شينجياڭ بويىنشا الدىدا ٴجۇردى، قاشقار ايماعى، ٴۇرىمجى قالاسى، بۇراتالا موڭعۇل اۆتونوميالى وبلىسى سوڭىنان ەردى. وڭتۇستىك، سولتۇستىك شينجياڭنىڭ سىرتقى ساۋداسىنىڭ بىركەلكى دامۋ جاعدايى اناعۇرلىم كورنەكتىلەندى، وڭتۇستىك شينجياڭ ٴوڭىرىنىڭ يمپورت ـ ەكسپورت قۇنىنىڭ ارتۋ قارقىنى بۇكىل شينجياڭنىڭ ورتاشا ارتۋ قارقىنىنان جوعارى بولدى.
شينجياڭنىڭ ەكسپورت تاۋارلارىنىڭ قۇرىلىمى اناعۇرلىم ساپالىلاندى. شينجياڭنىڭ جوعارى تەحنولوگيالى، ۇستەمە قۇنى جوعارى ونىمدەرىنىڭ ەكسپورت ەتىلۋى كورنەكتى بولىپ، ماشينا ـ ەلەكتر ونىمدەرىنىڭ ەكسپورت قۇنى سايكەس مەزگىلدەگىدەن %34.2 ارتتى؛ ەلەكترلى اۆتوموبيل، ليتي باتارەياسى سياقتى ”جاڭا ٴۇش ٴتۇر“ ۇزدىكسىز ٴوتىمدى بولىپ، ەكسپورت قۇنى سايكەس مەزگىلدەگىدەن %53.1 ارتتى.
2024 ـ جىلى جۇڭگو (شينجياڭ) ەركىن ساۋدا سىناق رايونىنىڭ يمپورت ـ ەكسپورت قۇنى 189 ميلليارد 980 ميلليون يۋان بولىپ، كەشەندى قورعامالى باجى اۋماعىمەن ٴبىر تۇتاس جوسپارلانىپ دامىپ، سىرتقى ساۋداداعى ۇلگى كورسەتۋ، جەتەكتەۋ رولى كورنەكتى بولدى.
شينجياڭ شەكارا وتكەلدەرىنىڭ ارنا ونىمدىلىگى تىڭنان جوعارىلادى. 2024 ـ جىلى شينجياڭ شەكارا وتكەلدەرىنىڭ جۇك تاسىمال مولشەرى 80 ميلليون توننادان اسىپ، سايكەس مەزگىلدەگىدەن %12.3 ارتتى. قازىرگە دەيىن ”تاس جول شەكارا وتكەلى قاراستى جەر بويىنشا تىكە وتكىزۋ“ ۇلگىسى بۇكىل شينجياڭداعى 7 تاس جول شەكارا وتكەلىندە، سونداي ـ اق 4 كەدەنگە + قاراستى جەردەگى جۇمىس ورنىندا كوشىرىلىپ جالپىلاستىرىلىپ، ”تەمىر جول شەكارا وتكەلىنەن ٴوتۋدى قولايلىلاستىرۋ“ رەفورماسى اناعۇرلىم تەرەڭدەتىلىپ، يمپورت ەتىلەتىن ٴتۇيىندى تاۋارلاردىڭ كەدەننەن ٴوتۋ ۋاقىتى ٴونىمدى قىسقاردى.
ٴۇرىمجى كەدەنى پارتكومىنىڭ مۇشەسى، ورىنباسار كەدەن باستىعى لي چيڭحۋا مىنالاردى ٴبىلدىردى: جالپى جاقتان العاندا، شينجياڭنىڭ سىرتقى ساۋداسى 2024 ـ جىلى قىسىمعا توتەپ بەرىپ جوعارى ورلەپ، جالپى مولشەرى ورنىقتىلىق بارىسىندا ىلگەرىلەگەن، ساپاسى ىلگەرىلەۋ بارىسىندا جوعارىلاعان كورنەكتى ”ناتيجە كەستەسىن“ تاپسىردى. 2025 ـ جىلى ٴۇرىمجى كەدەنى زەردەلى كەدەن قۇرىلىسىن، ”زەردەلى كەدەندە قۋاتتى ەل“ ارەكەتىن باس تۇتقا ەتىپ، رەفورمانى يگەرىپ، حاۋىپسىزدىككە كەپىلدىك ەتىپ، قىزمەت وتەۋدى ساپالىلاندىرىپ، ەسىك اشۋدى جەبەپ، شينجياڭنىڭ سىرتقى ساۋداسىنىڭ ورنىقتى قاداممەن مۇنان دا جوعارى دەڭگەيگە جەتۋىن ىلگەرىلەتەدى.