انار بۇلت \ شينجياڭ گازەتىنىڭ ٴتىلشىسى حي حۇڭۋي 1 ـ ايدىڭ 24 ـ كۇنى ۇرىمجىدەن حابارلايدى. اۆتونوميالى رايوندىق حالىق ۇكىمەتى اقپارات كەڭسەسى اشقان 2025 ـ جىلعى ساۋدا سالاسىنداعى تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ ساياساتى جونىندەگى قۇلاققاعىس ەتۋ ماجىلىسىنەن ۇعىسۋىمىزشا، 2025 ـ جىلى رايونىمىز ”ەكىنى جاڭالاۋ“ ساياساتىن (جابدىقتاردى كەڭ كولەمدە جاڭالاۋ جانە تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ) كۇش سالا كەڭەيتەدى ەكەن.
بيىل مەملەكەت قارجىلاي قولداۋ جاعىندا تەبىندى اناعۇرلىم ارتتىرىپ، اسا ۇزاق مەرزىمدىك زايوم قارجىسى كولەمىن ونان ارى ارتتىرادى ٴارى اۋىل شارۋاشىلىعى ماشينالارىنىڭ كەرەككە جارامايتىندارىن جاڭالاۋ بارىسىندا ماقتا تەرۋ ماشيناسى، جاڭا ەنەرگيالى قالا اۆتوبۋزى جانە قوزعالتقىش باتارەياسىن جاڭالاۋ سياقتىلارعا بەرىلەتىن قوسىمشا قاراجات ولشەمىن جوعارىلاتادى. سونىمەن بىرگە، شارتقا ۇيلەسەتىن شارۋاشىلىق تۇلعالارىنىڭ جابدىق جاڭالاۋىنا قاتىستى بانكە قارىز اقشا قورىن ورتالىق قازىنا %1.5 نەگىزدە ٴوسىمىن تولەۋ بويىنشا اسا ۇزاق مەرزىمدىك ەرەكشە زايوم قارجىسىن ورنالاستىرىپ، ۇستەمەلەپ ٴوسىمىن تولەپ، شارۋاشىلىق تۇلعالارىنىڭ جابدىق جاڭالاۋدا قارجى قۇراۋ وزىندىك قۇنىن ونان ارى تومەندەتەدى ەكەن.
قولداۋ كورسەتۋ كولەمىندە، بيىل ”ەكىنى جاڭالاۋ“ ساياساتى ونان ارى كەڭەيەدى. جابدىق جاڭالاۋ جاعىندا ونەركاسىپكە، ەنەرگياعا پايدالانىلاتىن جابدىقتار، ەنەرگيالى ەلەكتر، قاتىناس ـ تاسىمال، زات اينالىمى، قورشاعان ورتا نەگىزدىك قۇرىلعىلارى، وقۋ ـ اعارتۋ، مادەنيەت ـ ساياحات، ەمدەۋ، كونە، توزعان ليفت سياقتى سالالارعا ۇزدىكسىز قولداۋ كورسەتۋدەن سىرت، ەلەكتروندى ينفورماتسيا، ٴوندىرىس حاۋىپسىزدىگى، قۇرىلعىلى اۋىل شارۋاشىلىعى سياقتى سالالارعا دا كەڭەيىپ، كاسىپورىنداردىڭ وزىق، زەردەلى، جاسىل جابدىقتاردى جاڭالاۋىنا ٴتۇيىندى قولداۋ كورسەتىلەدى. تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ جاعىندا، شارتقا ۇيلەسەتىن مەملەكەتتىڭ 4 ـ كەزەڭدىك لاس زات شىعارۋ ولشەمىنە ۇيلەسەتىن جانار مايمەن جۇرەتىن ٴمىنىس كولىكتەر كەرەكتەن قالدىرىپ جاڭالاۋ قوسىمشا قاراجاتىن ٴوتىنىش ەتۋگە بولاتىن كونە اۆتوكولىكتەر كولەمىنە ەنگىزىلەدى؛ ٴۇي ەلەكتر جابدىقتارى ونىمدەرىندە ميكروتولقىندى پەش، سۋ تازارتقىش، ىدىس ـ اياق جۋۋ ماشيناسى، ەلەكترلى مەسكەي سىندى 4 تۇردەگى ٴۇي ەلەكتر ونىمدەرى قوسىمشا قاراجات بەرىلەتىن كولەمگە ەنگىزىلەدى، ونىڭ ۇستىنە 2024 ـ جىلى بەلگىلى تۇردەگى ٴۇي ەلەكتر جابدىقتارى ونىمدەرىنىڭ كونەسىنىڭ ورنىنا جاڭاسىن اۋىستىرۋ قوسىمشا قاراجاتىنان يگىلىكتەنگەن جەكە تۇتىنۋشىلار بيىل ۇقساس تۇردەگى ٴۇي ەلەكتر جابدىقتارى ونىمدەرىن ساتىپ السا، قوسىمشا قاراجاتتان جالعاستى يگىلىكتەنۋىنە بولادى؛ سونىمەن بىرگە، تۇتىنۋشىلاردىڭ سۇرانىسىنا ساي، قول تەلەفون، تاقتاشا كومپيۋتەر، زەردەلى قول ساعات (بىلەزىك) سىندى 3 تۇردەگى ونىمدەردى تۇڭعىش رەت قوسىمشا قاراجات كولەمىنە ەنگىزدى.
مۇنان سىرت، بيىل ”ەكىنى جاڭالاۋ“ ساياساتى قاتىناسۋ ولشەمىن اناعۇرلىم ساپالىلاندىرادى. ينتەرنەتتە، ينتەرنەتتەن تىسقارى شارۋاشىلىق تۇلعالارىنىڭ، سونداي ـ اق ۇقساماعان مەنشىك تۇزىمىندەگى، ۇقساماعان جەردە تىزىمگە تىركەلگەن، ۇقساماعان كولەمدەگى شارۋاشىلىق تۇلعالارىنىڭ قيمىلعا قاتىناسۋىنا بارىنە بىردەي مامىلە جاساپ، قولداۋ كورسەتۋدى ايقىن بەلگىلەدى ٴارى تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ قيمىلىنا قاتىناسقان شارۋاشىلىق تۇلعالارىنىڭ ٴتىزىمىن دەر كەزىندە جاڭالاپ، قاتىناسۋ ولشەمىنىڭ اناعۇرلىم ٴادىل دە ۇيلەسىمدى بولۋىنا مۇمكىندىك جاسايدى.
ۇعىسۋعا قاراعاندا، 2024 ـ جىلى اۆتونوميالى رايوندىق دامۋ جانە رەفورما كوميتەتى جەتەكشىلىك، سايكەستىرۋ رولىن بەلسەنە ساۋلەلەندىرىپ، ارناۋلى سايكەستىرۋ قىزمەت مەحانيزمىن ورناتىپ، 3 ميلليارد 174 ميلليون يۋان اسا ۇزاق مەرزىمدىك ەرەكشە زايوم قارجىسىن ٴساتتى قولعا كەلتىرىپ، اۆتونوميالى رايوننىڭ كوپ سالاداعى جابدىق جاڭالاۋىنا قولداۋ كورسەتتى ٴارى 2 ميلليارد يۋان كەلەتىن تۇتىنۋ بۇيىمدارىنىڭ كونەسىنىڭ ورنىنا جاڭاسىن اۋىستىرۋ اسا ۇزاق مەرزىمدىك ەرەكشە زايوم قوسىمشا قارجىسىن ٴبولىپ جەتكىزۋ جانە رەتتەۋ قىزمەتىن ٴساتتى تامامدادى.
اۆتونوميالى رايوندىق دامۋ جانە رەفورما كوميتەتى ەكونوميكا زەرتتەۋ ورنىنىڭ باستىعى زوۋ ليڭ مىنالاردى ٴبىلدىردى: بيىل ”ەكىنى جاڭالاۋ“ قىزمەتىن ارناۋلى سايكەستىرۋ مەحانيزمىنەن ۇزدىكسىز ويداعىداي پايدالانىپ، ٴبىر تۇتاس جوسپارلاپ سايكەستىرۋدى كۇشەيتىپ، تاراۋلار ارا سايكەسۋدى ويداعىداي ىستەپ، وڭىرلەردىڭ بىرگە ارەكەتتەنۋىن كۇشەيتىپ، بىرىككەن كۇش قالىپتاستىرىپ، رايونىمىزدىڭ ”ەكىنى جاڭالاۋ“ ساياساتىنىڭ اناعۇرلىم ويداعىداي تياناقتانىپ ونىمدىلىك كورسەتۋىن بەلسەنە ىلگەرىلەتىپ، تۇتىنۋ دەڭگەيىنىڭ جوعارىلاۋى مەن ەكونوميكانىڭ جوعارى ساپالى دامۋىن جەبەۋگە كۇش قوسادى.