انار بۇلت \ شينجياڭ گازەتىنىڭ ٴتىلشىسى حي حۇڭۋي 11 ـ ايدىڭ 27 ـ كۇنى ۇرىمجىدەن حابارلايدى. اۆتونوميالى رايوندىق ساۋدا ىستەرى مەڭگەرمەسىنەن ۇعىسۋعا قاراعاندا، 1 ـ ايدان 10 ـ ايعا دەيىن، شينجياڭنىڭ ەلەكتروندى ساۋدا ىستەرى سالاسىندا قارىشتاپ دامۋ اۋقىمى جارىققا شىعىپ، ينتەرنەتتەگى ساۋدا سوماسى سايكەس مەزگىلدەگىدەن %10.3 ارتقان، مۇنىڭ ىشىندە ينتەرنەتتەگى بولشەك ساتۋ سوماسى سايكەس مەزگىلدەگىدەن %14.2 ارتقان. ينتەرنەتتەگى بولشەك ساتۋ سوماسىندا ناقتى زاتتاردىڭ ينتەرنەتتەگى بولشەك ساتىلۋ سوماسى مەن قىزمەت وتەۋ تۇرلەرىنىڭ ينتەرنەتتەگى بولشەك ساتىلۋ سوماسى جەكە ـ جەكە سايكەس مەزگىلدەگىدەن %12.2 جانە %18.1 ارتقان.
ناقتى زاتتاردىڭ ينتەرنەتتەگى بولشەك ساتىلۋ جاعىندا ازىق ـ تۇلىك، دەنساۋلىق ساقتاۋ، ٴىنجۋ ـ مارجان، اشەكەي بۇيىمدار جانە 3C سيفرلى جابدىقتار سياقتى كاسىپتەردىڭ بەينەسى كورنەكتى بولىپ، ينتەرنەتتەگى بولشەك ساتىلۋ سوماسى جەكە ـ جەكە 24 ميلليارد 960 ميلليون يۋان، 4 ميلليارد 80 ميلليون يۋان جانە 2 ميلليارد 230 ميلليون يۋان بولدى. مۇنىڭ ىشىندە ازىق ـ تۇلىك، دەنساۋلىق ساقتاۋ سالاسىنىڭ سالىستىرماسى ەڭ جوعارى بولىپ، %64.1كە جەتتى.
سونىمەن بىرگە قىزمەت وتەۋ تۇرلەرىنىڭ ينتەرنەتتەگى بولشەك ساتىلۋىندا دا كورنەكتى ارتۋ جاعدايى جارىققا شىقتى. جەلىدەگى اس ـ سۋ، جەلىدەگى ساياحات جانە تۇرمىستىق قىزمەت وتەۋ سياقتى كاسىپتەر قىزمەت وتەۋ تۇرلەرىنىڭ ينتەرنەتتەگى ساتىلۋىندا اعالاپ العا شىعىپ، جەكە ـ جەكە %58.8تى، %21.3تى جانە %12.2تى يەلەدى. وسى كاسىپتەردىڭ دامۋى تۇتىنۋشىلاردىڭ تۇرمىس ساپاسىن جوعارىلاتىپ قانا قويماي، شينجياڭنىڭ قىزمەت وتەۋ كاسىبىنىڭ سيفرلانۋعا ويىسۋىن دا جەبەدى.
شينجياڭنىڭ مەملەكەتتىڭ اۋىل ـ قىستاقتى گۇلدەندىرۋ ستراتەگياسىنا بەلسەنە ٴۇن قوسىپ، اۋىل ـ قىستاقتاردىڭ وسى زامانعى زات جەتكىزۋ جۇيەسىن ۇزدىكسىز كەمەلدەندىرىپ، اۋىل شارۋاشىلىق ونىمدەرىنىڭ جوعارى بۋىنعا جەتكىزىلۋىن پارمەندى قامتاماسىز ەتۋىنىڭ ارقاسىندا، شينجياڭنىڭ اۋىل ـ قىستاق ەلەكتروندى ساۋداسىندا پارمەندى قوزعالىس قۋاتى تۋىندادى. ساندى مالىمەتتە كورسەتىلۋىنشە، الدىڭعى 10 ايدا شينجياڭنىڭ اۋىل ـ قىستاعىنىڭ ينتەرنەتتەگى بولشەك ساتۋ سوماسى سايكەس مەزگىلدەگىدەن %19 ارتقان، اۋىل شارۋاشىلىق ونىمدەرىنىڭ ينتەرنەتتەگى بولشەك ساتىلۋ سوماسى سايكەس مەزگىلدەگىدەن %15.3 ارتقان.
ايتا كەتۋگە تاتيتىنى، الدىڭعى 10 ايدا شينجياڭنىڭ تىكە تاراتۋ ەلەكتروندى ساۋداسى دا كورنەكتى ناتيجەگە قول جەتكىزدى. تىكە تاراتۋ ارقىلى ينتەرنەتتە بولشەك ساتۋ سوماسى 6 ميلليارد 150 ميلليون يۋان، تىكە تاراتۋ ارقىلى ينتەرنەتتە بولشەك ساتۋ مولشەرى 148 ميلليون دانا، تىكە تاراتۋ سانى 84 مىڭ رەت، تىكە تاراتۋدى كورگەندەر ٴبىر ميلليارد 140 ميلليونعا (رەت) جەتتى. بۇل ساندى مالىمەت شينجياڭنىڭ تىكە تاراتۋ ەلەكتروندى ساۋداسىنىڭ قانشالىق كۇسەت ەكەندىگىن ايگىلەپ قانا قويماي، تۇتىنۋشىلاردىڭ شينجياڭنىڭ ەرەكشە ونىمدەرىنە قۇشتارلىعى مەن مويىنداۋىن دا بەينەلەيدى.
