انار بۇلت \ شينجياڭ گازەتىنىڭ ٴتىلشىسى جاڭ يانفاڭ 10 ـ ايدىڭ 29 ـ كۇنى ۇرىمجىدەن حابارلايدى. 10 ـ ايدىڭ 29 ـ كۇنى اۆتونوميالى رايوندىق پارتكومنىڭ تۇراقتى مۇشەسى، اۆتونوميالى رايوننىڭ ۇنەمىلىك ىستەرگە جاۋاپتى ورىنباسار ٴتوراعاسى چىن ۋيجۇن ۇرىمجىدە اۋمىنعا ساياتىن كونسۋل قىزمەتى جىلدىق اۋىس ـ كۇيىس ۋاكىلدەر ۇيىرمەسىندەگىلەرمەن كەزدەستى.
چىن ۋيجۇن ۋاكىلدەر ۇيىرمەسىندەگىلەردىڭ شينجياڭعا كەلگەنىن قارسى الدى. ول بىلاي دەدى: شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، شينجياڭنىڭ قوعامى ورنىقتى بولدى، ەكونوميكاسى گۇلدەندى، حالقى تىنىش ٴومىر، شات ـ شادىمان تىرشىلىك كەشىردى، دامۋى ٴۇرتىس جاقسارۋعا بەت الدى. اۋمىننىڭ كاسىپ سالاسى ەرەكشەلىگى كورنەكتى، دامۋ باسىمدىعى ايرىقشا، جاڭا اۋمىننىڭ مادەنيەت، وقۋ ـ اعارتۋ، ساياحات سياقتى سالالارداعى سەلبەستىك كومەسكى كۇشى وراسان زور. ۋاكىلدەر ۇيىرمەسىنىڭ وسى رەتكى ساپارىندا اناعۇرلىم كوپ سەلبەستىك ورتاق ٴتۇيىنىن تاۋىپ، ەكى جەردىڭ ٴوزارا تيىمدىلىك جەتكىزىپ تەڭ يگىلىككە كەنەلۋىن جۇزەگە اسىرۋىن ٴۇمىت ەتەمىز.
اۋمىن ەرەكشە اكىمشىلىك رايونى ۇكىمەتى سالاۋات انىقتاۋ مەكەمەسىنىڭ باستىعى جوۋ ۋييىڭ مىنالاردى ٴبىلدىردى: اۋمىن گۋاڭدۇڭ _ شياڭگاڭ _ اۋمىن ۇلكەن شىعاناق رايونىنىڭ ماڭىزدى قۇرامداس بولىگى رەتىندە وزگەشە باسىمدىققا يە، شينجياڭىمەن ۇقساس دامۋ ورايىنا تولى. شينجياڭداعى ٴار سالا قايراتكەرلەرىنىڭ اۋمىنعا بارىپ اۋىس ـ كۇيىس جاساسىپ، قىزمەت تەكسەرىپ، قول ۇستاسا ەكى جەردىڭ جوعارى ساپالى دامۋىنا اناعۇرلىم كوپ ۇلەس قوسۋىن قىزۋ قارسى الامىز.
سول كۇنى سىرتقى ىستەر مينيسترلىگىنىڭ كونسۋل مەكەمەسى جانە اۋمىن ەرەكشە رايونى ۇكىمەتى قىزمەت گرۋپپاسى ۇرىمجىدە 14 ـ رەتكى اۋمىنعا ساياتىن كونسۋل قىزمەتى جىلدىق اۋىس ـ كۇيىس جيىنىن وتكىزدى.
