انار بۇلت \ شينجياڭ گازەتىنىڭ ٴتىلشىسى ياۋ گاڭ 4 ـ ايدىڭ 6 ـ كۇنى ۇرىمجىدەن حابارلايدى. 4 ـ ايدىڭ 6 ـ كۇنى 2024 ـ جىلعى شينجياڭ مادەنيەت ـ ساياحات كاسىپ سالاسى ساۋدا كورمەسى جانە 5 ـ كەزەكتى كوكتەمگى مادەنيەت ـ ساياحات ساۋدا كورمەسى (تومەندە قىسقارتىلىپ ”كوكتەمگى كورمە“ دەلىنەدى) باستالدى، ەل ٴىشى ـ سىرتىنداعى سيفرلى، زەردەلى مادەنيەت ـ ساياحات، كورىنىس ٴوڭىرى جابدىقتارى، ساياحات تاۋارلارى، قوناق ٴۇي ـ حالىقتىق تۇسەلحانا، ساياحات كووپەراتيۆتەرى، مادەني ەسكەرتكىش ـ مۇراجاي تەحنيكاسى سياقتى سالالاردان مىڭعا تاياۋ كاسىپورىن كورمەگە قاتىناستى.
وسى كەزەكتى كوكتەمگى كورمەنىڭ نەگىزگى تاقىرىبى ”جىبەك جولى تورابى، جالىندى شينجياڭ“ بولىپ، اۆتونوميالى رايوندىق مادەنيەت جانە ساياحات مەڭگەرمەسى جەتەكشىلىك ەتىپ، اۆتونوميالى رايوندىق ساياحات قوعامى مىندەتىنە الىپ وتكىزدى، 4 ـ ايدىڭ 6 ـ كۇنىنەن 8 ـ كۇنىنە دەيىن شينجياڭ حالىقارالىق ٴماجىلس ـ كورمە ورتالىعىندا وتكىزىلەدى.
وسى كەزەكتى كوكتەمگى كورمە گۋاڭدۇڭ، حاينان، سىچۋان، فۋجيان سياقتى 13 ولكە، رايون، قالانىڭ، قازاقستان، قىرعىزستان، وزبەكستان سياقتى ەلدەردىڭ مادەنيەت ـ ساياحات كاسىپورىندارىن جانە مادەنيەت ـ ساياحات تاراۋلارىن، كورىنىس وڭىرلەرىن كورمەگە قاتىسۋعا باۋرادى“. اۆتونوميالى رايوندىق ساياحات قوعامىنىڭ ورىنباسار باستىعى جاڭ شياۋيۇي بىلاي دەدى: كوكتەمگى كورمەدە تۇڭعىش رەت بوي كورسەتكەن مادەني ەسكەرتكىش، مۇراجاي كورمە اۋماعى شىنجىن قالاسى حۋاتۋ ولشەۋ ـ مەڭگەرۋ جۇيەسى شەكتى سەرىكتەستىگى، ۋحان داشۋەسى الىستان بايقاۋ ينفورماتسياسى ينجەنەريا شۋەيۋانىنىڭ ٴوندىرىس پەن وقىتۋدى توعىستىرۋ ورتالىعى سياقتى كاسىپورىندار مەن مەكەمە ـ ورىنداردى كورمەگە قاتىناسۋعا باۋراپ، كاسىپورىندار، مۇراجايلار، داشۋەلەر تىلدەسەتىن، اۋىس ـ كۇيىس جاسايتىن تۇعىر ورناتتى. زەردەلى ساياحاتتىڭ، زەردەلى مۇراجاي قۇرىلىسىنىڭ، AI تەحنيكاسىنىڭ مادەنيەت ـ ساياحات كاسىبىمەن تەرەڭ توعىسۋى دا وسى رەتكى كورمەدە ٴمان بەرىلگەن تۇيىندەردىڭ ٴبىرى بولدى.
داشياڭ بۇلتتىق زەردەلى ساندى مالىمەت جۇمىسى شەكتى سەرىكتەستىگى ۇلكەن ساندى مالىمەت، جاساندى زەردە، زات اينالىمى تورى سياقتى تەحنيكالاردى مادەنيەت ـ ساياحات قۇرىلىسىندا قولدانعان كاسىپورىن. بۇل سەرىكتەستىك مادەنيەت ـ ساياحاتتى زەردەلى باسقارۋ جۇيەسى، زەردەلى مۇراجاي سياقتى نىسانداردى الا كەلىپ، ٴمان بەرۋگە يە بولدى. ”شينجياڭدا مول مادەنيەت ـ ساياحات بايلىعى بار، جەر ـ جەردەگى مۇراجايلاردا ساقتالعان بۇيىمدار مول، تاريحي مادەنيەت قاتپارى تەرەڭ، تەحنيكالىق قۋات ۇستەۋ ارقىلى كورەرمەندەردىڭ كورىنىس تاماشالاۋ، كورمە تاماشالاۋ اسەرىن اناعۇرلىم جوعارىلاتۋدى ٴۇمىت ەتەمىز“، ـ دەدى وسى سەرىكتەستىكتىڭ زەردەلى مادەنيەت ـ ساياحات نىسانىنىڭ جاۋاپتىسى حى چينشياۋ.
جاڭ شياۋيۇي بىلاي دەپ تانىستىردى: وسى كەزەكتى كوكتەمگى كورمە مادەنيەت ـ ساياحاتتى سيفرلاندىراتىن زەردەلى قۇرىلعى جانە قىزمەت وتەۋ كاسىپ سالاسىنا باسا ٴمان بەرىپ، سيفرلى ينفورماتسيا تەحنيكاسى ارقىلى زەردەلى مادەنيەت ـ ساياحات قۇرىلىسىنا قۋات ۇستەيدى. ەل ىشىندەگى وزىق ساياحاتتى ينفورماتسيالاندىرۋ، كورىنىس وڭىرلەرىن جوسپارلاپ جۇمىس جۇرگىزۋ، جابدىقتاۋ تەحنيكاسى سياقتى كاسىپورىنداردى كەلۋگە ۇسىنىس ەتىپ، شينجياڭنىڭ جەر ـ جەرىندەگى مادەنيەت ـ ساياحات تاراۋلارى، كورىنىس وڭىرلەرى، مادەني ەسكەرتكىش، مۇراجاي، لاگەر، قوناق ٴۇي سياقتىلارمەن ارناۋلى ٴتۇيىلىسۋ قيمىلدارىن ورىستەتىپ، كورىنىس ٴوڭىرىنىڭ، مادەني ەسكەرتكىش، مۇراجايلاردىڭ جوسپارلاپ جۇمىس جۇرگىزۋىنە، قۇرىلىس دارەجەسىن وسىرۋىنە اناعۇرلىم وزىق ۇستانىم جانە تەحنيكالىق قولداۋ ازىرلەپ، ساياحات بايلىعىن ونان ارى بىرىكتىرىپ، رايونىمىزدىڭ مادەنيەت ـ ساياحات كاسىبىنىڭ سيفرلى، زەردەلى ساياحاتىنىڭ تۇتاس تۇلعالىق دەڭگەيىن جوعارىلاتتىق.
