انار بۇلت \ شينجياڭ گازەتىنىڭ ٴتىلشىسى ۋاڭ يايۇن 4 ـ ايدىڭ 1 ـ كۇنى ۇرىمجىدەن حابارلايدى. اۆتونوميالى رايوندىق تۇرعىن ٴۇي جانە قالا، اۋىل قۇرىلىسى مەڭگەرمەسىنەن ۇعىسۋىمىزشا، 2021 ـ جىلدان بەرى شينجياڭ 24 ميلليون 860 مىڭ شارشى مەترلىك قۇرىلىستى ەنەرگيا ۇنەمدەۋ بويىنشا جاڭالاعان، مۇنىڭ ىشىندە تۇرعىن ٴۇي قۇرىلىسى 17 ميلليون 730 مىڭ شارشى مەتر، الەۋمەتتىك قۇرىلىس 7 ميلليون 130 مىڭ شارشى مەتر بولعان.
جۋىق جىلداردان بەرى شينجياڭ قالا، اۋىل قۇرىلىسى سالاسىنىڭ جاسىل، تومەن كومىر قىشقىل گازدى تيپ جاڭالاپ دامۋىن جەدەل ىلگەرىلەتىپ، كونە، ەسكى شاعىن اۋماقتاردى جاڭالاۋ، قالانى كورىكتەندىرۋ، جارىقتاندىرۋ، سولتۇستىك وڭىرلەردە قىستا تازا ەنەرگيامەن جىلىنۋ، اتموسفەرانىڭ لاستانۋىنان ساقتانۋ جانە ونى وڭاۋ سياقتى نىساندارمەن ۇشتاستىرىپ، بۇرىن بار قۇرىلىس ەنەرگيا ونىمدىلىگىن جوعارىلاتۋ بويىنشا جاڭالاۋ قىزمەتىن ورنىقتى اتقاردى. جوعارى دەڭگەيدە جوبالاۋدى ۇزدىكسىز كۇشەيتىپ، «اۆتونوميالى رايوننىڭ قالا، اۋىل قۇرىلىسى سالاسىنداعى كومىر قىشقىل گازىنىڭ شىعارىلۋىن ەڭ جوعارى مانگە جەتكىزۋدى اتقارۋ جوباسىن» ورتاعا قويىپ، «نولگە جۋىق ەنەرگيا سارىپ ەتەتىن قۇرىلىستىڭ تەحنيكالىق ولشەمىن»، «الەۋمەتتىك قۇرىلىستا ەنەرگيا ۇنەمدەۋدى جوبالاۋ ولشەمىن» جاساپ، باسىپ تاراتىپ، ەنەرگيا ۇنەمدەۋ ولشەمى جۇيەسىن بىرتىندەپ كەمەلدەندىردى.
سونىمەن بىرگە، جاسىل قۇرىلىس قۇرۋ ارەكەتىن پارمەندى اتقارىپ، بۇكىل شينجياڭدا جاڭادان سالىنعان حالىقتىق قۇرىلىستار جاسىل قۇرىلىس ولشەمىن جاپپاي اتقارىپ، جاڭادان سالىنعان قۇرىلىستار %100 جاسىل قۇرىلىستىڭ نەگىزگى دارەجەسىنە جەتتى، ايماق، وبلىس، قالالار جۇلدىز دارەجەلى جاسىل قۇرىلىس بەلگىسىن تۇراقتاندىرۋ جانە جۇلدىز دارەجەلى جاسىل قۇرىلىستان ۇلگى كورسەتۋ ينجەنەريا نىسانى قۇرىلىسىن بەلسەنە ىلگەرىلەتتى. قۇرىلىسقا پايدالانىلاتىن ەنەرگيا قۇرىلىمىن ۇزدىكسىز ساپالىلاندىرىپ، اقسۋ ايماعى، قۇمىل قالاسى سياقتى 7 ايماق، وبلىس، قالادا كومىردىڭ ورنىنا ەلەكتر پايدالانۋدىڭ 1 ـ، 2 ـ مەرزىمدىك ينجەنەرياسىن ورىستەتىپ، ٴۇرىمجى قالاسىندا، سانجى حۇيزۋ اۆتونوميالى وبلىسىندا سولتۇستىك وڭىرلەردە قىستا تازا ەنەرگيامەن جىلىنۋ نىسانىن جاپپاي اتقاردى.
اۆتونوميالى رايوندىق تۇرعىن ٴۇي جانە قالا، اۋىل قۇرىلىسى مەڭگەرمەسى پارتيا باسشىلىق گرۋپپاسىنىڭ مۇشەسى، ورىنباسار مەڭگەرمە باستىعى ٴمۇتالىپ ٴالي بىلاي دەپ تانىستىردى: بۇدان بىلاي شينجياڭ ”ٴبىر شەڭبەر، ٴبىر بەلدەۋ، ٴبىر توپ“ قالا شوعىرىنىڭ جاسىل دامۋى، كورىكتى قالا ـ قالاشىق قۇرىلىسىن ىلگەرىلەتۋ، كورىكتى، جانعا جايلى اۋىل ـ قىستاق قۇرىلىسىن ىلگەرىلەتۋ، جاسىل، تومەن كومىر قىشقىل گازدى تۇرمىس ٴتاسىلىن دارىپتەۋ سياقتى ٴتۇيىندى مىندەتتەردى ارقاۋ ەتىپ، قالا قۇرىلىمى مەن ورنالاسۋىن ساپالىلاندىرىپ، جاسىل، تومەن كومىر قىشقىل گازدى الەۋمەتتىك اۋماق قۇرىپ، قۇرىلىستىڭ جاسىل، تومەن كومىر قىشقىل گازدى بولۋ دەڭگەيىن جوعارىلاتىپ، قالا قۇرىلىسىنا پايدالانىلاتىن ەنەرگيا قۇرىلىمىن ساپالىلاندىرىپ، شينجياڭنىڭ قۇرىلىس سالاسىندا كومىر قىشقىل گازىنىڭ شىعارىلۋىن ەڭ جوعارى مانگە جەتكىزۋ، كومىر قىشقىل گازىن بەيتاراپتاندىرۋ قىزمەتىن ونان ارى ىلگەرىلەتەدى.
