انار بۇلت \ شينجياڭ گازەتىنىڭ ٴتىلشىسى ما ينيڭ 3 ـ ايدىڭ 16 ـ كۇنى ۇرىمجىدەن حابارلايدى. 3 ـ ايدىڭ 15 ـ كۇنى شينجياڭ تۇڭعىش كەزەكتى شينجياڭ ونەركاسىپ كاسىپورىندارىنىڭ زەرتتەۋ ـ اشۋ بويىنشا قارجى قوسۋداعى 50 مىقتى كاسىپورىندى جاريالادى.
50 مىقتى كاسىپورىن ”سەگىز ٴىرى كاسىپ سالاسى شوعىرىندا“ تىزبەك يەسى بولعان 26 كاسىپورىندى، اۆتونوميالى رايونداعى ارنايىلاندىرىلعان، كەمەلدەندىرىلگەن، ەرەكشەلەندىرىلگەن، جاڭاشالاندىرىلعان ورتا، شاعىن 20 كاسىپورىندى، مەملەكەت دارەجەلى ارنايىلاندىرىلعان، كەمەلدەندىرىلگەن، ەرەكشەلەندىرىلگەن، جاڭاشالاندىرىلعان ”شاعىن قۋاتتى“ 7 كاسىپورىندى قامتىدى. ٴوڭىر بويىنشا قاراعاندا، ٴۇرىمجى قالاسىندا 24، سانجى حۇيزۋ اۆتونوميالى وبلىسىندا 9، قارامايلى قالاسىندا 6 كاسىپورىن بار بولىپ، جوعارىداعى 3 جەردىڭ قوسىندىسى 50 مىقتى كاسىپورىننىڭ %78ىن يەلەگەن؛ ىلە قازاق اۆتونوميالى وبلىسىنان وبلىسقا توتە قارايتىن 3 كاسىپورىن، بايىنعولين موڭعۇل اۆتونوميالى وبلىسىنان 2 كاسىپورىن، قۇمىل قالاسىنان 2 كاسىپورىن، تۇرپان قالاسىنان ٴبىر كاسىپورىن، شينجياڭ ٴوندىرىس ـ قۇرىلىس بيڭتۋانىنان 3 كاسىپورىن بار.
50 مىقتى كاسىپورىننىڭ 2022 ـ جىلعى تيجارات كىرىسى بۇكىل رايونداعى كولەمنەن جوعارى ونەركاسىپ كاسىپورىندارى تيجارات كىرىسىنىڭ %28.6ىن يەلەگەن، مۇنىڭ ىشىندە 10 ميلليارد يۋاننان جوعارى 14 كاسىپورىن، ٴبىر ميلليارد يۋاننان 10 ميلليارد يۋانعا دەيىن 15 كاسىپورىن بار.
50 مىقتى كاسىپورىننىڭ 2022 ـ جىلعى زەرتتەۋ ـ اشۋ ۇسىنىلىمىنىڭ ورتاشا كۇشەمەلىلىگى %2.16 بولىپ، بۇكىل رايونداعى كولەمنەن جوعارى ونەركاسىپتىڭ ورتاشا كۇشەمەلىلىگى %0.36 تەن 1.8 پايىز جوعارى بولعان. مۇنىڭ ىشىندە كۇشەمەلىلىگى %5 تەن جوعارى كاسىپورىن 19.
50 مىقتى كاسىپورىن قاتارىنا جينفىڭ عىلىم ـ تەحنيكا جارنا شەكتى سەرىكتەستىگى، ەرەكشە ترانسفورماتور جارنا شەكتى سەرىكتەستىگى سياقتى ٴبىر توپ ەل ىشىندە، حالىقارادا ىقپال قۋاتى بار جەتەكشى كاسىپورىندار شوعىرلانىپ عانا قالماستان، تاعى شينجياڭ شياڭرۇن جاڭا ماتەريال عىلىم ـ تەحنيكا شەكتى سەرىكتەستىگى، شينجياڭ جينشىكاڭ ٴدارى ـ دارمەك شارۋاشىلىعى شەكتى سەرىكتەستىگى سياقتى سوڭعى جىلدارى دامۋى ٴبىرشاما جىلدام ٴبىر توپ ستراتەگيالىق جاڭادان گۇلدەنگەن كاسىپ سالالارى كاسىپورىندارى مەن ارنايىلاندىرىلعان، كەمەلدەندىرىلگەن، ەرەكشەلەندىرىلگەن، جاڭاشالاندىرىلعان ورتا، شاعىن كاسىپورىندار بار.
مۇنىڭ ىشىندە شينجياڭ شياڭرۇن جاڭا ماتەريال عىلىم ـ تەحنيكا شەكتى سەرىكتەستىگى بۇكىل ەلدەگى تۇتاس تيتان كاسىپ سالاسى تىزبەگى بار بىردەن ـ ٴبىر ٴىرى حالىقتىق كاسىپورىن بولىپ، جىلىنا 20 مىڭ توننالىق تيتان جانە تيتان قورىتپاسى جاڭا ماتەريالىن ٴوندىرۋ نىسانى 2019 ـ جىلى 6 ـ ايدا وندىرىسكە قوسىلعان. سەرىكتەستىك جىلدىق ٴونىم مولشەرى 30 مىڭ توننالىق تيتان ماتەريال ٴوندىرىس بازاسىن سالماقشى، بۇل ەل ىشىندەگى ەڭ ۇلكەن تيتان جانە تيتان قورىتپاسىن زەرتتەۋ ـ اشۋ جانە ٴوندىرىس بازاسى بولماق. شينجياڭ جينشىكاڭ ٴدارى ـ دارمەك شارۋاشىلىعى شەكتى سەرىكتەستىگى جۇڭي ٴدارى ـ دارمەكتەردى، ۇلت ٴدارى ـ دارمەكتەرىن زەرتتەۋ ـ اشۋ، ٴوندىرۋ، جاڭا ٴدارى ـ دارمەكتەردى كلينيكالىق سىناقتان وتكىزۋ سياقتىلار ٴبىرتۇلعالانعان جوعارى، جاڭا تەحنيكالىق كاسىپورىن، 18 جىل ۋاقىت جۇمساپ، دەربەس ٴبىلىم مەنشىك ۇقىعى بار ادامزاتتىڭ سالاماتتىعىنا اۋىر زالال جەتكىزەتىن رەۆماتيزم تۇرىندەگى اۋرۋلاردى (يممۋنيتەتتىك اۋرۋلاردى) ەمدەيتىن جۇڭي ٴدارى ”سۋىقتى ايداپ، ىلعالدىقتى جوعالتاتىن“ جاڭا ٴدارىنى زەرتتەپ جاساپ، مەملەكەتتىڭ جاڭا ٴدارى كۋالىگىنە يە بولدى.
اۆتونوميالى رايوندىق ونەركاسىپ جانە ينفورماتسيالاندىرۋ مەڭگەرمەسى پارتيا باسشىلىق گرۋپپاسىنىڭ ورىنباسار شۋجيى، مەڭگەرمە باستىعى ابلەكىم ازەز مىنانى ٴبىلدىردى: سوڭعى جىلدارى اۆتونوميالى رايون 10 ميلليارد يۋاندىق شينجياڭ دارىندىلاردى دامىتۋ قورىن قۇرىپ، جاڭادان 2 ميلليارد يۋاندىق عىلىم ـ تەحنيكالىق قارجى ۇسىنىلىمىن كوبەيتىپ، عىلىم ـ تەحنيكادا جاڭالىق اشۋ سالاسىنداعى كوپتەگەن ٴتۇيىندى قىزمەتتەر ماڭىزدى ىلگەرىلەۋشىلىكتەرگە قول جەتكىزدى. مەملەكەت دارەجەلى كاسىپورىنداردىڭ 26 تەحنيكالىق ورتالىعى، مەملەكەت دارەجەلى ارنايىلاندىرىلعان، كەمەلدەندىرىلگەن، ەرەكشەلەندىرىلگەن، جاڭاشالاندىرىلعان ”شاعىن قۋاتتى“ 51 كاسىپورىن، مەملەكەتتىك ٴتۇيىندى 6 تاجىريبەحانا بار، ”فوتوۆولتتىق ماتەريالدار جانە باتەريا تاجىريبەحاناسى“، ”حۋايروۋ تاجىريبەحاناسى شينجياڭ بازاسى“ بەكىتۋدەن ٴوتىپ، سالىناتىن بولدى.
”اۆتونوميالى رايوننىڭ ’سەگىز ٴىرى كاسىپ سالاسى شوعىرىن‘ جانە 36 ٴتۇيىندى كاسىپ سالاسى تىزبەگىن ارقاۋ ەتىپ، 50 مىقتى كاسىپورىننىڭ ۇلگى بولۋ جانە جەتەكتەۋ رولىن ساۋلەلەندىرىپ، ونەركاسىپ كاسىپورىندارىنىڭ زەرتتەۋ ـ اشۋ ۇسىنىلىم سەرپىنىن ارتتىرۋىن قولداپ، جاڭالىق اشۋ جەتىستىكتەرىن شىعارۋدى جانە كەڭەيتۋدى جەدەلدەتىپ، رايونىمىزدىڭ ونەركاسىپ تەحنيكاسىنىڭ جاڭالىق اشۋ قۋاتىن كورنەكتى كۇشەيتۋدى ىلگەرىلەتەمىز“، ـ دەدى ابلەكىم ازەز.
