انار بۇلت \ شينجياڭ گازەتىنىڭ ٴتىلشىسى رىن حۋا 3 ـ ايدىڭ 15 ـ كۇنى ۇرىمجىدەن حابارلايدى. 3 ـ ايدىڭ 15 ـ كۇنى اۆتونوميالى رايوندىق بازاردى باقىلاۋ ـ باسقارۋ مەكەمەسى ٴۇرىمجى قالالىق بازاردى باقىلاۋ ـ باسقارۋ مەكەمەسى سياقتى ورىندارمەن بىرلەسىپ، ٴۇرىمجى ٴماجىلىس ـ كورمە ورتالىعىنىڭ ۋيۋە الاڭىندا اۆتونوميالى رايوننىڭ جانە ٴۇرىمجى قالاسىنىڭ تۇتىنۋدىڭ ومىرشەڭدىك كۇشىن قاۋلاتۋ ”15 ـ ناۋرىز“ تۇتىنۋشىلاردىڭ ۇقىق ـ مۇددەسىن قورعاۋ جينالىسىن وتكىزدى.
اۆتونوميالى رايوندىق بازاردى باقىلاۋ ـ باسقارۋ مەكەمەسىنىڭ 1 ـ دارەجەلى شارلاۋشىسى گاۋ جياندۇڭ تانىستىرىپ بىلاي دەدى: بيىل 3 ـ ايدان 12 ـ ايعا دەيىن اۆتونوميالى رايون تۇتاس رايون كولەمىندە ”تۇتىنۋ ورتاسى قۇرىلىسى جىلى“ قيمىلىن ورىستەتەدى. مۇندا الاڭسىز تۇتىنۋعا ۋادە بەرگەن كاسىپورىنداردى جەتىلدىرۋ، تۇتىنۋ ۇقىعىن قورعاۋعا قىزمەت وتەۋ پۋنكتى قۇرىلىسى، ”زورەكەر تارماقتارعا“ قاتاڭ سوققى بەرۋ سياقتى 13 ٴتۇرلى ٴتۇيىندى مازمۇن قامتىلادى. سونىمەن بىرگە 2024 ـ جىلعى حالىق تۇرمىسى سالاسىنداعى دەلولاردى تەكسەرىپ ٴبىر جاقتى ەتۋ ”تەمىر جۇدىرىق“ ارەكەتىن باستاپ اتقارىپ، گاز وشاق، ەلەكترلى ۆەلوسيپەد، بالالار ويىنشىقتارى، ازىق ـ تۇلىك سياقتى سالالارداعى تۇتىنۋشىلاردىڭ ۇقىق ـ مۇددەسىنە زيان جەتكىزەتىن 12 ٴتۇرلى زاڭعا قايشى ارەكەتكە ٴتۇيىندى تۇردە سوققى بەرەدى. ٴبىر قىدىرۋ پارمەندى شارالار ارقىلى حاۋىپسىز، الاڭسىز تۇتىنۋ ورتاسىن قالىپتاستىرىپ، تۇتىنۋ سەنىمىن جوعارىلاتىپ، تۇتىنۋدىڭ ومىرشەڭدىك كۇشىن قاۋلاتادى.
2023 ـ جىلى تۇتاس رايون 12 ٴتۇيىندى كاسىپ سالاسىندا الاڭسىز تۇتىنۋعا ۋادە بەرگەن كاسىپورىننان 2904ىن جەتىلدىردى؛ ينتەرنەت جەلىسىنەن تىس زات ساتىپ العاندا زاتتى سەبەپسىز قايتارۋعا ۋادە بەرگەن ورىننان 1429ىن جەتىلدىرىپ، 423 مىڭ زاتتى قايتارىپ، قايتارىلعان زات سوماسى 90 ميلليون 677 مىڭ يۋانعا جەتتى؛ بازاردى باقىلاۋ ـ باسقارۋ تاراۋلارى قابىلداعان ارىز ـ شاعىم، اشكەرەلەۋ، كەڭەس سۇراۋ ٴىسى 513 مىڭ 900 بولىپ، تۇتىنۋشىلاردىڭ 84 ميلليون 952 مىڭ 900 يۋان ەكونوميكالىق زيانىن قايتارىپ اكەلدى.
جينالىس تاعى 2023 ـ جىلعى تۇتىنۋشىلاردىڭ زاڭدى ۇقىق ـ مۇددەسىنە زيان جەتكىزگەن 10 ٴىرى تيپتىك دەلونى جاريالاپ، جالعان، جارامسىز تاۋارلاردى شوعىرلى جويۋ جاعدايىن تانىستىردى.
ۇعىسۋعا قاراعاندا، ”15 ـ ناۋرىز“ كەزىندە اۆتونوميالى رايوندىق بازاردى باقىلاۋ ـ باسقارۋ مەكەمەسى تاعى جەر ـ جەردەگى بازاردى باقىلاۋ ـ باسقارۋ تاراۋلارىنىڭ ٴتۇرلى فورماداعى ۇگىت قيمىلىن ورىستەتۋىنە جەتەكشىلىك ەتىپ، تۇتىنۋ ٴبىلىمى مەن ۇقىق قورعاۋ ٴبىلىمىن جالپىلاستىرىپ جانە تاراتىپ، تۇتىنۋ تۋرالى ەسكەرتۋ بەرۋ، ساقتاندىرۋ حابارلارىن دەر كەزىندە جاريالاعان.
