2 ساعاتتا 7.5 كيلومەتر جەردى شارلاپ تەكسەرەدى، قىزمەت قاراپايىم بولعانىمەن جاۋاپكەرشىلىك اۋىر
انار بۇلت \ شينجياڭ گازەتىنىڭ ٴتىلشىسى سى لۋلۋ
”شارلاپ تەكسەرۋ كۇندەلىكتى قىزمەت بولعانىمەن، جاۋاپكەرشىلىك اۋىر، ٴبىر رەتكى تولىق شارلاپ تەكسەرۋگە 2 ساعات ۋاقىت جۇمسالادى، بارىپ ـ كەلگەن جول ارالىعى 7.5 كيلومەتر.“ 2 ـ ايدىڭ 1 ـ كۇنى جۇڭگو كومىر توبى ىلە ەنەرگيا اشۋ شەكتى سەرىكتەستىگى ەلەكتر ەكىنشى رەت تەكسەرۋ، رەمونتتاۋ ٴبانىنىڭ ورىنباسار باستىعى جاڭ نانحۇي تىلشىگە وسىلاي دەدى. ونىڭ جانىنداعى 2 ەلەكتر اگراگاتتارى گۇرىلدەپ جۇمىس ىستەپ، كۇشتى ەلەكتر اعىسى ەلەكتر تورى ارقىلى سان مىڭداعان وتباسىلارىنا جەتكىزىلۋدە.
تۇرعىنداردى ەلەكترمەن قامداۋدان سىرت، جۇڭگو كومىر توبى ىلە ەنەرگيا اشۋ شەكتى سەرىكتەستىگى تاعى قۇلجا قالاسىنداعى 14 ميلليون شارشى مەتر جەردى جىلۋمەن قامداۋ اۋىر مىندەتىن دە ارقالاپ وتىر، جاڭ نانحۇي مەن قىزمەتتەسى جاۋاپتى بولىپ وتىرعان شارلاپ تەكسەرەتىن جەردە 2 ماڭىزدى ەلەكتر اگراگاتتارى جانە ٴبىر قىدىرۋ ەلەكتر جابدىقتارى جۇمىس جۇرگىزەدى، بۇل جەر ەلەكتر شاڭ سورعىش جابدىعى مەن كومىر تاسىمالداۋ تاسپاسى بار ماڭىزدى ٴوڭىر. كوكتەم مەرەكەسى تاياپ قالدى، شارلاپ تەكسەرۋ كولەمىن زورايتىپ، ٴوندىرىس حاۋىپسىزدىگىن قامتاماسىز ەتۋ جاۋاپكەرشىلىگى اۋىر.
”وسى ٴبىر مەزگىلدە ەلەكتر اگراگاتتارىنىڭ كوتەرىمدىلىگى توتەنشە جوعارى بولادى، ٴبىز، ٴسوزسىز، ۇقىپتى بولۋىمىز، تيىتتەي دە اعاتتىق جىبەرمەۋىمىز كەرەك“. جاڭ نانحۇي قىزمەتتەسى جوۋ لۋسۇڭعا قاداعالاپ تاپسىرىپ جاتتى. حاۋىپسىزدىكتى شارلاپ تەكسەرۋ قاراماققا وڭاي كورىنگەنىمەن، امالياتتا توزىمدىلىك پەن دەنە قۋاتىن سىنايتىن، قۇنتتىلىقپەن ىستەلەتىن جۇمىس.
تۇتاس شارلاپ تەكسەرۋ وڭىرىندە 2 ەلەكترلى شاڭ سورعىش قۇرىلعى بار، ٴاربىرى 10 قابات بينانىڭ بيىكتىگىندەي، باسپالداقپەن شىعۋعا 10 مينۋت ۋاقىت كەتەدى، UPS جۇيەسى، ماگنيتتىك قوزدىرۋ جۇيەسى جانە قىسىمدى ارتتىرۋ پۋنكتى سياقتى ورىنداردىڭ بارلىعى شارلاپ تەكسەرۋ قىزمەتىندە ٴمان بەرىلەتىن ماڭىزدى ٴتۇيىن، تەكسەرىلگەن پارامەتر شامالارى، ساقتىق سيگنالىن تاراتا ما، جوق دەگەننىڭ بارلىعىن جاڭ نانحۇي شارلاپ تەكسەرۋ داپتەرىنە ٴبىر ـ بىرلەپ ەستەلىككە الادى.
قىستا ٴوندىرىس زاۆود ٴۇيىنىڭ تەمپەراتۋراسى ٴبىرشاما جوعارى بولادى، ٴبىر رەت شارلاپ تەكسەرىپ بولعانشا ەكەۋىنەن تەر سورعالايدى. الايدا بولمە سىرتىنىڭ تەمپەراتۋراسى نولدەن تومەن ون نەشە سەلتسي گرادۋس بولعاندىقتان، زاۆود ۇيىنەن شىققاندا ەكەۋى ”ىستىق پەن سۋىق ارالاسقان كۇندى“ بىردەي باستان كەشىرىپ، توڭعاندارىنان قالشىلداپ كەتەدى.
شارلاپ تەكسەرۋ بارىسىندا جاڭ نانحۇيدىڭ ەڭ الاڭدايتىنى ەلەكترلى شاڭ سورعىش قۇرىلعىسىنىڭ ۇستىندەگى ەلەكتر جابدىعى، ويتكەنى جابدىق بولمە سىرتىنا ورناتىلعاندىقتان، اۋا رايى سياقتى فاكتورلاردىڭ اسەرىنە ۇشىراپ، قىس ماۋسىمىندا ۇنەمى ”كىشكەنتاي توسىن ۋاقيعالار“ تۋىلادى.
”جاڭ ورىنباسار بانجاڭ، بۇل جابدىقتان بوتەن دىبىس شىعىپ تۇرعان جوق پا“؟ جوۋ لۋسۇڭ كومىر تاسىمالداۋ جابدىعىن تەكسەرگەندە جيىلىك كونۆەرتورىنىڭ دىبىسى قالىپسىز ەكەنىن بايقايدى. ەكەۋى تەكسەرىپ كورىپ، جيىلىك كونۆەرتورىنىڭ ىشىندەگى ٴبىر بولشەگىنىڭ بۇزىلعانىن بايقاپ دەرەۋ اۋىستىرادى. جيىلىك كونۆەرتورى قايتادان جۇمىس باستاپ، كورسەتكىشتەرى قالپىنا كەلگەندە، ەكەۋى قۋانعاندارىنان شاپالاق سوعادى.
”بىرنەشە كۇننەن بەرى قار جاۋدى، ٴبىز جابدىقتىڭ اينالىم جاعدايىنا كەز كەلگەن ۋاقىتتا نازار اۋدارىپ، ٴار 2 ساعاتتا ٴبىر رەت شارلاپ تەكسەرىپ، ەلەكترلى شاڭ سورعىش قۇرىلعىسىنىڭ حاۋىپسىز اينالىمىنا شىنايى كەپىلدىك ەتۋىمىز كەرەك“، ـ دەدى جاڭ نانحۇي.
جاڭ نانحۇيدىڭ ٴۇيى ماناس اۋدانىندا، قۇلجا قالاسىنان 500 نەشە كيلومەتر الىس، جوعارى قارقىندى تاس جولدا كولىكپەن 8 ساعات ٴجۇرىپ جەتۋگە بولادى. ٴتىلشى ودان كوكتەم مەرەكەسىندە ۇيگە قايتىپ مەرەكە تويلاۋ ويى بار ـ جوعىن سۇراعاندا، ول قىزمەتتەستەرىمەن بىرگە قىزمەت ورنىنان تاپجىلماي، كوكتەم مەرەكەسى كەزىندەگى قامداۋمەن قامتاماسىزداندىرۋ قىزمەتىن ويداعىداي ىستەيتىندىگىن ايتتى.
