انار بۇلت \ شينجياڭ گازەتىنىڭ ٴتىلشىسى چىن چياڭۋي 2 ـ ايدىڭ 4 ـ كۇنى ۇرىمجىدەن حابارلايدى. ٴۇرىمجى كەدەنىنەن ۇعىسۋعا قاراعاندا، 2023 ـ جىلى جۇڭگو شينجياڭىنىڭ ورتا ازياداعى 5 ەلگە باعىتتالعان ەكسپورت قۇنى 246 ميلليارد 570 ميلليون يۋان بولىپ، ەكسپورت كولەمى بۇكىل ەل بويىنشا ٴبىرىنشى ورىندى يەلەپ، سايكەس مەزگىلدەگىدەن %23.2 ارتقان.
2023 ـ جىلعى سىرتقى ساۋدانىڭ اينالىم جاعدايىنان قاراعاندا، جۇڭگو شينجياڭىنىڭ ورتا ازياداعى 5 ەلمەن اراداعى سىرتقى ساۋدانىڭ سەرپىمدىلىگى تومەندەمەگەن، ورتا ازياداعى 5 ەل ٴالى دە شينجياڭنىڭ ٴبىرىنشى ۇلكەن ساۋدا بازارى بولىپ، ەكى جاقتىڭ ەكونوميكا ـ ساۋدا الىم ـ بەرىمى كۇشتى ارتۋ تەبىنىن ساقتاعان. 2023 ـ جىلى جۇڭگو شينجياڭىنىڭ ورتا ازياداعى 5 ەلگە باعىتتالعان يمپورت ـ ەكسپورت جالپى قۇنى 283 ميلليارد 670 ميلليون يۋان بولىپ، سايكەس مەزگىلدەگىدەن %50 ارتىپ، شينجياڭنىڭ سىرتقى ساۋدا يمپورت ـ ەكسپورت جالپى قۇنىنىڭ %79.4ىن ۇستاعان.
جۇڭگونىڭ شينجياڭى ورتا ازياداعى 5 ەلمەن ىرگەلەسەدى، جۇڭگونىڭ باتىسقا ەسىك اشۋىنىڭ الدىڭعى شەبى. سوڭعى جىلداردان بەرى، ”ٴبىر بەلدەۋ، ٴبىر جولدى“ بىرگە قۇرۋ اياسىندا جۇڭگو مەن ورتا ازيا ەلدەرى اراسىنداعى ۇلاستىرۋ، تۇتاستىرۋ قارقىنى ۇزدىكسىز ارتتى. جەكە ەلدەر بويىنشا ايتقاندا، جۇڭگو شينجياڭىنىڭ الدىڭعى 3 ۇلكەن ساۋدا سەرىكتەرى قازاقستان، قىرعىزستان، تاجىكستاندارمەن بولعان يمپورت ـ ەكسپورت قۇنى جەكە ـ جەكە سايكەس مەزگىلدەگىدەن %70.8 ، %25.8 ، %93.4 ارتىپ، الدىنداعى جىلعى سول تۇستاعى شينجياڭنىڭ سىرتقى ساۋدا يمپورت ـ ەكسپورت جالپى قۇنىنىڭ %40.3ىن، %30.8ىن، %5.6ىن ۇستادى.
قازىرگى تاڭدا، جۇڭگو مەن ورتا ازيا اراسىنداعى سەلبەستىكتىڭ ۇزدىكسىز تەرەڭدەۋىنە ىلەسە، شينجياڭ دا وسى بارىستا بارعان سايىن ماڭىزدى رولىن ساۋلەلەندىرۋدە. جۇڭگو _ ەۆروپا كەزەكشى پويەزى ەلىمىزدىڭ ”ٴبىر بەلدەۋ، ٴبىر جولدى“ بىرگە قۇراتىن ەلدەرمەن ەكونوميكا ـ ساۋدا سەلبەستىگىن تەرەڭدەتۋدىڭ ماڭىزدى دانەكەرىنە اينالدى، ٴۇرىمجى قاتارلى قالالاردىڭ توراپتىق يقۋاتى دا ٴونىمدى ارتتى، باتىستى بەتكە العان ارنالىق شەكارا وتكەلدەرىنىڭ قامتاماسىز ەتۋ قابىلەتى ۇزدىكسىز جوعارىلاپ، كوپ ۇلگىدەگى بىرلەسكەن تاسىمالدىڭ جانە حالىقارالىق تاس جول تاسىمال شارتى（TIR） تاسىمالىنىڭ سيىمدىلىعى ۇزدىكسىز كەڭەيىپ، ساپاسى جوعارىلادى.
2023 ـ جىلى جۇڭگو شينجياڭىنىڭ ورتا ازياداعى 5 ەلمەن اراداعى تاس جول، تەمىر جول تاسىمالىنىڭ يمپورت ـ ەكسپورت قۇنى سايكەس مەزگىلدەگىدەن جەكە ـ جەكە %52.5 ، %44.5 ارتىپ، الدىنداعى جىلعى سول تۇستاعى شينجياڭنىڭ تاس جول، تەمىر جول تاسىمالى يمپورت ـ ەكسپورت جالپى قۇنىنىڭ %90ىن، %95.1ىن ۇستادى.
ٴۇرىمجى كەدەنىنىڭ ساناعىنا نەگىزدەلگەندە، 2023 ـ جىلى جۇڭگو شينجياڭىنىڭ ورتا ازياداعى 5 ەلگە ەكسپورت ەتكەن ماشينا ەلەكتر ونىمدەرى 73 ميلليارد 940 ميلليون يۋان بولىپ، سايكەس مەزگىلدەگىدەن %72.3 ارتىپ، ارتۋ قارقىنى ەكسپورتتىڭ جالپى تۇلعالىق دەڭگەيىنەن 23.1 پايىز تەز بولىپ، جۇڭگو شينجياڭىنىڭ ورتا ازياداعى 5 ەلگە باعىتتالعان ەكسپورت جالپى قۇنىنىڭ %30ىن ۇستادى.
شەكارا وتكەلى ساۋداسى، شەكارالىق ساۋدا سياقتى ٴداستۇرلى باسەكە باسىمدىعىن دامىتۋدان سىرت، ٴۇرىمجى كەدەنى تاعى سىرتقى ساۋدانىڭ جاڭا كاسىپ كۇيىن جەتىلدىرۋ، ساۋدا ـ ساتتىق كاسىپ سالاسىن توعىسپالى دامىتۋ سياقتى جاڭا باسىمدىققا كۇش سالىپ، ساياساتتىڭ پايداسىن جەدەل جارىققا شىعاردى.
