”شينجياڭدىق ميجيە“ ءتۇرلى - ءتۇستى جەمىس - جيدەك، كوكونىس كەسپەسىن جاساپ شىقتى
□ انار بۇلت \ شينجياڭ گازەتىنىڭ ءتىلشىسى جاڭ جىلي
”بۇل مەن جاساعان جەمىس - جيدەك، كوكونىس كەسپەسى، ءتۇرلى - ءتۇستى جەمىس - جيدەك، كوكونىس جانە ۇن ىستەتىپ، وعان قوسا كوبەلەك پىشىنىندە مانەرلەپ شىققاندىقتان، الۋان ءتۇستى كوبەلەكتەرگە ۇقسايدى“، - دەدى شينجياڭ ميجيە حيفىڭ شەكتى سەرىكتەستىگىنىڭ جاۋاپتىسى ليۋ حۇيفاڭ 2 - ايدىڭ 17 - كۇنى تىلشىگە.
ليۋ حۇيفاڭ ونسۋ اۋدانى كوكيار قالاشىعى جاڭعاق جاڭا قىستاعىندا ەرجەتكەن ”90 - جىلداردىڭ تۇلەگى“. داشۋە بىتىرگەننەن كەيىن، ول باستابىندا ەلەكتروندى ساۋدا تۇعىرىنىڭ كومەگىندە اۋىلىنىڭ جۇقا قابىقتى جاڭعاعى مەن بيڭتاڭشين الماسىن ساتتى، ونان ىلە سياقتى جەرلەردە وندىرىلگەن بالدى ساتتى. كىشكەنتاي عانا ينتەرنەت دۇكەنى ارقىلى ساپالى شينجياڭ بالىنا ءبىر ءبۇتىن بازار اشىپ، ءوزى دە تىكە تاراتۋدا زات تانىستىراتىن ينتەرنەت جۇلدىزىنا اينالدى، توراپكەرلەر شىن ىقىلاسىمەن ونى ”شينجياڭدىق ميجيە“ اتاپ كەتتى.
وسى جىلداردا ليۋ حۇيفاڭنىڭ سەرىكتەستىگى، زاۆودى جانە ماركاسى بار بولىپ، ”بالداي ءتاتتى كاسىبى“ بارعان سايىن كوركەيدى. بال اراسىن باعۋدان بال اراسى ونىمدەرىن زەرتتەپ اشۋعا، مانەرلەۋگە دەيىن، ودان شينجياڭنىڭ اۋىل شارۋاشىلىق ونىمدەرىن ينتەرنەت جەلىسىندە جانە ينتەرنەت جەلىسىنەن تىس ساتۋعا دەيىن وعان ىلەسىپ ىستەگەن جاستار 60 ادامنان استى.
قايتكەندە ”بالداي ءتاتتى كاسىپتى“ اناعۇرلىم كەڭەيتۋگە بولادى؟ ليۋ حۇيفاڭ نازارىن ادامدار كۇندەلىكتى تۇتىناتىن ۇن تاعامدارىنا اۋداردى.
”شينجياڭنىڭ جەمىس - جيدەكتەرى مەن كوكونىستەرىنىڭ ساپاسى جاقسى، لاستانباعان، قورەكتىگى مول، ولاردى كەسپەگە قوسىپ، تۇتىنۋشىلاردى ءتىپتى دە مول، وزگەشە ۇن تاعامدارىمەن قامداپ قالماستان، شينجياڭنىڭ جەمىس - جيدەك، كوكونىسىنىڭ جانە استىعىنىڭ ۇستەمە قۇنىن جوعارىلاتادى“، - دەدى ليۋ حۇيفاڭ.
بيىلعى كوكتەم مەرەكەسى وتەر - وتپەستەن، ليۋ حۇيفاڭنىڭ اقسۋ قالاسىنا ورنالاسقان مانەرلەۋ زاۆودى سىناق رەتىندە ءوندىرىس باستادى. تەحنيكالىق قىزمەتكەرلەر ۇننىڭ ىشىنە جەرگىلىكتى ورىندا وندىرىلگەن شىرعاناق، شانياۋ، شامعۇر، ءسابىز، بوساي، اسقاباق سياقتى جەمىس - جيدەك، كوكونىستەردى ارالاستىرعان سوڭ ماشينامەن مانەرلەپ جاي كەسپە، كوبەلەك ءپىشىندى كەسپە، تەڭىز ۇلۋى ءپىشىندى كەسپە، قۋىس كەسپە سياقتىلاردى جاساپ شىقتى، بۇل ۇن تاعامدارى ادەمى تابيعي رەڭدە بولۋمەن بىرگە، وعان تاعى ۇقساماعان قورەكتىك قۇرامدار قوسىلدى.
قازىر ليۋ حۇيفاڭ جەمىس - جيدەك، كوكونىس كەسپەسى ونىمدەرىن قاتىستى تاراۋلاردىڭ ساراپتاۋىنا وتكىزدى، ساراپتاۋدا تولىمدى بولعان سوڭ مولىنان وندىرمەكشى.
ونىمدەرى بازارعا شىعارىلماي جاتىپ، حاباردار بولعان ءىشىنارا توراپكەرلەر وعان الدىن الا تاپسىرىس بەرە باستاپتى. مولشەرلەۋىنشە، وندىرىسكە كىرىسكەننەن كەيىن، كۇنىنە وندىرەتىن 200 − 300 كيلوگرام جەمىس - جيدەك، كوكونىس كەسپەسى ساتۋعا جەتپەي قالاتىن كورىنەدى، ليۋ حۇيفاڭ سوڭعى جارتى جىلدا تاعى ءبىر ءوندىرىس جەلىسىن كوبەيتۋدى جوسپارلاپ وتىر ەكەن.
”اۋىلىمنىڭ ءتىپتى دە كوپ ادامدارىن جۇمىستانۋعا باستايتىندىعىمدى، اۋىلداستارىمنىڭ اۋىل شارۋاشىلىعى قوسىمشا ونىمدەرىن ساتۋ ارناسىن ىركىلىسسىزدەندىرۋگە كومەكتەسە الاتىندىعىمدى ويلاعاندا، تۇلا بويىمدى كۇش - قۋات كەرنەگەندەي بولامىن“، - دەدى ليۋ حۇيفاڭ. گۇل جازيرالى كوكتەم كەلگەن سوڭ، ول تاعى دا اتىز اراسىنا بارىپ جالبىز، جۇمىرشاق سياقتىلاردى تەرىپ، اۋىلىنىڭ وسىناۋ مول بايلىعىن جەمىس - جيدەك، كوكونىس كەسپەسىنە سىڭىرمەكشى ەكەن.
