ما شيڭرۇي، ەركىن تۇنياز قازاقستاننىڭ جۇڭگودا تۇراتىن باس ەلشىسى نۇرىشەۆپەن جانە ونىڭ ساپارلاستارىمەن كەزدەستى

ما شيڭرۇي، ەركىن تۇنياز قازاقستاننىڭ جۇڭگودا تۇراتىن باس ەلشىسى نۇرىشەۆپەن جانە ونىڭ ساپارلاستارىمەن كەزدەستى

　　نۇرلان ءابىلماجىن كەزدەسۋگە قاتىناستى

　　انار بۇلت \ شينجياڭ گازەتىنىڭ ءتىلشىسى ۋاڭ شيڭرۇي 3 - ايدىڭ 17 - كۇنى ۇرىمجىدەن حابارلايدى. اۆتونوميالى رايوندىق پارتكومنىڭ شۋجيى ما شيڭرۇي، اۆتونوميالى رايوننىڭ ءتوراعاسى ەركىن تۇنياز 3 - ايدىڭ 17 - كۇنى ۇرىمجىدە قازاقستاننىڭ جۇڭگودا تۇراتىن باس ەلشىسى نۇرىشەۆپەن جانە ونىڭ ساپارلاستارىمەن كەزدەسىپ، ەكى ەلدىڭ مەملەكەت باسشىلارىنىڭ ماڭىزدى ورتاق تانىمىن تياناقتاندىرۋ، ەكى جاقتىڭ دوستىق بارىس - كەلىسىن، ەكونوميكا - ساۋدا سەلبەستىگىن، گۋمانيتارلىق اۋىس - كۇيىسىن ونان ارى تەرەڭدەتۋ جانە جەبەۋ سياقتى قىزمەتتەر جونىندە ىشكەرىلەي پىكىرلەستى.

　　اۆتونوميالى رايوندىق ساياسي كەڭەستىڭ ءتوراعاسى نۇرلان ءابىلماجىن كەزدەسۋگە قاتىناستى.

　　ما شيڭرۇي اۆتونوميالى رايوندىق پارتكوم مەن ۇكىمەت اتىنان، نۇرىشەۆتىڭ جانە ونىڭ ساپارلاستارىنىڭ اۋىس - كۇيىس جاساسۋ، ءتۇيىلىستىرۋ، دوستىق سەلبەستىكتى تەرەڭدەتۋ ءۇشىن شينجياڭعا كەلگەندىگىن قارسى الاتىنىن ءبىلدىردى. ول بىلاي دەدى: بىلتىر 9 - ايدا ءتوراعا شي جينپيڭ قازاقستاندا مەملەكەتتىك ساپاردا بولىپ، ەكى ەلدىڭ مەملەكەت باسشىلارى جۇڭگو مەن قازاقستاننىڭ جان - جاقتىلى سەلبەستىگىنىڭ جاڭا جوباسىن بىرگە كەسكىندەپ، جۇڭگو مەن قازاقستاننىڭ ماڭگىلىك جالپى بەتتىك ستراتەگيالىق سەرىكتەستىك قارىم - قاتىناسىن ۇزدىكسىز بەكەمدەۋگە، ءار سالاداعى سەلبەستىگىنىڭ قارىشتاپ دامۋىنا جەتەكشىلىك ەتتى جانە ونى ىلگەرىلەتتى. كەزەكتە، شي جينپيڭ جولداستى ۇيتقى ەتكەن پارتيا ورتالىق كوميتەتىنىڭ پارمەندى باسشىلىعىندا، جىبەك جولى ەكونوميكالىق بەلدەۋى وزەكتى رايونىنىڭ جوعارى ساپالى دامۋىن جەدەل ىلگەرىلەتىپ، قۇدىرەتتى ەل قۇرىلىسىنىڭ، ۇلتتى گۇلدەندىرۋدىڭ جاڭا جورىعىندا جۇڭگونىڭ شينجياڭى جۇڭگو ۇلگىسىندەگى وسىزامانداندىرۋ قۇرىلىسىن بەلسەندى ىلگەرىلەتۋدە. جۇڭگو مەن قازاقستان تاۋ - وزەندەرى تۇتاسقان، ەتەنە بايلانىسقان جاقسى كورشىلەر، جاقسى دوستار، جاقسى سەرىكتەستەر، قازاقستان جىبەك جولى ەكونوميكالىق بەلدەۋى باستاماسى العاش العا قويىلعان جەر جانە وعان قاتىناسقان ماڭىزدى ەل رەتىندە، جۇڭگو شينجياڭىنىڭ سىرتقا ەسىك اشۋى مەن سەلبەسۋىندەگى ماڭىزدى وبيەكتىسى ەسەپتەلەدى، ەكى جاقتىڭ سەلبەستىك قاتىناسى تىعىز، نەگىزى بەرىك، كەلەشەگى كەڭ. ەكى جاقتىڭ ەكى ەلدىڭ مەملەكەت باسشىلارى كەلىسكەن ماڭىزدى ورتاق تانىمدى تىزە قوسا ويداعىداي تياناقتاندىرىپ، ”ءبىر بەلدەۋ، ءبىر جول“ باستاماسى العا قويىلعاندىعىنىڭ 10 جىلدىعىن وراي ەتىپ، دامۋ تۇعىرىن اناعۇرلىم كەڭەيتىپ، ءوز ارتىقشىلىقتارىن اناعۇرلىم ساۋلەلەندىرىپ، ەكى جاقتىڭ ءار دەڭگەيدەگى دوستىق بارىس - كەلىسىن كۇشەيتىپ، ءوندىرىس قۋاتى سەلبەستىگىن جانە سىرتقا قارجى قوسۋدى تەرەڭدەتىپ، ۇلاستىرۋ - تۇتاستىرۋ قۇرىلىسىن ىلگەرىلەتىپ، قورعاس، الاتاۋ ساعاسى سياقتى شەكارا وتكەلدەرىنىڭ جانە شەكارا اتتاعان تاسىمالدىڭ كومەسكى كۇشىن ونان ارى ايگىلەپ، ەكونوميكا - ساۋدا سەلبەستىگىنىڭ دەڭگەيىن جوعارىلاتىپ، سيفرلى فينانس، ەلەكتروندى ساۋدا، جاسىل ەنەرگيا سياقتى سالالارداعى جاڭا ارتۋ ءتۇيىنىن بەلسەنە جەتىلدىرىپ، دوس قالالار قارىم - قاتىناسىنىڭ دەڭگەيىن ۇزدىكسىز جوعارىلاتىپ، دامىتىپ، مادەنيەت - ساياحات جاعىنداعى اۋىس - كۇيىستى، سەلبەستىكتى جەبەپ، جۇڭگو − قازاقستان قارىم - قاتىناسىن ۇزدىكسىز تەرەڭدەتۋگە تىڭ ۇلەس قوسۋىن ءۇمىت ەتەمىن.

　　نۇرىشەۆ مىنالاردى ءبىلدىردى: تاياۋدا عانا اياقتاعان جۇڭگونىڭ مەملەكەتتىك ەكى ماجىلىسىندە ءبىر قىدىرۋ كەلەلى شەشىم جاسالدى، بۇل جۇڭگو ەكونوميكاسىنىڭ، قوعامىنىڭ جوعارى ساپالى دامۋىن ىلگەرىلەتۋگە جاڭا قوزعاۋشى كۇش ۇستەيدى. قازىر قازاقستان − جۇڭگو ەكى ەل وزدەرىنىڭ وسىزامانداندىرۋ قۇرىلىسىن جەدەل ىلگەرىلەتۋدە، قازاقستاننىڭ جۇڭگونىڭ شينجياڭىمەن سەلبەستىكتى اناعۇرلىم كۇشەيتۋ ويى وتە ايقىن. ەكى جاقتىڭ سەلبەستىكتى، اۋىس - كۇيىستى اناعۇرلىم تەرەڭدەتىپ، شەكارا ساۋداسىن جانە قارجى قوسۋ سەلبەستىگىن ۇزدىكسىز كۇشەيتىپ، جۇڭگو − قازاقستان قورعاس حالىقارالىق شەكارالىق سەلبەستىك ورتالىعى سياقتى تۇعىرلاردىڭ دەڭگەيىن تىنباي جوعارىلاتىپ، سەلبەستىك ءورىسىن ۇزدىكسىز كەڭەيتىپ، ەكى جاقتىڭ ءار سالاداعى سەلبەستىگىن ىلگەرىلەتۋدە اناعۇرلىم كوپ ماندىك جەتىستىككە قول جەتكىزۋىن ءۇمىت ەتەمىن. نۇرىشەۆ قازاقستان مەن جۇڭگونىڭ ساۋدا جۇمىسىنداعى اۋىل شارۋاشىلىعى ونىمدەرى جاسىل ارناسى قۇرىلىسى، تەمىر جول شەكارا وتكەلى تاسىمالىن كۇشەيتۋ، ادامداردىڭ بارىس - كەلىسىن جەبەۋ، مادەنيەت - ساياحات اۋىس - كۇيىسىن كۇشەيتۋ سياقتى ەكى جاق كوڭىل ءبولىپ وتىرعان ماسەلەلەر جونىندە ۇسىنىس قويدى.

　　چىن ۋيجۇن، قادەن كابەن، چىن ميڭگو، سۇن حۇڭمەي قاتارلىلار كەزدەسۋگە قاتىناستى.