وسى اپتادا سۋىق اعىس جانداندى، ۇرىمجىدە اپتانىڭ ءبىرى سەبەزگى جاڭبىر جاۋدى، اپتا سوڭىندا تاعى دا سەبەزگى جاڭبىر جاۋىپ، سوڭى قارعا اينالىپ، تەمپەراتۋرا قايتادان نولدەن تومەنگە تۇسەدى. بۇل رەتكى سۋىق اعىستا قاردىڭ جاۋۋ مولشەرى ٴبىرشاما زور بولىپ، تەمپەراتۋرا كورنەكتى تومەندەپ، قالانىڭ اينالىمىنا، جول قاتىناسىنا بەلگىلى ىقپال جاسايدى، قاتىستى تاراۋلار مەن بۇقارا الدىن الا ساقتانۋى كەرەك.
اۆتونوميالى رايوندىق اۋا رايى مەكەمەسى 3 ـ ايدىڭ 14 ـ كۇنى جاريالاعان ماڭىزدى اۋا رايىنان الدىن الا مالىمەتتە كورسەتىلۋىنشە، مەجەمەن 3 ـ ايدىڭ 16 ـ كۇنى كۇندىزدەن 19 ـ كۇنى تۇنگە دەيىن، ورتا ازياداعى الاسا اۋا ءيىرىمىنىڭ ۇزدىكسىز ىقپالىنان، سولتۇستىك شينجياڭنىڭ باسىم كوپ وڭىرلەرىندە كورنەكتى جاڭبىر جاۋىپ، سوڭى قارعا اينالادى، تەمپەراتۋرا تومەندەپ، بوران سوعادى ەكەن، ىلە وبلىسىنىڭ تاۋلى ٴوڭىرى، بۇراتالا وبلىسىنىڭ باتىس بولەگى، تارباعاتاي ايماعىنىڭ سولتۇستىگى، التاي ايماعىنىڭ سولتۇستىك تاۋلى رايوندارىنداعى ٴىشىنارا جەرلەردە نوسەر نەمەسە قالىڭ قار جاۋىپ، ىلە وبلىسىنىڭ تاۋلى رايوندارىندا، التاي ايماعىنىڭ تاۋلى رايوندارىندا، ٴۇرىمجى قالاسىنىڭ تاۋلى رايوندارىندا، سانجى وبلىسىنىڭ تاۋلى رايوندارىندا قاردىڭ قالىڭدىعى 15 - 25 سانتيمەترگە جەتەدى ەكەن؛ جەل وتىندەگى جەل كۇشى 10 بال اينالاسىندا بولىپ، وڭتۇستىك شينجياڭداعى ويپاتتاردىڭ كوپ بولەگىندە قۇمدى بوران سوعادى؛ سولتۇستىك شينجياڭنىڭ كوپ ءبولىم وڭىرلەرىندە، قۇمىل قالاسىنىڭ سولتۇستىگىندە ەڭ تومەنگى تەمپەراتۋرا 10 - 8 سەلتسي گرادۋس تومەندەپ، ٴىشىنارا وڭىرلەرگە سۋىق اعىس كىرەدى؛ سولتۇستىك شينجياڭ جازىعىنىڭ كوپ بولەگىنىڭ ەڭ تومەنگى تەمپەراتۋراسى نولدەن تومەن ℃5تان نولدەن تومەن ℃ 10 قا دەيىن تومەندەپ، تاۋلى رايونداردىڭ تەمپەراتۋراسى نولدەن تومەن℃ 10تان نولدەن تومەن ℃ 20 قا دەيىن تۇسەدى ەكەن.
الدىن الا مالىمەتكە نەگىزدەلگەندە، ورتالىق قالا رايونىندا 18 - كۇنى كەشتەن 19 - كۇنى كۇندىزگە دەيىن سەبەزگى جاڭبىر جاۋىپ، سوڭى قارعا اينالادى، قاردىڭ قالىڭدىعى 5 - 10 سانتيمەترگە جەتەدى ٴارى 5 بال اينالاسىندا باتىس سولتۇستىك جەلى سوعىپ، تەمپەراتۋرا 5 سەلتسي گرادۋستان جوعارى تومەندەيدى ەكەن، قار جاۋعاننان كەيىن، قالا رايونىنىڭ ەڭ تومەنگى تەمپەراتۋراسى نولدەن تومەن ℃ 5تان نولدەن تومەن ℃ 7 قا دەيىن تۇسەدى.
اۆتونوميالى رايوندىق اۋا رايى مەكەمەسى مىنانى ەسكەرتتى: وسى رەتكى سۋىق اعىس بارىسىندا ەگىن، مال شارۋاشىلىق ٴوندىرىسى، جول قاتىناسى، قالا اينالىمى، ساياحات سياقتىلارعا ٴتيىمسىز ىقپال جاسالادى، ىلە وبلىسىنىڭ تاۋلى ٴوڭىرى، بۇراتالا وبلىسىنىڭ باتىس بولەگى، تارباعاتاي ايماعىنىڭ سولتۇستىك بولەگىنىڭ، تيانشان تاۋلى رايونىنىڭ ارالاسپا تيپتەگى تاسقىنىنان جانە التاي ايماعى تاۋلى وڭىرلەرىنىڭ ٴىشىنارا جەرلەرىندەگى قار كوشكىننەن ٴتۇيىندى تۇردە ساقتانۋ كەرەك.
