انار بۇلت \ شينجياڭ گازەتىنىڭ حابارى (ءتىلشى شيە حۇيبيان حابارلايدى) ءتىلشىنىڭ شينجياڭ اۋىل شارۋاشىلىعى اۋا رايى ستانسياسىنان ۇعىسۋىنشا، جازدىق ءبيدايدىڭ ۇيلەسىمدى ەگىس مەزگىلىندەگى اۋىل شارۋاشىلىق اۋا رايى كورسەتكىشىنە نەگىزدەلىپ، الداعى اۋا رايى كليماتىنا ۇشتاستىرىپ، شينجياڭ اۋىل شارۋاشىلىق اۋا رايى ستانسياسى 2023 - جىلى سولتۇستىك شينجياڭنىڭ باسىم كوپ ءبولىم جازدىق ءبيدايىن ەگۋ مەزگىلى ەرتە نەمەسە ءسال ەرتە بولادى دەپ مەجەلەپ وتىر.
مەجەگە نەگىزدەلگەندە، بۇراتالا موڭعۇل اۆتونوميالى وبلىسىنىڭ شىعىس بولەگى، ىلە قازاق اۆتونوميالى وبلىسىنىڭ باتىس بولەگى، قۇمىل قالاسىنىڭ يجوۋ رايونىندا 3 - ايدىڭ باس شەنىنەن 3 - ايدىڭ ورتا شەنىنە دەيىن؛ تارباعاتاي ايماعىنىڭ وڭتۇستىگى، بۇراتالا وبلىسىنىڭ باتىس بولەگى، ىلە وبلىسىنىڭ شىعىس بولەگى، سانجى حۇيزۋ اۆتونوميالى وبلىسىنىڭ باتىس بولەگىندە 3 - ايدىڭ ورتا شەنىنەن 3 - ايدىڭ سوڭىنا دەيىن؛ التاي ايماعىندا، تارباعاتاي ايماعىنىڭ سولتۇستىگى، سانجى وبلىسىنىڭ شىعىس بولەگى، قۇمىل قالاسىنىڭ سولتۇستىگىندە 3 - ايدىڭ سوڭىنان 4 - ايدىڭ سوڭىنا دەيىن جازدىق ءبيداي ەگۋگە ءبىرشاما ۇيلەسەدى.
جازدىق ءبيداي − سالقىن رايلى داقىل، بيولوگيالىق سيپاتتامالارىنا جانە ءبيداي ەگىلەتىن وڭىرلەردىڭ كليماتتىق ەرەكشەلىگىنە سايكەس، كۇندەلىكتى ورتاشا تەمپەراتۋرا ℃ 0~1 بولعان العاشقى كۇندەردە تۇقىم سىڭىرگەن دۇرىس. شينجياڭ اۋىل شارۋاشىلىق اۋا رايى ستانسياسىنىڭ اۋا رايى بويىنشا اۋىل شارۋاشىلىعىنا قىزمەت وتەۋ ماماندارى جەر - جەردىڭ كوكتەم باسىنداعى داقىلداردى ەگۋ، ەرتە ەگۋ قىزمەتىن ەرتەرەك ويداعىداي ىستەپ، قاردى بۇزىپ تۇقىم ءسىڭىرىپ، ەرتە كوكتەمدە توپىراق قۇرعاقشىلىعىنىڭ تۇقىم سىڭىرۋگە ءتيىمسىز ىقپالىنان ساقتانۋدى ۇسىنىس ەتتى.
شينجياڭ اۋا رايى ستانسياسىنىڭ ەڭ جاڭا الدىن الا مالىمەتىنە قاراعاندا، الداعى 10 كۇندە سولتۇستىك شينجياڭدا جاۋىن - شاشىن كوپ، تەمپەراتۋرانىڭ تولقۋ شاماسى ءبىرشاما جوعارى بولادى ەكەن، ونىڭ ۇستىنە الدىڭعى مەزگىلدە ءىشىنارا رايونداردا قار ءبىرشاما قالىڭ جاۋعان ەكەن، بۇل جونىندە شينجياڭ اۋىل شارۋاشىلىق اۋا رايى ستانسياسى قار ءبىرشاما جۇقا نەمەسە قار جاۋمايتىن جازدىق ءبيداي رايونىنا قاراتا، كوكتەمدە توپىراق 5 سانتيمەتر اينالاسىندا جىپسىگەن كەزدە تۇقىم ءسىڭىرۋدى؛ قاسات قار ءبىرشاما قالىڭداۋ جازدىق ءبيداي رايونىنا قار قاباتىن مەحانيكالىق نەمەسە جاساندى جولمەن ءبۇلدىرىپ، قاردىڭ ەرۋىن تەزدەتىپ، ۇيلەسىمدى مەزگىلدە ەرتە ەگۋگە كۇش سالۋدى ۇسىنىس ەتەدى. سونىمەن بىرگە، جەر - جەردىڭ سول جەردەگى اۋا رايى ستانسياسى مەن پۋنكتىنىڭ الدىن الا تۇقىم سەبۋدەن بۇرىنعى ورتا، قىسقا مەرزىمدىك اۋا رايىنان الدىن الا مالىمەتىنە سايكەس، سول جەردىڭ جەر بەدەرى، كليمات ەرەكشەلىگىنە ۇشتاستىرىپ، توپىراقتىڭ ءجىپسۋى جانە توپىراقتىڭ دىمقىلدىعى سياقتى احۋالدارعا نەگىزدەلىپ، جوعارىدا ايتىلعان تۇقىم ءسىڭىرۋ مەزگىلىن ونان ارى اشالاپ، تەڭشەۋ ءتيىس.
بىرنەشە كۇننەن بەرى، جەر ـ جەردىڭ جازدىق ءبيداي ەگۋ كەزىندەگى اۋا رايى قىزمەت وتەۋىن ويداعىداي ىستەۋ ءۇشىن، شينجياڭ اۋىل شارۋاشىلىق اۋا رايى ستانسياسى جازدىق ءبيدايعا قىزمەت وتەۋ ۇجىمىن قۇرىپ، جازدىق ءبيداي ەگۋ، مايسا شىعارۋ، سۋارۋ، ۇستەمە تىڭايتقىش بەرۋ سياقتى ءوندىرىس بۋىندارىنان باستاپ كىرىسىپ، ەگجەي ـ تەگجەيلى قىزمەت وتەۋدى ويداعىداي ىستەدى.
