تيانشان تورى – شينجياڭ گازەتىنىڭ حابارى. جۇڭگو جەر سىلكىنىسى ستانسياسى تورىنىڭ رەسمي ولشەۋىنە قاراعاندا، 1 - ايدىڭ 30 - كۇنى ساعات 7 دەن 49 مينۋت وتكەندە شينجياڭنىڭ اقسۋ ايماعى شايار اۋدانىندا 6.1 بال جەر سىلكىنگەن، سىلكىنىس ورتالىعى سولتۇستىك ەندىك 40.01 گرادۋس، شىعىس بويلىق 82.29 گرادۋسقا ورنالاسقان، سىلكىنىس قاينارىنىڭ تەرەڭدىگى 50 كيلومەتر. سىلكىنىس ورتالىعى ٴشول دالاداعى ادام جوق وڭىرگە جاتادى، سىلكىنىس ورتالىعىنا ەڭ جاقىن قىستاق شامامەن 50 كيلومەتر قاشىقتىقتا، اقسۋ ايماعىنىڭ اۋدان، قالاسىندا تۇگەلدەي سىلكىنىس اسەرى بولعان. اۆتونوميالى رايوندىق شۇعىل جاعدايعا توتەپ بەرۋدى باسقارۋ تاراۋلارىنىڭ انىقتاۋىنشا، قازىرگە دەيىن ٴولىم - ٴجىتىم جانە مال - مۇلىك شىعىنى جونىندەگى مالىمەت تاپسىرىپ الىنباعان، شايار اۋدانىنىڭ حابارلاسۋ، ەلەكترمەن قامداۋ، قاتىناس جولى سياقتى جاعدايلارى قالىپتى.
جەر سىلكىنىسى تۋىلعاننان كەيىن، اۆتونوميالى رايوندىق پارتكوم مەن ۇكىمەتتەگى نەگىزگى باسشى جولداستار ايرىقشا ٴمان بەرىپ، دەرەۋ ورنالاستىرۋ جاساپ، جەر سىلكىنىسىنە قارسى اتتانىپ، اپاتتان قۇتقارۋ شۇعىل جاعدايعا توتەپ بەرۋ قىزمەتىن كۇش سالا ويداعىداي ىستەپ، حالىق بۇقاراسىنىڭ ٴومىرى مەن مال - مۇلكىنىڭ اماندىعىنا شىنايى كەپىلدىك ەتۋدى تالاپ ەتتى. اۆتونوميالى رايون جەر سىلكىنىسىنە شۇعىل توتەپ بەرۋدىڭ 3 - دارەجەلى دابىلىن ىسكە قوستى، اۆتونوميالى رايوننىڭ وسى سالاعا جاۋاپتى باسشىلارى شۇعىل جاعدايعا توتەپ بەرۋ، جەر سىلكىنىسى، قاتىناس، سۋ يگىلىگى، تۇرعىن ٴۇي قۇرىلىسى، دەنساۋلىق ساقتاۋ، سالاماتتىق، حابارلاسۋ، ەلەكتر قۋاتى سياقتى تاراۋلاردىڭ قىزمەتكەرلەرىن باستاپ سىلكىنىس ورتالىعىنا دەرەۋ باردى.
وسى رەتكى جەر سىلكىنىسىنىڭ سىلكىنىس ورتالىعى شايار اۋدان قالاشىعىنان 141 كيلومەتر، توقسۋ اۋدان قالاشىعىنان 174 كيلومەتر، اۋات اۋدان قالاشىعىنان 177 كيلومەتر، كۇشار قالا رايونىنان 199 كيلومەتر، باي اۋدان قالاشىعىنان 202 كيلومەتر، ارال قالا رايونىنان 105 كيلومەتر، ٴۇرىمجى قالا رايونىنان 611 كيلومەتر قاشىقتىقتا. تاريحتاعى جەر سىلكىنىسى قيمىلى جاعدايىنا نەگىزدەلگەندە، سىلكىنىس ورتالىعىنىڭ ماڭىنداعى 200 كيلومەتر قاشىقتىق ىشىندە تاياۋ 5 جىلدان بەرى 3 بالدان جوعارى جەر سىلكىنىسى جيىنى 218 رەت تۋىلعان، ەڭ زور جەر سىلكىنىسى وسى رەتكى جەر سىلكىنىسى ەسەپتەلەدى.
