انار بۇلت \ شينجياڭ گازەتىنىڭ ءتىلشىسى لۋ فىڭباۋ 9 - ايدىڭ 26 - كۇنى ۇرىمجىدەن حابارلايدى. جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگىنەن ۇعىسۋعا قاراعاندا، 2013 - جىلى ”ءبىر بەلدەۋ، ءبىر جول“ باستاماسى العا قويىلعاننان بەرى، شينجياڭ تەمىر جولىندا شەكارادان كىرىپ - شىعاتىن جۇڭگو - ەۆروپا كەزەكشى پويەزدارى جىلىنا ورتا ەسەپپەن ％68 ارتقان، جۇڭگو - ەۆروپا كەزەكشى پويەزدارىنىڭ قاتىناۋ سانى بۇكىل ەلدەگىنىڭ ％2. 52ىن يەلەگەن.
”شەكارادان كىرىپ - شىعاتىن جۇڭگو - ەۆروپا كەزەكشى پويەزدارى كورنەكتى ارتتى، مۇنى شينجياڭنىڭ ءوزىنىڭ وڭىرلىك باسىمدىعى، ەكونوميكانىڭ دامۋ ومىرشەڭدىك كۇشى، نەگىزدىك قۇرىلعىلار قۇرىلىسى سەرپىنىنىڭ ۇزدىكسىز كۇشەيۋى جانە كەزەكشى پويەزداردىڭ كەدەننەن ءوتۋ ونىمدىلىگىنىڭ ۇزدىكسىز جوعارىلاۋى سياقتى فاكتورلاردان بولە قاراۋعا بولمايدى“، - دەدى جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگى زات تاسىمال ءبولىمىنىڭ ورىنباسار مەڭگەرۋشىسى لي شيڭ.
تالاي جىلدان بەرى، جۇڭگو - ەۆروپا كەزەكشى پويەزدارىنىڭ قاتىناۋ سانى، لەنياسى جىلدان - جىلعا كوبەيىپ، ”ءبىر بەلدەۋ، ءبىر جول“ قۇرىلىسىن ىلگەرىلەتەتىن ماڭىزدى دانەكەرگە، ازيا - ەۆروپا قۇرلىعى حالىقارالىق زات اينالىم تاسىمالىنداعى تىرەكتى كۇشكە اينالدى.
جۇڭگو الاتاۋ ساعاسى، قورعاس، ارليانحوت، مانجوۋلي، سۇيفىنحى بەس ۇلكەن شەكارا وتكەلى ارناسى ارقىلى شەكارادان شىعاتىن باتىس، ورتا، شىعىس سىندى ءۇش ۇلكەن ارنا جۇڭگو - ەۆروپا كەزەكشى پويەزدارىنىڭ نەگىزگى تاسىمال لەنياسىن قالىپتاستىردى. جۇڭگو - ەۆروپا كەزەكشى پويەزدارىنىڭ باتىس ارناسى بولعان شينجياڭ جۇڭگو - ەۆروپا كەزەكشى پويەزدارى ىستەرىنىڭ دامۋىندا بارعان سايىن ماڭىزدى رول اتقارۋدا.
شينجياڭ وڭىرلىك باسىمدىعىن جانە بايلىق باسىمدىعىن ساۋلەلەندىرىپ، جىبەك جولى ەكونوميكالىق بەلدەۋى وزەكتى رايونى قۇرىلىسىن قوزعاۋشى كۇش، مۇناي حيميا ونەركاسىبى، ەلەكتر، ءتۇستى مەتال، كومىر حيميا ونەركاسىبى سياقتى ەنەرگيا بايلىعى كاسىپ سالالارىن تىرەك، جاڭا ماتەريال، جاڭا ەنەرگيا، وزىق جابدىق جاساۋ سياقتى ستراتەگيالىق سيپاتتى جاڭادان گۇلدەنگەن كاسىپ سالالارىن جەتەكشى، توقىماشىلىق كيىم - كەشەك، اۋىل شارۋاشىلىعى قوسىمشا ونىمدەرىن مانەرلەۋ، ەلەكتروندى ونىمدەردى قۇراستىرۋ سياقتى ەڭبەك شوعىرلانعان كاسىپ سالالارىن ەرەكشەلىك ەتە وتىرىپ، شينجياڭ ەرەكشەلىگىنە يە، ءار ۇلت بۇقاراسىنا تيىمدىلىك جەتكىزەتىن، جوعارى ساپالى دامۋعا تىرەك بولاتىن وسى زامانعى ونەركاسىپ جۇيەسىن العاشقى ادىمدا قالىپتاستىرىپ، قارىشتاي دامىعان جۇڭگو - ەۆروپا كەزەكشى پويەزدارى ىستەرى ءۇشىن سارقىلماس قوزعاۋشى قۋات ۇستەدى.
بۇدان سىرت، شينجياڭ نەگىزدىك قۇرىلعىلار قۇرىلىسى سەرپىنىن دە ۇزدىكسىز كۇشەيتتى، گولمۇد - كورلا تەمىر جولىندا، لينحى - قۇمىل تەمىر جولىندا پويەز قاتىناۋى لانجوۋ - شينجياڭ تەمىر جولىن نەگىزگى ارنا ەتكەن ”ءبىر نەگىز، ەكى قوسىمشا“ تەمىر جول قاتىناس جۇلگەسىن قالىپتاستىردى، التاي - كوكتوعاي - جۇندۇڭ تەمىر جول تيجاراتى جوڭعار ويپاتىن اينالعان سولتۇستىك شينجياڭ اينالما لەنياسىن تۇتاستىردى، حوتان - چارقىلىق تەمىر جولىنىڭ ىسكە قوسىلىپ، تيجارات باستاۋى تارىم ويپاتىن اينالعان تەمىر جول اينالما لەنياسىنىڭ تۇتاستىرىلعاندىعىن اڭعارتتى. بيىل 6 - ايعا دەيىن شينجياڭ تەمىر جولىنىڭ تيجاراتتىق ۇزىندىعى 9091 كيلومەترگە جەتىپ، جۇڭگو - ەۆروپا كەزەكشى پويەزدارىنىڭ ءساتتى كىرىپ - شىعۋى ءۇشىن بەرىك قاتىناس نەگىزىن قالادى.
جۇڭگو - ەۆروپا كەزەكشى پويەزدارىندا شەشۋشى بۋىن بولعان الاتاۋ ساعاسى جانە قورعاس سىندى ەكى ۇلكەن تەمىر جول شەكارا وتكەلى كەزەكشى پويەزداردىڭ قاتىناۋ جوباسىن ساپالىلاندىرۋ، كەزەكشى پويەزداردىڭ قاتىناۋ ونىمدىلىگىن جوعارىلاتۋ، تاسىمال قۋاتىن ارتتىرىپ، جاڭالاۋ ينجەنەرياسىن اتقارۋ سياقتىلار ارقىلى شەكارادان كىرىپ - شىعاتىن جۇڭگو - ەۆروپا كەزەكشى پويەزدارىنىڭ قاتىناۋ سۇرانىسىن قاناعاتتاندىردى، شەكارا وتكەلىنەن قاتىناعان كەزەكشى پويەزدار سانى دا جىلدان - جىلعا ارتتى.
