حوتان - چاقىلىق تەمىر جولى، ءۇرىمجى اۋەجايىن وزگەرتىپ، كەڭەيتىپ سالۋ قۇرىلىسى نىسانى سياقتى كەلەلى نىسان قۇرىلىستارىنىڭ جاعدايى جونىندەگى اقپار جاريالاۋ ماجىلىسىنەن ۇعىسۋىمىزشا، گولمىت - كورلا تەمىر جولىنا رەليس توسەۋ جۇمىسى قاۋىرت ءجۇرىلىپ جاتىپتى، حوتان - چاقىلىق تەمىر جولى جانە ءۇرىمجى حالىقارالىق اۋەجايىن وزگەرتىپ، كەڭەيتىپ سالۋ قۇرىلىسى نىسانىنىڭ قۇرىلىسى تاياۋدا جاپپاي باستالادى ەكەن... 3 - ايدا تيانشاننىڭ تۇستىگى مەن تەرىستىگىندە قاتىناس ءتۇيىندى نىساندارىنىڭ قۇرىلىس جۇمىسى ىركەس - تىركەس قايتا باستالدى، تىڭنان باستالدى، رايونىمىز جۇمىس مەزگىلىن كەرى شەگەرىپ ورنالاستىرۋ، جۇمىس كەستەسى بويىنشا ىستەۋ سياقتى شارالار ارقىلى نىسانداردىڭ جەدەل سالىنۋىن ىلگەرىلەتتى.
3 - ايداعى التىنتاۋ كوكتەم شۋاعىنا شومدى، شينجياڭنان شىعاتىن 3 - تەمىر جول − گولمىت - كورلا تەمىر جولىنىڭ شينجياڭداعى بولىگىنىڭ قۇرىلىسى قاۋىرت جۇرىلۋدە، جاڭا توسەلگەن رەليس العا قاراي ىلگەرىلەپ بارادى. 2 - ايدىڭ اياعىنا دەيىن وسى نىسانعا جالپى 13 ميلليارد 387 ميلليون يۋان قارجى سالىندى، بۇل جالپى قارجىنىڭ ％58.6ىن ۇستايدى. ”ءبىز جۇمىس مەرزىمىن مىقتى يگەرىپ، قاۋىرت جۇمىس جۇرگىزىپ، نىساندى ەرتەرەك اياقتاتۋعا قۇلشىنامىز“، - دەدى وسى نىساننىڭ توسەنىش توسەۋ قۇرىلىس بولىگى نىسان ءبولىمىنىڭ ديرەكتورى حۋاڭ كىجۇن.
تارىم ويپاتىنداعى تەمىر جول تورىنىڭ ماڭىزدى ءبىر بولىگى رەتىندە، حوتاننان چاقىلىققا دەيىنگى تەمىر جولدىڭ حوتاننان سياباسىنا دەيىنگى باتىس بولىگىنىڭ قۇرىلىسى بىلتىر باستالدى. قازىر وسى نىساننىڭ ءتۇرلى دايىندىق جۇمىستارى قاۋىرت جۇرىلۋدە، تاياۋدا جاپپاي باستالادى. نىسان سالىنىپ بولعان سوڭ، حوتان ايماعىنداعى ءار ۇلت بۇقاراسى شينجياڭنان شىققاندا ەندىگارى ءۇرىمجىنى اينالمايدى، 1000 كيلومەتردەن استام جول قىسقارادى.
”جوعارىداعى 2 تەمىر جول سالىنىپ بولعان سوڭ، تارىم ويپاتىندا تەمىر جول تورىن قالىپتاستىرىپ قانا قويماي، وڭتۇستىك شينجياڭنان ەلىمىزدىڭ ىشكى قۇرلىعىنا توتە قاتىنايتىن تەمىر جول ۇلكەن ارناسى دا قالىپتاسىپ، وڭتۇستىك شينجياڭ ءوڭىرىنىڭ قاتىناس شارت - جاعدايىن بارىنشا جاقسارتىپ، وڭتۇستىك شينجياڭ ءوڭىرىنىڭ ەكونوميكالىق، قوعامدىق دامۋىن جەبەپ، ءار ۇلت حالقىنىڭ تۇرمىس دەڭگەيىن جوعارىلاتادى“، - دەدى اۆتونوميالى رايوندىق دامۋ جانە رەفورما كوميتەتىنىڭ ورىنباسار مەڭگەرۋشىسى لي رىن.
بۇكىل شينجياڭنىڭ اۋەجاي قۇرىلىس نىساندارىنىڭ اياق الىسى تەزدەتىلدى، بيىل التاي، قۇلجا، اقسۋ، قاشقار سياقتى 4 اۋەجايدى وزگەرتىپ، كەڭەيتىپ سالۋ نىسان قۇرىلىسى جەدەل ىلگەرىلەتىلەدى، ءۇرىمجى حالىقارالىق اۋەجايىن وزگەرتىپ، كەڭەيتىپ سالۋ نىسانى جانە كەريا اۋەجايىن جاڭادان سالۋ نىسانى باستالىپ، اۋەجاي يقۋاتىن ورنالاستىرۋ اناعۇرلىم كەمەلدەندىرىلەدى.
قازىر ءۇرىمجى حالىقارالىق اۋەجايىن وزگەرتىپ، كەڭەيتىپ سالۋ نىسانىنىڭ ءتۇرلى دايىندىق جۇمىستارى جەدەل ىستەلۋدە، تاياۋدا قۇرىلىس جاپپاي باستالادى، قۇرىلىس مەرزىمى 3 جىلعا جوسپارلاندى، 2022 - جىلى اياقتالادى. نىسان اياقتالعان سوڭ، رايونىمىزدىڭ جول - قاتىناسى مەن ساياحاتىنىڭ توعىسپالى دامۋىن ىلگەرىلەتىپ، ەكونوميكالىق ارتۋدىڭ جاڭا ۇيەگىن قالىپتاستىرادى ءارى رايونىمىزدىڭ سىرتقا ەسىك اشۋدى تەرەڭدەتۋىنە سەپتىگىن تيگىزىپ، جىبەك جولى ەكونوميكالىق بەلدەۋى وزەكتى رايونىنىڭ قاتىناس تورابى ورتالىعىن جەدەل قۇرىپ، ”كەڭىستىكتەگى جىبەك جولىن“ قالىپتاستىرادى.
كۇن جىلىنىپ، رايونىمىزدا 14 تاس جولدى جالعاستى سالۋ نىسانى تۇگەل قايتا جۇمىس باستادى، جاڭادان سالىناتىن نىسانداردىڭ دا الدىڭعى مەرزىمدىك جۇمىستارى بيىل جەدەلدەتىلىپ، شارت - جاعداي دايىندالعان نىسانداردىڭ قۇرىلىستارى باستالا بەرەدى.
لي رىن بىلاي دەدى: ءبىز نىسان قۇرىلىسىن جۇرگىزۋشى ورىنداردى ىركەس - تىركەس قۇرىلىستى قايتا باستاۋعا قۋزاپ، ناقتى قىزمەت مولشەرىن جەدەل ورىندايمىز ءارى جاڭادان جۇمىس باستاعان ءتۇيىندى نىسانداردىڭ باستالۋ شارت - جاعدايىن جەدەل تياناقتاندىرىپ، نىسان قۇرىلىسىن جەدەلدەتىپ، ”شينجياڭدى تۇتاستىرىپ، شينجياڭعا كىرۋدى، شينجياڭنان شىعۋدى تەزدەتۋ“ نىساناسىنىڭ ەرتەرەك ىسكە اسۋىن ىلگەرىلەتەمىز.
