انار بۇلت / شينجياڭ گازەتىنىڭ ءتىلشىسى لۋ فىڭباۋ، ەرىكتى ءتىلشى ۋ چي 12 - ايدىڭ 9 - كۇنى ۇرىمجىدەن حابارلايدى. جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگىنەن ۇعىسۋعا قاراعاندا، بىلتىر 12 - ايدىڭ 9 - كۇنى گولمۋد - كورلا تەمىر جولى ىسكە قوسىلعاننان قازىرگە دەيىن ءبىر جىلدا تاسىمالدانعان زات مولشەرى 10 ميلليون 728 مىڭ 500 تونناعا جەتىپ، كۇنىنە ورتا ەسەپپەن 29 مىڭ 400 توننا زات تاسىمالدانعان.
گولمۋد - كورلا تەمىر جولى ىسكە قوسىلۋدان بۇرىن وڭتۇستىك شينجياڭ وڭىرىندەگى زاتتار نەگىزىنەن لانجوۋ - شينجياڭ تەمىر جولى ارقىلى تاسىمالداناتىن. گولمۋد - كورلا تەمىر جولى ىسكە قوسىلعان سوڭ، لانجوۋ - شينجياڭ تەمىر جولى مەن لانجوۋ - شينجياڭ جوعارى جىلدامدىقتى تەمىر جول لەنياسىن نەگىزگى ارنا، قۇمىل - ىجينانى سولتۇستىك ارنا، كورلا - چارقىلىق - گولمۋدتى وڭتۇستىك ارنا ەتكەن ”ءبىر نەگىز، ەكى قانات“ قاتىناس ارناسى قالىپتاسىپ، تاسىمالداۋ قۋاتى ۇزدىكسىز جوعارىلادى.
شينجياڭ تەمىر جول تاراۋلارى تاسىمالداۋ قۇرىلىمىن ۇزدىكسىز ساپالىلاندىرىپ، گولمۋد - كورلا تەمىر جولىنىڭ ىقپال ەتۋ كولەمى ۇزدىكسىز كەڭەيىپ، بۇرىن چيڭحاي، شيزاڭدى ۇلاستىرۋدان قازىر گانسۋ، سىچۋان، حۋبەي، يۇننان سياقتى ولكەلەردى شارپىپ، وڭتۇستىك شينجياڭ وڭىرىنەن لانجوۋدان وزگە الىس جەرلەرگە تاسىمالداناتىن زاتتار بىرتىندەپ گولمۋد - كورلا تەمىر جولى ارقىلى شينجياڭنان شىعارىلىپ، بۇرىنعى لانجوۋ - شينجياڭ تەمىر جولىنىڭ تاسىمال قىسىمى ءونىمدى جەڭىلدەپ، زاتتى شينجياڭنان شىعارۋ ۋاقىتى دا 9 ساعات ۇستىندە قىسقاردى.
”قازىر وڭتۇستىك شينجياڭداعى زاتتاردىڭ گولمۋد - كورلا تەمىر جولى ارقىلى تاسىمالدانۋ سالىستىرماسى %80 − 70تەن ％95تەن استامعا جوعارىلاپ، لانجوۋ - شينجياڭ تەمىر جولىنىڭ نەگىزگى ارنالىق تاسىمال قىسىمىن جەڭىلدەتىپ قانا قالماستان، وڭتۇستىك شينجياڭداعى كاسىپورىندار وندىرگەن زاتتاردى تاسىمالداۋعا دا اناعۇرلىم كۇشتى تاسىمالدىق تىرەك ازىرلەدى“، - دەدى جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگى ورنالاستىرۋ ءبولىمى ءوندىرىس جوسپارى كەڭسەسىنىڭ ورىنباسار مەڭگەرۋشىسى جاڭ ميڭ.
بۇرىندارى وڭتۇستىك شينجياڭنان قابىلداعان زاتتار كوبىندە جەكەلەگەن ۆاگوندارمەن كەلەتىن دە، قۇمىلدىڭ شىعىس بەكەتىندە، كورلا بەكەتىندە 2 رەت قايتادان قۇرالىپ ۆاگوندارعا گرۋپپالاناتىن نەمەسە تۇتاسىمەن پويەزعا تيەلەتىن. قازىر پويەز گولمۋد - كورلا تەمىر جولى ارقىلى شينجياڭنان كىرىپ - شىعاتىندىقتان، تەك كورلا بەكەتىندە ءبىر رەت قايتا قۇرالىپ ۆاگوندارعا گرۋپپالانادى نەمەسە تۇتاسىمەن پويەزعا تيەلەدى، مۇنىمەن جۇمىس ۋاقىتى زور مولشەردە قىسقارىپ، تاسىمالداۋ كۇشى ۇنەمدەلدى.
”قۇرالعان، تۇتاس پويەز سانى بۇرىنعى كۇنىنە ورتا ەسەپپەن 5 پويەزدان كۇنىنە ورتا ەسەپپەن 22 پويەزعا ارتىپ، پويەزدىڭ جىلدام شىعىپ، جىلدام كىرۋى جۇزەگە اسىرىلدى“، - دەدى جۇڭگو تەمىر جولى ءۇرىمجى مەكەمەسى توبى شەكتى سەرىكتەستىگى كورلا پويەز ىستەرى بولىگىنىڭ ورىنباسار باستىعى شۇي بين. ونىمدىلىكتى جوعارىلاتۋ ارقىلى ءۇرىمجى باتىس بەكەتىنىڭ، قۇمىل شىعىس بەكەتىنىڭ تاسىمالداۋ قىسىمى ءونىمدى جەڭىلدەدى.
گولمۋد - كورلا تەمىر جولى ىسكە قوسىلعان سوڭ، العاشىنداعى ءار كۇنى 4 جۇپ جۇك پويەزى قاتىناۋدان قازىر كۇنىنە ورتا ەسەپپەن 11 جۇپ جۇك پويەزىنا كوبەيىپ، جول بويىنداعى وڭىرلەردىڭ وزىندىك تاسىمال قۋاتىن ءونىمدى جارىققا شىعارىپ، باتىس بولىكتىڭ ەنەرگيا، كەن ونىمدەرىنەن بىرگە يگىلىكتەنۋدى جانە تاسىمالداۋدى جەبەدى. گولمۋد - كورلا تەمىر جولى ارقىلى تاسىمالداناتىن زات تۇرلەرى دە جاڭا ىسكە قوسىلعان كەزدەگى 3 تۇردەن قازىر 75 تۇرگە كوبەيىپ، باتىس بولىك ولكە، رايونداردىڭ باسىم بايلىقتارىمەن ءوزارا تولىقتاۋىن تولىق جۇزەگە اسىردى.
زات تاسىمالى ىركىلىسسىزدەندى، جۇرتتىڭ ءجۇرىس - تۇرىسىنا قولايلى بولدى. گولمۋد - كورلا تەمىر جولى ىسكە قوسىلعان سوڭ، جاڭادان 7 جولاۋشىلار بەكەتى قوسىلىپ، جەرگىلىكتى ورىنداعى بۇقارانىڭ جولاۋشىلاۋ شارت - جاعدايى بارىنشا جاقساردى، جولاۋشىلار پويەزى العاشقى كەزدەگى اپتاسىنا 1.5 جۇپ قاتىناۋدان قازىر اپتاسىنا 3 جۇپ قاتىناپ، قاتىناۋ ارالىعى ميلاننان كورلاعا دەيىنگى ارالىقتان ميلاننان ۇرىمجىگە دەيىن ۇزارىپ، پويەز جول بويىنداعى بۇقارانىڭ جولاۋشىلاۋداعى الدىمەن تاڭدايتىن قاتىناس قۇرالىنىڭ بىرىنە اينالدى.
