انار بۇلت/شينجياڭ گازەتىنىڭ حابارى (ءتىلشى يۇي مىڭفان حابارلايدى). قالىڭ قار مەزگىلى كىرىسىمەن، ىلە-شالا سۋىق اعىس دا كەلدى. جاڭا ءبىر رەتكى سۋىق اعىستىڭ اسەرىنەن، بۇگىننەن باستاپ (12 - ايدىڭ 9 - كۇنى) ءۇرتىس 3 كۇن سولتۇستىك شينجياڭنىڭ، شىعىس شينجياڭنىڭ كوپ جەرلەرىندە اۋا كورنەكتى سۋىتادى، اۋا تەمپەراتۋراسى ۇزدىكسىز تومەندەيدى. سولتۇستىك شينجياڭنىڭ كوپ ءبولىم رايوندارى، بايىنعولين موڭعۇل اۆتونوميالى وبلىسىنىڭ سولتۇستىگى، قۇمىل قالاسىنىڭ سولتۇستىگى سياقتى جەرلەردە قار ارالاس جاڭبىر جاۋادى، بوران سوعادى، اۋا تەمپەراتۋرا 8 ~ 12 سەلتسي گرادۋس تومەندەيدى، قالىڭ كيىنىپ جىلۋ ساقتاۋعا كوڭىل بولىڭىزدەر.
بۇگىن سولتۇستىك شينجياڭنىڭ كوپ جەرلەرىندە، بايىنعولين موڭعۇل اۆتونوميالى وبلىسىنىڭ سولتۇستىگى، قۇمىل قالاسىنىڭ سولتۇستىگى سياقتى جەرلەردە ازداپ قار جاۋادى، مۇندا ىلە قازاق اۆتونوميالى وبلىسى، تارباعاتاي ايماعى، التاي ايماعى سياقتى جەرلەردىڭ ءىشىنارا وڭىرلەرى مەن سانجى حۇيزۋ اۆتونوميالى وبلىسى، ءۇرىمجى قالاسىنىڭ تاۋلى وڭىرلەرى، قۇمىل قالاسىنىڭ سولتۇستىك ءوڭىرى سىندى ءبىر ءبولىم وڭىرلەردە ورتاشا، قالىڭ قار جاۋادى، ىلە قازاق اۆتونوميالى وبلىسىنىڭ ءبىر بولىم تاۋلى وڭىرلەرىندە قارلى بوران بولادى؛ جوعارىدا ايتىلعان كوپ جەرلەردە 5 بال شاماسىندا باتىس - تەرىستىك جەلى سوعادى، سولتۇستىك شينجياڭ، شىعىس شينجياڭ جەل وتتەرىندە 8 ~ 9 بال باتىس - تەرىستىك جەلى سوعادى، 10 ~ 11 بال ۇيتقىمالى بوران سوعادى.
12 - ايدىڭ 9 - كۇنى تاڭەرتەڭ، ءۇرىمجى قالاسىندا قار جاۋا باستادى. سۋرەتتى انار بۇلت/شينجياڭ گازەتىنىڭ ءتىلشىسى جاڭ ۋاندى تۇسىرگەن
ءۇرىمجى قالاسىندا بۇگىن قىرباق قاردان ورتاشا قارعا دەيىن جاۋادى، ەڭ جوعارى اۋا تەمپەراتۋرا نولدەن تومەن 2 سەلتسي گرادۋس، ەڭ تومەن اۋا تەمپەراتۋرا نولدەن تومەن 7 سەلتسي گرادۋس، 4 ~ 5 بال باتىس - تەرىستىك جەلى سوعادى.
اۋارايى تاراۋى مىنانى ەسكەرتەدى: سولتۇستىك شينجياڭنىڭ، شىعىس شينجياڭنىڭ جەل ءوتى رايوندارىندا ۇيتقىمالى جەل كۇشى ءبىرشاما زور، ءبىر ءبولىم جەرلەردە بۇرقاسىن بولادى، بوراننىڭ تاس جول، تەمىر جول قاتىناس تاسىمالىنا جانە قالاداعى قۇرىلعىلاردىڭ حاۋىپسىزدىگىنە جاسايتىن ىقپالىنان ساقتانۋ قاجەت.
قىسقى كۇن توقىراۋى مەزگىلىنەن بۇرىن، ءبىز تۇرعان سولتۇستىك جارتى شاردا كۇندىز ۇزدىكسىز قىسقارىپ، كەش بىرتىندەپ ۇزارادى. ”قالىڭ قار، قىرباق قار مەزگىلىندە، وشاقتان قازان تۇسپەيدى“ دەگەن ءتامسىل بار، بۇل كۇننىڭ قىسقارعانى سونشالىق، 3 ۋاق تاماقتى ارت - ارتىنان ىستەيتىندەي دارەجەدە ەكەنىن بەينەلەيدى.
