ءساندى دە ءساليقالى اعاش ەسىك، ادەمى دە كەلىستى كيىم سورەسى، نازىك ناقىشتالعان ءۇي توبەسى... ءپايزاۋات اۋدانى جامباز اۋىلى گال قىستاعىنداعى ەگىنشى ءومارجان سامەتتىڭ ۇيىندە ادەمى ويۋ - ورنەك سالىنىپ ءساندى جاسالعان ءتۇرلى اعاش بۇيىمدار كىسىنى ەرەكشە باۋرايدى. 20 نەشە جىل اعاششىلىق ىستەگەن ءومارجان ەڭبەكشىل، شەبەر قوس قولىمەن ارمانداعان اۋىل - قىستاق باۋ - باقشالى تۇرمىسىن رەالدىققا اينالدىردى.
”ءۇيىمنىڭ ەڭ ۇلكەن ەرەكشەلىگى ءۇيدىڭ ءىشى - سىرتىنىڭ بارىندە قولمەن ويىلعان اعاش ويمالار بار، مىناداي ءبىر دىڭگەككە ورنەك سالۋعا 5 كۇن اينالاسىندا ۋاقىت كەتەدى“. 11 - ايدىڭ 29 - كۇنى ءومارجاننىڭ اۋلاسىنا كىرگەنىمىزدە، دىڭگەككە اينالدىرا ويىپ تۇسىرىلگەن گۇل ناقىشتارى اسا سالتاناتتى بەينەسىمەن كوز تارتتى. ءومارجان ەسىك الدىنداعى ءبىر دىڭگەكتى نۇسقاپ تۇرىپ تىلشىگە: ”مىناعان ۇقسايتىن دىڭگەكتەن ۇيدە جالپى 14 دىڭگەك بار، تەك ورنەك سالۋدىڭ وزىنە 2 ايدان استام ۋاقىت كەتتى“، - دەدى.
ۇيگە كىرگەندە جىپ - جىلى لەپ ەستى. ءاسىلى ۇيگە ەدەن ارقىلى جىلىتۋ جابدىعى ورناتىلعان ەكەن. قىستى كۇنى بولسا دا، كاريدوردىڭ ەكى شەتىندەگى 10 نەشە گۇل تۇبەكتە جاسىل وسىمدىك جايقالا ءوسىپ تۇر.ءۇيدىڭ قۇرىلىس اۋدانى 250 شارشى مەتر، 3 بولمە، 3 زال، ءبىر اسحانا، 2 تازالىق ءۇي بار، تۇلعالىق قۇرىلىمى تاس كەرپىشتەن سىرت، ەسىكتەن تەرەزەگە دەيىن، سورەدەن ءۇي توبەسىنە دەيىن اشەكەيلەنگەن 100دەي ورىنداعى اعاششىلىق جۇمىسىن تۇگەلدەي ءومارجاننىڭ ءوزى ىستەپتى.
ءۇي سالىنعالى ءبىراز جىل بولعانىمەن، ءار بولمەنىڭ اشەكەيلەنۋى ءالى جاڭا كۇيىندە تۇر، سيپاساڭىز ساۋساعىڭىزعا شاڭ جۇعار ەمەس، قۇمدى بورانى ءبىرشاما كۇشتى اۋىل - قىستاقتا بۇنداي جاعداي كوپ كەزىگە بەرمەيدى.
”شاعىن قوناق زالدىڭ توبەسىنە كەتكەن اعاش ماتەريال 5000 يۋان، مەنىڭ ونەرىم دە 5000 يۋانعا تاتيدى“. ءتىلشىنى 17 شارشى مەترلىك قوناق زالعا شاقىرعان ءومارجان ءۇي توبەسىن نۇسقاپ وسىلاي دەدى. بۇكىل ءۇيدىڭ بولمە - بولمەسىنەن، وقيات كوزىڭىز تۇسكەن تۇس - تۇستان ىجداعاتپەن ناقىشتالعان بادام گۇلى، شىرماۋىق گۇلى سياقتى ءتۇرلى گۇل - ءشوپ ورنەكتەرى كورىنىپ، كەمەلىنە كەلگەن ءمىنسىز قولونەردى تولىقتاي ايگىلەپ تۇر. ۇزاق ۋاقىتتىق جۇمىستان ءومارجاننىڭ قولىنا مۇيىزگەك قاپتاپ كەتكەندىگى، دەسەدە تىرناعىن تاپ - تازا، رەتتى العاندىعى دا ءتىلشىنىڭ كوزىنە ءتۇستى.
”تازالىق كەدەيلىك پەن بايلىقتىڭ پارقىندا ەمەس“، - دەدى ءومارجان، ءار رەت جۇمىسىن اياقتاپ ۇيگە قايتقان سوڭ، ول ەڭ الدىمەن جۋىنىپ الادى، ”ءۇي ادەمى بولۋ ءۇشىن، وندا تۇراتىن ادامدار دا ادەمى بولۋ كەرەك. ىشتەن سىرتقا دەيىن تاپ - تازا تۇرسا، ادامنىڭ وزىنە جايلى، كەلگەن مەيمانعا دا جايلى“. قاپساعاي دەنەلى ءومارجان سۇلۋلىقتى سۇيەدى. ول ەستەتيكالىق قابىلەت بولماسا، اعاششى بولۋ قيىن دەيدى.
ءومارجان بالا كەزىنەن قولونەرشىلىككە اۋەستەنگەن، 14 جاس كەزىندە وسى قىستاقتاعى ەگىنشى ابلاقارى وماردەن اعاششىلىق ۇيرەنگەن. ۇستازى وعان اعاششىلىقتىڭ ونەر ەكەندىگىن، وعان قولدىڭ ەپتىلىگىنەن سىرت، سابىر كەرەكتىگىن ايتادى. ول تۇپ - تۋرا 5 جىل ۇيرەنىپ، ۇستازى ۇيرەتكەن بارلىق اعاششىلىق ونەرىن جاتىق يگەرىپ الادى.
جاي عانا اعاش كەسەگىن ەرەكشە اسەمونەر بۇيىمىنا اينالدىرۋعا قانشالىق جۇمىس بارىسى قاجەت دەسەڭىزشى؟ اعاش تاڭداۋ، قۇرعاتۋ، ولشەۋ، كەسۋ، بوياۋ، ورنەك باسۋ، ويۋ... ءومارجان نەگىزگى جۇمىس ءتارتىبىنىڭ ءوزى ونعا تارتادى، ونىڭ ىشىندە ويۋ ەڭ قيىنى دەيدى. اعاشپەن قويان - قولتىق ارالاستىق بارىسىندا، ءومارجان ويما تۋرالى ءوز تۇسىنىگىن قالىپتاستىردى: اعاش ％100 دىم كۇيىندە بولسا، جارىلمايدى؛ ويما ويعاندا تىم كۇشەمەي لايىقتى بولسا، ورنەك وزگەرمەي قالپىن ساقتايدى؛ بىردەن - بىردەن ويىپ، ناقىش ورنەگىن قايتا - قايتا سالۋ كەرەك.
تاجىريبە توپتاعان جانە كوز اياسى كەڭەيگەن ءومارجان ءداستۇرلى قولونەرگە مۇراگەرلىك ەتۋ نەگىزىندە جاڭالىق اشىپ، كوپتەگەن ورنەكتەر جوبالاۋمەن بىرگە، بۇرىنعىداي بۇكىلدەي قولمەن ويۋدان ءبىر ءبولىمىن ماشينا ارقىلى ويۋعا ءوتىپ، جۇمىس ونىمدىلىگىن ارتتىردى. ”جاساعان ءۇي جيھازدارىمدى وڭتۇستىك شينجياڭ وڭىرىندە عانا ەمەس، سولتۇستىك شينجياڭ وڭىرىندە، ءتىپتى، بۇكىل ەلدىڭ جەر - جەرىندە پايدالانۋعا بولادى“. ءوزىنىڭ اعاششىلىق ونەرىنە ءومارجاننىڭ سەنىمى مىعىم ءارى ونەرىن ماقتانىش سانايدى.
ونەرىنىڭ جوعارىلاۋىنا ىلەسە، ءومارجاننىڭ اتاعى شىعا باستادى. قازىر جەرگىلىكتى ورىنداعىلار اعاششىلىق جۇمىسىنا شاقىرۋدان سىرت، ماڭىنداعى اۋدان - قالالاردان ونىمەن ىرىقتى بايلانىس جاسايتىندار بار. سوڭعى جىلدارى زاكاز نەگىزىنەن ءۇزىلىپ كورگەن جوق، كىرىسى دە جىلدان - جىلعا كوبەيدى.
اۋقاتتانا باستاعان ءومارجان اۋىلداستارىن ۇمىتقان جوق. 2020 - جىلى ول اعاش ماتەريالدارىن وڭدەۋ دۇكەنىن اشىپ، 5 − 6 قىستاق تۇرعىنىن جۇمىسقا الىپ، ولاردىڭ كىرىسىن ارتتىرۋىنا دەم بەردى؛ قىستاقتىڭ پارتا - ورىندىق جوندەۋىنە تەگىن كومەكتەسىپ، قيىنشىلىعى بار وتباسىلاردىڭ اقشاسىن تولەي تۇرىپ، ءۇيىن جوندەتىپ بەردى؛ مەرەكە - مەيرام كۇندەرى مەكتەپكە بارىپ حال سۇراپ، وقۋشىلارعا اقشالاي جىلۋ اتاپ كومەكتەستى. ءتىلشى وسى جىلدارى قىستاق تۇرعىندارى مەن مەكتەپكە كومەك ءۇشىن قانشا اقشا جانە بۇيىم اتادىڭىز دەپ سۇراعاندا، ءومارجان: ”باسقالارعا ىرىقتىلىقپەن كومەكتەسكەن سوڭ، ونى ەستەلىككە الۋعا بولمايدى عوي، كومەك داپتەرگە تۇسسە ءمانى وزگەرەدى!“، - دەپ جاۋاپ بەردى.
”مۇنداي جاقسى تۇرمىس كەشىرە الۋىمىز جاقسى داۋىردە جۇرگەندىگىمىزدەن. مەملەكەتتىڭ ساياساتى وسىنشاما جاقسى، قۇلشىنا بىلسەڭ، تۇرمىس جاقسارماي قايدا بارادى؟“، - دەدى ءومارجان، - ”2 بالام داشۋەدە وقىپ جاتىر. كەلەر جىلى جازدىق دەمالىستا سۋجوۋدا وقىپ جاتقان ۇلكەن قىزىم بىزگە جول باستاۋشى بولىپ وتباسىمىزبەن شاڭحاي، حاڭجوۋ، سۋجوۋ، سانيا سياقتى جەرلەرگە ساياحاتتاتىپ، وتانىمىزدىڭ كورىكتى تاۋ - وزەندەرىن جاقسىلاپ ارالاتپاقشى“.
