بيىل 18 - قىركۇيەك ۋاقيعاسى تۋىلعاندىعىنىڭ 89 جىلدىعى. 9 - ايدىڭ 18 - كۇنى تۇستەن بۇرىن قوعامداعى ءار سالا قايراتكەرلەر شىنياڭدا سالتاناتتى جينالىس اشىپ، قوڭىراۋ سوعىپ، دابىل قاعۋ سالتىن وتكىزىپ، تاريحتى ەستە بەرىك ساقتاپ، قاھارمانداردى ەسكە الدى.
ساعات 9دان 18 مينۋت وتكەندە ەسكە ءتۇسىرۋ سالتى اسقاق مەملەكەت گيمنىمەن باستالدى. ”18 - قىركۇيەك“ تاريحي مۇراجايى تاريحي قالدىق ەسكەرتكىشىنىڭ الدىندا ادامدار رەتتى ساپ تۇزەپ، ءۇنسىز قۇرمەت ءبىلدىردى. قوعامداعى ءار سالادان كەلگەن 14 ۋاكىل سالماقتى بەينەدە قوڭىراۋ تاياقشاسىن العا قاراي جىلجىتىپ، ”دابىل قوڭىراۋىن“ سوقتى. 14 رەت سوعىلعان قوڭىراۋ دابىلى اۋەدە جاڭعىرىپ، جۇڭحۋا ۇلتىنىڭ 14 جىل بويى جاپون شاپقىنشىلارىنا قارسى سوعىس جۇرگىزگەندەگى جاپا - ماشاقاتتى تاريحي بەلەستەرىن بەينەلەپ، جۇرت كوكەيىنە ۇيالاتتى.
دابىل داۋىسى كوك ءجۇزىن ءتىلىپ ءوتىپ، 3 مينۋت جاڭعىردى، كوشەلەردە اۆتوكولىكتەر جاپپاي توقتاپ، گۋدوك شالىپ، بەلگى بەردى، جاياۋلار ءجۇرىسىن توقتاتىپ، ءۇنسىز قۇرمەت ءبىلدىردى. لياۋنيڭ ولكەسىنىڭ وزگە 13 قالاسى دا ءبىر ۋاقىتتا اۋە شابۋىلىنان قورعانۋ سيگنالىن شالىپ، ەل باسىنا كۇن تۋعان وسى كۇندى بىرگە ەسكە ءتۇسىردى.
88 جاستاعى ساقا اسكەر لي ۋيبو تىلشىگە بىلاي دەدى: ”تاريح كەلمەسكە كەتكەنىمەن، ءبىراق ۇمىتۋعا بولمايدى، ويتپەگەندە سول قاھارماندارعا كىنالى بولىپ قالامىز. قازىر كۇنىمىز بارعان سايىن جاقساردى، الايدا ءبىز، ءسوز جوق، زەينەتتە دە بەينەتتىڭ بولاتىندىعىن ويلاۋىمىز، مەشەۋ بولساق كوز تۇرتكى بولاتىنىمىزدى ءار ۋاق ەستە بەرىك ساقتاۋىمىز، ىنتىماقتاسىپ، قۇدىرەتتى مەملەكەت قۇرۋىمىز كەرەك!“.
قيمىلعا قاتىناسقان شىنياڭ قالالىق 111 - ورتا مەكتەپتىڭ وقۋشىسى جاڭ حاۋيۇي بىلاي دەدى: ”وقۋشى جاس رەتىندە، ءبىز نامىسىمىز تاپتالعان سول ءبىر تاريحتى ۇمىتپايمىز، ءبىز قاھارمانداردىڭ باسىن ءباي تىگىپ، ىستىق قانىن توگۋدەي رۋحىن ۇيرەنۋ بارىسىمىزعا ءسىڭىرىپ، وتانشىلدىق سۇيىسپەنشىلىكتى وتانعا قىزمەت ەتۋ مۇراتىنا اينالدىرامىز“.
1995 - جىلدان بەرى، شىنياڭ ۇدايى 26 جىل بويى ساقتىق دابىلىن قاعىپ، 18 - قىركۇيەك ۋاقيعاسىن ەسكە ءتۇسىرىپ كەلەدى.
