8 - ايدىڭ 21 - كۇنى جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى شي جينپيڭ پاكيستاننىڭ زۇڭتۇڭى اريف الۆيگە اۋىزشا سالەم جولدادى.
شي جينپيڭ اۋىزشا سالەمىندە مىنالاردى ءبىلدىردى: الۆي زۇڭتۇڭ جۇڭگو - پاكيستان ەكونوميكالىق ءدالىزى ساياسي پارتيالارى بىرگە اقىلداسۋ مەحانيزمىنىڭ 2 - رەتكى ءماجىلىسىنىڭ اشىلعاندىعىن ارناۋلى حات جولداپ قۇتتىقتاپ، جۇڭگو - پاكيستان قارىم - قاتىناسى مەن جۇڭگو - پاكيستان ەكونوميكالىق ءدالىزى قۇرىلىسىنا ايرىقشا ءمان بەرەتىندىگىن جانە قولداۋ كورسەتەتىندىگىن تولىق ايگىلەدى، مەن مۇنى القايمىن.
شي جينپيڭ بىلاي دەپ اتاپ كورسەتتى: جۇڭگو مەن پاكيستان ەرەكشە دوستىق سۇيىسپەنشىلىگى بار جاقسى باۋىرلاس، جاقسى سەرىك. جۇڭگو - پاكيستان ەكونوميكالىق ءدالىزى − ”ءبىر بەلدەۋ ، ءبىر جول“ قۇرىلىسىنداعى بەلگى سيپاتتى نىسان، ول جۇڭگو مەن پاكيستاننىڭ جالپى جاعدايدا بىردەي ستراتەگيالىق سەلبەستىك سەرىكتەستىك قارىم - قاتىناسىن ىشكەرىلەي دامىتۋدا، جۇڭگو - پاكيستاننىڭ اناعۇرلىم تىعىز تاعدىرلاس ورتاق تۇلعاسىن قالىپتاستىرۋدا ماڭىزدى مانگە يە. جۇڭگو - پاكيستان ساياسي پارتيالارى ۇنەمى دوستىق كەڭەس وتكىزىپ، ساياسي ورتاق تانىمدى ۇزدىكسىز ۇيىستىردى، بۇل ءدالىز قۇرىلىسىنىڭ ورنىقتى، باياندى بولۋىن جانە ”ءبىر بەلدەۋ، ءبىر جولدى“ جوعارى ساپامەن بىرگە قۇرۋدى ىلگەرىلەتۋگە ءتيىمدى.
شي جينپيڭ بىلاي دەپ باسا دارىپتەدى: جاڭا تيپتى ايدارشا ۆيرۋس وكپە قابىنۋ ىندەتى تۋىلعاننان بەرى، الەمدىك ىندەتكە قارسى اتتانۋدىڭ امالياتى ءار ەلدىڭ تەك ءوزارا قولداۋ كورسەتۋى، ىنتىماقتاسا سەلبەسۋى عانا ىندەتتى جەڭۋدىڭ دۇرىس جولى ەكەندىگىن تولىق دالەلدەدى. جۇڭگو جاق پاكيستان جاقپەن بىرگە جۇڭگو - پاكيستان تاعدىرلاس ورتاق تۇلعاسى قۇرىلىسىن تەرەڭدەتۋدى، وڭىردەگى ەلدەردىڭ ىنتىماقتاسا سەلبەسۋىن بىرگە جەبەۋدى، وسى ءوڭىردىڭ بەيبىت دامۋىنىڭ تاماشا اۋقىمىن قورعاۋدى قالايدى.
وسىنىڭ الدىندا، اريف الۆي جۇڭگو - پاكيستان ەكونوميكالىق ءدالىزى ساياسي پارتيالارى بىرگە اقىلداسۋ مەحانيزمىنىڭ 2 - رەتكى ماجىلىسىنە قۇتتىقتاۋ حات جولداپ، مىنانى ءبىلدىردى: باس شۋجي شي جينپيڭ العا قويعان ادامزاتتىڭ تاعدىرلاس ورتاق تۇلعاسى مەن ”ءبىر بەلدەۋ ، ءبىر جول“ باستاماسى سەلبەستىكتىڭ، بەيبىتشىلىكتىڭ جانە دامۋدىڭ شىن ءمانىن تەرەڭىنەن ءتۇسىندىرىپ، دۇنيە ءجۇزى حالقىنىڭ جالپىلىق تىلەگىن بەينەلەدى. مەن جۇڭگونىڭ پاكيستان جاقتا جاڭا تيپتى ايدارشا ۆيرۋس وكپە قابىنۋ ىندەتى ورشىگەن كەزدە، پاكيستان جاققا دەر كەزىندە مەديتسينالىق كومەك كورسەتكەندىگىنە ايرىقشا العىس ايتامىن. پاكيستان جاق پاكيستان مەن جۇڭگونىڭ مادەنيەت اۋىس - كۇيىسىن، ءوزارا سەنىمدىلىگىن ۇزدىكسىز كۇشەيتەدى، جۇڭگومەن بىرگە ورتاق نىسانا ۇستانىپ، ءوڭىردىڭ بەيبىتشىلىگى مەن ورنىقتىلىعىن جەبەۋگە قول ۇستاسا كۇش سالادى.
جۇڭگو - پاكيستان ەكونوميكالىق ءدالىزى ساياسي پارتيالارى بىرگە اقىلداسۋ مەحانيزمىن جۇڭگو كوممۋنيستىك پارتياسى پاكيستاننىڭ بيلىك باسىنداعى جانە بيلىكتەن تىسقارعى نەگىزگى ساياسي پارتيالارىمەن بىرگە 2019 - جىلى قۇرعان. 8 - ايدىڭ 20 - كۇنى جۇڭگو كوممۋنيستىك پارتياسى ورتالىق كوميتەتىنىڭ شەتەلدەرمەن بايلانىس جاساۋ ءبولىمى ۇيىمداستىرعان جۇڭگو - پاكيستان ەكونوميكالىق ءدالىزى ساياسي پارتيالارى بىرگە اقىلداسۋ مەحانيزمىنىڭ 2 - رەتكى ءماجىلىسى بەينە ەكران ءماجىلىسى فورماسىمەن وتكىزىلدى.
