شي جينپيڭ رەسەي فەدەراتسياسى حاۋىپسىزدىك كەڭەسىنىڭ حاتشىسىمەن كەزدەستى
مەملەكەت ءتوراعاسى شي جينپيڭ 12 - ايدىڭ 2 - كۇنى حالىق سارايىندا جۇڭگوعا جۇڭگو - رەسەي زاڭ اتقارۋ حاۋىپسىزدىك سەلبەستىك مەحانيزمى ماجىلىسىنە جانە جۇڭگو - رەسەي ستراتەگيالىق حاۋىپسىزدىك كەڭەسىنە قاتىناسۋعا كەلگەن رەسەي فەدەراتسياسى حاۋىپسىزدىك كەڭەسىنىڭ حاتشىسى پاترۋشەۆپەن كەزدەستى.
شي جينپيڭ بىلاي دەپ اتاپ كورسەتتى: بيىل جۇڭگو - رەسەي ەكى جاق ديپلوماتيالىق قارىم - قاتىناس ورناتقاندىعىنىڭ 70 جىلدىعىن قۇتتىقتاۋ قيمىلدارىن ءساتتى وتكىزدى، ەكى ەل قارىم - قاتىناسىنىڭ دامۋى جاڭا داۋىرگە ءوتتى. كۇردەلى، قۇبىلمالى حالىقارالىق جاعداي الدىندا، جۇڭگو - رەسەي اناعۇرلىم تىعىز ءبىر جاقتا تۇرىپ، باستان - اياق ادال، سەنىمدى ستراتەگيالىق سەرىكتەس بولىپ، ءبىر - بىرىنە بەرىك، پارمەندى ستراتەگيالىق قولداۋ كورسەتۋى كەرەك.
شي جينپيڭ بىلاي دەپ باسا دارىپتەدى: بيىل جىل باسىنان بەرى، امەريكا سياقتى باتىستاعى ەلدەر جۇڭگو مەن رەسەيدىڭ ىشكى ىسىنە كيلىگۋدى كۇشەيتىپ، ەكى ەلدىڭ يەلىك ۇقىعى مەن حاۋىپسىزدىگىنە قاتەر ءتوندىرىپ، ەكى ەلدىڭ ەكونوميكالىق، قوعامدىق دامۋىنا كەدەرگىلىك جاسادى. پۋتين زۇڭتۇڭ بۇلاي ىستەۋدىڭ اۋىر، ەرەكشە قاتەلىك ەكەندىگىن، وزگەنى زيانداپ قانا قويماي، وزدەرىنە دە پايداسىز ەكەندىگىن ءبىلدىردى، جۇڭگو جاق مۇنى بۇكىلدەي قۇپتايدى. مەن ءارقانداي كۇشتىڭ جۇڭگو حالقى مەن جۇڭحۋا ۇلتىنىڭ العا ىلگەرىلەۋ قادامىن توسا المايتىندىعىنا، رەسەي حالقىنىڭ دا سىرتتىڭ كيلىگۋ اسەرىنە ۇشىرامايتىندىعىنا، ءوز دامۋ جولىمەن ۇزدىكسىز مىزعىماي جۇرەتىندىگىنە دە كامىل سەنەمىن. جۇڭگو مەن رەسەي ستراتەگيالىق حاۋىپسىزدىكتى اقىلداسۋ جانە زاڭ اتقارۋ حاۋىپسىزدىك ىستەستىگى سىندى وسى ەكى تۇعىردان ۇزدىكسىز ويداعىداي پايدالانىپ، ستراتەگيالىق حاۋىپسىزدىك بايلانىسىن كۇشەيتىپ، ستراتەگيالىق ءوزارا سەنىمدىلىكتى ارتتىرىپ، ءوزىنىڭ وزەكتى مۇددەسى مەن ەكى ەلدىڭ ورتاق حاۋىپسىزدىگىن ويداعىداي قورعاپ، ءوڭىردىڭ، سونداي - اق دۇنيە ءجۇزىنىڭ بەيبىتشىلىگىن، ورنىقتىلىعىن قورعاۋ كەرەك.
پاترۋشەۆ مىنالاردى ءبىلدىردى: رەسەي - جۇڭگو ستراتەگيالىق مانگە يە جالپى بەتتىك ستراتەگيالىق سەلبەستىك سەرىكتەر، كەزەكتە ەكى ەلدىڭ ءار سالاداعى سەلبەستىگى بۇرىن بولماعان جوعارى ورەگە جەتتى. رەسەي - جۇڭگو قارىم - قاتىناسى بەرىك، استە بۇلىنبەيدى. كەزەكتە امەريكا جۇرگىزىپ وتىرعان ءبىر قىدىرۋ ساياسات رەسەي - جۇڭگو ەكى ەلدىڭ مۇددەسىنە زيان جەتكىزۋمەن بىرگە، تۇتاس حالىقارالىق جۇيە مەن تارتىپكە دە كەرەناۋ ىقپال تۋدىرىپ وتىر. رەسەي مەن جۇڭگونىڭ كوپتەگەن كەلەلى حالىقارالىق ماسەلەدە تۇرعىسى ۇقساس نەمەسە ۇقساستاۋ، ەكى جاق تىعىز سايكەسۋدى جالعاستىرىپ، رەسەي - جۇڭگو ەكى ەلدىڭ ءوز يەلىك ۇقىعى مەن حاۋىپسىزدىگىن قورعاۋى، حالىقارالىق ستراتەگيالىق ورنىقتىلىقتى قورعاۋى، كوپ ۇيەكتەنۋ مەن حالىقارالىق قارىم - قاتىناستىڭ دەموكراتيالانۋىن جەبەۋى، حالىقارالىق زاڭ مەن ءادىل حالىقارالىق ءتارتىپتى قورعاۋى كەرەك.
ياڭ جيەچى، گو شىڭكۇن، ۋاڭ ي قاتارلىلار كەزدەسۋگە قاتىناستى.
