شي جينپيڭ جاڭادان تاعايىندالعان شەتەلدىڭ جۇڭگوداعى باس ەلشىلەرىنىڭ مەملەكەت حاتىن قابىلدادى
مەملەكەت ءتوراعاسى شي جينپيڭ 11 - ايدىڭ 22 - كۇنى تۇستەن كەيىن حالىق سارايىندا، 19 مەملەكەتتىڭ جاڭادان تاعايىندالعان جۇڭگوداعى باس ەلشىلەرى تاپسىرعان مەملەكەت حاتىن قابىلدادى.
حالىق سارايىنىڭ سولتۇستىك قاقپاسىنىڭ سىرتىندا، قۇرمەت قاراۋىلدارى رەتتى قاتار تۇزەپ، كەرنايشىلار قوناق قارسى الۋ كەرنايىن تارتتى. ەلشىلەر ىركەس - تىركەس كەلىپ، قىزىل كىلەمدى بويلاپ باسپالداقپەن جوعارى كوتەرىلىپ، بەيجيڭ زالىنا كىرىپ، شي جينپيڭگە رەتىمەن مەملەكەت حاتىن تاپسىردى. ولار: لاتۆيانىڭ باس ەلشىسى مانيكا، بيرمانىڭ باس ەلشىسى مياۋ دانپەي، نيدەرلاندتىڭ باس ەلشىسى حى ۋيمين، يوردانيانىڭ باس ەلشىسى حوۋسايني، سلوۆەنيانىڭ باس ەلشىسى سۋ لان، كانادانىڭ باس ەلشىسى باۋ دامين، بۋركينا فاسونىڭ باس ەلشىسى كۇڭ بولەي، لاوستىڭ باس ەلشىسى كان باۋ، برۋنەيدىڭ باس ەلشىسى لاحىماني، ۆيەتنامنىڭ باس ەلشىسى فان شيڭمەي، كوستا - ريكانىڭ باس ەلشىسى دىرجيادو، بانگلادەشتىڭ باس ەلشىسى زامان، رۋاندانىڭ باس ەلشىسى جيمونياۋ، تايلاندتىڭ باس ەلشىسى اتايۇي، ەگيپەتتىڭ باس ەلشىسى بادىلي، پانامانىڭ باس ەلشىسى گانلين، سينگاپۋردىڭ باس ەلشىسى لۇي دىياۋ، قازاقستاننىڭ باس ەلشىسى قويشىبايەۆ، كۋبانىڭ باس ەلشىسى پەيلەيلا.
شي جينپيڭ ءار ەل ەلشىلەرىنىڭ جۇڭگوعا كەلىپ جاڭا مىندەت وتەگەندىگىن قارسى الىپ، ولارعا ءوز ەلدەرىنىڭ باسشىلارى مەن حالىقتارىنا شىن ىقىلاستى سالەمى مەن ىزگى تىلەگىن جەتكىزىپ قويۋدى تاپسىردى. شي جينپيڭ بىلاي دەپ اتاپ كورسەتتى: جۇڭگو ءار ەلمەن دوستىق قارىم - قاتىناستى دامىتۋعا ايرىقشا ءمان بەرەدى، ءار ەلمەن ساياسي ءوزارا سەنىمدىلىكتى نىعايتىپ، ناقتى سەلبەستىكتى تەرەڭدەتىپ، گۋمانيتارلىق اۋىس - كۇيىستى كۇشەيتىپ، ”ءبىر بەلدەۋ، ءبىر جول“دى بىرگە قۇرىپ، ءار ەل حالقىن اناعۇرلىم ويداعىداي باقىتقا كەنەلتۋدى قالايدى. جۇڭگو ۇكىمەتى ءار ەل ەلشىلەرىنىڭ مىندەت اتقارۋىنا قولايلىلىق جاسايدى جانە قولداۋ كورسەتەدى، ەلشىلەردىڭ جۇڭگونىڭ ءار ەلمەن دوستىعىن تەرەڭدەتۋ، ەكى جاقتى قارىم - قاتىناستىڭ دامۋىن ىلگەرىلەتۋ ءۇشىن بەلسەندى ۇلەس قوسۋىن ءۇمىت ەتەدى.
ەلشىلەر ءوز مەملەكەت باسشىلارىنىڭ شي جينپيڭگە دەگەن شىن ىقىلاستى سالەمىن جەتكىزىپ، جاڭا جۇڭگو قۇرىلعان 70 جىلدا قول جەتكەن ۇلى جەتىستىكتەردى جانە جۇڭگونىڭ دۇنيە ءجۇزىنىڭ بەيبىتشىلىگىن قورعاۋ، بىرگە دامۋدى جەبەۋ ءۇشىن اتقارعان بەلسەندى جانە سىندارلى رولىن جوعارى باعالادى. ولار: ءار ەلدىڭ جۇڭگومەن بارىس - كەلىستى، سەلبەستىكتى كۇشەيتۋدى، ”ءبىر بەلدەۋ، ءبىر جول“دى بىرگە قۇرۋعا بەلسەنە ات سالىسۋدى قالايتىندىعىن ءبىلدىردى. ولار جۇڭگوعا ەلشى بولىپ كەلگەندىكتەرىن ايرىقشا ماقتانىش سەزىنەتىندىكتەرىن، ءوز ەلدەرىنىڭ جۇڭگومەن ەكى جاقتى قارىم - قاتىناسىنىڭ دامۋىن ىلگەرىلەتۋگە كۇش سالاتىندىقتارىن ءبىلدىردى.
ۋاڭ ي اتالعان قيمىلعا قاتىناستى.
