مەملەكەت ءتوراعاسى شي جينپيڭ 10 - ايدىڭ 13 - كۇنى كاتماندۋدا تۇسكەن قوناق ۇيىندە نەپال كوممۋنيستىك پارتياسى بىرلەستىگىنىڭ ءتوراعاسى پراچاندامەن كەزدەستى.
شي جينپيڭ بىلاي دەدى: پراچاندا ءتوراعا نەپالدىڭ مايتالمان ساياساتشىسى، سونداي - اق جۇڭگو حالقىنىڭ جاقسى دوسى، كونە دوسى، جۇڭگو مەن نەپال قارىم - قاتىناسىنىڭ دامۋىنا ماڭىزدى ۇلەس قوسقان. بىلتىر ءسىز ولي زۇڭلي ەكەۋىڭىز ساياسي كەسىم جاساپ، نەپال كوممۋنيستىك پارتياسىن بىرلەسىپ قۇرىپ، مەملەكەتتىڭ ساياسيى ورنىقتى بولعان، ەكونوميكاسى دامىعان جاڭا ساتىسىن اشتىڭىزدار. شي جينپيڭ بىلاي دەپ اتاپ كورسەتتى: جۇڭگو مەن نەپالدىڭ تاۋ - سۋى جالعاسقان، بىرىمەن - ءبىرى ەتەنە تىنستاس. جۇڭگو جاق نەپال جاقتىڭ جۇڭگونىڭ وزەكتى مۇددەسىنە ساياتىن ماسەلەلەردە ۇزاق ۋاقىت تاباندى قولداۋ كورسەتىپ كەلگەندىگىنە العىس ايتادى، نەپالمەن جان - جاقتى سەلبەستىكتى ۇزبەي تەرەڭدەتىپ، نەپالدىڭ دامۋىنا قولداۋ جانە كومەك كورسەتىپ، ەكى ەل قارىم - قاتىناسىنىڭ ءتىپتى زور دامۋىن جۇزەگە اسىرۋدى قالايدى.
شي جينپيڭ جۇڭگو كوممۋنيستىك پارتياسىنىڭ پارتيانى جاپپاي قاتاڭ جونگە سالۋ، بيلىك باسىنداعى پارتيانىڭ قۇرىلىسىن كۇشەيتۋ، پارتيانىڭ بيلىك جۇرگىزۋ ورنىن بەكەمدەۋ جاقتارىنداعى نەگىزگى تاجىريبەلەرىن تانىستىردى. شي جينپيڭ بىلاي دەپ اتاپ كورسەتتى: جۇڭگو كوممۋنيستىك پارتياسى مەن نەپال كوممۋنيستىك پارتياسى تۇگەلدەي ماركسيزمدى جەتەكشى يدەيا ەتەدى، نەپال كوممۋنيستىك پارتياسىمەن پارتيالار ارا قارىم - قاتىناستى كۇشەيتىپ، مەرزىمدى ۋاقىتتا اۋىس - ءتۇيىس جاساۋ مەحانيزمىن ورناتىپ، پارتيا قۇرىلىسى جانە ەل باسقارۋ تاجىريبەلەرىنەن ءوزارا ۇلگى الىپ، ءوزارا قۇرمەت ەتەتىن، پارىقتاردى تاستاپ ورتاقتىققا ۇمتىلاتىن، ءبىر - بىرىنەن ۇيرەنىپ، ءوزارا ۇلگى الاتىن جاڭاشا ساياسي پارتيا قارىم - قاتىناسىن ورناتۋدى قالايدى.
پراچاندا ءتوراعا شي جينپيڭنىڭ نەپالعا ساپارلاي كەلگەندىگىن قىزۋ قارسى الىپ، جاڭا جۇڭگو قۇرىلعاندىعىنىڭ 70 جىلدىعىن قۇتتىقتاي كەلىپ، مىنالاردى ءبىلدىردى: جۇڭگو كوممۋنيستىك پارتياسى ءساتتى تۇردە جۇڭگو حالقىنا باسشىلىق ەتىپ، بۇرىن بولماعان دامۋدى جۇزەگە اسىرىپ، دۇنيە ءجۇزىن جالت قاراتقان تابىستارعا قول جەتكىزدى، نەپال كوممۋنيستىك پارتياسى بۇعان ايرىقشا سۇيىنەدى، جۇڭگو كوممۋنيستىك پارتياسىنىڭ جۇڭگو حالقىنا ۇزدىكسىز باسشىلىق ەتىپ، بارلىق تار جول، تايعاق كەشۋلەردى جەڭىپ، ”قوس 100 جىلدىق“ كۇرەس نىساناسىن ءساتتى جۇزەگە اسىرا الاتىندىعىنا، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن ىسكە اسىرا الاتىندىعىنا سەنەدى ءارى تىلەۋلەستىك بىلدىرەدى. نەپال جاق جۇڭگو كوممۋنيستىك پارتياسىمەن ۇزاق ۋاقىتتىق سەلبەستىك قارىم - قاتىناس ورناتۋدى، جۇڭگو كوممۋنيستىك پارتياسىنىڭ ەل باسقارۋداعى ءساتتى تاجىريبەلەرىنەن ۇلگى الۋدى ءۇمىت ەتەدى. ءتوراعا شي جينپيڭنىڭ وسى رەتكى ساپارىنىڭ، ءسوز جوق، نەپال مەن جۇڭگو قارىم - قاتىناسىن اناعۇرلىم جوعارى دەڭگەيگە كوتەرىپ، نەپالدىڭ مەملەكەتتى دامىتۋدى، كوركەيتۋدى جۇزەگە اسىرۋىنا كۇش ۇستەيتىندىگىنە سەنەمىن. نەپال - جۇڭگو قارىم - قاتىناسىنىڭ نەگىزى − بەيبىت قاتار تۇرۋدىڭ 5 پرينسيبى، ەكى ەل ءوزارا سەنىم ارتادى، ءوزارا قولداۋ كورسەتەدى. نەپال جاق جۇڭگو جاقتىڭ ادامزاتتىڭ تاعدىرلاس ورتاق تۇلعاسىن قۇرۋدى ىلگەرىلەتۋگە كۇش سالعاندىعىن، حالىقارالىق قارىم - قاتىناستا بەيبىتشىلىكتى قورعاپ، ادىلدىك پەن تۋراشىلدىقتى جاقتاپ، ورتا، شاعىن مەملەكەتتەردىڭ مۇددەسىن قورعاعاندىعىن ايرىقشا القايدى. نەپال جاق ”ءبىر بەلدەۋ، ءبىر جول“دى بىرگە قۇرۋعا بەلسەنە ات سالىسۋدى، اۋىس - ءتۇيىستى، سەلبەستىكتى كۇشەيتۋدى قالايدى.
ديڭ شۋەشياڭ، ياڭ جيەچى، ۋاڭ ي قاتارلىلار كەزدەسۋگە قاتىناستى.
