شي جينپيڭ ەلىمىز ساڭلاقتارىنىڭ دۇنيە جۇزىلىك شەبەرلىك جارىسىندا تاماشا ناتيجەگە قول جەتكىزگەندىگى جونىندە ماڭىزدى نۇسقاۋ بەرىپ، بىلاي دەپ باسا دارىپتەدى
اناعۇرلىم كەمەلدىلىككە تالپىناتىن ۇستالىق رۋحتى اسقاقتاتىپ، قالىڭ جاستاردى شەبەرلىگىن ءوسىرىپ دارىندى بولۋ، شەبەرلىگىمەن وتانعا ەسە قوسۋ جولىمەن جۇرۋگە ىنتالاندىرۋ كەرەك
لي كىچياڭ بەكىتۋ جازدى
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا ەلىمىزدىڭ شەبەرلىك ساڭلاقتارىنىڭ 45 - كەزەكتى دۇنيە جۇزىلىك شەبەرلىك جارىسىندا تاماشا ناتيجەگە قول جەتكىزگەندىگى جونىندە ماڭىزدى نۇسقاۋ بەرىپ، ەلىمىزدىڭ جارىسقا قاتىناسقان ساڭلاقتارىن جانە شەبەرلىك دارىندىلارىن باۋلۋ قىزمەتىمەن شۇعىلداناتىن جولداستاردى قىزۋ قۇتتىقتادى.
شي جينپيڭ بىلاي دەپ باسا دارىپتەدى: ەڭبەكشىلەردىڭ ساپاسى ءبىر مەملەكەتتىڭ، ءبىر ۇلتتىڭ دامۋى جونىنەن ايرىقشا ماڭىزدى. تەحنيكالىق جۇمىسشىلار قوسىنى جۇڭگو جاساۋىنا، جۇڭگو جاسامپازدىعىنا تىرەك بولاتىن ماڭىزدى نەگىز، ەكونوميكانىڭ جوعارى ساپالى دامۋىن ىلگەرىلەتۋدە ماڭىزدى رول اتقارادى. شەبەرلىك دارىندىلارىن باۋلۋ، ىستەتۋ، باعالاۋ، ىنتالاندىرۋ ءتۇزىمىن اقاۋسىزداندىرىپ، تەحنيكالىق جۇمىسشىلار اعارتۋىن كۇش سالا دامىتىپ، كاسىپتىك شەبەرلىككە باۋلۋدى كەڭ كولەمدە ورىستەتىپ، قىرۋار جوعارى ساپالى ەڭبەكشىلەردى جانە تەحنيكالىق، شەبەرلىك دارىندىلارىن باۋلۋدى جەدەلدەتۋ كەرەك. تۇتاس قوعامدا اناعۇرلىم كەمەلدىلىككە تالپىناتىن ۇستالىق رۋحتى اسقاقتاتىپ، قالىڭ جاستاردى شەبەرلىگىن ءوسىرىپ دارىندى بولۋ، شەبەرلىگىمەن وتانعا ەسە قوسۋ جولىمەن جۇرۋگە ىنتالاندىرۋ كەرەك.
شي جينپيڭ بىلاي دەپ اتاپ كورسەتتى: ەلىمىز 2021 - جىلى شاڭحاي 46 - كەزەكتى دۇنيە جۇزىلىك شەبەرلىك جارىسىن وتكىزەدى. ءتۇرلى دايىندىق جانە ۇيىمداستىرۋ قىزمەتىن جاقسى ىستەپ، ءارقايسى ەلدەرمەن شەبەرلىك سالاسىندا اۋىس - كۇيىستى، ۇلگى الۋدى كۇشەيتىپ، ەلىمىزدىڭ كاسىپتىك شەبەرلىككە باۋلۋ ناتيجەسىن جانە ورەسىن ايگىلەپ، جاڭالىققا باي، ىقپالى كەڭ بولعان ءبىر كەزەك دۇنيە جۇزىلىك شەبەرلىك جارىسىن وتكىزۋگە قۇلشىنۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ زۇڭليى لي كىچياڭ بەكىتۋ جازىپ، بىلاي دەپ اتاپ كورسەتتى: شەبەرلىك دارىندىلارى مەملەكەتتىڭ قىمباتتى بايلىعى، كاسىپ سالاسى دارەجەسىن ءوسىرۋدى جەبەۋدىڭ، جوعارى ساپالى دامۋدى ىلگەرىلەتۋدىڭ ماڭىزدى تىرەگى. شي جينپيڭنىڭ جاڭا ءداۋىر جۇڭگوشا سوتسياليزم يدەياسىن جەتەكشى ەتۋگە تاباندى بولىپ، پارتيا ورتالىق كوميتەتىنىڭ، مەملەكەتتىك كەڭەستىڭ شەشىمدەرىن، ورنالاستىرۋلارىن دايەكتىلەندىرىپ، شەبەرلىك دارىندىلاردى باۋلۋعا اناعۇرلىم باسا ءمان بەرىپ، كاسىپتىك شەبەرلىكتى جوعارىلاتۋ ارەكەتىن ويداعىداي اتقارىپ، قاجەتتىلىكتى تىعىز ارقاۋ ەتىپ، وسى زامانعى كاسىپتىك تاربيەنى دامىتىپ، تەحنيكالىق مەكتەپتەردى ويداعىداي باسقارىپ، تەحنيكالىق جۇمىسشىلار كاسىبىن دامىتۋ مەحانيزمىن جانە ساياساتىن كەمەلدەندىرىپ، قوعامعا قاجەتتى اناعۇرلىم كوپ شەبەرلىك دارىندىلاردىڭ، ءىرى ەل ۇستالارىنىڭ ۇزدىكسىز جارىققا شىعۋىنا مۇمكىندىك جاساپ، كوپ بولىپ شارۋاشىلىق قۇرۋعا، جالپى قاۋىم جاڭالىق اشۋعا سۇيەنىپ، جاڭا قوزعاۋشى قۋاتتىڭ تولىسۋىن، زورايۋىن جانە جۇمىستانۋدىڭ ارتۋىن جەبەۋ كەرەك. سونىمەن بىرگە، شەبەرلىك سالاسىنداعى حالىقارالىق سەلبەستىكتى كۇشەيتىپ، 46 - كەزەكتى دۇنيە جۇزىلىك شەبەرلىك جارىسىن وتكىزۋ قىزمەتىن ويداعىداي ىستەپ، قالىڭ جاستار شەبەرلىك ۇيرەنەتىن، مەملەكەتكە ەڭبەك ەتەتىن قويۋ راي قالىپتاسۋىن ىلگەرىلەتۋ كەرەك.
45 - كەزەكتى دۇنيە جۇزىلىك شەبەرلىك جارىسىن قورىتىندىلاۋ جينالىسى 9 - ايدىڭ 23 - كۇنى بەيجيڭدە وتكىزىلدى. جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، مەملەكەتتىك كەڭەستىڭ ورىنباسار زۇڭليى حۋ چۇنحۋا جينالىستا شي جينپيڭنىڭ ماڭىزدى نۇسقاۋىن جانە لي كىچياڭنىڭ بەكىتۋىن وقىدى ءارى ءسوز سويلەدى. ول سوزىندە بىلاي دەپ اتاپ كورسەتتى: شەبەرلىك دارىندىلارى ەلىمىزدىڭ دارىندىلار قوسىنىنىڭ ماڭىزدى قۇرامداس بولىگى، اناعۇرلىم پارمەندى شارالار قولدانىپ، قالىڭ شەبەرلىك ەڭبەكشىلەرىنىڭ ەسەيىپ - ەرجەتۋىنە، دارىندى بولۋىنا شارت - جاعداي جاساۋ كەرەك. كەڭ كولەمدى كاسىپتىك شەبەرلىككە باۋلۋدى ورىستەتىپ، باۋلۋ، ىستەتۋ، باعالاۋ، ىنتالاندىرۋ مەحانيزمىن اقاۋسىزداندىرىپ، شاڭحايدا وتەتىن 46 - كەزەكتى دۇنيە جۇزىلىك شەبەرلىك جارىسىن ويداعىداي ۇيىمداستىرۋعا بارىنشا كۇش سالۋ كەرەك. جارىسقا قاتىناسقان ساڭلاقتاردىڭ اۋەلگى ماقساتتان اينىماي، شەبەرلىگىن ءوسىرىپ دارىندى بولۋ، شەبەرلىگىمەن وتانعا ەسە قوسۋ جولىندا اناعۇرلىم زور ناتيجەگە قول جەتكىزۋىن، اناعۇرلىم زور ۇلەس قوسۋىن ءۇمىت ەتەمىن.
دۇنيە جۇزىلىك شەبەرلىك جارىسى 2 جىلدا ءبىر كەزەك وتەدى، ”دۇنيە جۇزىلىك شەبەرلىك وليمپياداسى“ دەپ اتالادى. بيىل 8 - ايدا رەسەيدىڭ قازانىندا وتكەن 45 - كەزەكتى دۇنيە جۇزىلىك شەبەرلىك جارىسىندا ەلىمىز ساڭلاقتارى جالپى 16 التىن، 14 كۇمىس، 5 قولا جانە 17 ۇزدىك سيلىق الىپ، التىن مەدال تاقتاسىندا، سيلىق تاقتاسىندا، توپتىق جالپى نومىردە ءبىرىنشى ورىندى يەلەدى. 46 - كەزەكتى دۇنيە جۇزىلىك شەبەرلىك جارىسى 2021 - جىلى 9 - ايدا شاڭحايدا وتەدى.
