شي جينپيڭ يراقتىڭ زۇڭليى ابدۇل − ماحديمەن كەزدەستى
مەملەكەت ءتوراعاسى شي جينپيڭ 9 - ايدىڭ 23 - كۇنى حالىق سارايىندا يراقتىڭ زۇڭليى ابدۇل − ماحديمەن كەزدەستى.
شي جينپيڭ بىلاي دەپ اتاپ كورسەتتى: جۇڭگو مەن يراقتىڭ ءداستۇرلى دوستىعى تەرەڭ. بىلتىر ەكى جاق ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 60 جىلدىعىن بىرگە قۇتتىقتادى. بيىل جاڭا جۇڭگو قۇرىلعاندىعىنىڭ 70 جىلدىعى. جاڭا تاريحي باستامادا جۇڭگو جاق يراق جاقپەن بىرگە جۇڭگو مەن يراقتىڭ ستراتەگيالىق سەرىكتەستىك قارىم - قاتىناسىنىڭ ۇزدىكسىز تىڭ ساتىعا كوتەرىلۋىن ىلگەرىلەتۋدى قالايدى.
شي جينپيڭ بىلاي دەپ باسا دارىپتەدى: جۇڭگو جاق يراق جاقتىڭ مەملەكەتتىڭ يەلىك ۇقىعىن، تاۋەلسىزدىگىن، بىرلىگىن، تەرريتوريا تۇتاستىعىن قورعاۋعا جاساعان قۇلشىنىسىن باتىل قولدايدى، ءارقانداي سىرتقى كۇشتىڭ يراقتىڭ ىشكى ىسىنە كيلىگۋىنە قارسى تۇرادى. جۇڭگو جاق يراقتىڭ لاڭكەستىككە قارسى تۇرۋ سوعىسىندا زور جەڭىسكە قول جەتكىزگەندىگىن قۇتتىقتايدى، يراق جاقتىڭ لاڭكەستىككە قارسى تۇرۋدى جانە قايتا قۇرۋدى ورىستەتىپ، مەملەكەتتىڭ باياندى تىنىشتىعى مەن دامۋىن جۇزەگە اسىرۋىنا ۇزدىكسىز بەلسەندى قولداۋ كورسەتۋدى جانە كومەكتەسۋدى قالايدى.
شي جينپيڭ بىلاي دەپ باسا دارىپتەدى: جۇڭگو يراقتىڭ ەكونوميكاسىن قايتا قۇرۋعا ەڭ ەرتە ات سالىسقان، ۋاقىتى ەڭ ۇزاق، نىساندار ورنالاسۋ اۋماعى ەڭ كەڭ، سالاسى ەڭ كوپ مەملەكەت. يراقتىڭ حاۋىپسىزدىك جاعدايى ەڭ قاتاڭ مەزگىلدە دە جۇڭگو كاسىپورىندارى يراقتان بۇرىنعىداي تاپجىلمادى. جۇڭگو جاق ”ءبىر بەلدەۋ، ءبىر جول“دى بىرگە قۇرۋدى يراق جاقتىڭ قايتا قۇرۋ جوباسىمەن ءتۇيىلىستىرۋدى كۇشەيتۋدى، مۇناي، نەگىزدىك قۇرىلعىلار قۇرىلىسى سياقتى سالالاردا ەكى جاقتىڭ سەلبەستىگىن ىلگەرىلەتۋدى قالايدى. جۇڭگو مەن يراق تۇگەلدەي وركەنيەتتى بايىرعى ەلدەر، ەكى جاق گۋمانيتارلىق اۋىس - كۇيىستى بەلسەنە ورىستەتۋ كەرەك. يراق جاقتىڭ ۇزدىكسىز پارمەندى شارالار قولدانىپ، يراقتاعى جۇڭگو جاق قۇرىلىمدارىنىڭ جانە قىزمەتكەرلەرىنىڭ حاۋىپسىزدىگىنە شىنايى كەپىلدىك ەتۋىن ءۇمىت ەتەمىن. جۇڭگو جاق يراق جاقپەن حاۋىپسىزدىك بويىنشا زاڭ اتقارۋ سەلبەستىگىن كۇشەيتۋدى قالايدى.
شي جينپيڭ بىلاي دەپ باسا دارىپتەدى: قازىر ورتا شىعىس شىعاناق جاعدايى كۇردەلى دە كىلتەڭ. قاتىستى جاقتار سابىرلى، ۇستامدى بولىپ، ءوزارا قۇرمەت ەتۋ نەگىزىندە تىلدەسۋ، كەلىسسوز سياقتى بەيبىت تاسىلدەر ارقىلى ءبىر - ءبىرىنىڭ قايشىلىقتارىن، الاۋىزدىقتارىن لايىقتى شەشىپ، ءوڭىردىڭ بەيبىتشىلىگى مەن ورنىقتىلىعىن بىرگە قورعاۋ كەرەك. جۇڭگو جاق يراق جاقتى قامتىعان قاتىستى جاقتارمەن بايلانىستى ساقتاۋدى قالايدى.
ابدۇل − ماحدي جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قىزۋ قۇتتىقتادى. ول مىنالاردى ءبىلدىردى: جۇڭگو مەملەكەتتىڭ يەلىك ۇقىعىن، تاۋەلسىزدىگىن جانە ۇلت نامىسىن باتىل قورعاپ، زور دامۋ جەتىستىگىنە قول جەتكىزدى. قازىرگى دۇنيە ءجۇزى جاعدايىندا جۇڭگو دۇنيە ءجۇزىنىڭ بەيبىتشىلىگىن، ورنىقتىلىعىن، جاراسىمدىلىعىن قورعاۋداعى ماڭىزدى تىرەك. يراق سوعىستى جانە ىشكى الاساپىراندىقتى باستان وتكەردى، جۇڭگونىڭ يراقتىڭ لاڭكەستىككە قارسى تۇرۋىنا جانە قايتا قۇرۋىنا قۇندى قولداۋ كورسەتكەندىگىنە شىن جۇرەكتەن العىس ايتامىن. يراق جاق ”ءبىر بەلدەۋ، ءبىر جول“دى بىرگە قۇرۋ جۇلگەسىندە ەكى ەلدىڭ ءتۇرلى سالاداعى ناقتى ىستەر سەلبەستىگىن تەرەڭدەتۋدى قالايدى. يراق جاق ءوڭىردىڭ شۇعىل جاعدايىن باسەڭدەتۋگە، سوعىستان ساقتانۋعا بەلسەنە كۇش سالادى، جۇڭگو جاقپەن بايلانىستى، سايكەستىكتى كۇشەيتۋدى قالايدى.
ياڭ جيەچى، حى ليفىڭ قاتارلىلار كەزدەسۋگە قاتىناستى.
