مەملەكەت ءتوراعاسى شي جينپيڭ 9 - ايدىڭ 20 - كۇنى ۇسىنىس بويىنشا ساۋد ارابياسى پاتشالىعىنىڭ پاتشاسى سالمانمەن تەلەفوندا سويلەستى.
شي جينپيڭ بىلاي دەپ اتاپ كورسەتتى: جۋىق جىلداردان بەرى، جۇڭگو مەن ساۋد ارابياسىنىڭ قارىم - قاتىناسى جاپپاي تەز قارقىنمەن دامىدى. جۇڭگو مەن ساۋد ارابياسى − جان - جاقتى ستراتەگيالىق سەرىكتەس جانە ”ءبىر بەلدەۋ، ءبىر جول“دى بىرگە قۇراتىن ماڭىزدى سەلبەستىك سەرىكتەس. جۇڭگو جاق ساۋد ارابياسىنىڭ ءبىر جۇڭگو پرينسيبىندە بەرىك تۇرىپ، جۇڭگو جاقتىڭ وزەكتى مۇددەسىنە ساياتىن جانە ماڭىزدى كوڭىل بولەتىن ماسەلەلەردە قىمباتتى قولداۋ كورسەتكەندىگىن القايدى، جۇڭگو جاق تا ساۋد ارابياسى جاقتىڭ مەملەكەتتىڭ يەلىك ۇقىعىن، حاۋىپسىزدىگىن، ورنىقتىلىعىن قورعاۋدا كورسەتكەن قۇلشىنىسىن باتىل قولدايدى. جۇڭگو جاق ساۋد ارابياسىمەن بولعان قارىم - قاتىناسىنا ستراتەگيالىق وسكەلەڭ تۇرعىدان جانە ۇزاق بولاشاقتىق تۇرعىدان مامىلە جاساپ، ساۋد ارابياسى جاقپەن بايلانىستى ساقتاپ، ەكى ەلدىڭ قارىم - قاتىناسى مەن سەلبەستىگىنىڭ دامۋىنا ۇزدىكسىز جاڭا قوزعاۋشى كۇش قوسۋدى قالايدى.
سالمان مىنانى ءبىلدىردى: ساۋد ارابياسى مەن جۇڭگونىڭ قارىم - قاتىناسى بەرىك تە تاماشا، ساۋد ارابياسى جاق ءبىر جۇڭگو ساياساتىن تاباندى اتقارىپ، جۇڭگو جاقتىڭ وزەكتى مۇددەسىنە ساياتىن ماسەلەدە جۇڭگونى ۇزدىكسىز باتىل قولداپ، ەكى ەلدىڭ جان - جاقتى ستراتەگيالىق سەرىكتەستىك قارىم - قاتىناسىنىڭ ىشكەرىلەي دامۋىن ءۇمىت ەتەدى.
سالمان جاقىندا ساۋد ارابياسىنىڭ مۇناي قۇرىلعىسىنىڭ تۇتقيىل شابۋىلعا ۇشىراعاندىعىنا قاتىستى جاعدايدى حابارلاندىردى. شي جينپيڭ بىلاي دەپ باسا دارىپتەدى: جۇڭگو جاق ساۋد ارابياسىنىڭ مۇناي قۇرىلعىسىنىڭ تۇتقيىل شابۋىلعا ۇشىراعاندىعىن جازعىرادى، بۇل ۋاقيعا شىعاناق ءوڭىرىنىڭ جاعدايىنا جانە حالىقارالىق ەنەرگيا بازارىنا سوققى بولىپ ءتيدى. ۋاقيعانىڭ جان - جاقتى، وبيەكتيۆ، ءادىل تەكسەرىلۋىن ءۇمىت ەتەمىن، قاتىستى جاقتاردى وڭىرلىك جاعدايدىڭ شيەلەنىسۋىن ۋشىقتىراتىن ارەكەت قولدانۋدان ساقتانۋعا، ءوڭىردىڭ بەيبىتشىلىگى مەن ورنىقتىلىعىن بىرگە قورعاۋعا ۇندەيمىن.
