شي جينپيڭ حىناندا حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامۋ جونىندەگى اڭگىمە ءماجىلىستى باسقارىپ اشقاندا بىلاي دەپ باسا دارىپتەدى
قاۋىرت قورعاۋدى بىرگە ويداعىداي يگەرىپ، قاۋىرت جونگە سالۋدى سايكەستى ىلگەرىلەتىپ، حۋاڭحى وزەنىن حالىققا قۇت اكەلەتىن باقىت وزەنىنە اينالدىرايىق
حان جىڭ قاتىناستى ءارى ءسوز سويلەدى
9 - ايدىڭ 18 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جىڭجوۋدا حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامۋ جونىندەگى اڭگىمە ءماجىلىستى باسقارىپ اشتى ءارى ماڭىزدى ءسوز سويلەدى.
9 - ايدىڭ 18 - كۇنى تۇستەن بۇرىن جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ جىڭجوۋدا حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامۋ جونىندەگى اڭگىمە ءماجىلىستى باسقارىپ اشتى ءارى ماڭىزدى ءسوز سويلەدى. سۋرەتتە: اڭگىمە ماجىلىسىنەن ىلگەرى، شي جينپيڭ 9 - ايدىڭ 17 - كۇنى تۇستەن كەيىن جىڭجوۋ حۋاڭحى وزەنى مەملەكەتتىك گەولوگيالىق باقشاسىندا، حۋاڭحى وزەنى جاعاسىندا جاياۋ ءجۇرىپ، ماڭىنداعى ورتانى تەكسەرىپ كورىپ، حۋاڭحى بويىنداعى وڭىرلەردىڭ ەكولوگياسىن قورعاۋ، سۋ بايلىعىنان پايدالانۋ، توسپا قۇرىلىسى جانە تاسقىننان ساقتانۋ جاعدايى سياقتى احۋالداردى ۇعىستى.
جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ 9 - ايدىڭ 18 - كۇنى تۇستەن بۇرىن جىڭجوۋدا حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامۋ جونىندەگى اڭگىمە ءماجىلىستى باسقارىپ اشتى ءارى ماڭىزدى ءسوز سويلەدى. ول بىلاي دەپ باسا دارىپتەدى: تۇنىق سۋ، جاسىل تاۋ − باعالى بايلىق ۇستانىمىنا تاباندى بولىپ، ەكولوگيانى الدىڭعى ورىنعا قويۋعا، جاسىل دامۋعا تاباندى بولىپ، سۋعا قاراي تۇراقتاندىرىپ، سۋ جاعدايىنا قاراي ءىس جۇرگىزىپ، جەر - جەردىڭ جاعدايىنا قاراي ىستەپ، تۇرلەر بويىنشا شارا قولدانىپ، جوعارعى - تومەنگى اعاردى، نەگىزگى، تارماق اعىنداردى، وڭ، سول جاعالاۋلاردى ءبىر تۇتاس جوسپارلاپ، قاۋىرت قورعاۋدى بىرگە ويداعىداي يگەرىپ، قاۋىرت جونگە سالۋدى سايكەستى ىلگەرىلەتىپ، ەكولوگيانى قورعاۋدى، جونگە سالۋدى كۇش سالا نىعايتىپ، حۋاڭحىنىڭ باياندى تىنىشتىعىن قامتاماسىز ەتىپ، تۇتاس اعاردىڭ جوعارى ساپالى دامۋىن ىلگەرىلەتىپ، حالىق بۇقاراسىنىڭ تۇرمىسىن جاقسارتىپ، حۋاڭحى مادەنيەتىن قورعاپ، جالعاستىرىپ، اسقاقتاتىپ، حۋاڭحىنى حالىققا قۇت اكەلەتىن باقىت وزەنىنە اينالدىرۋ كەرەك.
جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ تۇراقتى مۇشەسى، مەملەكەتتىك كەڭەستىڭ ورىنباسار زۇڭليى حان جىڭ اڭگىمە ماجىلىسكە قاتىناستى ءارى ءسوز سويلەدى.
اڭگىمە ماجىلىستە، چيڭحاي ولكەلىك پارتكومنىڭ شۋجيى ۋاڭ جيانجۇن، شانشي ولكەلىك پارتكومنىڭ شۋجيى حۋ حىپيڭ، حىنان ولكەلىك پارتكومنىڭ شۋجيى ۋاڭ گوشىڭ، جاراتىلىستىق بايلىق مينيسترلىگىنىڭ مينيسترى لۋ حاۋ، ەكولوگيالىق ورتا مينيسترلىگىنىڭ مينيسترى لي گانجيە، سۋ يگىلىگى مينيسترلىگىنىڭ مينيسترى ى جيڭپيڭ، مەملەكەتتىك دامۋ جانە رەفورما كوميتەتىنىڭ مەڭگەرۋشىسى حى ليفىڭ ىركەس - تىركەس سوزگە شىقتى، سانشي ولكەلىك پارتكومنىڭ شۋجيى لو حۇينيڭ، ىشكى موڭعۇل اۆتونوميالى رايوندىق پارتكومنىڭ شۋجيى لي جيحىڭ، شاندۇڭ ولكەلىك پارتكومنىڭ شۋجيى ليۋ جيا - ي، سىچۋان ولكەلىك پارتكومنىڭ شۋجيى پىڭ چيڭحۋا، گانسۋ ولكەلىك پارتكومنىڭ شۋجيى لين دو، نيڭشيا حۇيزۋ اۆتونوميالى رايوندىق پارتكومنىڭ شۋجيى شى تايفىڭ جازباشا ءسوز تاپسىرىپ، حۋاڭحى وزەنى الابىنىڭ ەكولوگياسىن قالپىنا كەلتىرۋ، سۋ مەن توپىراقتى ساقتاۋ، لاستانۋدان ساقتانۋ جانە ونى جونگە سالۋ سياقتى جاقتاردان جەكە - جەكە تانىمدارى مەن كوزقاراستارىن بايانداپ، ءىس جۇزىندىك جاعدايمەن بىرلەستىرىپ پىكىر جانە ۇسىنىس ورتاعا قويدى.
كوپشىلىكتىڭ ءسوزىن تىڭداعاننان كەيىن، شي جينپيڭ ماڭىزدى ءسوز سويلەدى. ول بىلاي دەپ باسا دارىپتەدى: حۋاڭحى وزەنى الابى − ەلىمىزدىڭ ماڭىزدى ەكولوگيالىق قالتقىسى جانە ماڭىزدى ەكونوميكالىق بەلدەۋى، كەدەيلىكتەن ارىلتۋدان قامال الۋ شايقاسىنىڭ جەڭىسىنە جەتۋدەگى ماڭىزدى ءوڭىر، ەلىمىزدىڭ ەكونوميكالىق، قوعامدىق دامۋى جانە ەكولوگيالىق حاۋىپسىزدىگى جاعىندا ايرىقشا ماڭىزدى ورىنعا يە. حۋاڭحى وزەنىن قورعاۋ − جۇڭحۋا ۇلتىنىڭ ۇلى گۇلدەنۋىنە جانە ماڭگى باياندى دامۋىنا ساياتىن ۇزاق بولاشاقتىق ۇلى جوسپار. بەيجيڭدى، تيانجيندى، حىبەيدى سايكەستىرە دامىتۋ، چاڭجياڭ ەكونوميكالىق بەلدەۋىن دامىتۋ، گۋاڭدۇڭ - شياڭگاڭ - اۋمىن ۇلكەن شىعاناق رايونى قۇرىلىسى، چاڭجياڭ اتىراۋىن ءبىر تۇلعالاندىرىپ دامىتۋ سياقتى، حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامىتۋدا كەلەلى مەملەكەتتىك ستراتەگيا بولىپ تابىلادى. حۋاڭحى وزەنىن جونگە سالۋدى، قورعاۋدى كۇشەيتۋ، حۋاڭحى وزەنى الابىنىڭ جوعارى ساپالى دامۋىن ىلگەرىلەتۋ، وزەن الابىنداعى ولكە - اۆتونوميالى رايونداردىڭ كەدەيلىكتەن ارىلتۋدان قامال الۋ شايقاسىنىڭ جەڭىسىنە جەتۋىنە بەلسەنە قولداۋ كورسەتۋ، وزەن الابىنداعى حالىق بۇقاراسى، اسىرەسە، از ۇلت بۇقاراسى كوڭىل ءبولىپ وتىرعان تاسقىننان ساقتانۋ حاۋىپسىزدىگى، اۋىز سۋ حاۋىپسىزدىگى، ەكولوگيالىق حاۋىپسىزدىك سياقتى ماسەلەلەردى ويداعىداي شەشۋ قوعام ورنىقتىلىعىن قورعاۋدا، ۇلتتار ىنتىماعىن جەبەۋدە ماڭىزدى مانگە يە.
شي جينپيڭ بىلاي دەپ اتاپ كورسەتتى: ”حۋاڭحى وزەنى تىنىش بولسا، الەم تىنىش بولادى“. ەجەلدەن بەرى، جۇڭحۋا ۇلتى ءارقاشان حۋاڭحى وزەنىنىڭ تاسقىن، قۋاڭشىلىق اپاتىمەن كۇرەس جۇرگىزىپ كەلەدى. جاڭا جۇڭگو قۇرىلعان سوڭ، پارتيا مەن مەملەكەت حۋاڭحى وزەنىن جونگە سالۋعا، اشۋعا ايرىقشا ءمان بەرىپ كەلەدى. پارتيا ورتالىق كوميتەتىنىڭ پارمەندى باسشىلىعىندا، حۋاڭحى وزەنى بويىنداعى ارميا مەن حالىق جانە حۋاڭحى وزەنىنىڭ قۇرىلىسشىلارى حۋاڭحى وزەنىن جونگە سالۋدا، قورعاۋدا اسا اۋقىمدى قىزمەت ورىستەتىپ، كۇللى دۇنيەنىڭ نازارىن اۋدارعان جەتىستىككە قول جەتكىزدى. سۋ مەن قۇمدى جونگە سالۋ ايتارلىقتاي ناتيجە بەرىپ، تاسقىننان ساقتانۋ، اپات زيانىن ازايتۋ جۇيەسى نەگىزىنەن ورناتىلدى، وزەن ارناسىنىڭ تارايۋ بەتالىسى العاشقى قادامدا تىزگىندەلىپ، وزەن الابىندا پايدالانىلاتىن سۋدىڭ ارتۋى تىم تەز بولۋ جاعدايى ءونىمدى تىزگىندەلىپ، ەكونوميكانىڭ، قوعامنىڭ باياندى دامۋىنا پارمەندى تىرەك بولدى. ەكولوگيالىق ورتا ۇزدىكسىز، كورنەكتى تۇردە جاقسارا ءتۇسىپ، سۋ مەن توپىراقتىڭ زايا بولۋىنان كەشەندى ساقتانۋ جانە ونى جونگە سالۋ ناتيجەسى كورنەكتى بولىپ، ءۇش وزەن قاينارى سياقتى ماڭىزدى ەكولوگيانى قورعاۋ جانە قالپىنا كەلتىرۋ ينجەنەرياسى جەدەل اتقارىلىپ، جوعارعى اعاردىڭ سۋ قاينارىن ساقتاۋ قابىلەتى ورنىقتى جوعارىلاپ، ورتاڭعى اعارداعى سارى توپىراقتى ءۇستىرتتىڭ سۋ جيناۋ، توپىراق ساقتاۋ قابىلەتى ايتارلىقتاي كۇشەيىپ، ”ادام ىلگەرى باسىپ، قۇم كەرى شەگىنەتىن“ قۇمدى تىزگىندەۋ كەرەمەتى جۇزەگە اسىپ، بيولوگيالىق الۋان تۇرلىلىك ايتارلىقتاي كوبەيدى. دامۋ دەڭگەيى ۇزدىكسىز ءوسىپ، ورتالىق قالالار مەن ورتا جازىق سياقتى قالالار شوعىرى جەدەل قۇرىلىپ، بۇكىل ەلدەگى ماڭىزدى ەگىن، مال شارۋاشىلىعى ءوندىرىس بازاسى جانە ەنەرگيا بازاسى سىندى ورنى ونان ارى بەكەمدەلىپ، جاڭا ەكونوميكالىق ارتۋ ءتۇيىنى ۇزدىكسىز جارىققا شىعىپ، قايراڭ اۋماعىنداعى تۇرعىنداردى كوشىرۋ ينجەنەرياسى جەدەل ىلگەرىلەپ، بۇقارانىڭ تۇرمىسى كورنەكتى جاقساردى. پارتيا 18 - قۇرىلتايىنان بەرى، پارتيا ورتالىق كوميتەتى ەكولوگيالىق وركەنيەت قۇرىلىسىنىڭ جالپى جاعدايىن كوزدەي وتىرىپ، ”سۋ ۇنەمدەۋدى الدىڭعى ورىنعا قويۋ، كەڭىستىك جاعىندا بىركەلكى بولۋ، جۇيەلى جونگە سالۋ، ەكى قولمەن بىردەي كۇش جۇمساۋ“ سىندى سۋدى جونگە سالۋ وي جەلىسىن بەلگىلەپ، حۋاڭحى وزەنى الابىنىڭ ەكونوميكالىق، قوعامدىق دامۋى مەن بۇقارانىڭ تۇرمىسىندا اسا زور وزگەرىس تۋىلدى. سونىمەن بىرگە مىنانى دا سەرگەكتىكپەن كورە بىلگەن ءجون: كەزەكتە حۋاڭحى وزەنى الابىندا ءالى دە كەيبىر كورنەكتى قيىنشىلىقتار مەن ماسەلەلەر ورىن تەۋىپ وتىر، وزەن الابىنىڭ ەكولوگيالىق ورتاسى ءالسىز، سۋ بايلىعىن قامتاماسىز ەتۋ جاعدايى مۇشكىل، دامۋ ساپاسى جوعارىلاتۋدى كۇتۋدە. بۇل ماسەلەلەردىڭ بەينەسى حۋاڭحى وزەنىنەن كورىنىس بەرگەنىمەن، تامىرى وزەن الابىندا جاتىر.
شي جينپيڭ بىلاي دەپ باسا دارىپتەدى: حۋاڭحى وزەنىن جونگە سالۋدىڭ ماڭىزدى ءتۇيىنى قورعاۋدا، تەتىگى جونگە سالۋدا. تاۋدى، سۋدى، ورماندى، اتىزدى، كولدى، جايلىمدى كەشەندى جونگە سالۋعا، جۇيەلى جونگە سالۋعا، قاينارىنان جونگە سالۋعا تاباندى بولىپ، ءتۇرلى قىزمەتتەردى ءبىر تۇتاس جوسپارلاي وتىرىپ ىلگەرىلەتىپ، سەلبەسۋدى، سايكەسۋدى كۇشەيتىپ، حۋاڭحى وزەنى الابىنىڭ جوعارى ساپالى دامۋىن ىلگەرىلەتۋ كەرەك.
ءبىرىنشى، ەكولوگيالىق ورتانى قورعاۋدى كۇشەيتۋ. حۋاڭحى وزەنىنىڭ ەكولوگيالىق جۇيەسى ورگانيكالىق تۇتاس تۇلعا، جوعارعى، ورتاڭعى، تومەنگى اعاردىڭ پارقىن تولىق ويلاستىرۋ كەرەك. جوعارعى اعاردا ءۇش وزەن قاينارى، چيليانشان تاۋى، گاننان حۋاڭحى جوعارى اعارىنداعى سۋ قاينارىن ساقتاۋ ءوڭىرى سياقتىلاردى ءتۇيىن ەتىپ، كەلەلى ەكولوگيانى قورعاۋ، قالپىنا كەلتىرۋ جانە قۇرىلىس ينجەنەريالارىنان ءبىر توبىن اتقارۋدى ىلگەرىلەتىپ، سۋ قاينارىن ساقتاۋ قابىلەتىن جوعارىلاتۋ كەرەك. ورتاڭعى اعاردا سۋ مەن توپىراقتى ساقتاۋدى جانە لاستانۋدى جونگە سالۋدى كورنەكتىلەندىرە وتىرىپ ويداعىداي يگەرۋ، شارت - جاعدايى بار جەرلەر قۋاڭشىلىققا ءتوزىمدى ساتىلى اتىز، تۇنبالىق جەر توسپاسى سياقتىلاردى زور كۇشپەن قۇرۋ، كەيبىر جەرلەر تابيعي قالپىنا كەلتىرۋدى نەگىز ەتىپ، ادامدار جاعىنان كەدەرگى بولۋدى، لاستانۋى اۋىر تارماق وزەندەردى جونگە سالۋدى زور كۇشپەن ىلگەرىلەتۋ كەرەك. تومەنگى اعارداعى حۋاڭحى اتىراۋىندا قورعاۋ قىزمەتىن ويداعىداي ىستەپ، وزەن اعارى ەكولوگيالىق جۇيەسىنىڭ اقاۋسىزدىعىن جەبەپ، ورگانيزمدەردىڭ كوپ تۇرلىلىگىن مولايتۋ كەرەك.
ەكىنشى، حۋاڭحى وزەنىنىڭ باياندى تىنىشتىعىنا كەپىلدىك ەتۋ. حۋاڭحى وزەنىنىڭ سۋى از، قۇمى كوپ بولۋ، سۋى مەن قۇمىنىڭ بايلانىسىنىڭ ساي كەلمەۋى حۋاڭحى وزەنىنىڭ كۇردەلى، وڭايشىلىقپەن وڭالمايتىن كىناراتىنىڭ سەبەبى. حۋاڭحى وزەنىندە كوپ جىلدان بەرى ۇلكەن ماسەلە تۋىلماعانىمەن، قىراعىلىقتى استە بوساڭسىتۋعا بولمايدى. سۋ مەن قۇمنىڭ بايلانىسىن رەتكە سالۋ سىندى وسى ”بۇيدانى“ مىقتاپ يگەرىپ، سۋ مەن قۇمدى رەتتەۋ - مەڭگەرۋ مەحانيزمىن كەمەلدەندىرىپ، كوپ جاق بىرىگىپ سۋدى تىزگىندەۋ، جەكە - جەكە باسقارۋ ماسەلەسىن شەشىپ، وزەن ارناسى مەن قايراڭدى وڭىرلەردە كەشەندى جوعارىلاتۋ، جونگە سالۋ ينجەنەرياسىن اتقارىپ، حۋاڭحى وزەنىنىڭ تومەنگى اعارىندا تۇنبا تۇنۋىن ازايتىپ، حۋاڭحى وزەنى جاعالاۋىنىڭ حاۋىپسىزدىگىنە شىنايى كەپىلدىك ەتۋ كەرەك.
ءۇشىنشى، سۋ بايلىعىن ۇنەمدەپ، شوعىرلى پايدالانۋدى ىلگەرىلەتۋ. حۋاڭحى وزەنىنىڭ سۋ بايلىعى مولشەرى وسىنشالىق عانا، ەكولوگيالىق قۇرىلىس جۇرگىزۋ ءۇشىن سۋ جۇمسالادى، ەكونوميكانى دامىتۋ، تاماقتانۋ، تىرشىلىك ەتۋ دە سۋدان ايرىلمايدى، سۋدى شەكسىز قامدايتىن بايلىق ساناۋعا بولمايدى. سۋعا قاراي قالانى تۇراقتاندىرۋعا، سۋعا قاراي جەردى تۇراقتاندىرۋعا، سۋعا قاراي ادامدى تۇراقتاندىرۋعا، سۋعا قاراي ءوندىرىستى تۇراقتاندىرۋعا تاباندى بولىپ، سۋ بايلىعىن ەڭ ۇلكەن بۇلجىماس تەجەم ساناپ، جان سانىن، قالانى جانە كاسىپ سالاسىن دامىتۋدى ۇيلەسىمدى جوبالاپ، ۇيلەسىمسىز سۋ ىستەتۋ سۇرانىسىن باتىل تەجەپ، ۇيلەسىمدى سۋ ۇنەمدەيتىن كاسىپتەر مەن تەحنيكالاردى بارىنشا دامىتىپ، اۋىل شارۋاشىلىعىندا سۋ ۇنەمدەۋدى بارىنشا ىلگەرىلەتىپ، بۇكىل قوعامدا سۋ ۇنەمدەۋ ارەكەتىن اتقارىپ، سۋدان ۇتىمسىز پايدالانۋ ءتاسىلىن ۇنەمدەپ، شوعىرلى پايدالانۋ تاسىلگە قاراي وزگەرتۋدى ىلگەرىلەتۋ كەرەك.
ءتورتىنشى، حۋاڭحى وزەنى الابىنىڭ جوعارى ساپالى دامۋىن ىلگەرىلەتۋ. ءىس جۇزىندىكتى تياناق ەتىپ، سۋعا وڭتايلى بولسا سۋعا سۇيەنۋ، تاۋعا وڭتايلى بولسا تاۋعا سۇيەنۋ، استىققا وڭتايلى بولسا استىق ەگۋ، اۋىل شارۋاشىلىعىن دامىتۋعا وڭتايلى بولسا اۋىل شارۋاشىلىعىن دامىتۋ، ونەركاسىپتى دامىتۋعا وڭتايلى بولسا ونەركاسىپتى دامىتۋ، ساۋدانى دامىتۋعا وڭتايلى بولسا ساۋدانى دامىتۋ، وڭىرلىك ەرەكشەلىككە يە جوعارى ساپالى دامۋ جولىن بەلسەنە قاراستىرۋ كەرەك. ءۇش وزەن قاينارى، چيليانشان تاۋى سياقتى ەكولوگيالىق يقۋاتى ماڭىزدى وڭىرلەردە، نەگىزىنەن، ەكولوگيانى قورعاپ، سۋ قاينارىن ساقتاپ، اناعۇرلىم كوپ ەكولوگيالىق ونىمدەردى جاراتۋ كەرەك. حۋاڭحى يىنىندەگى سۋارمالى ءوڭىر، فىنۋي جازىعى سياقتى استىق وندىرىلەتىن نەگىزگى وڭىرلەر وسى زامانعى اۋىل شارۋاشىلىعىن دامىتىپ، اۋىل شارۋاشىلىعى ونىمدەرىنىڭ ساپاسىن جوعارىلاتۋى كەرەك. وڭىرلىك ورتالىق قالالار سياقتى ەكونوميكانى دامىتۋ شارت - جاعدايى جاقسى وڭىرلەر شوعىرلى دامىپ، ەكونوميكا مەن جان سانىنىڭ كوتەرىمدىلىك قۋاتىن جوعارىلاتۋى كەرەك. كەدەي وڭىرلەر نەگىزدىك قۇرىلعىلار مەن الەۋمەتتىك قىزمەت وتەۋ دەڭگەيىن جوعارىلاتىپ، حالىق تۇرمىسىن بارىنشا قامتاماسىز ەتۋى جانە جاقسارتۋى كەرەك. ”ءبىر بەلدەۋ، ءبىر جول“دى بىرگە قۇرۋعا بەلسەنە ات سالىسىپ، سىرتقا ەسىك اشۋ دەڭگەيىن جوعارىلاتىپ، ەسىك اشۋ ارقىلى رەفورمانى، دامۋدى جەبەۋ كەرەك.
بەسىنشى، حۋاڭحى وزەنى مادەنيەتىن قورعاۋ، مۇراگەرلىك ەتۋ، اسقاقتاتۋ. حۋاڭحى مادەنيەتى − جۇڭحۋا مادەنيەتىنىڭ ماڭىزدى قۇرامداس بولىگى، جۇڭحۋا ۇلتىنىڭ تامىرى مەن جانى. حۋاڭحى مادەنيەت مۇرالارىن جۇيەلى قورعاۋدى ىلگەرىلەتىپ، حۋاڭحى مادەنيەتىندە قامتىلعان داۋىرلىك قۇندى ىشكەرىلەي كادەگە جاراتىپ، ”حۋاڭحى حيكايالارىن“ جاقسى شەرتىپ، تاريحتىڭ مادەنيەت جۇلگەسىن جالعاستىرىپ، مادەنيەت سەنىمدىلىگىن بەكەمدەپ، جۇڭحۋا ۇلتىنىڭ ۇلى گۇلدەنۋى سىندى جۇڭگو ارمانىن ورىنداۋعا رۋحاني كۇش توپتاۋ كەرەك.
شي جينپيڭ بىلاي دەپ اتاپ كورسەتتى: حۋاڭحى وزەنى الابىنىڭ ەكولوگياسىن قورعاۋعا جانە جوعارى ساپالى دامۋىنا باسشىلىق ەتۋدى كۇشەيتىپ، ەلىمىز سوتسياليستىك ءتۇزىمىنىڭ كۇشتى شوعىرلاندىرا وتىرىپ ۇلكەن ىستەر ىستەۋ ارتىقشىلىعىن ساۋلەلەندىرىپ، ”ءبىر تۇتاس جۇيە“ يدەياسىن مىقتاپ ورناتىپ، زاڭدىلىققا قۇرمەت ەتىپ، قورعاۋ مەن جونگە سالۋدىڭ جۇيەلىلىگىنە، تۇتاستىعىنا، سايكەستىگىنە اناعۇرلىم ءمان بەرىپ، جوعارى دەڭگەيدە جوبالاۋدى مىقتاپ ورىستەتىپ، كەلەلى ماسەلەلەردى زەرتتەۋدى كۇشەيتىپ، ءتۇزىلىس - مەحانيزمدى كۇش سالا جاڭالاپ، حۋاڭحى وزەنى الابىنىڭ ەكولوگياسىن قورعاۋ جانە جوعارى ساپالى دامۋى جاعىندا اناعۇرلىم زور قادام تاستاۋدى ىلگەرىلەتۋ كەرەك.
شي جينپيڭ بىلاي دەپ باسا دارىپتەدى: حۋاڭحى وزەنى الابىنىڭ ەكولوگياسىن قورعاۋدى جانە جوعارى ساپالى دامۋىن ىلگەرىلەتۋ ءبىر كۇندە ورىندالمايدى. تاريحي سابىرلىلىق پەن ستراتەگيالىق تاباندىلىقتى ساقتاپ، ەڭبەك ماعان جازىلماسا دا بولادى دەيتىن رۋحاني دەڭگەيمەن جانە ەڭبەك سىڭىرۋدە مەن بولماسام بولمايدى دەيتىن تاريحي جاۋاپكەرشىلىكپەن ۇزاق بولاشاقتى جوسپارلاپ قانا قويماي، قازىرگى ىستەردى جاقسى ىستەپ، ۇلى جوبانى سوڭىنا دەيىن سۇلبالاپ، بىرىنەن سوڭ ءبىرىن ىستەپ، حۋاڭحى وزەنىنىڭ حالىققا يگىلىك جەتكىزۋىنە مۇمكىندىك جاساۋ كەرەك.
حان جىڭ سوزىندە مىنانى ءبىلدىردى: باس شۋجي شي جينپيڭنىڭ ماڭىزدى ءسوزىنىڭ رۋحىن ىشكەرىلەي ۇيرەنىپ، ءتۇسىنىپ، قاۋىرت قورعاۋدى بىرگە يگەرۋدەن، قاۋىرت جونگە سالۋدى سايكەستى ىلگەرىلەتۋدەن جازباي، كۇش بىرىكتىرە وتىرىپ حۋاڭحى وزەنى الابىنىڭ ەكولوگياسىن قورعاۋدا جانە جوعارى ساپالى دامۋىندا جاڭا جاعداي اشۋ كەرەك. حۋاڭحى وزەنى الابىنىڭ ەكولوگياسىن قورعاۋدى جاپپاي كۇشەيتىپ، تاۋ، سۋ، ورمان، اتىز، كول، جايلىم ەكولوگيالىق كەڭىستىگىن ءبىر تۇلعالاندىرىپ قورعاۋعا جانە قورشاعان ورتانىڭ لاستانۋىن سايكەستى جونگە سالۋعا تاباندى بولىپ، جوعارعى اعاردا ”جۇڭحۋا سۋ مۇناراسى“ بەرىك، ورتاڭعى، تومەنگى اعاردىڭ ەكولوگياسى قونىسقا جايلى بولاتىن ەكولوگيالىق حاۋىپسىزدىك جاعدايىن قالىپتاستىرۋ كەرەك. جوعارى ساپالى دامۋ جولىنان باتىل اۋىتقىماي، جەرگىلىكتى ورىننىڭ جاعدايىنا قاراي وڭىرلىك ەرەكشەلىككە يە وسى زامانعى كاسىپ جۇيەسىن تۇلعالاپ، ەكونوميكانى دامىتۋدىڭ قوزعاۋشى كۇشى مەن سەرپىمدىلىگىن ارتتىرۋ كەرەك. حالىق تۇرمىسىن قامتاماسىز ەتۋدى، جاقسارتۋدى شىعار ءتۇيىن جانە تابان تىرەر تياناق ەتىپ، تۇتاس وزەن الابىنىڭ نەگىزگى الەۋمەتتىك قىزمەت وتەۋىن تەڭەستىرۋ دەڭگەيىن جەدەل جوعارىلاتىپ، حۋاڭحى وزەنى الابىنداعى حالىقتىڭ رەفورما، دامۋ جەتىستىكتەرىنەن اناعۇرلىم جاقسى يگىلىكتەنۋىنە مۇمكىندىك جاساۋ كەرەك. ءتۇزىلىس - مەحانيزم رەفورماسىندا جاڭالىق اشۋدى تەرەڭدەتىپ، بازار زاڭدىلىعىنا جانە بەتالىسىنا ۇيلەسەتىن سەلبەستىك مەحانيزمىن قاراستىرىپ، حۋاڭحى وزەنى الابىنىڭ ەكولوگياسىن قورعاۋدى جانە جوعارى ساپالى دامۋىن ىلگەرىلەتەتىن قۋاتتى بىرىككەن كۇش قالىپتاستىرۋ كەرەك.
ديڭ شۋەشياڭ، ليۋ حى، حى ليفىڭ اڭگىمە ماجىلىسكە قاتىناستى، ورتالىق پەن مەملەكەت ورگاندارىنىڭ قاتىستى تاراۋلارىنداعى جاۋاپتى جولداستار، قاتىستى ولكە، اۆتونوميالى رايونداعى جاۋاپتى جولداستار اڭگىمە ماجىلىسكە قاتىناستى.
