− ءتوراعا شي جينپيڭنىڭ ماسكەۋ حايۋاناتتار باقشاسىنداعى مىسىق ايۋ سارايىنىڭ اشىلۋ سالتىنا قاتىناسقاندىعى جونىندە
6 - ايدىڭ 5 - كۇنى كەشكە تامان، ماسكەۋ حايۋاناتتار باقشاسىنىڭ مىسىق ايۋ سارايىندا ”ديڭديڭ“ مەن ”رۋ - ي“ وزدەرىنىڭ ”ۇلكەن ۇيى“ندە ءسابىزدى اۋىز تولتىرا شايناپ وتىر، ولار اينەكتىڭ سىرتىنداعى تىلشىلەرگە دە اۋىق - اۋىق قاراپ باستارىن شايقاپ قويادى، مومىندىعى ايقىن اڭعارىلادى.
بۇل ەكەۋىنىڭ جۇڭگو مىسىق ايۋدى قورعاۋ، زەرتتەۋ ورتالىعىنىڭ يا - ان بيفىڭشيا بازاسىنان وسى اراعا كەلگەندىگىنە ءبىر ايدان استى. ولاردىڭ وسىناۋ شالعايداعى جاڭا مەكەندەرىن ەرەكشە ۇناتاتىندىقتارىن ءارى وسىنداعى جاڭا تۇرمىسقا ۇيلەسكەندىكتەرىن انىق بايقاۋعا بولادى.
ساعات 20دان 15 مينۋت وتكەن مولشەردە، رەسەيدە مەملەكەت ىستەرى ساپارىندا جۇرگەن مەملەكەت ءتوراعاسى شي جينپيڭ پۋتين زۇڭتۇڭنىڭ سەرىك بولۋىندا ماسكەۋ حايۋاناتتار باقشاسىنا كەلىپ، مىسىق ايۋ سارايىنىڭ اشىلۋ سالتىنا قاتىناستى.
مىسىق ايۋ سارايىندا، مەملەكەتتىك ورمان شارۋاشىلىعى جانە جايلىم مەكەمەسىنىڭ باستىعى جاڭ جيانلۇڭ، ماسكەۋ قالاسىنىڭ باستىعى سوبيانين، ماسكەۋ حايۋاناتتار باقشاسىنىڭ باستىعى اكۋروۆا ءتوراعا شي جينپيڭگە جۇڭگونىڭ 2 مىسىق ايۋىنىڭ تۇرمىس جاعدايىن ەگجەي - تەگجەيلى تانىستىردى.
ماسكەۋ حايۋاناتتار باقشاسى مىسىق ايۋ سارايىنان ”ديڭديڭ“ مەن ”رۋ - ي“گە جەكە - جەكە 3 بولمەلى ”ۇلكەن ءۇي“ دايىنداپ، ولاردىڭ ازىقتانۋ، ۇيىقتاۋ، ويناۋ قاجەتىن تولىق قاناعاتتاندىردى. مۇنان سىرت، حايۋاناتتار باقشاسى ازىق ازىرلەۋ بولمەسىن، بامبۋكتى جاس كۇيىندە ساقتاۋ بولمەسىن، باقىلاۋ بولمەسىن دە دايىنداپ، ولاردىڭ جەتىلۋ بارىسىندا تاماشا فيزيولوگيالىق جانە پسيحيكالىق كۇيىن ساقتاۋىنا شىنايى كەپىلدىك ەتتى.
ءتوراعا شي جينپيڭ مالىمەتتى دەن قويا تىڭدادى ءارى ءالسىن - ءالى سۇراۋ قويدى.
ەكى باسشى مىسىق ايۋ سارايىنان شىققاندا، سىرتتا كۇتىپ تۇرعان جۇڭگولىق جانە رەسەيلىك 30 نەشە بالا ولاردى دەرەۋ ورتالارىنا الدى.
جۇڭگولىق بالالار ءتوراعا شي جينپيڭگە: ”شي جينپيڭ اتا، سالەمەتسىز بە!“، - دەپ امانداستى ءارى ورىس تىلىندە پۋتين زۇڭتۇڭعا دا امانداستى.
رەسەيلىك بالالار حانزۋ تىلىندە ءتوراعا شي جينپيڭگە: ”سالەمەتسىز بە!“، - دەپ امانداستى.
ءتوراعا شي جينپيڭ بالالارعا: ”سالەمەتسىڭدەر مە!“، - دەپ كۇلىمسىرەي امانداستى.
ەكى باسشى بالالارمەن ىقىلاسپەن اڭگىمەلەستى، بىرگە سۋرەتكە ءتۇسىپ، ەستەلىك قالدىردى.
مىسىق ايۋ قۋىرشاعىن كوتەرىپ العان بالالاردىڭ، جۇزدەرىنەن باقىت كۇلكىسى ەسەدى.
وسى سۇيىسپەنشىلىك، وسى كورىنىس، جۇرەكتى جىلىتىپ، جانىڭدى جەلپىنتەدى.
سىرتتاعى قىزۋ دۋماننىڭ اسەرىنە ۇشىراعاننان بولار ”ديڭديڭ“ مەن ”رۋ - ي“دىڭ كوڭىل كۇيلەرى دە وتە جاقسى كورىندى، ءسابىزدى ونان ارى قۇشىرلانا شايناپ، موپ - موماقان سۇيكىمدى بەينەمەن جازعىتۇرىمنىڭ وسى ءبىر قىزىقتى، جايلى دا جاراسىمدى كەرىمسال كەشىنىڭ راقاتىنا بولەنىپ وتىر.
بۇل وسى 2 ”جۇڭگو - رەسەي دوستىق ەلشىسى“نىڭ رەسەيدە تۇڭعىش رەت حالىققا كورسەتىلۋى ەدى.
ءتوراعا شي جينپيڭمەن بىرگە مىسىق ايۋ سارايىنىڭ اشىلۋ سالتىنا قاتىناسۋدان ىلگەرى، پۋتين زۇڭتۇڭ تىلشىلەر جيىنىندا ”ديڭديڭ“ مەن ”رۋ - ي“دىڭ ماسكەۋ حايۋاناتتار باقشاسىنا ورنالاسقاندىعىن ەرەكشە تىلگە العان بولاتىن. ”ءبىز مىسىق ايۋدى ءسوز ەتكەنىمىزدە، ىلعي دا جۇزىمىزگە كۇلكى ۇيرىلەدى. جۇڭگو ’مەملەكەت اسىلى‘ مىسىق ايۋدى وسىندا جىبەرىپ، ەكى ەل دوستىعىنىڭ اناعۇرلىم تەرەڭدەگەندىگىنىڭ كۋاسى ەتىپ وتىر“.
سول كۇنى كەشتە، ءتوراعا شي جينپيڭ جۇڭگو مەن رەسەيدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعىن ەسكە ءتۇسىرۋ جينالىسىنا قاتىناسقان كەزدە، مىنالاردى ءبىلدىردى: ”ديڭديڭ“ مەن ”رۋ - ي“دىڭ ماسكەۋ حايۋاناتتار باقشاسىنا ورنالاسۋى رەسەي حالقىنا، اسىرەسە، كىشكەنتاي دوستارعا قۋانىش الا كەلىپ، جۇڭگو مەن رەسەي ەكى ەل حالقى دوستىعىنىڭ تاعى ءبىر ادەمى اڭگىمەسىنە اينالدى. ”ەندىگى قادامدا، ءبىز وقۋ - اعارۋ، مادەنيەت، دەنە تاربيە، ساياحات، اقپارات قۇرالدارى، جاستار سياقتى سالالاردا ءتىپتى دە كوپ حالىق كەڭ كولەمدە ات سالىساتىن، قۋانا قابىلدايتىن قيمىلدار وتكىزىپ، ەكى ەل قوعامىنىڭ ءار سالاسىندا، ءارقايسى جەرلەرىندە اۋىس - كۇيىستى، ءوزارا ۇلگى الۋدى كۇشەيتىپ، تانىمدىق قارىم - قاتىناستى، مادەنيەتتىك تۇسىنىستىكتى، حالىق تىلەگىن توعىستىرۋدى ىلگەرىلەتىپ، جۇڭگو مەن رەسەيدىڭ ۇرپاقتان - ۇرپاقتار بويى دوستىعىنىڭ اماناتىن بىرگە جالعاستىرامىز“.
