مەملەكەت ءتوراعاسى شي جينپيڭ 6 - ايدىڭ 6 - كۇنى ماسكەۋدە رەسەيدىڭ زۇڭليى مەدۆەدەۆپەن كەزدەستى.
شي جينپيڭ بىلاي دەپ اتاپ كورسەتتى: بيىل جۇڭگو مەن رەسەيدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى. جۇڭگو - رەسەي قارىم - قاتىناسى جوعارى دەڭگەيدەگى دامۋدى ساقتادى، ءىرى ەلدەر قارىم - قاتىناسىندا ءوزارا سەنىم دەڭگەيى، ىستەستىك ورەسى، ستراتەگيالىق قۇنى ەڭ جوعارى، دۇنيە ءجۇزىنىڭ بەيبىتشىلىگىنە، ورنىقتىلىعىنا، دامۋىنا ماڭىزدى ۇلەس قوستى. قازىر جۇڭگو - رەسەي قارىم - قاتىناسى جاڭا داۋىرگە ءوتىپ، ەكى ەلدىڭ جان - جاقتى ستراتەگيالىق ىستەستىك سەرىكتەستىك قاتىناسىندا تىڭ مازمۇندار ۇزدىكسىز ىسكە قوسىلدى. قىم - قۋىت، كۇردەلى حالىقارالىق جاعدايعا، اسىرەسە، بازارى جاڭادان گۇلدەنگەن ەلدەردىڭ دامۋىن اۋىزدىقتايتىن ءىشىنارا ورىنسىز ارەكەتتەرگە سايكەس، جۇڭگو مەن رەسەيدىڭ جان - جاقتى ستراتەگيالىق سەرىكتەستىك ىستەستىكتى كۇشەيتۋى ەكى ەلدىڭ جانە ەكى ەل حالىقتارىنىڭ مۇددەسىن قورعاۋدا، دۇنيە ءجۇزىنىڭ بەيبىتشىلىگىن، ورنىقتىلىعىن، گۇلدەنۋىن قورعاۋدا كەلەلى مانگە يە.
شي جينپيڭ بىلاي دەپ باسا دارىپتەدى: ەكى جاق تاعى دا قۇلشىنا ءتۇسىپ، ءار سالاداعى سەلبەستىكتەردىڭ ۇزدىكسىز ىشكەرىلەي دامۋىن ىلگەرىلەتىپ، ەكى ەل حالىقتارىنا اناعۇرلىم كوپ تيىمدىلىكتەر اكەلىپ، ەكى ەلدىڭ دامۋىنا، گۇلدەنۋىنە اناعۇرلىم قۋاتتى قوزعاۋشى كۇش ۇستەۋى كەرەك. ەكى جاق، سونداي - اق بىرلەسكەن مەملەكەتتەر ۇيىمى، الەمدىك ساۋدا ۇيىمى، بريكس ەلدەرى، 20 ەل توبى سياقتى كوپ جاقتى ىستەردەگى سەلبەستىكتى كۇشەيتىپ، حالىقارالىق قوعامعا اناعۇرلىم كوپ ”جۇڭگو، رەسەي جوباسى“ن ارناۋى كەرەك.
مەدۆەدەۆ مىنالاردى ءبىلدىردى: ەكى ەلدىڭ مەملەكەت باسشىلارى كەشە مالىمدەمەگە قول قويىپ، جۇڭگو - رەسەي قارىم - قاتىناسىنىڭ جاڭا داۋىرگە وتكەنىن جاريالادى، مۇنىڭ ماڭىزى زور. قازىر ءىشىنارا ەلدەر سوڭعى زاردابىمەن ساناسپاي، حالىقارالىق زاڭ مەن حالىقارالىق قارىم - قاتىناس نەگىزگى ەرەجەسىنە اشىق قايشىلىق جاساپ، قيت ەتسە بولدى باسقا ەلدەردى جازالاپ، باسقا ەلدەردىڭ كاسىپورىندارىن قىسپاققا الىپ وتىر، بۇل دۇنيە ءجۇزى ەكونوميكاسىنىڭ ارتۋىن اۋىزدىقتاپ، حالىقارالىق ساۋدانىڭ دامۋىنا زيان جەتكىزدى، بۇل ارەكەت يەك استىن عانا كورگەندىك جانە ءبۇلدىرۋ سيپاتىنا يە. رەسەي مەن جۇڭگو ستراتەگيالىق سەلبەستىكتى كۇشەيتىپ، رەسەي مەن جۇڭگو، سونداي - اق حالىقارالىق قوعام ءدوپ كەلگەن ورتاق سىن - سايىستارعا قول ۇستاسا توتەپ بەرىپ، دۇنيە ءجۇزىنىڭ بەيبىتشىلىگى مەن دامۋىن شىن مانىندە قورعاۋى كەرەك. رەسەي جاق جۇڭگو جاقپەن بىرگە ەكى ەل زۇڭليلەرىنىڭ مەرزىمدى كەڭەسى سياقتى مەحانيزمدەر ارقىلى ەكى ەلدىڭ مەملەكەت باسشىلارى قول جەتكىزگەن ەۆروپا - ازيا ەكونوميكالىق وداعى مەن ”ءبىر بەلدەۋ، ءبىر جول“دى بىرگە قۇرۋدى ۇشتاستىرۋ سەلبەستىگىن قامتىعان ماڭىزدى سەلبەستىك ورتاق تانىمىن جاپپاي تياناقتاندىرۋدى قالايدى.
ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار كەزدەسۋگە قاتىناستى.
