شي جينپيڭ رەسەيدىڭ زۇڭتۇڭى پۋتينمەن كەڭەس وتكىزدى

بەيجيڭنەن اتتانىپ ماسكەۋگە بارىپ، رەسەي فەدەراتسياسىنداعى مەملەكەت ىستەرى ساپارىن باستادى ءارى 23 - كەزەكتى سانت - پەتربۋرگ حالىقارالىق ەكونوميكالىق تالقى مىنبەرىنە قاتىناسادى

شي جينپيڭ رەسەيدىڭ زۇڭتۇڭى پۋتينمەن كەڭەس وتكىزدى

ەكى ەلدىڭ مەملەكەت باسشىلارى جۇڭگو مەن رەسەيدىڭ جاڭا داۋىردەگى جان - جاقتى ستراتەگيالىق ىستەستىك سەرىكتەستىك قارىم - قاتىناسىن دامىتۋعا ءبىر اۋىزدان قوسىلدى

　　6 - ايدىڭ 5 - كۇنى مەملەكەت ءتوراعاسى شي جينپيڭ ماسكەۋ كرەمىل سارايىندا رەسەيدىڭ زۇڭتۇڭى پۋتينمەن كەڭەس وتكىزدى. سۋرەتتە: كەڭەستەن بۇرىن ەكى ەلدىڭ مەملەكەت باسشىلارى قول الىسىپ تۇرىپ ەستەلىك سۋرەتكە ءتۇستى. سۋرەتتى شينحۋا اگەنتتىگىنىڭ ءتىلشىسى ديڭ حايتاۋ تۇسىرگەن　

مەملەكەت ءتوراعاسى شي جينپيڭ 6 - ايدىڭ 5 - كۇنى ماسكەۋدەگى كرەمىل سارايىندا رەسەيدىڭ زۇڭتۇڭى پۋتينمەن كەڭەس وتكىزدى. ەكى ەلدىڭ مەملەكەت باسشىلارى ديپلوماتيالىق قاتىناس ورناتقان 70 جىلدان بەرگى ەكى جاقتى قارىم - قاتىناستىڭ دامۋىنا جوعارى باعا بەرىپ، تاتۋ كورشىلىك، دوستىق، سەلبەسىپ تەڭ يگىلىككە كەنەلۋ ۇستانىمىنا ساي، جۇڭگو مەن رەسەيدىڭ جاڭا داۋىردەگى جان - جاقتى ستراتەگيالىق ىستەستىك سەرىكتەستىك قارىم - قاتىناسىن دامىتىپ، ەكى ەلدىڭ قارىم - قاتىناسىن اناعۇرلىم جوعارى ورەگە كوتەرىپ، ەكى ەل حالىقتارى مەن دۇنيە ءجۇزى حالىقتارىن اناعۇرلىم جاقسى يگىلىككە كەنەلتۋگە ءبىر اۋىزدان قوسىلدى.

شي جينپيڭ بىلاي دەپ اتاپ كورسەتتى: بۇل − مەنىڭ تاعى دا مەملەكەت ءتوراعاسى مىندەتىن وتەگەننەن كەيىن، تۇڭعىش رەت رەسەيگە مەملەكەت ىستەرى ساپارىمەن كەلۋىم ءارى 2013 - جىلدان بەرى رەسەيدەگى 8 - رەتكى ساپارىم. قازىر جۇڭگو - رەسەي قارىم - قاتىناسى جوعارى دەڭگەيدە ۇزدىكسىز، ورنىقتى، اقاۋسىز دامىپ، تاريحتاعى ەڭ جاقسى مەزگىلدە تۇر. ەكى جاق قارسى جاقتىڭ ءوز ەلىنىڭ وزەكتى مۇددەسىن قورعاۋىن باتىل قولداپ، ساياسي جانە ستراتەگيالىق ءوزارا سەنىمى نىعايىپ بەكەمدەلە ءتۇستى؛ ءار سالاداعى سەلبەستىكتى بەلسەنە ىلگەرىلەتىپ، ەكى ەلدىڭ قارىم - قاتىناسىنىڭ ىشكى قوزعاۋشى كۇشى ۇزدىكسىز كورنەكتىلەنىپ، مۇددەلەر توعىسۋى كۇن سايىن تەرەڭدەدى؛ حالىقارالىق ىستەر مەن الەمدىك جونگە سالۋعا بەلسەنە ات سالىسىپ، دۇنيە ءجۇزىنىڭ بەيبىتشىلىگى مەن ورنىقتىلىعىن جانە حالىقارالىق ادىلدىك پەن تۋراشىلدىقتى قورعاۋدا ماڭىزدى ورەلى رول اتقاردى.

شي جينپيڭ بىلاي دەپ باسا دارىپتەدى: بيىل − جۇڭگو مەن رەسەيدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى. 70 جىل − بەلەس ءارى جاڭا باستاما. دۇنيە جۇزىندە 100 جىلدا بولماعان زور وزگەرىستەردى باستان وتكەرىپ وتىرعان جۇڭگو مەن رەسەي ەكى ەل حالىقتارى مەن حالىقارالىق قوعامنىڭ اناعۇرلىم زور ءۇمىتىن ارقالاپ وتىر. جۇڭگو جاق رەسەي جاقپەن قول ۇستاسا قۇلشىنىپ، ەكى ەلدىڭ جوعارى دەڭگەيدەگى ساياسي قارىم - قاتىناسىنىڭ بەلسەندى اسەرىن ۇزدىكسىز ۇلعايتىپ، ەكى ەل حالىقتارىنىڭ ەكى جاقتى سەلبەستىكتە اناعۇرلىم كوپ تابىس سەزىمىنە يە بولۋىنا مۇمكىندىك جاساپ، حالىقارالىق ىستەردە اناعۇرلىم كوپ ”جۇڭگو، رەسەي جوباسى“ن ۇسىنۋدى قالايدى. بۇگىن مەن پۋتين زۇڭتۇڭمەن ەكى ءتۇرلى ماڭىزدى مالىمدەمەگە قول قويدىم، ءبىرىنشى، جۇڭگو مەن رەسەيدىڭ جاڭا داۋىردەگى جان - جاقتى ستراتەگيالىق ىستەستىك سەرىكتەستىك قارىم - قاتىناسىن دامىتىپ، ەكى ەلدىڭ ديپلوماتيالىق قارىم - قاتىناس ورناتقاندىعىنىڭ 70 جىلدىعى سىندى ماڭىزدى جىلدا ەكى جاقتى قارىم - قاتىناستىڭ جاڭا ورنىن بەلگىلەۋدى جانە وعان ءمان ۇستەۋدى جاريالادىق؛ ەكىنشى، الەمدىك ستراتەگيانىڭ ورنىقتىلىعىن بىرگە قورعاپ، جۇڭگو مەن رەسەيدىڭ جاۋاپكەرشىلىك ارقالاۋ رۋحى مەن ەكى ەلدىڭ ستراتەگيالىق سەلبەستىگىنىڭ بەلسەندى اسەرىن ايگىلەۋدى مالىمدەدىك، بۇل قازىرگى تاڭدا ەرەكشە ماڭىزدى مانگە يە.

شي جينپيڭ بىلاي دەپ اتاپ كورسەتتى: بۇگىنگى دۇنيە جۇزىندە ورنىقسىزدىق پەن تۇراقسىزدىق ۇدەپ كەلەدى. جۇڭگو مەن رەسەيدىڭ قارىم - قاتىناسىن كۇشەيتۋ − تاريحتىڭ ءۇنى، ەكى جاقتىڭ بۇلجىماس ستراتەگيالىق تاڭداۋى. ەكى جاق ستراتەگيالىق قارىم - قاتىناس پەن سەلبەستىكتى ىلگەرىلەتىپ، ءبىر - ءبىرىنىڭ وزەكتى مۇددەسىنە ساياتىن ماسەلەلەردە ءبىرىن - ءبىرى قولداۋدى كۇشەيتۋ كەرەك. ەكى ەلدىڭ ەكونوميكا - ساۋدا سەلبەستىگىنىڭ ساپاسىنىڭ جاپپاي ءوسىپ، دارەجەسىنىڭ جوعارىلاۋىن جەبەپ، ەكى ەلدىڭ ستراتەگيالىق ءىرى نىساندارى مەن جاڭا گۇلدەنگەن سالالار سەلبەستىگىنىڭ بىرگە دامۋىن ىلگەرىلەتىپ، ەكونوميكا - ساۋدا، قارجى قوسۋ، ەنەرگيا، عىلىم - تەحنيكا، عارىش - اۆياتسيا، ۇلاستىرۋ - تۇتاستىرۋ، اۋىل شارۋاشىلىعى، فينانس، جەرگىلىكتى ورىندار سياقتى سالالارداعى سەلبەستىكتى كۇشەيتۋ كەرەك. ”ءبىر بەلدەۋ، ءبىر جول“دى بىرگە قۇرۋدى ەۆروپا - ازيا ەكونوميكالىق وداعىمەن ۇشتاستىرۋ سەلبەستىگىن بەلسەنە ىلگەرىلەتىپ، ءوڭىردىڭ ءبىر تۇلعالانۋى مەن ءوڭىر ەكونوميكاسىنىڭ توعىسپالى دامۋىن جەبەۋگە كۇش سالۋ كەرەك. گۋمانيتارلىق اۋىس - كۇيىستى كۇشەيتىپ، 2020 - جىلدان 2021 - جىلعا دەيىنگى جۇڭگو مەن رەسەيدىڭ عىلىم - تەحنيكادا جاڭالىق اشۋ جىلى قيمىلى جوباسىن ويداعىداي جوبالاۋ كەرەك. جۇڭگو مەن رەسەي بىرلەسكەن مەملەكەتتەر ۇيىمى حاۋىپسىزدىك القالار كەڭەسىنىڭ تۇراقتى القا ەلى رەتىندە ۇزدىكسىز تۇردە حالىقارالىق قوعاممەن بىرگە بىرلەسكەن مەملەكەتتەر ۇيىمىن وزەك، حالىقارالىق زاڭدى نەگىز ەتكەن حالىقارالىق جۇيەنى باتىل قورعاپ، كوپ جاقتى ساۋدا ءتۇزىلىسىن قورعاپ، قىم - قۋىت، كۇردەلى حالىقارالىق جاعدايعا قۇدىرەتتى وڭ ەنەرگيا ۇستەپ، ادامزاتتىڭ تاعدىرلاس ورتاق تۇلعاسىن قۇرۋعا جاڭا ۇلەس قوسۋى كەرەك.

پۋتين مىنالاردى ءبىلدىردى: كونە كوز دوسىم ءتوراعا شي جينپيڭنىڭ رەسەيگە ساپارلاي كەلگەنىن قىزۋ قارسى الامىن، جۇڭحۋا حالىق رەسپۋبليكاسى قۇرىلعاندىعىنىڭ 70 جىلدىعىن قىزۋ قۇتتىقتايمىن، جاڭا جۇڭگو دۇنيەگە كەلگەننىڭ ەكىنشى كۇنى ەكى ەلىمىز ديپلوماتيالىق قارىم - قاتىناس ورناتتى. ديپلوماتيالىق قارىم - قاتىناس ورناتقان 70 جىلدان بەرى، ەكى جاقتىڭ بىرگە قۇلشىنۋىندا، رەسەي - جۇڭگو قارىم - قاتىناسى بۇرىن بولماعان جوعارى دەڭگەيگە جەتىپ، شار تاراپتى اۋىس - كۇيىس سەلبەستىگى اسا ناتيجەلى بولدى. رەسەي مەن جۇڭگونىڭ اتى زاتىنا ساي جان - جاقتى ستراتەگيالىق ىستەستىك سەرىكتەستىك قاتىناس ورناتۋى ەكى ەل حالىقتارىنا باقىت جەتكىزىپ قانا قويماي، الەمدىك حاۋىپسىزدىك پەن ستراتەگيالىق ورنىقتىلىقتى قورعاۋداعى ماڭىزدى كۇشكە اينالدى. ءبىز ءوزىمىز قول جەتكىزگەن تابىستارعا قاناعاتتانىپ قانا قويماي، ەكى ەل قارىم - قاتىناسىن اناعۇرلىم جاقسى دامىتۋىمىز كەرەك. قازىرگى كۇردەلى دە الماعايىپ حالىقارالىق جاعدايدا ءتوراعا شي جينپيڭنىڭ بۇل ساپارىنىڭ ءمانى زور، جاڭا داۋىردەگى رەسەي - جۇڭگو قارىم - قاتىناسىنىڭ دامۋىنا قۇدىرەتتى قوزعاۋشى كۇش قوسادى. رەسەي مەن جۇڭگو كەلەلى حالىقارالىق جانە وڭىرلىك ماسەلەلەردەگى سايكەسۋ مەن سەلبەسۋدى ۇزدىكسىز كۇشەيتىپ، سىڭار جاقتىلىق، قورعامپازدىق اكەلگەن سىن - سايىسقا توتەپ بەرىپ، دۇنيە ءجۇزىنىڭ بەيبىتشىلىگى مەن ورنىقتىلىعىن قورعاۋ كەرەك. رەسەي جاق جۇڭگومەن ەكونوميكا - ساۋدا، اۋىل شارۋاشىلىعى، فينانس، عىلىم - تەحنيكا، قورشاعان ورتانى قورعاۋ، حابار - بايلانىس، نەگىزدىك قۇرىلعى قۇرىلىسى سياقتى سالالارداعى سەلبەستىكتەردى تەرەڭدەتۋگە كۇش سالىپ، جەرگىلىكتى ورىندار اراسىنداعى بارىس - كەلىستى كۇشەيتىپ، وقۋ - اعارتۋ، مادەنيەت، ساياحات سياقتى گۋمانيتارلىق اۋىس - كۇيىستى ىلگەرىلەتۋ كەرەك. رەسەي جاق جۇڭگو جاقتى جەتكىلىكتى مۇناي، گاز ەنەرگياسىمەن قامداۋدى قالايدى، جۇڭگوعا سويا بۇرشاق سياقتى اۋىل شارۋاشىلىعى ونىمدەرى ەكسپورتىن ارتتىرۋدى قالايدى، ەۆروپا - ازيا ەكونوميكالىق وداعىنىڭ ”ءبىر بەلدەۋ، ءبىر جول“مەن ۇشتاسۋىن جەدەلدەتۋدى ءۇمىت ەتەدى.

ەكى ەلدىڭ مەملەكەت باسشىلارى ەكى ەلدىڭ قاتىستى تاراۋلارىنىڭ جاۋاپتىلارىنىڭ ءارقايسى ءتۇيىندى سالالارداعى ەكى جاقتى سەلبەستىك جاعدايى جونىندەگى مالىمەتىن تىڭدادى ءارى چاۋشيان تۇبەگىنىڭ جاعدايى، يراننىڭ يادرو ماسەلەسى، ۆەنەسۋەلا سياقتى ورتاق كوڭىل ءبولىپ وتىرعان حالىقارالىق جانە وڭىرلىك ماسەلەلەر جونىندە پىكىر اۋىستىردى. ەكى ەلدىڭ مەملەكەت باسشىلارى بىرلەسكەن مەملەكەتتەر ۇيىمى، شاڭحاي سەلبەستىك ۇيىمى، بريكس ەلدەرى، ازيا - تىنىق مۇحيت ەكونوميكالىق سەلبەستىك ۇيىمى، 20 ەل توبى سياقتى حالىقارالىق ورىندارداعى بايلانىستى، سايكەستىكتى كۇشەيتىپ، كوپ جاقتىلىق پەن حالىقارالىق قارىم - قاتىناستىڭ نەگىزگى ولشەمىن قورعاۋعا ءبىر اۋىزدان قوسىلدى.

كەڭەستەن كەيىن ەكى ەلدىڭ مەملەكەت باسشىلارى «جۇڭحۋا حالىق رەسپۋبليكاسى مەن رەسەي فەدەراتسياسىنىڭ جاڭا داۋىردەگى جان - جاقتى ستراتەگيالىق ىستەستىك سەرىكتەستىك قارىم - قاتىناسىن دامىتۋ جونىندەگى بىرلەسكەن مالىمدەمەسى»نە، «جۇڭحۋا حالىق رەسپۋبليكاسى مەن رەسەي فەدەراتسياسىنىڭ وسى زامانعى الەمنىڭ ستراتەگيالىق ورنىقتىلىعىن كۇشەيتۋ جونىندەگى بىرلەسكەن مالىمدەمەسى»نە بىرگە قول قويدى ءارى كوپتەگەن ەكى جاقتى حۇجاتتارعا قول قويۋعا كۋا بولدى.

ەكى ەلدىڭ مەملەكەت باسشىلارى تىلشىلەرمەن دە بىرگە كەزدەستى ءارى چاڭچىڭ اۆتوكولىگىنىڭ تۋلا وبلىسىنداعى زاۆودىندا وندىرىلگەن اۆتوكولىك كورمەسىن تاماشالادى، ماسكەۋ حايۋاناتتار باقشاسىنداعى مىسىق ايۋ سارايىنىڭ اشىلۋ سالتىنا قاتىناستى.

كەڭەستەن بۇرىن پۋتين زۇڭتۇڭ كرەمل سارايىنىڭ گەورگي زالىندا شي جينپيڭدى سالتاناتپەن قارسى الۋ سالتىن وتكىزدى.

6 - ايداعى ماسكەۋدە كۇن نۇرى شۇلەن شۇعىلاسىن شاشىپ، جەر ءجۇزى جاسىل جەلەك جامىلعان. شي جينپيڭ اۆتوكولىكپەن كرەمل سارايىنىڭ بولوۆيتس مۇناراشا عيماراتىنىڭ قاقپاسىنان كىردى، رەسەيدىڭ باتىر تۇلعالى اتتى سالتانات قاراۋىلى جول بويىندا قاتارعا تۇرىپ قارسى الدى.

ايبىندى دا اسەرلى قوناق قابىلداۋ مۋزيكاسىنىڭ سۇيەمەلدەۋىندە شي جينپيڭ مەن پۋتين جەكە - جەكە گەورگي زالىنىڭ ەكى باسىنان قىزىل كىلەمدى باسىپ ارشىندى قاداممەن زالدىڭ ورتاسىنا قاراي ءجۇردى. ەكى ەلدىڭ مەملەكەت باسشىلارى قول الىسىپ تۇرىپ، بىرگە ەستەلىك سۋرەتكە ءتۇستى. اسكەري وركەستر جۇڭگو، رەسەي ەكى ەلدىڭ مەملەكەت ءانىن ورىندادى. شي جينپيڭ رەسەي جاقتىڭ نەگىزگى مانساپتىلارىمەن قول الىسىپ، پۋتين جۇڭگو جاقتان سەرىك بولىپ بارعان كىسىلەرمەن قول الىستى.

ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلىلار جوعارىداعى قيمىلدارعا قاتىناستى.

شينحۋا اگەنتتىگىنىڭ 6 - ايدىڭ 5 - كۇنى بەيجيڭنەن بەرگەن حابارى. مەملەكەت ءتوراعاسى شي جينپيڭ رەسەي فەدەراتسياسىنىڭ زۇڭتۇڭى پۋتيننىڭ ۇسىنىسىمەن رەسەيدە مەملەكەت ىستەرى ساپارىندا بولۋ ءارى 23 - كەزەكتى سانت - پەتربۋرگ حالىقارالىق ەكونوميكالىق تالقى مىنبەرىنە قاتىناسۋ ءۇشىن 6 - ايدىڭ 5 - كۇنى ارناۋلى ۇشاقپەن بەيجيڭنەن اتتاندى.

شي جينپيڭگە سەرىك بولىپ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت شۋجيچۋىنىڭ شۋجيى، ورتالىق كوميتەت كەڭسەسىنىڭ مەڭگەرۋشىسى ديڭ شۋەشياڭ، جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ مۇشەسى، ورتالىق كوميتەت سىرتقى ىستەر قىزمەت كوميتەتى كەڭسەسىنىڭ مەڭگەرۋشىسى ياڭ جيەچى، مەملەكەتتىك كەڭەستىڭ مۇشەسى، قوسىمشا سىرتقى ىستەر مينيسترى ۋاڭ ي، مەملەكەتتىك ساياسي كەڭەستىڭ ورىنباسار ءتوراعاسى، مەملەكەتتىك دامۋ جانە رەفورما كوميتەتىنىڭ مەڭگەرۋشىسى حى ليفىڭ قاتارلىلار ساپارعا اتتاندى.　شينحۋا اگەنتتىگىنىڭ 6 - ايدىڭ 5 - كۇنى ماسكەۋدەن بەرگەن حابارى (تىلشىلەر لۋان حاي، لي جىحۇي). مەملەكەت ءتوراعاسى شي جينپيڭ 6 - ايدىڭ 5 - كۇنى ارناۋلى ۇشاقپەن ماسكەۋگە جەتىپ، رەسەي فەدەراتسياسىنداعى مەملەكەت ىستەرى ساپارىن باستادى.

جەرگىلىكتى ۋاقىت تۇسكى ساعات 12دە شي جينپيڭ وتىرعان ارناۋلى ۇشاق ماسكەۋ ۆنۋكۆو ارناۋلى ۇشاق اۋەجايىنا كەلىپ قوندى. شي جينپيڭ ۇشاق ەسىگىنەن شىققاندا، رەسەي ۇكىمەتىنىڭ جوعارى دارەجەلى ءمانساپتىلارى ساتىنىڭ جانىندا تۇرىپ، قىزۋ قارسى الدى.

رەسەي جاق اۋەجايدا ءتوراعا شي جينپيڭگە ارناپ قارسى الۋ سالتىن وتكىزدى. اسكەري وركەستر جۇڭگو - رەسەي ەكى ەلدىڭ مەملەكەت ءانىن ورىندادى. شي جينپيڭ رەسەي ءۇش ارمياسنىڭ قۇرمەت قاراۋىلىن جانە سالتانات قاتارىن كوزدەن كەشىردى.

شي جينپيڭ جۇڭگو ۇكىمەتى مەن جۇڭگو حالقى اتىنان رەسەي ۇكىمەتى مەن حالقىنا شىن ىقىلاستى سالەم جولدادى ءارى ىزگى تىلەك ءبىلدىردى. شي جينپيڭ مىنانى باسا دارىپتەدى: بيىل − جۇڭگو مەن رەسەي ديپلوماتيالىق قارىم - قاتىناس ورناتقان 70 جىلدىق تاريحي ءساتتى قارسى الادى. ەكى جاقتىڭ بىرگە قۇلشىنۋىندا، جۇڭگو مەن رەسەيدىڭ جان - جاقتى ستراتەگيالىق ىستەستىك سەرىكتەستىك قارىم - قاتىناسى تاريحتاعى ەڭ جاقسى مەزگىلگە ءوتىپ، بۇگىنگى دۇنيە جۇزىندەگى ءىرى ەلدەردىڭ، كورشى ەلدەردىڭ تاتۋ - ءتاتتى بىرگە تۇرۋىنىڭ، سەلبەستىك جاساپ بىرگە يگىلىكتەنۋىنىڭ ۇلگىسىنە اينالدى. ەكى ەلدىڭ ساياسي ءوزارا سەنىمدىلىگى بەرىك، جوعارى جىكتەگىلەر بارىس - كەلىسىنىڭ جانە ءار سالاداعى سەلبەستىك مەحانيزمى كەمەلدى، حالىقارالىق ىستەردە قويۋ سەلبەستىك ورىستەتىپ، ءوڭىردىڭ جانە دۇنيە ءجۇزىنىڭ بەيبىتشىلىگى مەن ورنىقتىلىعىن جانە حالىقارالىق ادىلدىك پەن تۋراشىلدىقتى قورعاۋدا بەلسەندى دە ورەلى رول اتقاردى.

شي جينپيڭ مىنالاردى اتاپ كورسەتتى: 70 جىلدىق اۋمالى - توكپەلى جاعدايدىڭ سىناقتارىن باستان كەشىرۋ ارقىلى جۇڭگو مەن رەسەيدىڭ قارىم - قاتىناسى كۇن سايىن تولىسىپ، ورنىعىپ، بەكەمدەلىپ، تىڭ تاريحي باستاماعا كوتەرىلدى، جاڭا تاريحي ورايعا ءدوپ كەلدى. ساپار كەزىندە، مەن پۋتين زۇڭتۇڭمەن ەكى جاقتى قارىم - قاتىناستى تەرەڭدەتۋ، ناقتى سەلبەستىكتى ىلگەرىلەتۋ جانە بىرگە كوڭىل ءبولىپ وتىرعان كەلەلى حالىقارالىق جانە وڭىرلىك ماسەلەلەر تۋرالى پىكىر اۋىستىرىپ، ەكى ەل قارىم - قاتىناسىنىڭ بولاشاق دامۋ جوسپارىن بىرگە جاساپ، جۇڭگو مەن رەسەيدىڭ جان - جاقتى ستراتەگيالىق سەلبەستىك سەرىكتەستىك قارىم - قاتىناسىنىڭ ارشىندى قاداممەن جاڭا داۋىرگە قادام تاستاپ، اناعۇرلىم جوعارى ورەگە كوتەرىلىپ، اناعۇرلىم زور دامۋدى جۇزەگە اسىرۋىن ىلگەرىلەتەمىز.

ديڭ شۋەشياڭ، ياڭ جيەچى، ۋاڭ ي، حى ليفىڭ قاتارلى سەرىكتەرى وسى ۇشاقتا بىرگە باردى.

جۇڭگونىڭ رەسەيدە تۇراتىن باس ەلشىسى لي حۇي دا اۋەجايعا شىعىپ قارسى الدى.

ساپار كەزىندە، شي جينپيڭ سانت - پەتربۋرگكە بارىپ، 23 - كەزەكتى سانت - پەتربۋرگ حالىقارالىق ەكونوميكا تالقى مىنبەرىنە قاتىناسادى.