جۇڭگو كوممۋنيستىك پارتياسى ورتالىق كوميتەتىنىڭ باس شۋجيى، مەملەكەت ءتوراعاسى، ورتالىق اسكەري ىستەر كوميتەتىنىڭ ءتوراعاسى شي جينپيڭ تاياۋدا جاڭ فۋچيڭ جولداستىڭ ىزگى ىستەرى جونىندە ماڭىزدى نۇسقاۋ بەرىپ بىلاي دەپ باسا دارىپتەدى: ساقا قاھارمان جاڭ فۋچيڭ 60 نەشە جىل بويى اتاق - ابىرويعا بەرىلمەي، ءومىر بويى اۋەلگى ماقساتتان اينىماي، قاسيەتىن وزگەرتپەدى، ونىڭ ىستەرى ادامدى اسەرلەندىرەدى. اسكەري بولىمدە ول وتاندى قورعادى؛ جەرگىلىكتى ورىندا ول حالىققا باقىت جەتكىزدى. ول ءوزىنىڭ قاراپايىمدىلىعىمەن، كىرشىكسىزدىگىمەن، اتاق - ابىرويعا بوي ۇرماي، تارتىمدى ءومىر داستانىن جازدى، ول اسكەري بولىمدەردەگى قالىڭ كوماندير - جاۋىنگەرلەردىڭ جانە اسكەري قوسىننان شەگىنگەن اسكەريلەردىڭ ۇيرەنۋ ۇلگىسى. ۇلەس قوسۋ رۋحىن بەلسەنە ساۋلەلەندىرىپ، جۇدىرىقتاي جۇمىلا كۇرەس جۇرگىزىپ، جاڭا داۋىردە قۇدىرەتتى كۇش ۇيىستىرۋ كەرەك.
بيىل 95 جاستاعى ساقا پارتيا مۇشەسى، جاڭ فۋچيڭ − بۇرىنعى باتىس سولتۇستىك دالا ارمياسى 359 - لۇي 718 - تۋان 2 - يىڭ 6 - ليانىنىڭ جاۋىنگەرى، ازاتتىق سوعىسىندا جاڭبىرشا جاۋعان وق ىشىندە تالاي رەت امان قالىپ، ىلگەرىندى - كەيىندى 3 رەت 1 - دارەجەلى ەڭبەك، ءبىر رەت 2 - دارەجەلى ەڭبەك ءسىڭىرىپ، باتىس سولتۇستىك دالا ارمياسى جاعىنان ”ەرەكشە ەڭبەك“ جازىلدى، 2 رەت ”سوعىس قاھارمانى“ داڭقتى اتاعىنا يە بولدى. 1955 - جىلى جاڭ فۋچيڭ قوسىننان شەگىنىپ كاسىپ اۋىستىرىپ، حۋبەي ولكەسىنىڭ ەڭ شەت - شالعايداعى لايفىڭ اۋدانىنا ىرىقتىلىقپەن بارىپ قىزمەت ىستەپ، كەدەي تاۋلى وڭىرگە ءومىر بويى ۇلەس قوستى. 60 نەشە جىلدان بەرى، جاڭ فۋچيڭ ەڭبەگىن ەلگە ادەيى بىلدىرگەن جوق، ءتىپتى، بالالارى دا بىلمەدى. 2018 - جىلدىڭ اياعىندا قوسىننان شەگىنگەن اسكەريلەردىڭ ينفورماتسياسىن جيناعاندا، جاڭ فۋچيڭنىڭ ىزگى ىستەرى بايقالىپ، قاھارماننىڭ بۇرىنعى ىستەرى جاريا بولدى.
