جۋىردا قوعام حاۋىپسىزدىگى مەكەمەسى اقپار جاريالاۋ ءماجىلىسىن اشىپ، قوعام حاۋىپسىزدىگى مينيسترلىگىنىڭ «اكىمشىلىكتى قاراپايىمداستىرىپ، ۇقىقتى تومەنگە بەرۋ، ۇقىقتى بەرۋ مەن باسقارۋدى ۇشتاستىرۋ، قىزمەت وتەۋدى كەمەلدەندىرۋ» رەفورماسىنداعى 10 ءتۇرلى تىڭ شارانى ورتاعا قويدى. جۋىردا قوعام حاۋىپسىزدىگى مينيسترلىگىنىڭ قاتىناستى باسقارۋ مەكەمەسى بۇل شارالاردى ءبىر – بىرلەپ ءتۇسىندىردى، مۇندا 6 – ايدىڭ 1 – كۇنىنەن باستاپ، بۇكىل ەلىمىز بويىنشا شاعىن تيپتەگى اۆتوموبيلدەردىڭ شوفەرلىك كۋالىگى ەمتيحانىنا ازاماتتىق كۋالىكپەن ءارقانداي جەردە قاتىناسۋعا بولاتىنىن ايقىن اتاپ كورسەتتى.
قوعام حاۋىپسىزدىگى مينيسترلىگى بۇل رەتكى رەفورما بارىسىندا جۇرتشىلىق نازار اۋدارىپ وتىرعان ىستەرگە بەلسەندىلىكپەن جاۋاپ قايتارىپ، ولكە ىشىندە جانە سىرت جەردە ەمتيحان بەرۋدى اتقارۋ جاعدايىن مۇقيات قورىتىندىلاۋ جانە باعالاۋ نەگىزىندە، شاعىن تيپتەگى اۆتوموبيلدەردىڭ شوفەرلىك كۋالىگىن الۋعا سىرت جەردە ءوتىنىش بەرۋ شارتىن ونان ارى كەڭەيتىپ، بۇكىل ەلىمىز بويىنشا ازاماتتىق كۋالىك ارقىلى ءارقانداي جەردە ەمتيحان بەرۋگە رۇقسات ەتۋدى جولعا قويدى. ءوتىنىش بەرۋشى ازاماتتىق كۋالىگى ارقىلى بۇكىل ەلىمىزدەگى ءارقانداي قالادا شاعىن تيپتەگى اۆتوموبيلدەردىڭ شوفەرلىك كۋالىگىنە (1C، C2، C5) ءوتىنىش بەرە الادى، قونىستانۋ كۋالىگى نەمەسە قونىستانۋدى تىزىمدەتۋ ىسپاتتاماسىن تاپسىرۋدىڭ قاجەتى جوق، بۇل جۇرتشىلىقتىڭ جاقىن جەردەن، ەركىنشە ەمتيحان بەرىپ، كۋالىك الۋىنا قولايلىلىق جاراتادى.
ىشكى ولكەلەردە (ۇلى قۇرلىق) قىزمەت ىستەيتىن جانە تۇرمىس كەشىرىپ جاتقان شياڭگاڭدىق، اۋمىندىق، تايۋاندىق تۇرعىندار قونىستانۋ كۋالىگى ارقىلى ەمتيحانعا قاتىناسىپ، ىشكى ولكەلەردەگى ءارقانداي قالادا شاعىن تيپتەگى اۆتوموبيلدىڭ شوفەرلىك كۋالىگىنە ءوتىنىش بەرە الادى، قونىستانۋدى تىزىمدەتۋ انىقتاماسى سياقتى انىقتامانى، ىسپاتتامانى تاپسىرۋىنىڭ قاجەتى جوق.
