شي جينپيڭ جۇڭگو كوممۋنيستىك پارتياسى ورتالىق كوميتەتى ساياسي بيۋروسىنىڭ 20 ـ رەتكى توپتىق ۇيرەنۋىندە بىلاي دەپ باسا دارىپتەدى
ٴوز كۇشىنە سۇيەنۋگە، ٴوزىن الۋەتتەندىرۋگە تاباندى بولىپ، ناقتى قولدانۋ باعدارىن كورنەكتىلەندىرىپ، جاساندى زەردەنىڭ اقاۋسىز، ٴتارتىپتى دامۋىن ىلگەرىلەتۋ كەرەك
جۇڭگو كوممۋنيستىك پارتياسى ورتالىق كوميتەتى ساياسي بيۋروسى 4 ـ ايدىڭ 25 ـ كۇنى تۇستەن كەيىن جاساندى زەردەنىڭ دامۋىن جانە ونى باقىلاۋ ـ باسقارۋدى كۇشەيتۋ جونىندە 20 ـ رەتكى توپتىق ۇيرەنۋ وتكىزدى. جۇڭگو كوممۋنيستىك پارتياسى ورتالىق كوميتەتىنىڭ باس شۋجيى شي جينپيڭ ۇيرەنۋدى باسقارعاندا بىلاي دەپ باسا دارىپتەدى: جاڭا بۋىن جاساندى زەردە تەحنولوگياسى جەدەل دامىعان جاڭا جاعدايدا، بۇكىل مەملەكەت بويىنشا جۇمىلاتىن جاڭاشا ٴتۇزىلىس ارتىقشىلىعىن تولىق ساۋلەلەندىرىپ، ٴوز كۇشىنە سۇيەنۋگە، ٴوزىن الۋەتتەندىرۋگە تاباندى بولىپ، ناقتى قولدانۋ باعدارىن كورنەكتىلەندىرىپ، ەلىمىزدە جاساندى زەردەنىڭ پايدالى، حاۋىپسىز، ٴادىل بەتالىسقا قاراي اقاۋسىز، ٴتارتىپتى دامۋىن ىلگەرىلەتۋ كەرەك.
شي ـ ان قاتىناس داشۋەسىنىڭ پروفەسسورى جىڭ ناننيڭ جولداس وسى ماسەلە جونىندە ٴتۇسىندىرۋ جاساپ، قىزمەت ۇسىنىسىن ورتاعا قويدى. ورتالىق كوميتەت ساياسي بيۋروسىنداعى جولداستار ٴتۇسىندىرۋدى مۇقيات تىڭدادى ٴارى تالقى جۇرگىزدى.
شي جينپيڭ ٴتۇسىندىرۋدى جانە تالقىنى تىڭداعاننان كەيىن ماڭىزدى ٴسوز سويلەدى. ول بىلاي دەپ اتاپ كورسەتتى: جاساندى زەردە جاڭا كەزەكتى عىلىم ـ تەحنولوگيا توڭكەرىسى مەن كاسىپ سالاسى وزگەرىسىنە جەتەكشىلىك ەتەتىن ستراتەگيالىق تەحنولوگيا رەتىندە، ادامزاتتىڭ ٴوندىرىس، تۇرمىس ٴتاسىلىن تەرەڭ وزگەرتتى. پارتيا ورتالىق كوميتەتى جاساندى زەردەنىڭ دامۋىنا ايرىقشا ٴمان بەردى. تاياۋ جىلداردان بەرى جوعارى دەڭگەيدە جوبالاۋدى كەمەلدەندىرىپ، قىزمەت ورنالاستىرۋىن كۇشەيتىپ، ەلىمىزدىڭ جاساندى زەردە جالپىلىق قۋاتىنىڭ تۇتاس تۇلعالىق، جۇيەلى جوعارىلاۋىن ىلگەرىلەتتى، سونىمەن بىرگە نەگىزدىك نازاريا، شەشۋشى، وزەكتى تەحنولوگيا سياقتى جاقتاردا ٴالى دە ولقىلىقتار مەن ٴالسىز تۇستار ورىن تەۋىپ وتىر. پارىقتارعا دۇرىس قاراپ، ەسەلەي قۇلشىنىپ، جاساندى زەردە عىلىم ـ تەحنولوگياسىندا جاڭالىق اشۋدى، كاسىپ سالاسىنىڭ دامۋىن جانە قۋات ۇستەۋدى، قولدانۋدى جاپپاي ىلگەرىلەتىپ، جاساندى زەردەنى باقىلاۋ ـ باسقارۋ ٴتۇزىلىس ـ مەحانيزمىن كەمەلدەندىرىپ، جاساندى زەردەنى دامىتۋ جانە باسقارۋ ىرىقتىلىق ۇقىعىن مىقتاپ يگەرۋ كەرەك.
شي جينپيڭ بىلاي دەپ باسا دارىپتەدى: جاساندى زەردە سالاسىندا ورايدى الدىمەن يگەرىپ، باسىمدىققا قول جەتكىزۋ ٴۇشىن، ٴسوز جوق، نەگىزدىك نازاريا، ٴادىس، قۇرال ـ جابدىق سياقتى جاقتاردا تىڭ تابىستارعا قول جەتكىزۋ كەرەك. نەگىزدىك زەرتتەۋدى ۇزدىكسىز كۇشەيتىپ، كۇشتى شوعىرلاندىرا وتىرىپ جوعارى دەڭگەيلى چيپ، نەگىزدىك جۇمساق بولشەك سياقتى وزەكتى تەحنولوگيالاردان قامال الىپ، دەربەس مەڭگەرۋگە بولاتىن، سايكەستى جۇمىس جۇرگىزەتىن جاساندى زەردە نەگىزدىك جۇمساق، قاتتى بولشەك جۇيەسىن ورناتۋ كەرەك. جاساندى زەردە ارقىلى عىلمي زەرتتەۋ ۇلگى فورماسىنىڭ وزگەرىسىنە جەتەكشىلىك ەتىپ، ٴار سالاداعى عىلىم ـ تەحنولوگيادا جاڭالىق اشىپ تىڭ تابىسقا جەتۋدى جەدەلدەتۋ كەرەك.
شي جينپيڭ بىلاي دەپ اتاپ كورسەتتى: ەلىمىزدىڭ ساندى مالىمەت بايلىعى مول، كاسىپ سالاسى جۇيەسى كەمەلدى، ناقتى قولدانۋ ورتاسى كەڭ، بازار كەڭىستىگى زور. جاساندى زەردە عىلىم ـ تەحنولوگياسىندا جاڭالىق اشۋ مەن كاسىپ سالاسىندا جاڭالىق اشۋدىڭ تەرەڭدەي توعىسۋىن ىلگەرىلەتىپ، كاسىپورىندار جەتەكشىلىك ەتەتىن ٴوندىرىس، وقىتۋ، زەرتتەۋ، قولدانۋ سايكەسكەن جاڭالىق اشۋ جۇيەسىن ورناتىپ، ٴداستۇرلى كاسىپ سالالارىن جاڭالاپ دارەجەسىن جوعارىلاتۋعا دەم بەرىپ، ستراتەگيالىق جاڭادان گۇلدەنگەن كاسىپ سالالارى مەن بولاشاق كاسىپ سالالارى دامۋىنىڭ جاڭا جارىس جولىن اشۋ كەرەك. ەسەپتەۋ قۋاتى نەگىزدىك قۇرىلعىلار قۇرىلىسىن ٴبىر تۇتاس جوسپارلاپ ىلگەرىلەتىپ، ساندى مالىمەت بايلىعىن اشۋدى، پايدالانۋدى جانە اشىق ۇستاپ بىرگە يگىلىكتەنۋدى تەرەڭدەتۋ كەرەك.
شي جينپيڭ بىلاي دەپ باسا دارىپتەدى: جاڭا تەحنولوگيا، جاڭا سالا رەتىندەگى جاساندى زەردەنى ساياساتتىق جاقتان قولداۋ وتە ماڭىزدى. ٴبىلىم مەنشىك ۇقىعى، قازىنالىق سالىق كىرىسى، ۇكىمەتتىك ساتىپ الۋ، قۇرىلعىلاردى اشىق ۇستاۋ سياقتى ساياساتتاردان جان ـ جاقتى پايدالانىپ، عىلىم ـ تەحنولوگيا، فينانس جۇمىستارىن ويداعىداي ىستەۋ كەرەك. جاساندى زەردە بويىنشا تۇتاس وقۋ ساتىسىنداعى تاربيە مەن تۇتاس قوعامنىڭ جالپىلىق ٴبىلىم تاربيەسىن ىلگەرىلەتىپ، جوعارى ساپالى دارىندىلاردى ۇزدىكسىز جەتىلدىرۋ كەرەك. جاساندى زەردە عىلمي زەرتتەۋىن قامتاماسىز ەتۋ، كاسىپتىك جاقتان قولداۋ جانە دارىندىلاردى باعالاۋ مەحانيزمىن كەمەلدەندىرىپ، ٴتۇرلى دارىندىلاردىڭ قابىلەتىن ايگىلەۋىنە تۇعىر ازىرلەپ، شارت ـ جاعداي جاراتۋ كەرەك.
شي جينپيڭ بىلاي دەپ اتاپ كورسەتتى: جاساندى زەردە بۇرىن بولماعان دامۋ ورايىن اكەلدى، سونداي ـ اق بۇرىن بولماعان حاۋىپ ـ قاتەرلەر مەن سىن ـ سايىستاردى دا اكەلدى. جاساندى زەردەنىڭ دامۋ بەتالىسى مەن زاڭدىلىعىن يگەرىپ، قاتىستى زاڭداردى، زاڭ ەرەجەلەردى، ساياسات ـ تۇزىمدەردى، ناقتى قولدانۋ ولشەمدەرىن، ەتيكالىق ولشەمدى جەدەل جاساپ جانە كەمەلدەندىرىپ، تەحنولوگيالىق تەكسەرىپ بەكىتۋ، حاۋىپ ـ قاتەردەن ساقتاندىرۋ، شۇعىل جاعدايعا توتەپ بەرۋ بويىنشا اتتانىسقا كەلۋ جۇيەسىن ورناتىپ، جاساندى زەردەنىڭ حاۋىپسىزدىگىنە، سەنىمدىلىگىنە، مەڭگەرىمدىلىگىنە شىنايى كەپىلدىك ەتۋ كەرەك.
شي جينپيڭ بىلاي دەپ باسا دارىپتەدى: جاساندى زەردە ادامزاتتى باقىتقا كەنەلتەتىن حالىقارالىق الەۋمەتتىك ٴونىم بولا الادى. جاساندى زەردە حالىقارالىق سەلبەستىگىن كەڭ كولەمدە ورىستەتىپ، جەر شارىنىڭ وڭتۇستىگىندەگى ەلدەردىڭ تەحنولوگيالىق قابىلەت قۇرىلىسىن كۇشەيتۋىنە كومەكتەسىپ، دۇنيە ٴجۇزى زەردە اڭعارىن جويۋعا جۇڭگو ۇلەسىن قوسۋ كەرەك. ٴار جاقتىڭ دامۋ ستراتەگياسىن، باسقارۋ ەرەجەسىن، تەحنولوگيالىق ولشەمىن ٴتۇيىلىستىرۋدى، سايكەستىرۋدى كۇشەيتۋىن ىلگەرىلەتىپ، كەڭ كولەمدى ورتاق تانىمعا يە الەمدىك باسقارۋ جۇلگەسى مەن ولشەم جۇيەسىن ەرتەرەك قالىپتاستىرۋ كەرەك.
