11 ـ ايدىڭ 26 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارلاي كەلگەن ساموا زۇڭليى فيامەمەن كەزدەستى.
□ سۋرەتتى شينحۋا اگەنتتىگىنىڭ ٴتىلشىسى حۋاڭ جيڭۋىن تۇسىرگەن
شينحۋا اگەنتتىگىنىڭ 11 ـ ايدىڭ 26 ـ كۇنى بەيجيڭنەن بەرگەن حابارى (تىلشىلەر فىڭ شينران، ساۋ جيايۋە). 11 ـ ايدىڭ 26 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ دياۋيۇيتاي مەملەكەتتىك قوناق ۇيىندە جۇڭگوعا رەسمي ساپارمەن كەلگەن ساموا زۇڭليى فيامەمەن كەزدەستى.
شي جينپيڭ بىلاي دەپ اتاپ كورسەتتى: ساموا تىنىق مۇحيتتاعى ارال ەلدەرى اراسىندا 1 ـ توپتا جاڭا جۇڭگومەن ديپلوماتيالىق قارىم ـ قاتىناس ورناتقان. ديپلوماتيالىق قارىم ـ قاتىناس ورناتقان 50 جىلعا تاياۋ ۋاقىتتان بەرى ەكى ەل ٴداستۇرلى دوستىقتى ساقتاپ، باستان ـ اياق ٴوزارا قۇرمەت ەتىپ، تەرەزەسى تەڭ تۇرعىدا مامىلە جاساپ، سەلبەسىپ تەڭ يگىلىككە كەنەلدى. جۇڭگو جاق ەجەلدەن بەرى مەملەكەتتەر ۇلكەن ـ كىشىگە بولىنبەي تەرەزەسى تەڭ بولۋى كەرەكتىگىن، ٴبارىنىڭ دە دەربەس، وزىنە ـ ٴوزى قوجايىن بولا وتىرىپ وسىزامانداندىرۋدى جۇزەگە اسىرۋ ۇقىعى بار ەكەندىگىن دارىپتەپ كەلەدى. جۇڭگو جاق ساموا جاقتىڭ ٴوز يەلىك ۇقىعى مەن تاۋەلسىزدىگىن قورعاۋىن، ٴوز ەلىنىڭ مەملەكەت جاعدايىنا ۇيلەسەتىن دامۋ جولى جونىندە دەربەس ىزدەنىس جاساۋىن تاباندىلىقپەن قولدايدى، ساموا جاقپەن ٴوزارا قۇرمەت ەتۋگە، ٴوزارا سەنىم ارتۋعا تاباندى بولىپ، ەل باسقارۋ جانە دامۋ تاجىريبەلەرى جونىندەگى اۋىس ـ كۇيىستى كۇشەيتىپ، تۇستىك ەلدەر سەلبەستىگى جۇلگەسىندە ساموا ەكونوميكاسىنىڭ، قوعامىنىڭ دامۋىنا ۇزدىكسىز كومەك كورسەتىپ، ەكونوميكا ـ ساۋدا، قارجى قوسۋ، ەگىنشىلىك، بالىقشىلىق سياقتى سالالارداعى كومەسكى كۇشتى تەرەڭ اشىپ، ٴوزارا پايدا جەتكىزۋ سەلبەستىگىن كەڭەيتىپ، بىرگە دامۋدى جۇزەگە اسىرۋدى قالايدى. ەكى جاق وركەنيەتتەردىڭ ٴوزارا ۇلگى الۋىن جەبەپ، وقۋ ـ اعارتۋ، مادەنيەت، جاستار سياقتى گۋمانيتارلىق سالالارداعى اۋىس ـ كۇيىستى، سەلبەستىكتى كۇشەيتىپ، جۇڭگو مەن ساموانىڭ جالپى بەتتىك ستراتەگيالىق سەرىكتەستىك قارىم ـ قاتىناسىنىڭ ورنىقتى قاداممەن الىسقا جەتۋىن ىلگەرىلەتۋ كەرەك.
شي جينپيڭ بىلاي دەپ باسا دارىپتەدى: جۇڭگو تىنىق مۇحيتتاعى ارال ەلدەرى جونىنەن ”تورتكە تولىق قۇرمەت ەتۋ“ پرينسيبىن ۇستانادى، تىنىق مۇحيتتاعى ارال ەلدەرىنە كومەكتەسۋدە ۇستەمە ساياسي شارت قويمايدى، باسقالارعا زورلاپ تاڭبايدى، ”قۇرعاق ۋادە“ بەرمەيدى. جۇڭگونىڭ تىنىق مۇحيتتاعى ارال ەلدەرىنە باعىتتالعان ساياساتى اشىق، سيىسىمدى، جەكەشىلدىگى جوق، ٴۇشىنشى جاققا باعىتتالمايدى، وڭىرلىك تالاس جۇرگىزبەيدى جانە ىقپال كولەمىن كەڭەيتپەيدى. جۇڭگو جاق تىنىق مۇحيتتاعى ارال ەلدەرىنىڭ كليمات وزگەرىسىنە توتەپ بەرۋ قابىلەتىن جوعارىلاتۋىنا كومەكتەسۋدى الدىمەن سەلبەستىك جاساساتىن سالا ەتىپ، «بىرلەسكەن مەملەكەتتەر ۇيىمىنىڭ كليمات وزگەرىسى جۇلگەلىك شارتىنىڭ» جانە ونىڭ «پاريج كەلىسىمىنىڭ» جان ـ جاقتى، ٴونىمدى اتقارىلۋىن ىلگەرىلەتۋدى، ورتاق، الايدا پارىقتى جاۋاپكەرشىلىك پرينسيبىن قورعاۋدى، تۋراشىلدىقتى، ادىلدىكتى جانە جەر شارىنىڭ وڭتۇستىگىنىڭ ورتاق مۇددەسىن قورعاۋدى، قول ۇستاسىپ ادامزاتتىڭ تاعدىرلاس ورتاق تۇلعاسىن قۇرۋدى قالايدى.
فيامە مىنالاردى ٴبىلدىردى: ٴتوراعا شي جينپيڭنىڭ ەرەن باسشىلىعىندا، جۇڭگو وراسان زور دامۋ جەتىستىكتەرىنە قول جەتكىزىپ، جەر شارىنىڭ وڭتۇستىگىندەگى مەملەكەتتەرگە ۇلگى ورناتتى، ساموا جاق جۇڭگو ۇلگىسىندەگى وسىزامانداندىرۋدان، اسىرەسە، ٴتوراعا شي جينپيڭنىڭ كەدەيلىكتى ازايتۋ، جاسىل دامۋ سياقتىلارعا قاتىستى ەل باسقارۋ تاجىريبەلەرىنەن ۇيرەنۋدى جانە ودان ۇلگى الۋدى قالايدى. جۇڭگو جاقتىڭ ۇزاق ۋاقىتتان بەرى سامواعا قۇندى كومەك كورسەتىپ كەلگەندىگىنە العىس ايتادى، ساموا جاق جۇڭگونىڭ وزگە ەلدىڭ ىشكى ىسىنە كيلىكپەۋ پرينسيبىن ۇستانىپ، تىنىق مۇحيتتاعى ارال ەلدەرىنە كومەكتەسكەندە ەشقانداي ۇستەمە ساياسي شارت قويماي، ەجەلدەن ايتقانىنان اينىماي، ايتقانىن ورىنداپ كەلگەندىگىن ايرىقشا القايدى. ساموا جاق ٴبىر جۇڭگو پرينسيبىنە تاباندىلىقپەن بويسۇنادى، ٴتوراعا شي جينپيڭ العا قويعان الەمدىك دامۋ باستاماسىن، الەمدىك حاۋىپسىزدىك باستاماسىن، الەمدىك وركەنيەت باستاماسىن قولدايدى. ساموا جاق جۇڭگونى ماڭىزدى ستراتەگيالىق سەرىكتەسى دەپ قارايدى، كەلەر جىلى ەكى ەلدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعىن بىرگە قۇتتىقتاۋدى وراي ەتىپ، ەكى ەل قارىم ـ قاتىناسىنىڭ ونان ارى دامۋىن ىلگەرىلەتۋدى ٴۇمىت ەتەدى.
كەزدەسۋدەن كەيىن، ەكى جاق «جۇڭحۋا حالىق رەسپۋبليكاسى مەن ساموا تاۋەلسىز مەملەكەتىنىڭ بىرلەسكەن مالىمدەمەسىن» جاريالادى.
ۋاڭ ي كەزدەسۋگە قاتىناستى.
