شينحۋا اگەنتتىگىنىڭ 9 ـ ايدىڭ 2 ـ كۇنى بەيجيڭنەن بەرگەن حابارى (تىلشىلەر جىڭ ميڭدا، ۋاڭ پۋ). 9 ـ ايدىڭ 2 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگو _ افريكا سەلبەستىك تالقى مىنبەرى بەيجيڭ باسشىلار ماجىلىسىنە قاتىناسۋ ٴارى مەملەكەتتىك ساپاردا بولۋ ٴۇشىن جۇڭگوعا كەلگەن وڭتۇستىك افريكا زۇڭتۇڭى رامافوسامەن كەڭەس وتكىزدى. ەكى ەلدىڭ مەملەكەت باسشىلارى جۇڭگو _ وڭتۇستىك افريكا قارىم ـ قاتىناسىن جاڭا داۋىردەگى جان ـ جاقتى ستراتەگيالىق سەلبەستىك سەرىكتەستىك قارىم ـ قاتىناس دەڭگەيىنە كوتەرۋدى جاريالادى.
شي جينپيڭ بىلاي دەپ اتاپ كورسەتتى: جۇڭگونىڭ وڭتۇستىك افريكامەن دوستىعى ۇلت ازاتتىعىنا قول جەتكىزۋدەگى ٴبىر ـ بىرىنە شىن ادالدىعىنان، مەملەكەتتى دامىتۋ قۇرىلىسىن ىلگەرىلەتۋدەگى ٴوزارا سۇيەمەلدەۋىنەن، ٴوزارا سەرىك بولۋىنان، حالىقارالىق ادىلدىككە، ادىلەتتىلىككە تالپىنۋداعى ىنتىماعىنان، ىستەستىگىنەن باستاۋ العان. بيىل جۇڭحۋا حالىق رەسپۋبليكاسى قۇرىلعاندىعىنىڭ 75 جىلدىعى ٴارى جاڭا وڭتۇستىك افريكا قۇرىلعاندىعىنىڭ 30 جىلدىعى. حالىقارالىق جاعداي اۋمالى ـ توكپەلى بولسا دا، جۇڭگو مەن وڭتۇستىك افريكا ەكى ەلدىڭ وسىزاماندانۋعا تالپىنعان بورىشى وزگەرگەن جوق، جۇڭگو _ افريكا سەلبەستىگىن ىلگەرىلەتۋ مۇراتى وزگەرگەن جوق، الەمدىك باسقارۋدى كەمەلدەندىرۋ تىلەگى وزگەرگەن جوق. جۇڭگو مەن وڭتۇستىك افريكانىڭ ىنتىماقتى، سەلبەستىكتى كۇشەيتۋى ەكى ەل حالقىنىڭ ورتاق تىلەگىنە ۇيلەسەدى، جەر شارىنىڭ وڭتۇستىگىنىڭ دامىپ، زورايۋىنىڭ تاريحي بارىسىنا ۇيلەسەدى، بۇل ماڭىزدى داۋىرلىك مانگە جانە دۇنيە جۇزىلىك ىقپالعا يە.
شي جينپيڭ بىلاي دەپ باسا دارىپتەدى: جۇڭگو _ وڭتۇستىك افريكا قارىم ـ قاتىناسىنىڭ جاڭا ورنىن كوزدەپ، ەكى جاق ”ٴۇش بەتالىستى“ ويداعىداي يگەرۋى كەرەك. ٴبىرىنشى، بىرگە العا باساتىن ساياسي بەتالىس، جوعارى دەڭگەيدەگى ستراتەگيالىق ٴوزارا سەنىمدىلىك ارقىلى ەكى ەل قارىم ـ قاتىناسىنىڭ ارشىندى قاداممەن العا باسۋىنا جەتەكشىلىك ەتۋ. ەكىنشى، ٴوزارا پايدا جەتكىزىپ تەڭ يگىلىككە كەنەلەتىن سەلبەستىك بەتالىسى، ەكى ەل سەلبەستىگىنىڭ جوعارى دەڭگەيدەگى جوباسىن كەمەلدەندىرىپ، ”ٴبىر بەلدەۋ، ٴبىر جولدى“ جوعارى ساپامەن بىرگە قۇرىپ، سيفرلى ەكونوميكا، جاساندى زەردە، جاڭا ەنەرگيا سياقتى سالالارداعى سەلبەستىكتى ىلگەرىلەتۋ. ٴۇشىنشى، ۇرپاقتان ـ ۇرپاققا جالعاسقان دوستىق حالىق تىلەگى بەتالىسى، ادام كۇشى بايلىعىن اشۋ اۋىس ـ كۇيىسىن، سەلبەستىگىن كۇشەيتىپ، كاسىپتىك وقۋ ـ اعارتۋدان ۇلگى كورسەتەتىن مەكتەپ، كاسىپتىك باۋلۋ ورتالىعى نىساندارىن جەدەل ىلگەرىلەتىپ، وڭتۇستىك افريكا جاستارىنا ٴتىپتى دە كوپ وقۋ سيلىق اقشاسىن جانە ٴبىلىم اسىرۋ، باۋلىنۋ ورايىن ازىرلەۋ.
شي جينپيڭ بىلاي دەپ اتاپ كورسەتتى: جۇڭگو _ افريكا سەلبەستىك تالقى مىنبەرى تۇستىك ەلدەر سەلبەستىگىنىڭ ۇلگىسى جانە حالىقارانى افريكامەن سەلبەستىك جاساۋعا باستايتىن تۋ. جۇڭگو _ افريكا ەكى جاق وسى رەتكى باسشىلار ماجىلىسىندە جاڭا داۋىردەگى جۇڭگو _ افريكا قارىم ـ قاتىناسىنىڭ جاڭا ورنىن تۇراقتاندىرىپ، وسىزامانداندىرۋدى قول ۇستاسا ىلگەرىلەتۋدىڭ ناقتى جولىن بىرگە اقىلداسادى. جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسى جوعارى دەڭگەيدەگى سىرتقا ەسىك اشۋ ٴتۇزىلىس ـ مەحانيزمىن كەمەلدەندىرۋ جونىندە ورنالاستىرۋ جاسادى، جۇڭگونىڭ افريكا ەلدەرىنە اشقان ەسىگى بارعان سايىن ايقارا اشىلادى. جۇڭگو جاق وڭتۇستىك افريكا سياقتى افريكا ەلدەرىمەن سەلبەستىكتىڭ جاڭا قوزعالىس قۋاتىن ۇزدىكسىز قالىپتاستىرىپ، جۇڭگو _ افريكا سەلبەستىگىنىڭ جوعارى ساپالى دامۋىن جەبەۋدى قالايدى، جۇڭگو _ افريكا سەلبەستىگىنىڭ جۇردەك پويەزى، ٴسوز جوق، بارعان سايىن تەز، بارعان سايىن جاقسى زىمىرايدى.
شي جينپيڭ بىلاي دەپ باسا دارىپتەدى: قازىر دۇنيە ٴجۇزىنىڭ 100 جىلدىق وزگەرىسى جەدەل قۇبىلىپ، ادامزات قوعامى بۇرىن بولماعان سىن ـ سايىسقا ٴدوپ كەلدى. حالىقارالىق جاعداي نەعۇرلىم كۇردەلى بولعان سايىن، جەر شارىنىڭ وڭتۇستىگىندەگى ەلدەر دەربەس، ٴوز ـ وزىنە قوجايىن بولۋعا، ىنتىماقتاسا سەلبەسۋگە سولعۇرلىم تاباندى بولىپ، حالىقارالىق ادىلدىكتى، ادىلەتتىلىكتى بىرگە قورعاۋى كەرەك. جۇڭگو جاق وڭتۇستىك افريكامەن حالىقارالىق كوپ جاقتى ىستەستىكتى كۇشەيتۋدى قالايدى، وڭتۇستىك افريكانىڭ كەلەر جىلى 20 ەل توبىنىڭ كەزەكتى ٴتوراعا ەلى بولۋ قىزمەتىن وتەۋىن بار كۇشپەن قولدايدى.
رامافوسا مىنالاردى ٴبىلدىردى: بىلتىر ٴتوراعا شي جينپيڭنىڭ وڭتۇستىك افريكاداعى 4 ـ رەتكى مەملەكەتتىك ساپارى ٴساتتى بولدى، ٴبىز وڭتۇستىك افريكا مەن جۇڭگونىڭ ديپلوماتيالىق قارىم ـ قاتىناس ورناتقاندىعىنىڭ 25 جىلدىعىن بىرگە قۇتتىقتاپ، وڭتۇستىك افريكا _ جۇڭگو قارىم ـ قاتىناسىنىڭ ”التىن داۋىرگە“ ٴوتۋىن ىلگەرىلەتتىك. وڭتۇستىك افريكا مەن جۇڭگو ەكى ەلدىڭ وسكەلەڭ ساياسي ٴوزارا سەنىمدىلىگى جانە تەرەڭ ٴداستۇرلى دوستىعى بار، كوپتەگەن ماسەلەلەردەگى تۇرعىسى ۇقساس، نىساناسى بىردەي. ەكونوميكا ـ ساۋدا سەلبەستىگى تەڭ تۇرعىدا قۇرمەت ەتۋدى، ٴوزارا پايدا جەتكىزىپ تەڭ يگىلىككە كەنەلۋدى نەگىز ەتكەن بولىپ، بايلانىسى كۇن سايىن جيىلەپ بارادى. جۇڭگو جاقتىڭ ۇزاق ۋاقىتتان بەرى وڭتۇستىك افريكانىڭ ەكونوميكالىق، قوعامدىق دامۋىنا قىمباتتى قولداۋ كورسەتكەندىگىنە العىس ايتامىن، جۇڭگو كوممۋنيستىك پارتياسى 20 ـ كەزەكتى ورتالىق كوميتەتى ٴۇشىنشى جالپى ٴماجىلىسىنىڭ ٴساتتى اشىلعاندىعىن قۇتتىقتايمىن، جۇڭگونىڭ رەفورمانى اناعۇرلىم جاپپاي تەرەڭدەتۋىنىڭ، جۇڭگو ۇلگىسىندەگى وسىزامانداندىرۋدى ىلگەرىلەتۋىنىڭ وڭتۇستىك افريكاعا جانە جەر شارىنىڭ وڭتۇستىگىندەگى باسقا دا ەلدەرگە اناعۇرلىم كوپ وراي ازىرلەيتىندىگىنە سەنەمىن. وڭتۇستىك افريكا ۇزدىكسىز جۇڭگونىڭ سەنىمدى جانە ادال دوسى بولا بەرۋدى، جۇڭگو جاقپەن جاڭا داۋىردەگى جان ـ جاقتى ستراتەگيالىق سەلبەستىك سەرىكتەستىك قارىم ـ قاتىناس ورناتۋدى وراي ەتىپ، ەكونوميكا ـ ساۋدا، قارجى قوسۋ، نەگىزدىك قۇرىلعى، جاڭا ەنەرگيا، كەدەيلىكتى ازايتۋ سياقتى سالالارداعى ناقتى ىستەر سەلبەستىگىن كەڭەيتىپ، تەرەڭدەتىپ، گۋمانيتارلىق بارىس ـ كەلىس پەن وقۋ ـ اعارتۋ، مادەنيەت سەلبەستىگىن نىعايتىپ، ەكى ەل قارىم ـ قاتىناسىنىڭ ٴتىپتى دە مول تابىستارعا قول جەتكىزۋىن ىلگەرىلەتىپ، وڭتۇستىك افريكانىڭ وسىزاماندانۋدى جۇزەگە اسىرۋىنا دەم بەرۋدى قالايدى. وڭتۇستىك افريكا جاق ٴبىر جۇڭگو ساياساتىن ۇزدىكسىز تاباندىلىقپەن اتقارادى. جۇڭگو _ افريكا سەلبەستىك تالقى مىنبەرى جۇلگەسىندەگى سەلبەستىك وڭتۇستىك افريكانى قامتىعان افريكا ەلدەرىن كوپ يگىلىككە كەنەلتتى. وڭتۇستىك افريكا جۇڭگو جاقتىڭ وسى رەتكى جۇڭگو _ افريكا سەلبەستىك تالقى مىنبەرى بەيجيڭ باسشىلار ٴماجىلىسىن ٴساتتى وتكىزۋىن قولدايدى، افريكا مەن جۇڭگونىڭ ىنتىماعىن كۇشەيتىپ، ٴوزارا باتىل قولداۋ كورسەتىپ، افريكا قۇرلىعى مەن جەر شارىنىڭ وڭتۇستىگىندەگى ەلدەردىڭ بىرگە دامۋىن جەبەيدى. وڭتۇستىك افريكا جۇڭگو مەن برازيليانىڭ ۋكراينا ماسەلەسىن ساياسي جولمەن شەشۋ جونىندە العا قويعان ”6 ٴتۇيىندى ورتاق تانىمىن“ قولدايدى، جۇڭگو جاقتىڭ وڭتۇستىك افريكانىڭ بىلتىر بريكس ەلدەرى باسشىلارىنىڭ ديدارلاسۋىن باس بولىپ وتكىزۋىن قولداعاندىعىنا العىس ايتادى، وڭتۇستىك افريكا جاق جۇڭگو جاقپەن بريكس جانە 20 ەل توبى سياقتى كوپ جاقتى جۇلگەدە بايلانىستى، ىستەستىكتى ۇزدىكسىز جيىلەتۋدى قالايدى.
كەڭەستەن كەيىن ەكى ەلدىڭ مەملەكەت باسشىلارى بەيدوۋ جاساندى سەرىك جول نۇسقاۋ جۇيەسىن قولدانۋ، تۇرعىن ٴۇي قۇرىلىسى، ەكى جاقتى ساۋدا، اۋىل شارۋاشىلىق ونىمدەرىنىڭ بازارعا كىرۋىنە رۇقسات ەتۋ، مادەنيەت مۇرالارى سياقتى كوپتەگەن ەكى جاقتى سەلبەستىك حۇجاتتارىنا قول قويۋعا بىرگە كۋا بولدى.
ەكى جاق «جۇڭحۋا حالىق رەسپۋبليكاسى مەن وڭتۇستىك افريكا رەسپۋبليكاسىنىڭ جاڭا داۋىردەگى جان ـ جاقتى ستراتەگيالىق سەلبەستىك سەرىكتەستىك قارىم ـ قاتىناس ورناتۋ جونىندەگى بىرلەسكەن مالىمدەمەسىن» جاريالادى.
كەڭەستەن بۇرىن شي جينپيڭ حالىق سارايىنىڭ سولتۇستىك زالىندا رامافوسانى قارسى الۋ سالتىن وتكىزدى.
ۋاڭ ي جوعارىداعى قيمىلدارعا قاتىناستى.
