شينحۋا اگەنتتىگىنىڭ 8 ـ ايدىڭ 20 ـ كۇنى بەيجيڭنەن بەرگەن حابارى (ٴتىلشى ۋىن شين). 8 ـ ايدىڭ 20 ـ كۇنى تۇستەن كەيىن مەملەكەت ٴتوراعاسى شي جينپيڭ بەيجيڭ حالىق سارايىندا جۇڭگوعا رەسمي ساپارمەن كەلگەن فيجي زۇڭليى رابۇكامەن كەزدەستى.
شي جينپيڭ فيجي ەرلەر 7 ادامدىق ٴزايتۇن دوپ كومانداسىنىڭ پاريج وليمپيادا سپورت جارىسىندا كۇمىس مەدال العاندىعىن قۇتتىقتادى. شي جينپيڭ بىلاي دەپ اتاپ كورسەتتى: فيجي _ جاڭا جۇڭگومەن ەڭ ەرتە ديپلوماتيالىق قارىم ـ قاتىناس ورناتقان تىنىق مۇحيتتاعى ارال ەلى، كەلەر جىلى _ جۇڭگو مەن فيجيدىڭ ديپلوماتيالىق قارىم ـ قاتىناس ورناتقاندىعىنىڭ 50 جىلدىعى. جارتى عاسىرعا تاياۋ ۋاقىتتان بەرى، ەكى ەل باستان ـ اياق ٴوزارا قولداۋ كورسەتىپ، ٴوزارا كومەكتەسىپ، ۇلكەن ـ كىشى ەلدەردىڭ تەڭ تۇرعىدا مامىلە جاساۋىنىڭ، دوستىق سەلبەستىگىنىڭ تيپتىك ۇلگىسىنە اينالدى. جۇڭگو جاق جۇڭگو _ فيجي قارىم ـ قاتىناسىنا ايرىقشا ٴمان بەرەدى، فيجيدىڭ ەكونوميكالىق، قوعامدىق دامۋىنا قولىنان كەلگەنىنشە ۇزدىكسىز كومەكتەسىپ، فيجي جاقپەن بىرگە ەكى ەل قارىم ـ قاتىناسىنىڭ ۇلكەن بەتالىسىن يگەرىپ، جۇڭگو _ فيجي تاعدىرلاس ورتاق تۇلعاسىن قۇرۋدى ىلگەرىلەتىپ، ەكى ەل حالقىن اناعۇرلىم ويداعىداي باقىتقا كەنەلتۋدى قالايدى.
شي جينپيڭ رابۇكانىڭ يۇننان، فۋجيان، جىجياڭ سىندى 3 جەردە ساپاردا بولۋ جاعدايىمەن جانە اسەرىمەن ۇشتاستىرىپ، جۇڭگونىڭ كەدەيلەردى سۇيەمەلدەۋ، كەدەيلىكتى ازايتۋ جاعىنداعى ادىستەرى مەن تاجىريبەلەرىن تانىستىردى. شي جينپيڭ بىلاي دەپ باسا دارىپتەدى: ٴبىر ميلليارد 400 ميلليوننان استام حالىق جاپپاي دوڭگەلەك داۋلەتتى قوعامعا بىرگە قادام تاستادى، بۇل _ جۇڭگو كوممۋنيستىك پارتياسىنىڭ جۇڭگو حالقىنا باسشىلىق ەتىپ قول جەتكىزگەن تاريحي تابىسى ٴارى جۇڭگونىڭ ادامزاتتىڭ كەدەيلىكتى ازايتۋ جانە دامۋ ىستەرىنە قوسقان تاريحي ۇلەسى. وسى بارىستا ٴبىز ٴاربىر ۇلتتى، ٴاربىر ٴوڭىردى، ٴاربىر ادامدى قاعىس قالدىرماي، سوتسياليستىك ٴتۇزىمنىڭ كۇشتى شوعىرلاندىرا وتىرىپ ۇلكەن ىستەردى ىستەۋ ساياسي ابزالدىلىعىن تولىق ايگىلەپ، بۇكىل جۇڭگوداعى 56 ۇلت حالقىنىڭ شىن جۇرەكتەن قۋاتتاۋى مەن قولداۋىنا يە بولدىق. قازىر جۇڭگو جۇڭگو ۇلگىسىندەگى وسىزامانداندىرۋ ارقىلى مەملەكەتتى قۇدىرەتتەندىرۋ قۇرىلىسىن، ۇلتتى گۇلدەندىرۋ ۇلى ٴىسىن جاپپاي ىلگەرىلەتۋدە، جۇڭگو كوممۋنيستىك پارتياسى 20 ـ كەزەكتى ورتالىق كوميتەتىنىڭ ٴۇشىنشى جالپى ٴماجىلىسى رەفورمانى ونان ارى جاپپاي تەرەڭدەتۋ، جۇڭگو ۇلگىسىندەگى وسىزامانداندىرۋدى ىلگەرىلەتۋ جونىندە ستراتەگيالىق ورنالاستىرۋ جاسادى. جۇڭگو ۇلگىسىندەگى وسىزامانداندىرۋ _ بەيبىت دامۋ جولىمەن جۇرۋگە تاباندى بولاتىن وسىزامانداندىرۋ. جۇڭگو مەن فيجي ەكەۋى دە ”الەمنىڭ وڭتۇستىگىنە“ تاۋەلدى، جۇڭگو جاق فيجي قاتارلى تىنىق مۇحيتتاعى ارال ەلدەرىنىڭ كليمات وزگەرىسىنە توتەپ بەرۋىنە كومەك بەرىپ، دامۋ سەلبەستىگىن كۇشەيتىپ، تىنىق مۇحيتتى بەيبىتشىلىك مۇحيتىنا، دوستىق مۇحيتىنا، سەلبەستىك مۇحيتىنا اينالدىرۋدى قالايدى.
رابۇكا جۇڭگو دەنە تاربيە ۋاكىلدەر ۇيىرمەسىنىڭ پاريج وليمپيادا سپورت جارىسىندا ۇزدىك ناتيجەگە قول جەتكىزگەندىگىن قۇتتىقتادى. رابۇكا مىنالاردى ٴبىلدىردى: مەن 30 جىلدىڭ الدىندا زۇڭلي رەتىندە جۇڭگودا ساپاردا بولعانمىن، وسى رەتكى ساپارىمدا يۇننان، فۋجيان، جىجياڭ سياقتى جەرلەرگە بارىپ ەكسكۋرسيادا، ساپاردا بولىپ، جۇڭگونىڭ ٴتوراعا شي جينپيڭنىڭ باسشىلىعىندا كەدەيلىكتى جويۋ جانە دامۋ جاعىندا قول جەتكىزگەن ۇلى كەرەمەتتەرى مەن وراسان زور تابىستارىنا ٴوز كوزىممەن كۋا بولدىم، بۇعان ەرەكشە ٴسۇيىندىم. مەن جۇڭگو جاقتىڭ وزىق ۇستانىمى مەن تابىستى تاجىريبەلەرىنەن، اسىرەسە، نەگىزگى ساتىعا ىشكەرىلەي ارالاسىپ، حالىقتىڭ ۇنىنە قۇلاق اسۋىنان ۇيرەنۋدى، ۇلگى الۋدى، جۇڭگو جاقپەن كەدەيلىكتى ازايتۋ، نەگىزدىك قۇرىلعى، ۇلاستىرۋ ـ تۇتاستىرۋ سياقتى سالالارداعى سەلبەستىكتى كۇشەيتۋدى ٴۇمىت ەتەمىن. فيجي جاق جۇڭگو جاقتىڭ بەيبىت قاتار تۇرۋدىڭ بەس پرينسيبىنە تاباندى بولعاندىعىن القايدى، ٴتوراعا شي جينپيڭ العا قويعان جەلىلەس الەمدىك باستامالاردى قولدايدى، جۇڭگو جاقپەن ”ٴبىر بەلدەۋ، ٴبىر جولدى“ ۇزدىكسىز بىرگە قۇرىپ، تىنىق مۇحيتتاعى ارال ەلدەرىنىڭ جۇڭگومەن قارىم ـ قاتىناسىنىڭ دامۋىن جەبەپ، تىنىق مۇحيتتى بەيبىتشىلىك مۇحيتىنا اينالدىرۋدى قالايدى. فيجي جاق جۇڭگونىڭ تايۋان ماسەلەسىندەگى تۇرعىسىن بۇكىلدەي تۇسىنەدى، ٴبىر جۇڭگو ساياساتىن ۇزدىكسىز باتىل اتقارادى.
ەكى جاق «جۇڭحۋا حالىق رەسپۋبليكاسى مەن فيجي رەسپۋبليكاسىنىڭ بىرلەسكەن مالىمدەمەسىن» جاريالادى.
ۋاڭ ي كەزدەسۋگە قاتىناستى.
